Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kasemɔ Nii Kɛjɛ Tsɔɔlɔ Kpele Lɛ Ŋɔɔ

 YITSO 23

Nɔ Hewɔ Ni Gbɔmɛi Ahe Yeɔ

Nɔ Hewɔ Ni Gbɔmɛi Ahe Yeɔ

ANI ole mɔ ko ni he miiye?— Ekolɛ bo diɛŋtsɛ lɛ ohe yeɔ yɛ bei komɛi amli. Ekolɛ tsitsi baamɔ bo, aloo omusu baakɔ̃ bo. Mɛi komɛi ahe miiye waa. Amɛnyɛɛɛ ni amɛkome amɛdamɔ shi po akɛ ja mɔ ko wa amɛ. Bei pii lɛ ebaa lɛ nakai kɛ́ gbɔmɛi gbɔlɔ waa.

Mɔ fɛɛ mɔ he yeɔ yɛ bei komɛi amli. Ani ole nɔ hewɔ ni gbɔmɛi ahe yeɔ, amɛgbɔlɔɔ, ni amɛgboiɔ lɛ?— Gbi ko lɛ, akɛ nuu ko ni nyɛɛɛ anyiɛ ba Yesu ŋɔɔ, ni Yesu tsɔɔ nɔ hewɔ ni gbɔmɛi ahe yeɔ ni amɛgboiɔ lɛ. Ha magba bo enɛ he sane.

Yesu yɛ shia ko mli yɛ maŋ ko ni bɛŋkɛ Galilea Ŋshɔ lɛ naa lɛ mli. Gbɔmɛi asafo babaoo ba eŋɔɔ. Akɛni mɛi pii ba hewɔ lɛ, gbɛ ko kwraa bɛ ni mɛi krokomɛi baanyɛ atsɔ nɔ amɛbote shia lɛ mli. Mɔ ko mɔ ko nyɛɛɛ abɛŋkɛ shinaa lɛ naa po. Kɛlɛ mɛi pii miiba lolo! Gbɔmɛi akuu ko kɛ nuu ko ni ekumɔ ni nyɛɛɛ anyiɛ po ba. Ehe bahia ni mɛi ejwɛ kɛ lɛ aŋmɛ saatso bibioo ko nɔ koni amɛtere lɛ.

Ani ole nɔ hewɔ ni amɛsumɔɔ ni amɛkɛ nuu ni he yeɔ nɛɛ aba Yesu ŋɔɔ lɛ?— Amɛyɛ hemɔkɛyeli akɛ Yesu baanyɛ aye abua lɛ. Amɛhe amɛye akɛ Yesu baanyɛ atsá nakai hela lɛ aha lɛ. Ani ole bɔ ni fee ni amɛkɛ nakai nuu ni ekumɔ lɛ tee Yesu ŋɔɔ yɛ mɛi pii ni yɔɔ shia lɛ mli lɛ fɛɛ sɛɛ?—

Ojogbaŋŋ, mfoniri ni onaa yɛ biɛ lɛ tsɔɔ gbɛ ni amɛtsɔ nɔ amɛfee nakai. Klɛŋklɛŋ lɛ, amɛtere nuu lɛ ni amɛkwɔ kɛtee tsũ lɛ yiteŋ. Eyiteŋ yɛ tɛtrɛɛ. Kɛkɛ ni amɛgbu fɔlɔ agbo ko yɛ tsũ lɛ yiteŋ.  Naagbee lɛ, amɛŋmɛɛ nuu lɛ he fiofio yɛ esaatso lɛ nɔ kɛtsɔ fɔlɔ lɛ mli kɛtee tsũ lɛ mli. Mɛɛ hemɔkɛyeli po amɛná nɛkɛ!

Mɛi ni yɔɔ shia lɛ mli lɛ fɛɛ anaa kpɛ amɛhe beni amɛna nɔ ni yaa nɔ lɛ. Nuu ni ekumɔ ni kã saatso bibioo lɛ nɔ lɛ bapue yɛ amɛteŋ. Ani Yesu mli fu beni ena nɔ ni gbɔmɛi lɛ fee lɛ?— Dabi kwraa! Eŋɔɔ enaa akɛ amɛyɛ hemɔkɛyeli. Ekɛɛ nuu ni ekumɔ lɛ akɛ: ‘Áŋɔ ohe eshai lɛ afa bo.’

Mɛni Yesu kɛɛ nuu ni ekumɔ lɛ akɛ efee?

Gbɔmɛi lɛ ateŋ mɛi komɛi susu akɛ ejaaa akɛ Yesu aaakɛɛ nakai. Amɛheee amɛyeee akɛ ebaanyɛ ekɛ eshai afa. No hewɔ lɛ, bɔni afee ni Yesu atsɔɔ akɛ ebaanyɛ ekɛ eshai afa diɛŋtsɛ lɛ, ekɛɛ nuu lɛ akɛ: “Tee shi, wo osaa lɛ ni oya owe!”

 Beni Yesu kɛɛ nakai lɛ, atsá nuu lɛ! Ejeee mɔ ni ekumɔ dɔŋŋ. Agbɛnɛ, lɛ diɛŋtsɛ enyɛ ete shi edamɔ shi ni enyiɛ ni mɔ ko ehiɛɛɛ emli. Mɛi ni na enɛ lɛ anaa kpɛ amɛhe. Amɛnako nɔ ko ni yɔɔ naakpɛɛ ni tamɔ nɛkɛ pɛŋ yɛ amɛwala shihilɛ bei fɛɛ mli! Amɛjie Yehowa yi akɛ ekɛ Tsɔɔlɔ Kpele ni tamɔ nɛkɛ, ni baanyɛ atsá gbɔmɛi ahelai po eha amɛ lɛ eha amɛ.—Marko 2:1-12.

Mɛni wɔkaseɔ kɛjɛɔ naakpɛɛ nii nɛɛ mli?

Mɛni wɔkaseɔ kɛjɛɔ naakpɛɛ nii nɛɛ mli?— Wɔkaseɔ akɛ Yesu yɛ hewalɛ ni ekɛ eshai faa, ni ehaa mɛi ni he yeɔ lɛ náa hewalɛ ekoŋŋ. Shi wɔkaseɔ nɔ kroko hu, nɔ ko ni he hiaa waa. Wɔkaseɔ akɛ gbɔmɛi ahe yeɔ yɛ esha hewɔ.

Akɛni wɔ fɛɛ wɔhe yeɔ yɛ bei komɛi amli hewɔ lɛ, ani enɛ tsɔɔ akɛ eshafeelɔi ji wɔ fɛɛ?— Hɛɛ, Biblia lɛ kɛɔ akɛ, akɛ esha fɔ́ wɔ fɛɛ. Ani ole nɔ ni esha ni akɛfɔɔ mɔ lɛ tsɔɔ?— Etsɔɔ akɛ afɔ́ wɔ akɛ mɛi ni yeee emuu. Yɛ bei komɛi amli lɛ wɔfeɔ nibii ni ejaaa, eyɛ mli moŋ akɛ wɔsumɔɔɔ ni wɔfeɔ nakai. Ani ole bɔ ni fee ni wɔ fɛɛ wɔbaná esha?—

Afɔ́ wɔ yɛ esha mli ejaakɛ klɛŋklɛŋ nuu ni ji Adam lɛ booo Nyɔŋmɔ toi. Efee esha beni eku Nyɔŋmɔ mla mli lɛ. Ni wɔ fɛɛ wɔná esha kɛjɛ Adam ŋɔɔ. Ani ole bɔ ni fee ni wɔná esha ni wɔyɔɔ lɛ kɛjɛ emli lɛ? Ha mabɔ mɔdɛŋ matsɔɔ mli yɛ gbɛ ni obaanyɛ onu shishi nɔ.

Te fee tɛŋŋ ni wɔ fɛɛ wɔbaná esha?

Ekolɛ óna bɔ ni ashãa bodobodo yɛ tsɛŋsi mli pɛŋ. Mɛni baaba bodobodo lɛ he kɛji tsɛŋsi lɛ he eboda? Ani ole?— Nakai kadimɔ  nii loo bodamɔ lɛ baaje kpo yɛ bodobodoi fɛɛ ni abaashã yɛ nakai tsɛŋsi lɛ mli lɛ ahe, aloo jeee nakai?—

Adam tamɔ nakai tsɛŋsi lɛ, ni wɔtamɔ bodobodo lɛ. Ebatsɔ mɔ ni yeee emuu beni eku Nyɔŋmɔ mla mli lɛ. Etamɔ nɔ ni ehe eboda, aloo eyeee emuu. No hewɔ lɛ, beni efɔ́ bii lɛ, te amɛbaatamɔ amɛha tɛŋŋ?— Ebii lɛ fɛɛ baaná nɛkɛ emuu ni ayeee kadimɔ nii nɛɛ eko.

Gbekɛbii pii yɛ ni afɔɔɔ amɛ kɛ kpá wulu ko ni obaana faŋŋ. Amɛnine loo amɛnane efoko. Shi emuu ni amɛyeee lɛ ji hiɛdɔɔ sane waa akɛ ehaa amɛhe yeɔ, ni yɛ be ko sɛɛ lɛ amɛgboiɔ.

Shi taakɛ wɔle lɛ, mɛi komɛi ahe fɔɔ yeli fe mɛi krokomɛi. Mɛni hewɔ ebaa lɛ nakai? Ani akɛ esha babaoo fɔ amɛ hewɔ?— Dabi, esha kome lɛ nɔŋŋ falɛ akɛfɔ́ɔ mɔ fɛɛ mɔ. Afɔ́ wɔ fɛɛ akɛ mɛi ni yeee emuu. No hewɔ lɛ, yɛ naagbee lɛ, hela ko baanyɛ amɔ mɔ fɛɛ mɔ. Gbɔmɛi ni bɔɔ mɔdɛŋ akɛ amɛbaaye Nyɔŋmɔ mlai lɛ fɛɛ nɔ, ni amɛfeee nɔ fɔŋ ko kwraa lɛ po ahe baanyɛ aye.

Mɛɛ gbɔmɔtsoŋ hewalɛ nɛkɛ wɔbaaná beni ajie wɔhe eshai kɛtee lɛ?

Belɛ, mɛni hewɔ mɔ ni mɛi komɛi ahe fɔɔ yeli fe mɛi krokomɛi lɛ?— Nibii pii haa ebaa lɛ nakai. Ekolɛ ebaanyɛ ebalɛ akɛ amɛbɛ niyenii ni fa ni amɛaaye. Aloo ekolɛ amɛyeee niyenii kpakpa. Ekolɛ amɛyeɔ keekii kɛ siklitɛi pii tsɔ. Yiŋtoo kroko hu ji akɛ, ekolɛ amɛwɔɔɔ mra, no hewɔ lɛ amɛwɔ shɛɛɛ amɛnaa. Aloo ekolɛ amɛwooo atadei ni sa yɛ fɛibe mli. Mɛi komɛi hu bɛ gbɔmɔtsoŋ hewalɛ kwraa, ni amɛnyɛɛɛ amɛdamɔ hela naa kɛji akɛ amɛkwɛ amɛhe nɔ jogbaŋŋ po.

 Ani be baashɛ ni wɔhe yeŋ? Ani wɔbaaye wɔhe kɛjɛ esha dɛŋ gbi ko?— Ojogbaŋŋ, mɛni Yesu fee kɛha nuu ni ekumɔ lɛ?— Yesu kɛ ehe eshai ke lɛ ni etsá lɛ. Yesu tsɔ nɛkɛ gbɛ nɔ etsɔɔ nɔ ni gbi ko lɛ ebaafee eha mɛi fɛɛ ni bɔɔ mɔdɛŋ waa ni amɛfee nɔ ni ja lɛ.

Kɛji akɛ wɔtsɔɔ akɛ wɔsumɔɔɔ ni wɔfee esha, ni ákɛ wɔsumɔɔɔ nii ni ejaaa lɛ, Yesu baatsá wɔhelai lɛ. Ebaajie emuu ni wɔyeee ni yɔɔ wɔhe bianɛ lɛ kɛya wɔsɛɛ ko. Ebaafee enɛ akɛ Nyɔŋmɔ Maŋtsɛyeli lɛ nɔ Maŋtsɛ. Ajieŋ eshai fɛɛ kɛjɛŋ wɔhe trukaa. Abaajie kɛya yɛ be mli ni be shwieɔ mli lɛ. Kɛkɛ lɛ, beni wɔhe eshai lɛ etã kwraa lɛ, wɔhe yeŋ dɔŋŋ. Wɔ fɛɛ wɔbaaná gbɔmɔtsoŋ hewalɛ kpakpa. Mɛɛ miishɛɛ po enɛ aaaji nɛkɛ!

Kɛha susumɔi babaoo ni kɔɔ bɔ ni esha baa wɔ fɛɛ wɔnɔ lɛ he lɛ, kanemɔ Hiob 14:4; Lala 51:7; Romabii 3:23; 5:12; kɛ 6:23.

Ekrokomɛi Hu Nɛ

Mi-Wolo ni Gbaa Biblia Mli Saji

Biblia Mli Sane 96: Yesu Tsa Helatsɛmɛi

YESU​—GBƐ LƐ, ANƆKWALE LƐ, WALA LƐ

“Aŋɔ Ohe Eshai lɛ Afa Bo”

Mɛɛ tsakpaa Yesu tsɔɔ akɛ eyɔɔ esha kɛ hela teŋ?