Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kasemɔ Nii Kɛjɛ Tsɔɔlɔ Kpele Lɛ Ŋɔɔ

 YITSO 5

‘Mibinuu Lɛ Nɛ’

‘Mibinuu Lɛ Nɛ’

KƐJI akɛ gbekɛbii fee nibii kpakpai lɛ, eŋɔɔ mɛi ni kwɛɔ amɛnɔ lɛ anaa. Kɛji akɛ gbekɛ yoo ko fee nɔ ko jogbaŋŋ lɛ, etsɛ náa miishɛɛ akɛ eeekɛɛ mɛi krokomɛi akɛ: “Mibiyoo lɛ nɛ.” Aloo kɛji akɛ gbekɛ nuu fee nibii kpakpai lɛ, tsɛ lɛ kɛ miishɛɛ kɛɔ akɛ: “Mibinuu lɛ nɛ.”

Yesu feɔ nɔ ni saa e-Tsɛ lɛ hiɛ be fɛɛ be. No hewɔ lɛ, e-Tsɛ lɛ nyaa ehe. Ani okaiɔ nɔ ni Yesu Tsɛ lɛ fee gbi ko beni Yesu kɛ esɛɛnyiɛlɔi lɛ ateŋ mɛi etɛ yɔɔ lɛ?— Hɛɛ, Nyɔŋmɔ jɛ ŋwɛi tɔ̃ɔ ewie ni ekɛɛ amɛ akɛ: “Mɔnɛ ji misuɔmɔ bi ní mináa ehe tsui lɛ.”—Mateo 17:5.

Yesu yɛ miishɛɛ be fɛɛ be akɛ eeefee nɔ ni sa e-Tsɛ lɛ hiɛ. Ani ole nɔ hewɔ? Ejaakɛ esumɔɔ e-Tsɛ lɛ diɛŋtsɛ. Kɛji akɛ mɔ ko fee nɔ ko akɛni aanyɛ enɔ ni efee kɛkɛ hewɔ lɛ, nakai nibii lɛ afeemɔ feɔ nɔ ni wa. Shi kɛji akɛ eyɛ he suɔmɔ lɛ, ewaaa. Ani ole nɔ ni suɔmɔ mli ni ajɛɔ afeɔ nii lɛ tsɔɔ?— Etsɔɔ akɛ oosumɔ ni ofee nɔ ko diɛŋtsɛ.

Dani Yesu aaaba shikpɔŋ nɔ po lɛ, no mli lɛ eesumɔ ni efee nɔ fɛɛ nɔ ni e-Tsɛ lɛ kɛɔ lɛ akɛ efee. Ejaakɛ esumɔɔ e-Tsɛ, Yehowa Nyɔŋmɔ. Yesu kɛ e-Tsɛ lɛ yɛ gbɛhe ko ni yɔɔ naakpɛɛ waa mli yɛ ŋwɛi. Shi, Nyɔŋmɔ yɛ nitsumɔ krɛdɛɛ ko kɛha Yesu ni ebaatsu. Esa akɛ Yesu ashĩ ŋwɛi dani enyɛ etsu nakai nitsumɔ lɛ. Esa akɛ afɔ lɛ akɛ abifao yɛ shikpɔŋ nɔ. Yesu miisumɔ ni efee enɛ ejaakɛ Yehowa miisumɔ ni efee nakai.

Mɛni ŋwɛibɔfo Gabriel kɛɛ Maria?

Bɔni afee ni afɔ Yesu akɛ abifao yɛ shikpɔŋ nɔ lɛ, esa akɛ ená nyɛ. Ani ole mɔ ni ji emami?— Egbɛi ji Maria. Yehowa tsu ebɔfo  Gabriel kɛjɛ ŋwɛi koni ekɛ Maria abawie. Gabriel kɛɛ lɛ akɛ ebaafɔ binuu. Abaatsɛ abifao lɛ gbɛi akɛ Yesu. Ni namɔ baafee abifao lɛ tsɛ?— Ŋwɛibɔfo lɛ kɛɛ akɛ abifao lɛ Tsɛ baafee Yehowa Nyɔŋmɔ. No hewɔ ni abaatsɛ Yesu akɛ Nyɔŋmɔ Bi lɛ.

Te osusuɔ akɛ Maria nu enɛ he eha tɛŋŋ?— Ani ekɛɛ akɛ, “misumɔɔɔ ni matsɔ Yesu mami”? Dabi, Maria esaa ehe akɛ ebaafee nɔ ni Nyɔŋmɔ taoɔ. Shi te aaafee tɛŋŋ afɔ Nyɔŋmɔ Bi ni yɔɔ ŋwɛi lɛ akɛ fufɔoo yɛ shikpɔŋ nɔ hu? Yɛ mɛɛ gbɛ nɔ Yesu fɔmɔ lɛ yɔɔ srɔto yɛ gbekɛbii krokomɛi fɛɛ anɔ̃ he? Ani ole?—

Ojogbaŋŋ, Nyɔŋmɔ bɔ wɔ klɛŋklɛŋ fɔlɔi, Adam kɛ Hawa, koni amɛnyɛ amɛfee ekome yɛ gbɛ ni yɔɔ naakpɛɛ nɔ. Yɛ sɛɛ mli lɛ, gbekɛ abifao baanyɛ ada yɛ emami musuŋ. Mɛi kɛɔ akɛ naakpɛɛ nii nɛ! Miheɔ miyeɔ akɛ okpɛlɛɔ nɔ nakai.

Agbɛnɛ Nyɔŋmɔ fee nɔ ko ni yɔɔ naakpɛɛ waa po fe nakai. Ejie e-Bi lɛ wala kɛjɛ ŋwɛi ni ekɛwo Maria musuŋ. Nyɔŋmɔ efeko nakai dã, ni kɛjɛ no sɛɛ kɛbaa nɛɛ efeko nakai dɔŋŋ. Yɛ naakpɛɛ nii nɛɛ hewɔ lɛ, Yesu je shishi eda yɛ Maria musuŋ tamɔ bɔ ni gbekɛbii krokomɛi fɛɛ daraa yɛ amɛmamimɛi amusuŋ lɛ. Yɛ no sɛɛ lɛ, Yosef kɛ Maria hi shi.

Beni be ni abaafɔ Yesu shɛ lɛ, no mli lɛ Maria kɛ Yosef etee Betlehem maŋ lɛ mli amɛyaasara jɛmɛ. Shi mɛi babaoo eyi maŋ lɛ mli  obɔ̃. Tsũ ko kwraa bɛ kɛha Maria kɛ Yosef, no hewɔ lɛ, amɛyahi he ko ni kooloi wɔɔ. Jɛmɛ Maria fɔ Yesu yɛ, ni akɛ lɛ fɔ̃ kooloi aniyenii anɔ̃ mli, taakɛ obaanyɛ ona yɛ biɛ lɛ. Kooloi aniyenii anɔ̃ ji nɔ ni akɛ niyenii woɔ mli ahaa tsinai kɛ kooloi krokomɛi koni amɛye.

Mɛni hewɔ akɛ Yesu fɔ̃ɔ kooloi aniyenii anɔ̃ mli lɛ?

Nibii ni hɛleɔ mɔ shi ba yɛ gbi gbɛkɛ ni afɔ Yesu lɛ nɔ. Ŋwɛibɔfo ko jie ehe kpo etsɔɔ tookwɛlɔi komɛi yɛ he ko ni bɛŋkɛ Betlehem. Ekɛɛ amɛ akɛ Yesu ji gbɔmɔ ni he hiaa. Ŋwɛibɔfo lɛ kɛɛ akɛ: ‘Naa! Miigba nyɛ sanekpakpa ni baaha gbɔmɛi aná miishɛɛ. Ŋmɛnɛ, afɔ mɔ ko ni baahere gbɔmɛi ayiwala.’—Luka 2:10, 11.

Mɛɛ sanekpakpa ŋwɛibɔfoi nɛɛ ateŋ mɔ kome kɛɛ tookwɛlɔi lɛ?

Ŋwɛibɔfo lɛ kɛɛ tookwɛlɔi lɛ akɛ amɛbaanyɛ amɛna Yesu yɛ Betlehem, ni ekã kooloi aniyenii anɔ̃ ko mli. Kɛkɛ ni trukaa lɛ ŋwɛibɔfoi krokomɛi ni yɔɔ ŋwɛi lɛ bafata klɛŋklɛŋ bɔfo lɛ he ni  amɛjie Nyɔŋmɔ yi. Ŋwɛibɔfoi lɛ la akɛ: “Anunyam aha Nyɔŋmɔ . . . , ni hejɔlɛ aba shikpɔŋ lɛ nɔ, ní aná gbɔmɛi ahe tsuijurɔ!”—Luka 2:12-14.

Beni ŋwɛibɔfoi lɛ tee lɛ, tookwɛlɔi lɛ tee Betlehem ni amɛyana Yesu. Ni amɛkɛɛ Yosef kɛ Maria nibii kpakpai fɛɛ ni amɛnu lɛ. Ani obaanyɛ osusu bɔ ni Maria ná miishɛɛ eha akɛ esumɔ akɛ eeetsɔ Yesu mami lɛ he?

Sɛɛ mli lɛ, Yosef kɛ Maria ŋɔ Yesu kɛtee Nazaret maŋ lɛ mli. Jɛmɛ Yesu da yɛ. Beni etsɔ onukpa lɛ, eje enitsɔɔmɔ nitsumɔ kpele lɛ shishi. Enɛ ji nitsumɔ ni Yehowa Nyɔŋmɔ sumɔɔ ni e-Bi lɛ atsu yɛ shikpɔŋ nɔ lɛ fã ko.  Yesu miisumɔ ni etsu nakai nitsumɔ lɛ, ejaakɛ Yesu sumɔɔ eŋwɛi Tsɛ lɛ waa diɛŋtsɛ.

Dani Yesu aaaje enitsumɔ lɛ shishi ákɛ Tsɔɔlɔ Kpele lɛ, Yohane Baptisilɔ lɛ baptisi lɛ yɛ Yordan Faa lɛ mli. Kɛkɛ ni nɔ ko ni yɔɔ naakpɛɛ ba! Beni Yesu jeɔ kpo kɛjɛɔ nu lɛ mli lɛ, Yehowa wie kɛjɛ ŋwɛi akɛ: “Mɔnɛ ji misuɔmɔ bi ní mináa ehe tsui lɛ.” (Mateo 3:17) Ani onáaa miishɛɛ kɛji akɛ ofɔlɔi kɛɛ bo akɛ amɛsumɔɔ osane?— Wɔyɛ nɔmimaa akɛ Yesu hu ná miishɛɛ.

Yesu fee nɔ ni ja be fɛɛ be. Efeee osato. Ekɛɛɛ mɛi akɛ Nyɔŋmɔ ji lɛ. Ŋwɛibɔfo Gabriel ekɛɛ Maria akɛ abaatsɛ Yesu akɛ Nyɔŋmɔ Bi. Yesu diɛŋtsɛ kɛɛ akɛ Nyɔŋmɔ Bi ji lɛ. Ni ekɛɛɛ mɛi akɛ ele nii waa fe e-Tsɛ lɛ. Ekɛɛ akɛ: “Mitsɛ da fe mi.”—Yohane 14:28.

Beni Yesu Tsɛ lɛ ha Yesu nitsumɔ yɛ ŋwɛi po lɛ, etsu enɛ. Ekɛɛɛ akɛ ebaafee, kɛkɛ lɛ éyafee nɔ kroko. Esumɔɔ e-Tsɛ lɛ. No hewɔ lɛ, ebo nɔ ni e-Tsɛ lɛ kɛɛ lɛ toi. Ni beni Yesu ba shikpɔŋ nɔ lɛ, etsu nɔ ni eŋwɛi Tsɛ lɛ tsu lɛ akɛ ebafee lɛ. Efiteee ebe ekɛfeee nɔ kroko. Eyɛ faŋŋ akɛ no hewɔ ni Yehowa sumɔɔ e-Bi lɛ sane waa nakai lɛ!

Wɔ hu wɔmiisumɔ ni wɔsa Yehowa hiɛ, aloo jeee nakai?— Belɛ esa akɛ wɔ hu wɔtsɔɔ akɛ wɔboɔ Nyɔŋmɔ toi diɛŋtsɛ, tamɔ bɔ ni Yesu fee lɛ. Nyɔŋmɔ tsɔɔ Biblia lɛ nɔ ekɛ wɔ wieɔ. Efeŋ nɔ ni sa akɛ wɔɔkwa wɔfee tamɔ wɔmiibo Nyɔŋmɔ toi, kɛkɛ lɛ yɛ no sɛɛ lɛ wɔhe nibii krokomɛi wɔye ni wɔfee nibii ni teɔ shi woɔ Biblia lɛ, ani ebaafee nɔ ni sa?— Ni kaimɔ akɛ, kɛji akɛ wɔsumɔɔ Yehowa lɛɛlɛŋ lɛ, wɔbaaná miishɛɛ akɛ wɔɔfee nɔ ni sa ehiɛ.

Agbɛnɛ kanemɔ nɛkɛ Biblia mli ŋmalɛi krokomɛi ni tsɔɔ nɔ ni ehe hiaa ni wɔle ni wɔhé wɔye yɛ Yesu he lɛ: Mateo 7:21-23; Yohane 4:25, 26; kɛ 1 Timoteo 2:5, 6.