Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kasemɔ Nii Kɛjɛ Tsɔɔlɔ Kpele Lɛ Ŋɔɔ

 YITSO 17

Gbɛ Ni Obaatsɔ Nɔ Oná Miishɛɛ

Gbɛ Ni Obaatsɔ Nɔ Oná Miishɛɛ

Mɛni hewɔ Yehowa ji ‘miishɛɛ Nyɔŋmɔ lɛ’?

WƆ FƐƐ wɔsumɔɔ ni wɔná miishɛɛ, aloo jeee nakai?— Shi jeee gbɔmɛi pii yɔɔ miishɛɛ diɛŋtsɛ. Ani ole nɔ hewɔ?— No ji akɛ, amɛkaseko nɔ ni haa mɔ náa miishɛɛ diɛŋtsɛ lɛ. Amɛsusuɔ akɛ nibii babaoo ni amɛbaaná lɛ ji gbɛ ni atsɔɔ nɔ anáa miishɛɛ. Shi kɛji akɛ amɛná enɛɛmɛi hu lɛ, amɛmiishɛɛ lɛ sɛɛ etsɛɛɛ.

Naa nɔ ni he hiaa titri lɛ. Tsɔɔlɔ Kpele lɛ kɛɛ akɛ: “Nɔ hamɔ mli yɛ miishɛɛ fe hemɔ.” (Bɔfoi lɛ Asaji 20:35, NW) No hewɔ lɛ, mɛni ji gbɛ ni atsɔɔ nɔ anáa miishɛɛ?— Hɛɛ, no ji kɛtsɔ nibii ni wɔkɛaaha mɛi krokomɛi kɛ nii ni wɔɔtsu wɔha amɛ lɛ nɔ. Ani ole nakai?—

Nyɛhaa wɔsusua enɛ he babaoo. Ani Yesu kɛɛ akɛ, mɔ ni enine shɛɔ nikeenii ko nɔ lɛ náŋ miishɛɛ?— Dabi, ekɛɛɛ nakai.  Osumɔɔ ni ake bo nii, aloo jeee nakai?— Mɔ fɛɛ mɔ sumɔɔ nakai. Wɔnáa miishɛɛ kɛji akɛ wɔnine shɛ nibii fɛfɛji anɔ.

Shi Yesu kɛɛ akɛ wɔmii shɛɔ wɔhe waa po kɛji akɛ wɔkɛ nɔ ko ha mɔ ko. No hewɔ lɛ, namɔ osusuɔ akɛ ekɛ nibii pii eha gbɔmɛi fe mɔ fɛɛ mɔ?— Hɛɛ, lɛ ji Yehowa Nyɔŋmɔ.

Biblia lɛ kɛɔ akɛ Nyɔŋmɔ lɛ, “lɛ moŋ edɛŋ wala kɛ mumɔ kɛ nii fɛɛ jɛɔ haa gbɔmɛi fɛɛ.” Ehaa wɔ nugbɔ ni nɛɔ kɛjɛɔ ŋwɛi kɛ hulu hu, koni kwɛ̃ɛnii adara ni wɔná niyenii wɔye. (Bɔfoi lɛ Asaji 14:17; 17:25) Ŋwanejee ko bɛ he akɛ Biblia lɛ tsɛɔ Yehowa akɛ ‘miishɛɛ Nyɔŋmɔ lɛ’! (1 Timoteo 1:11) Nibii ni akɛhaa mɛi krokomɛi lɛ ji nibii ni haa Nyɔŋmɔ náa miishɛɛ lɛ ateŋ ekome. Ni kɛji akɛ wɔke mɛi nii lɛ, ebaaha wɔ hu wɔná miishɛɛ.

Mɛni baanyɛ aha oná miishɛɛ fe nɔ ni okome too oooye daaŋjiemɔ nibii lɛ fɛɛ?

Agbɛnɛ, mɛni yɔɔ ni wɔbaanyɛ wɔkɛke mɛi krokomɛi? Mɛni obaakɛɛ?— Bei komɛi lɛ ebiɔ shika babaoo dani ake nii. Kɛji akɛ eji nikeenii ko ni oyahe yɛ shwapo mli lɛ, esa akɛ owo nyɔmɔ. No hewɔ lɛ, kɛji akɛ oosumɔ ni okɛ nikeenii ni tamɔ nakai ake lɛ, ebaabi ni okɛ shika ato kɛyashi oooná shika ni fa koni okɛhe nikeenii lɛ.

Shi jeee nikeenii fɛɛ esa akɛ ahé yɛ shwapo mli. Ákɛ nɔkwɛmɔnɔ lɛ, kɛ jeŋ dɔ waa gbi ko lɛ, nu glase kome ni mli ejɔ lɛ ŋɔɔ waa. No hewɔ lɛ, kɛ okɛ nakai nikeenii lɛ ha mɔ ko ni kumai miiye lɛ lɛ, obaanyɛ oná miishɛɛ ni jɛɔ nihamɔ mli kɛbaa lɛ eko.

Gbi ko lɛ, okɛ omami baashã keekii. Ebaaŋɔɔ waa. Shi mɛni obaanyɛ ni okɛ nakai keekii lɛ ekomɛi afee ni baaha oná miishɛɛ waa po fe nɔ ni oooye fɛɛ?— Hɛɛ, obaanyɛ ni okɛ ekomɛi ake onanemɛi lɛ ateŋ mɔ ko. Ani obaasumɔ ni ofee nakai be ko?—

 Tsɔɔlɔ Kpele lɛ kɛ ebɔfoi lɛ fɛɛ le miishɛɛ ni yɔɔ nihamɔ mli lɛ. Ani ole nɔ ni amɛkɛha mɛi krokomɛi?— No ji nɔ ni hi fe fɛɛ yɛ je lɛ mli! Amɛle anɔkwale ni kɔɔ Nyɔŋmɔ he lɛ, ni amɛkɛ miishɛɛ gba nɛkɛ sanekpakpa nɛɛ amɛtsɔɔ mɛi krokomɛi. Amɛfee enɛ ni amɛŋmɛɛɛ gbɛ koni mɔ ko aha amɛ shika yɛ nɔ ni amɛkɛha lɛ hewɔ.

Gbi ko lɛ, bɔfo Paulo kɛ enaanyo kpakpa kaselɔ Luka kɛ yoo ko ni lɛ hu eesumɔ ni ená miishɛɛ ni jɛɔ nihamɔ mli baa lɛ eko lɛ kpe. Amɛkɛ lɛ kpe yɛ faa ko naa. Paulo kɛ Luka tee jɛmɛ ejaakɛ amɛnu akɛ eji he ko ni asɔleɔ yɛ. Ni eji anɔkwale akɛ beni amɛyashɛ jɛmɛ lɛ, amɛna yei komɛi ni miisɔle.

Paulo je shishi egba yei nɛɛ Yehowa Nyɔŋmɔ kɛ e-Maŋtsɛyeli lɛ he sanekpakpa lɛ he sane. Amɛteŋ mɔ kome, ni atsɛɔ lɛ Lidia bo toi jogbaŋŋ. Yɛ sɛɛ mli lɛ, Lidia miisumɔ ni efee nɔ ko ni ekɛtsɔɔ akɛ eesumɔ sanekpakpa ni enu lɛ jogbaŋŋ diɛŋtsɛ. No hewɔ lɛ, ewo Paulo kɛ Luka hewalɛ akɛ: “Kɛji nyɛbu mi akɛ mihe Nuŋtsɔ lɛ miye anɔkwale mli lɛ, no lɛ nyɛbaa miwe lɛ, ni nyɛbahia jɛi.” Ni egbá amɛnaa aahu ni amɛkpɛlɛ.—Bɔfoi lɛ Asaji 16:13-15.

Mɛni Lidia kɛɔ Paulo kɛ Luka lɛ?

Lidia ná miishɛɛ akɛ eha nɛkɛ Nyɔŋmɔ tsuji nɛɛ eba eshia. Esumɔ amɛ ejaakɛ amɛye amɛbua lɛ ni ekase Yehowa kɛ Yesu he nii, kɛ bɔ ni gbɔmɛi aaafee ni amɛhi shi kɛya naanɔ. Ená miishɛɛ akɛ enyɛ eha Paulo kɛ Luka niyenii ni amɛye kɛ he ko ni amɛbaajɔɔ amɛhe yɛ.

No hewɔ lɛ, Lidia nihamɔ lɛ ha ená miishɛɛ, ejaakɛ eesumɔ waa koni ekɛ nii aha. No ji nɔ ko ni esa akɛ wɔkai. Mɔ ko baakɛɛ wɔ akɛ, esa akɛ wɔke nɔ ko. Shi kɛji akɛ wɔsumɔɔɔ ni wɔfee nakai diɛŋtsɛ lɛ, nihamɔ lɛ haŋ wɔná miishɛɛ.

Mɛni hewɔ Lidia ná miishɛɛ yɛ nii ni efee eha Paulo kɛ Luka lɛ hewɔ?

Ákɛ nɔkwɛmɔnɔ lɛ, kɛji akɛ ekolɛ oyɛ siklitɛi komɛi ni obaasumɔ ni oye hu? Kɛji akɛ mikɛɛ bo akɛ esa akɛ okɛ eko aha gbekɛ ko lɛ, ani obaaná he miishɛɛ akɛ okɛ eko aaake?— Shi kɛ́ oyɛ siklitɛi komɛi, ni okɛ onaanyo ko ni osumɔɔ esane waa kpe hu? Kɛji akɛ bo  diɛŋtsɛ osusu he akɛ okɛ eko baake onaanyo lɛ, ani enɛ haŋ oná miishɛɛ?—

Yɛ bei komɛi amli lɛ wɔsumɔɔ mɔ ko aahu akɛ wɔsumɔɔ ni wɔkɛ nɔ fɛɛ nɔ aha lɛ ni wɔshiii nɔ ko po wɔhaaa wɔhe. Nakai ji bɔ ni esa akɛ wɔnu he wɔha yɛ Nyɔŋmɔ he yɛ be mli ni wɔdaraa yɛ suɔmɔ ni wɔyɔɔ kɛha Lɛ lɛ mli lɛ.

Mɛni hewɔ yoo ohiafo nɛɛ ná miishɛɛ yɛ nɔ fɛɛ nɔ ni eyɔɔ ni ekɛha hewɔ lɛ?

Tsɔɔlɔ Kpele lɛ le yoo ohiafo ko ni nu he nakai. Ena lɛ yɛ Yerusalem sɔlemɔwe lɛ. Eyɛ shika bibii enyɔ pɛ; no pɛ eyɔɔ. Shi ekɛ enyɔ lɛ fɛɛ wo adeka lɛ mli akɛ onia ni etsu, loo nikeenii kɛha sɔlemɔwe lɛ. Mɔ ko mɔ ko enyɛɛɛ enɔ koni efee nakai. Gbɔmɛi ni yɔɔ jɛmɛ lɛ ateŋ mɛi pii po leee nɔ ni efee lɛ. Efee nakai ejaakɛ eesumɔ ni efee, ejaakɛ esumɔɔ Yehowa jogbaŋŋ diɛŋtsɛ. Nii ni enyɛ eha lɛ ha ená miishɛɛ.—Luka 21:1-4.

Gbɛ̀i pii yɛ ni wɔbaanyɛ wɔtsɔ nɔ wɔkɛ nɔ ko aha. Ani obaanyɛ otsĩ ekomɛi atã?— Kɛji akɛ wɔke nii akɛni wɔmiisumɔ diɛŋtsɛ ni wɔfee nakai hewɔ lɛ, wɔbaaná miishɛɛ. No hewɔ ni Tsɔɔlɔ Kpele lɛ kɛɔ wɔ akɛ: ‘Nyɛkasea nihamɔ lɛ.’ (Luka 6:38) Kɛ́ wɔfee nakai lɛ, wɔbaaha mɛi krokomɛi aná miishɛɛ. Ni wɔbaafee mɛi ni yɔɔ miishɛɛ fe mɔ fɛɛ mɔ!

Nyɛhaa wɔkanea bɔ ni nihamɔ kɛ miishɛɛ baa lɛ he sane babaoo yɛ Mateo 6:1-4; Luka 14:12-14; kɛ 2 Korintobii 9:7.