Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kasemɔ Nii Kɛjɛ Tsɔɔlɔ Kpele Lɛ Ŋɔɔ

 YITSO 39

Nyɔŋmɔ Kai E-Bi Lɛ

Nyɔŋmɔ Kai E-Bi Lɛ

BENI Yesu naanyo Lazaro gbo lɛ, efó. Ani osusuɔ akɛ edɔ Yehowa beni Yesu na amanehulu ni egbo lɛ?— Biblia lɛ kɛɔ akɛ ‘nii’ baanyɛ ‘adɔ’ Nyɔŋmɔ, ni nibii ni yaa nɔ lɛ po baanyɛ aha ‘eye awerɛho.’—Lala 78:40, 41; Yohane 11:35.

Ani obaanyɛ ofee bɔ ni edɔ Yehowa ha beni enaa ní esuɔmɔ Bi lɛ miigbo lɛ he mfoniri yɛ ojwɛŋmɔ mli?— Yesu le jogbaŋŋ akɛ Nyɔŋmɔ hiɛ kpaŋ enɔ. No hewɔ ni dani ebaagbo lɛ, ewie enaagbee wiemɔi nɛɛ akɛ: “Ataa, odɛŋ mituɔ [miwala] miwoɔ nɛɛ” lɛ.—Luka 23:46.

Yesu le jogbaŋŋ akɛ abaatée lɛ shi, ni ákɛ ashiŋ lɛ yɛ ‘hɛl’ loo gbonyobu lɛ mli. Beni atée Yesu shi sɛɛ lɛ, bɔfo Petro tsɛ nɔ ni aŋma yɛ Yesu he yɛ Biblia lɛ mli lɛ sɛɛ akɛ: “Ashiŋ esusuma yɛ gbohiiaje ni eheloo hu enaŋ fitemɔ.” (Bɔfoi lɛ Asaji 2:31; Lala 16:10) Dabi, Yesu gbɔmɔtso lɛ yeee gbii pii ni baaha efite yɛ gbonyobu lɛ mli, ni ji akɛ, ni ekpɔtɔ koni eje fũ.

 Beni Yesu yɔɔ shikpɔŋ nɔ lɛ, ekɛɛ ekaselɔi lɛ po akɛ kɛ́ egbo lɛ etsɛŋ yɛ bu lɛ mli. Etsɔɔ mli eha amɛ akɛ ‘abaagbe lɛ, ni gbi ni ji gbi etɛ lɛ nɔ lɛ ebaate shi.’ (Luka 9:22) No hewɔ lɛ, yɛ anɔkwale mli lɛ, esaaa akɛ Yesu kaselɔi lɛ anaa kpɛɔ amɛhe beni atée lɛ shi lɛ. Shi ani amɛnaa kpɛ amɛhe?— Ha wɔkwɛ.

Beni Tsɔɔlɔ Kpele lɛ gbo yɛ sɛŋmɔtso lɛ nɔ lɛ, no mli lɛ Sohaa shwane ni, ni átswa aaafee ŋmɛji etɛ. Yosef ji Akuashɔŋ lɛ mli niiatsɛ ko ni heɔ Yesu nɔ eyeɔ yɛ teemɔŋ. Beni enu akɛ Yesu egbo lɛ, etee Pilato ni ji Roma nɔyelɔ lɛ ŋɔɔ. Ni ebi kɛji ebaanyɛ ejie Yesu gbonyo lɛ kɛjɛ sɛŋmɔtso lɛ nɔ koni eyafũ lɛ. Sɛɛ mli lɛ, Yosef wó Yesu gbonyo lɛ kɛtee abɔɔ ko ni gbonyobu ko yɔɔ mli ni ji he ni afũɔ gbohii yɛ lɛ mli.

Beni akɛ gbonyo lɛ fɔ̃ gbonyobu lɛ mli sɛɛ lɛ, akokolo tɛ agbo ko akɛfɔ̃ naa. No hewɔ lɛ atsĩ gbonyobu lɛ naa. Agbɛnɛ Hɔgbaa ni ji gbi etɛ lɛ bashɛ. No mli lɛ je tsɛreko, no hewɔ lɛ duŋ ewo lolo. Hii miibu gbonyobu lɛ he. Osɔfonukpai lɛ tsu amɛ koni amɛyabu gbonyobu lɛ he. Ani ole nɔ hewɔ?—

Osɔfoi lɛ hu enu akɛ Yesu kɛɛ abaatée lɛ shi. No hewɔ lɛ, bɔni afee ni ekaselɔi lɛ akabaju gbonyo lɛ ni amɛbakɛɛ akɛ Yesu eté shi hewɔ lɛ, osɔfoi lɛ ha bulɔi yabu gbonyobu lɛ he. Trukaa lɛ, shikpɔŋ bɔi hosomɔ. La ko kpɛ yɛ duŋ lɛ mli. Yehowa ŋwɛibɔfo ko ni! Asraafoi lɛ she gbeyei aahu akɛ amɛnyɛɛɛ amɛjo foi. Bɔfo lɛ tee gbonyobu lɛ naa ni eyatsi tɛ lɛ kɛjɛ gbonyobu lɛ naa. Mɔ ko mɔ ko bɛ gbonyobu lɛ mli!

Mɛni hewɔ mɔ ko bɛ gbonyo bu lɛ mli lɛ? Mɛni eba?

Hɛɛ, etamɔ bɔ pɛ ni bɔfo Petro kɛɛ yɛ sɛɛ mli lɛ akɛ: “Nɛkɛ Yesu nɛɛ Nyɔŋmɔ tée lɛ shi” lɛ. (Bɔfoi lɛ Asaji 2:32) Nyɔŋmɔ tée Yesu shi kɛ gbɔmɔtso ni tamɔ nɔ ni Yesu yɔɔ dani eba shikpɔŋ nɔ lɛ. Akɛ mumɔŋ gbɔmɔtso tée lɛ shi tamɔ ŋwɛibɔfoi lɛ anɔ̃ lɛ. (1 Petro 3:18) No hewɔ lɛ, kɛ́ gbɔmɛi baanyɛ ana Yesu lɛ, no lɛ  esa akɛ efee helooŋ gbɔmɔtso ehã ehe. Ani nakai efee?— Ha wɔkwɛ.

Agbɛnɛ hulu lɛ miite shi. Asraafoi lɛ etee. Maria Magdaleena kɛ yei krokomɛi ni ji Yesu kaselɔi lɛ nyiɛ gbɛ kɛmiiya gbonyobu lɛ naa. Amɛmiibibii amɛhe akɛ: ‘Namɔ baakokolo tɛ lɛ yɛ gbonyobu lɛ naa aha wɔ?’ (Marko 16:3) Shi beni amɛshɛ gbonyobu lɛ naa lɛ, ákokolo tɛ lɛ yɛ gbonyobu lɛ naa momo. Ni mɔ ko mɔ ko bɛ gbonyobu lɛ mli! Yesu adesa gbɔmɔtso ni ekɛgbo lɛ bɛ jɛmɛ! Oya nɔŋŋ ni Maria Magdaleena jo foi koni eyatao Yesu bɔfoi lɛ ekomɛi.

Yei krokomɛi lɛ hi gbonyobu lɛ naa. Amɛsusu akɛ: ‘Nɛgbɛ po Yesu gbonyo lɛ yɔɔ?’ Trukaa lɛ, hii enyɔ ni wo atadei ni miikpɛlɛ pue. Ŋwɛibɔfoi ni! Amɛkɛɛ yei lɛ akɛ: ‘Mɛni hewɔ nyɛtaoɔ Yesu yɛ biɛ? Atée lɛ shi. Nyɛfea oya ni nyɛyakɛa ekaselɔi lɛ.’ Ojogbaŋŋ, obaanyɛ ofee bɔ ni yei lɛ baajo foi oya kɛya lɛ he mfoniri yɛ ojwɛŋmɔ mli okwɛ! Beni amɛyaa yɛ gbɛ lɛ nɔ lɛ, nuu ko kɛ amɛ kpe. Ani ole mɔ ni ji?—

Yesu ni eŋɔ helooŋ gbɔmɔtso lɛ ni! Lɛ hu ekɛɛ yei lɛ akɛ: ‘Nyɛyaa ni nyɛyakɛa mikaselɔi lɛ.’ Yei lɛ ná miishɛɛ. Amɛyana kaselɔi lɛ ni amɛkɛɛ amɛ akɛ: ‘Yesu yɛ wala mli! Wɔna lɛ!’ Maria ekɛɛ Petro kɛ Yohane momo akɛ mɔ ko mɔ ko bɛ gbonyobu lɛ mli. Agbɛnɛ amɛtee jɛmɛ, taakɛ obaanyɛ ona yɛ mfoniri lɛ mli lɛ. Amɛkwɛ klala ni akɛbala Yesu lɛ, shi amɛleee nɔ ni amɛbaakɛɛ. Amɛmiisumɔ ni amɛhe amɛye akɛ Yesu eba wala mli ekoŋŋ, shi eefee amɛ naakpɛɛ waa akɛ enɛ baanyɛ afee anɔkwale.

Mɛni ekolɛ Petro kɛ Yohane susuɔ he?

Sɛɛ mli yɛ nakai Hɔgbaa lɛ mli nɔŋŋ lɛ, Yesu jie ehe kpo etsɔɔ ekaselɔi enyɔ komɛi ni nyiɛ gbɛ kɛmiiya Emao akrowa lɛ mli lɛ. Yesu kɛ amɛ nyiɛ ni ekɛ amɛ gba sane, shi amɛyooo lɛ, ejaakɛ jeee helooŋ gbɔmɔtso ni eyɔɔ be ko ni eho lɛ nɔŋŋ ehiɛ lɛ. Beni Yesu kɛ amɛ baaye nii ni esɔle lɛ, no sɛɛ dani amɛyoo lɛ. Kaselɔi lɛ ná  miishɛɛ aahu akɛ amɛku amɛsɛɛ ni amɛnyiɛ oyayaayai kilomitai babaoo kɛtee Yerusalem! Ekolɛ enɛ sɛɛ be fioo ni Yesu jie ehe kpo etsɔɔ Petro koni ekɛtsɔɔ lɛ akɛ E-yɛ wala mli lɛ.

Kɛkɛ ni sɛɛ mli yɛ nakai Hɔgbaa lɛ gbɛkɛ lɛ, kaselɔi babaoo yabua amɛhe naa yɛ tsũ ko mli. Aŋamɔ shinaai lɛ. Trukaa ni Yesu bafata amɛhe yɛ tsũ lɛ mli! Agbɛnɛ amɛle akɛ Tsɔɔlɔ Kpele lɛ yɛ wala mli ekoŋŋ lɛɛlɛŋ. Susumɔ bɔ ni amɛná miishɛɛ amɛha lɛ he okwɛ!—Mateo 28:1-15; Luka 24:1-49; Yohane 19:38–20:21.

Yesu kɛ gbii 40 jie ehe kpo etsɔɔ ekaselɔi lɛ kɛ helooŋ gbɔmɔtsei srɔtoi koni ekɛtsɔɔ amɛ akɛ eyɛ wala mli. Kɛkɛ ni eshi shikpɔŋ  lɛ nɔ ni etee e-Tsɛ ŋɔɔ yɛ ŋwɛi. (Bɔfoi lɛ Asaji 1:9-11) Etsɛɛɛ tsɔ ni kaselɔi lɛ bɔi mɔ fɛɛ mɔ kɛɛmɔ akɛ Nyɔŋmɔ etée Yesu shi kɛjɛ gbohii ateŋ. Beni osɔfoi lɛ yi amɛ ni amɛha agbe amɛteŋ mɛi komɛi po lɛ, amɛtee nɔ amɛshiɛ. Amɛle akɛ kɛji amɛgboi po lɛ, Nyɔŋmɔ baakai amɛ tamɔ bɔ ni ekai e-Bi lɛ.

Mɛni mɛi babaoo susuɔ he kɛji eshɛ afi lɛ mli be ni atée Yesu shi lɛ? Shi te osusuɔ he tɛŋŋ?

Kwɛ bɔ ni Yesu blema sɛɛnyiɛlɔi lɛ tamɔɔɔ gbɔmɛi babaoo ni yɔɔ ŋmɛnɛ lɛ! Gbɔmɛi nɛɛ susuɔ Easter kpɛŋkpɛlɛi kɛ Easter wuɔwɔji ni hiɛ sui srɔtoi pɛ he yɛ afi lɛ mli gbi ni atée Yesu shi lɛ nɔ. Shi Biblia lɛ ewieee nɔ ko kwraa yɛ Easter kpɛŋkpɛlɛi kɛ wuɔwɔji ahe. Ewieɔ Nyɔŋmɔ sɔɔmɔ he.

Wɔbaanyɛ wɔfee tamɔ Yesu kaselɔi lɛ, kɛ́ wɔkɛɛ mɛi krokomɛi akɛ eji naakpɛɛ nifeemɔ ákɛ Nyɔŋmɔ tée e-Bi lɛ shi lɛ. Esaaa akɛ wɔsheɔ gbeyei kɔkɔɔkɔ, kɛ́ gbɔmɛi kɛɛ amɛbaagbe wɔ po. Kɛ́ eba lɛ akɛ wɔgboi po lɛ, Yehowa baakai wɔ ni ebaatée wɔ shi, tamɔ bɔ ni etée Yesu shi lɛ nɔŋŋ.

Ani wɔnáaa miishɛɛ akɛ Nyɔŋmɔ kaiɔ mɛi ni sɔmɔɔ lɛ lɛ, ni ákɛ ebaatée amɛ shi kɛjɛ gbohii ateŋ po?— Esa akɛ nibii nɛɛ ni wɔle lɛ aha wɔsumɔ akɛ wɔɔle bɔ ni wɔbaafee wɔha Nyɔŋmɔ aná miishɛɛ. Ani ole akɛ wɔbaanyɛ wɔha ená miishɛɛ lɛɛlɛŋ?— Ha wɔgba enɛ he sane agbɛnɛ.

Esa akɛ hemɔkɛyeli ni wɔyɔɔ yɛ Yesu gbohiiashitee lɛ mli lɛ aha wɔhiɛnɔkamɔ lɛ mli awa ni wɔhemɔkɛyeli lɛ aná hewalɛ. Ofainɛ kanemɔ Bɔfoi lɛ Asaji 2:22-36; 4:18-20; kɛ 1 Korintobii 15:3-8, 20-23.