Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kasemɔ Nii Kɛjɛ Tsɔɔlɔ Kpele Lɛ Ŋɔɔ

 YITSO 36

Namɛi Abaatee Amɛ Shi Lɛ? Nɛgbɛ Amɛbaahi?

Namɛi Abaatee Amɛ Shi Lɛ? Nɛgbɛ Amɛbaahi?

MƐI enyiɛ wɔkane amɛhe sane akɛ atee amɛ shi yɛ naagbee yitsei enyɔ lɛ mli lɛ?— Amɛyi enumɔ. Amɛteŋ mɛi enyiɛ ji gbekɛbii?— Amɛyi etɛ. Ni atsɛɔ mɔ ni ji ejwɛ lɛ akɛ oblanyo fioo. Mɛni osusuɔ akɛ enɛ tsɔɔ?—

Ojogbaŋŋ, etsɔɔ akɛ Nyɔŋmɔ sumɔɔ gbekɛbii. Shi ebaatee mɛi krokomɛi babaoo hu shi. Ani Nyɔŋmɔ baatee mɛi ni fee ekpakpa lɛ pɛ ashi?— Wɔbaanyɛ wɔsusu nakai. Kɛ̃lɛ, mɛi pii ekaseee anɔkwale ni kɔɔ Yehowa Nyɔŋmɔ kɛ e-Bi lɛ he lɛ. No hewɔ lɛ, amɛfee nibii fɔji, ejaakɛ atsɔɔ amɛ nibii ni ejaaa. Ani osusuɔ akɛ Yehowa baatee gbɔmɛi ni tamɔ nakai lɛ ashi?—

Biblia lɛ kɛɔ akɛ: “Gbohiiashitee baaba, ni jalɔi kɛ mɛi ni ejaaa fɛɛ baate shi.” (Bɔfoi lɛ Asaji 24:15) Mɛni hewɔ abaatee mɛi ni ejaaa, loo amɛfeee nɔ ni ja lɛ ashi lɛ?— Ejaakɛ amɛnáaa hegbɛ ni amɛkɛkase Yehowa kɛ nɔ ni esumɔɔ ni gbɔmɛi afee lɛ he nii.

Mɛni hewɔ Nyɔŋmɔ baatee mɛi komɛi ni efeee ekpakpa lɛ ashi lɛ?

 Mɛɛ be mli osusuɔ akɛ abaatee mɛi ashi lɛ?— Susumɔ enɛ he kɛya sɛɛ, kɛya beni Lazaro gbo, ni Yesu wo enyɛmi yoo Marta shi akɛ: “Onyɛmi nuu lɛ baate shi” lɛ mli. Marta ha hetoo akɛ: “Mile akɛ ebaate shi yɛ gbohiiashitee lɛ mli yɛ naagbee gbi lɛ nɔ.” (Yohane 11:23, 24) Mɛni Marta tsɔɔ beni ekɛɛ akɛ Lazaro baate shi yɛ “naagbee gbi lɛ nɔ” lɛ?—

Nɛgbɛ Paradeiso ni Yesu wieɔ he etsɔɔ nuu lɛ yɔɔ?

Ojogbaŋŋ, Marta enu Yesu shiwoo akɛ: ‘Mɛi ni yɔɔ kaimɔ gbohiiabui amli lɛ fɛɛ baaje kpo’ lɛ. (Yohane 5:28, 29) No hewɔ lɛ, “naagbee gbi lɛ” ji be ni akɛ mɛi fɛɛ ni yɔɔ Nyɔŋmɔ kaimɔ mli lɛ baaba wala mli ekoŋŋ. Nɛkɛ naagbee gbi nɛɛ jeee ŋmɛlɛtswai 24 gbi. Esɛɛkɛlɛ baafee afii 1,000. Nɛkɛ gbi nɛɛ nɔ Biblia lɛ kɛɔ akɛ, ‘Nyɔŋmɔ baakojo shikpɔŋ lɛ nɔ bii’ lɛ. Mɛi ni átee amɛ shi lɛ baafata mɛi ni ekojoɔ amɛ lɛ ahe.—Bɔfoi lɛ Asaji 17:31; 2 Petro 3:8.

Susumɔ miishɛɛ gbi ni enɛ baafee lɛ he okwɛ! Yɛ nɛkɛ afii 1,000 gbi nɛɛ nɔ lɛ, akɛ mɛi akpekpei abɔ ni egboi jeeŋmɔ lɛ baaba wala mli ekoŋŋ. Yesu tsɛɔ he ni akɛ amɛ baa koni amɛbahi lɛ akɛ Paradeiso. Nyɛhaa wɔkwɛa he ni Paradeiso baahi kɛ bɔ ni jɛmɛ baatamɔ aha.

Beni eshwɛ tamɔ ŋmɛlɛtswai etɛ dani Yesu baagbo yɛ sɛŋmɔtso lɛ nɔ lɛ, ewie Paradeiso he etsɔɔ nuu ko ni asɛŋ lɛ yɛ emasɛi lɛ. Aagbe gbɔmɔ lɛ yɛ awui komɛi ni eye hewɔ. Shi, beni awuiyelɔ nɛɛ kwɛɔ Yesu ni enuɔ nɔ ni awieɔ yɛ E-he lɛ, eje shishi  ehé Yesu nɔ eye. No hewɔ lɛ, awuiyelɔ lɛ kɛɛ akɛ: “Nuŋtsɔ, kaimɔ mi, beni oooba yɛ omaŋtsɛyeli lɛ mli lɛ!” Yesu ha lɛ hetoo akɛ: “Lɛɛlɛŋ, miikɛɛo ŋmɛnɛ akɛ: Okɛ mi aaahi Paradeiso!”—Luka 23:42, 43, NW.

Kɛ́ wɔkane Paradeiso he sane lɛ, mɛɛ mfoniri esa akɛ wɔfee yɛ wɔjwɛŋmɔ mli?

Mɛni Yesu kɛ nɔ ni ekɛɛ nɛɛ tsɔɔ? Nɛgbɛ Paradeiso yɔɔ?— Susumɔ he okwɛ. Shishijee lɛ nɛgbɛ Paradeiso yɔɔ?— Kaimɔ akɛ, Nyɔŋmɔ kɛ paradeiso ha klɛŋklɛŋ nuu Adam, kɛ eŋa lɛ koni amɛhi mli yɛ shikpɔŋ nɛɛ nɔ. Atsɛ́ jɛmɛ gbɛi akɛ Eden trom. Kooloi yɛ nakai trom lɛ mli, shi amɛyeee mɔ ko awui. Ni tsei kɛ amɛnɔ aduawai ni ŋɔɔ waa hu yɛ mli, kɛ faa ko ni da hu. Eji he ko ni hi jogbaŋŋ ni esa akɛ ahi!—1 Mose 2:8-10.

No hewɔ lɛ, beni wɔkase nakai awuiyelɔ lɛ he sane akɛ ebaahi Paradeiso lɛ, esa akɛ wɔfee shikpɔŋ nɛɛ ni etsɔ he ko ni yɔɔ fɛo waa ni abaahi nɔ lɛ he mfoniri yɛ wɔjwɛŋmɔ mli. Ani Yesu kɛ tsutsu awuiyelɔ lɛ baahi Paradeiso yɛ shikpɔŋ nɛɛ nɔ?— Dabi. Ani ole nɔ hewɔ ni ehiŋ biɛ lɛ?—

Ejaakɛ Yesu baahi ŋwɛi, ní eeye Paradeiso shikpɔŋ lɛ nɔ akɛ Maŋtsɛ. No hewɔ lɛ, Yesu kɛ nakai nuu lɛ baahi shi kɛ shishinumɔ akɛ, Yesu baatee lɛ shi kɛjɛ gbohii ateŋ, koni etsu nibii ni he hiaa lɛ lɛ ahe nii. Shi mɛni hewɔ Yesu baaŋmɛ gbɛ koni tsutsu awuiyelɔ ahi Paradeiso?— Nyɛhaa wɔkwɛa akɛ wɔbaana hetoo lɛ lo.

 Dani awuiyelɔ lɛ kɛ Yesu baawie lɛ, no mli lɛ ani ele Nyɔŋmɔ yiŋtoi ahe nii?— Dabi, eleee. Efee nibii fɔji ejaakɛ eleee anɔkwale ni kɔɔ Nyɔŋmɔ he lɛ. Abaatsɔɔ lɛ Nyɔŋmɔ yiŋtoi ahe nii yɛ Paradeiso. Kɛkɛ lɛ, ebaaná hegbɛ ni etsɔɔ akɛ esumɔɔ Nyɔŋmɔ diɛŋtsɛ kɛtsɔ E-suɔmɔnaa nii ni ebaafee lɛ nɔ.

Ani mɔ fɛɛ mɔ ni ateeɔ lɛ shi lɛ baahi Paradeiso yɛ shikpɔŋ nɔ?— Dabi, ebaŋ lɛ nakai. Ani ole nɔ hewɔ ni ebaŋ lɛ nakai lɛ?— Ejaakɛ abaatee mɛi komɛi ashi koni amɛkɛ Yesu ayahi ŋwɛi. Amɛkɛ lɛ baaye Paradeiso shikpɔŋ lɛ nɔ ákɛ maŋtsɛmɛi. Nyɛhaa wɔkwɛa bɔ ni fee ni wɔle enɛ.

Gbɛkɛ, dani Yesu baagbo lɛ, ekɛɛ ebɔfoi lɛ akɛ: ‘Shihilɛhei pii ni abaahi yɛ mi-Tsɛ we lɛ yɛ ŋwɛi, ni miiya koni miyasaa he ko mato nyɛ.’ Kɛkɛ ni Yesu wo amɛ shi akɛ: “Mibaba ekoŋŋ ni mibabaŋɔ nyɛ kɛya he ni mi diɛŋtsɛ miyɔɔ lɛ, koni he ni miyɔɔ lɛ nyɛ hu nyɛhi jɛi.”—Yohane 14:2, 3.

 Nɛgbɛ Yesu tee beni atee lɛ shi lɛ sɛɛ?— Hɛɛ, eku esɛɛ kɛtee ŋwɛi koni ekɛ e-Tsɛ lɛ ayahi shi. (Yohane 17:4, 5) No hewɔ lɛ, Yesu wo ebɔfoi lɛ kɛ esɛɛnyiɛlɔi krokomɛi lɛ ashi akɛ, ebaatee amɛ shi koni amɛnyɛ ni amɛkɛ lɛ ahi ŋwɛi. Mɛni amɛkɛ Yesu baafee yɛ jɛmɛ?— Biblia lɛ kɛɔ akɛ, ekaselɔi lɛ ni ná “klɛŋklɛŋ shitee” lɛ baahi ŋwɛi ni amɛkɛ lɛ baaye shikpɔŋ lɛ nɔ ‘akɛ maŋtsɛmɛi afii akpe.’—Kpojiemɔ 5:10; 20:6; 2 Timoteo 2:12.

Mɛi enyiɛ baaná “klɛŋklɛŋ shitee” lɛ mli gbɛfaŋnɔ ni amɛkɛ Yesu aye nɔ akɛ maŋtsɛmɛi?— Yesu kɛɛ ekaselɔi lɛ akɛ: “Kaashe gbeyei, asafoku bibioo; ejaakɛ nyɛtsɛ lɛ yɛ he tsuijurɔ akɛ eeeŋɔ maŋtsɛyeli lɛ eha nyɛ.” (Luka 12:32, wɔma efã ko nɔ mi.) Nɛkɛ “asafoku bibioo” nɛɛ ni ateeɔ amɛ shi koni amɛkɛ Yesu ahi shi yɛ eŋwɛi Maŋtsɛyeli lɛ mli lɛ ji yibɔ ni shɛɔ pɛpɛɛpɛ diɛŋtsɛ. Biblia lɛ tsɔɔ akɛ ateeɔ mɛi “akpei oha-kɛ-nyɔŋmai-ejwɛ-kɛ-ejwɛ” shi kɛjɛɔ shikpɔŋ nɔ.—Kpojiemɔ 14:1, 3.

Nɛgbɛ mɛi ni atee amɛ shi lɛ baahi, ni mɛni amɛbaafee?

Mɛi enyiɛ baahi shi yɛ Paradeiso yɛ shikpɔŋ nɔ?— Biblia lɛ ewieee. Shi Nyɔŋmɔ ekɛɛ Adam kɛ Hawa beni amɛyɔɔ Eden trom lɛ mli lɛ akɛ amɛfɔ́ bii ni amɛyi shikpɔŋ lɛ nɔ obɔ. Eji anɔkwale akɛ amɛnyɛɛɛ amɛfee nakai. Shi Nyɔŋmɔ baakwɛ koni atsu eyiŋtoo akɛ, aha shikpɔŋ lɛ nɔ ayi obɔ kɛ gbɔmɛi kpakpai lɛ he nii.—1 Mose 1:28; Yesaia 45:18; 55:11.

Bo lɛ susumɔ miishɛɛ ni ebaafee akɛ abaahi shi yɛ Paradeiso lɛ he okwɛ! Shikpɔŋ lɛ fɛɛ baatsɔ tamɔ abɔɔ fɛfɛo ko. Loofɔji kɛ kooloi kɛ tsei kɛ fɔfɔii srɔtoi fɛɛ ni yɔɔ fɛo baayi mli obɔ̃. Mɔ ko mɔ ko náŋ piŋmɔ ko akɛni ehe miiye hewɔ, ni asaŋ ehe ehiaŋ ni mɔ ko agbó. Mɔ fɛɛ mɔ baatsɔ enyɛmi naanyo. Kɛji akɛ wɔmiisumɔ ni wɔhi shi kɛya naanɔ yɛ Paradeiso lɛ, belɛ be ni esa akɛ wɔsaa wɔhe kɛha enɛ lɛ nɛ.

Kanemɔ Nyɔŋmɔ yiŋtoo kɛha shikpɔŋ lɛ he saji babaoo yɛ Abɛi 2:21, 22; Jajelɔ 1:4; Yesaia 2:4; 11:6-9; 35:5, 6; kɛ 65:21-24.