Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kasemɔ Nii Kɛjɛ Tsɔɔlɔ Kpele Lɛ Ŋɔɔ

 YITSO 26

Nɔ Hewɔ Ni Ewa Akɛ Aaafee Ekpakpa

Nɔ Hewɔ Ni Ewa Akɛ Aaafee Ekpakpa

BENI Saulo fee nibii fɔji lɛ, namɔ ná miishɛɛ?— Satan Abonsam ná miishɛɛ. Shi Yudafoi ajamɔ mli hiɛnyiɛlɔi lɛ hu ná miishɛɛ. Kɛkɛ ni beni Saulo batsɔ Tsɔɔlɔ Kpele lɛ kaselɔ, ní abatsɛ egbɛi akɛ Paulo lɛ, nakai jamɔ mli hiɛnyiɛlɔi lɛ je shishi amɛnyɛ̃ lɛ. No hewɔ lɛ, ani obaanyɛ onu nɔ hewɔ ni ewa kɛha Yesu kaselɔ akɛ eeefee ekpakpa lɛ shishi?—

Mɛɛ amanehulu Paulo na beni efee ekpakpa lɛ?

Be ko lɛ osɔfonukpa ni atsɛɔ lɛ Anania lɛ fã koni agbá Paulo hiɛ ma. Anania po bɔ mɔdɛŋ ni eha awo Paulo tsuŋ. Beni Paulo batsɔ Yesu kaselɔ lɛ ena amanehulu babaoo. Ákɛ nɔkwɛmɔnɔ lɛ, gbɔmɛi fɔji komɛi yi Paulo ni amɛbɔ mɔdɛŋ koni amɛtswia lɛ tɛi wuji ni amɛgbe lɛ.—Bɔfoi lɛ Asaji 23:1, 2; 2 Korintobii 11:24, 25.

Mɛi pii bɔɔ mɔdɛŋ koni amɛha wɔfee nibii ni Nyɔŋmɔ sumɔɔɔ. No hewɔ lɛ, sanebimɔ lɛ ji, Te osumɔɔ nɔ ni hi lɛ jogbaŋŋ  ohaa tɛŋŋ? Ani osumɔɔ waa akɛ ooofee nɔ ni hi kɛ́ mɛi sumɔɔɔ osane yɛ nɔ ni hi ni ofeɔ lɛ hewɔ po? Ebiɔ ekãa dani anyɛɔ afeɔ nakai, aloo jeee nakai?—

Ekolɛ obaabi akɛ, ‘Mɛni hewɔ esa akɛ gbɔmɛi anyɛ̃ wɔ yɛ nɔ̃ kpakpa ni wɔfeɔ lɛ hewɔ lɛ? Ani esaaa akɛ amɛnáa miishɛɛ moŋ?’ Nakai obaasusu. Mɛi sumɔɔ Yesu sane bei pii yɛ nibii kpakpai ni efee lɛ hewɔ. Be ko lɛ, maŋ ko mli bii fɛɛ bua amɛhe naa yɛ shia ni eyɔɔ mli lɛ naa. Amɛba ejaakɛ Yesu miitsá helatsɛmɛi.—Marko 1:33.

 Shi, bei komɛi lɛ gbɔmɛi sumɔɔɔ nɔ ni Yesu tsɔɔ lɛ. Eyɛ mli akɛ etsɔɔ nɔ ni ji anɔkwale be fɛɛ be moŋ, shi mɛi komɛi tsɔɔ akɛ amɛsumɔɔɔ esane kwraa ejaakɛ ewieɔ anɔkwale. Eba lɛ nakai gbi ko yɛ Nazaret, maŋ ni Yesu da yɛ mli lɛ mli. Etee kpeehe lɛ, ni ji he ko ni Yudafoi lɛ kpeɔ yɛ ni amɛjáa Nyɔŋmɔ lɛ.

Yesu jɛ Ŋmalɛi lɛ amli eha wiemɔ ko ni ŋɔɔ waa yɛ jɛmɛ. Klɛŋklɛŋ lɛ, eŋɔɔ gbɔmɛi lɛ anaa. Amɛnaa kpɛ amɛhe yɛ duromɔ wiemɔi ni ŋɔɔ ni jɛɔ enaa lɛ hewɔ. Ewa kɛha amɛ akɛ amɛaahe amɛye akɛ oblanyo ni da yɛ amɛ diɛŋtsɛ amɛmaŋ lɛ mli lɛ diɛŋtsɛ nɛ.

Kɛkɛ ni Yesu wie nɔ kroko. Ewie bei ni Nyɔŋmɔ jie duromɔ krɛdɛɛ kpo etsɔɔ gbɔmɛi ni jeee Yudafoi lɛ he. Beni Yesu wie enɛ lɛ, mɛi ni yɔɔ kpeehe lɛ amli fu. Ani ole nɔ hewɔ?— Amɛsusu akɛ amɛ pɛ ji mɛi ni yɔɔ Nyɔŋmɔ duromɔ krɛdɛɛ. Amɛsusu akɛ amɛhi fe mɛi krokomɛi. No hewɔ lɛ, amɛnyɛ̃ Yesu yɛ nɔ ni ewie lɛ hewɔ. Ni ani ole nɔ ni amɛbɔ mɔdɛŋ koni amɛfee lɛ?—

Biblia lɛ kɛɔ akɛ: ‘Amɛmɔ Yesu, ni amɛtsirɛ lɛ kɛtee maŋ lɛ sɛɛ. Amɛkɛ lɛ tee gɔŋ ko nɔ, ni amɛtsirɛ lɛ kɛtee gɔŋ lɛ naa, koni amɛyashɛ lɛ amɛfɔ̃ kɛjɛ jɛmɛ ni amɛgbe lɛ! Shi Yesu je amɛdɛŋ.’—Luka 4:16-30.

Mɛni hewɔ nɛkɛ gbɔmɛi nɛɛ bɔɔ mɔdɛŋ ni amɛgbe Yesu lɛ?

Eji enɛ ba onɔ kulɛ, ani obaaku osɛɛ oya koni oyagba Nyɔŋmɔ he sane otsɔɔ nakai gbɔmɛi lɛ ekoŋŋ?— Enɛ baabi ekãa, aloo jeee nakai?— Shi, aaafee afi sɛɛ lɛ, Yesu ku esɛɛ etee Nazaret ekoŋŋ. Biblia lɛ kɛɔ akɛ: “Etsɔɔ amɛ nii yɛ amɛkpeehe lɛ.” Yesu kpaaa anɔkwale lɛ he wiemɔ yɛ gbɔmɛi ni bɛ suɔmɔ ko kwraa kɛha Nyɔŋmɔ lɛ ahe gbeyeishemɔ hewɔ.—Mateo 13:54.

Gbi kroko, ni ji hejɔɔmɔ gbi nɔ lɛ, Yesu yɛ he ko, ni nuu ko ni nine egbo loo eje kpa yɛ jɛmɛ. Yesu yɛ hewalɛ ni jɛ Nyɔŋmɔ ŋɔɔ ni ekɛaatsá nakai nuu lɛ. Shi amɛteŋ mɛi komɛi ni yɔɔ jɛmɛ lɛ miibɔ mɔdɛŋ ni amɛgbá Yesu naa. Mɛni Tsɔɔlɔ Kpele lɛ baafee?—  Klɛŋklɛŋ lɛ, ebi akɛ: ‘Kɛ́ oyɛ too ni eyagbee bu mli yɛ Hejɔɔmɔ Gbi nɔ lɛ, ani obaajie lɛ yɛ mli lo?’

Hɛɛ, amɛbaajie too lɛ, yɛ Hejɔɔmɔ Gbi lɛ nɔ po, gbi ni esa akɛ amɛkɛjɔɔ amɛhe lɛ. No hewɔ lɛ, Yesu kɛɛ: ‘Ehi jogbaŋŋ moŋ akɛ aye abua gbɔmɔ yɛ Hejɔɔmɔ Gbi lɛ nɔ, ejaakɛ gbɔmɔ jara wa aahu fe too!’ Kwɛ bɔ ni eyɔɔ faŋŋ akɛ, esa akɛ Yesu aye abua nɛkɛ nuu nɛɛ kɛtsɔ ehela lɛ tsamɔ nɔ!

Yesu kɛɛ nuu lɛ akɛ ekpã enine mli. Amrɔ nɔŋŋ ni atsá nine lɛ. Kwɛ bɔ ni nuu lɛ ná miishɛɛ waa ha! Shi nakai hii krokomɛi lɛ hu? Ani amɛná miishɛɛ?— Dabi. Amɛná nyɛ̃ɛ ni mli wa waa moŋ amɛha Yesu. Amɛje kpo koni amɛyato ŋaa ni amɛbaatsɔ nɔ amɛgbe lɛ!—Mateo 12:9-14.

Nakai nɔŋŋ eji ŋmɛnɛ. Yɛ nɔ fɛɛ nɔ ni wɔfeɔ lɛ sɛɛ lɛ, wɔnyɛŋ wɔsa mɔ fɛɛ mɔ hiɛ. No hewɔ lɛ, esa akɛ wɔle mɔ ni wɔsumɔɔ ni wɔsa ehiɛ diɛŋtsɛ. Kɛji akɛ wɔmiisumɔ ni wɔsa Yehowa Nyɔŋmɔ kɛ e-Bi Yesu Kristo hiɛ lɛ, no lɛ esa akɛ wɔfee nɔ ni amɛtsɔɔ wɔ lɛ be fɛɛ be. Shi kɛ́ wɔfee nakai lɛ, namɔ baanyɛ̃ wɔ? Namɔ baaha ewa kɛha wɔ akɛ wɔɔfee nɔ ni hi?—

Satan Abonsam baafee nakai. Ni namɛi hu baafee nakai?— Mɛi ni Abonsam elaka amɛ ni amɛkɛ amɛhe woɔ nibii fɔji amli lɛ. Yesu kɛɛ jamɔ mli hiɛnyiɛlɔi ni yɔɔ egbii lɛ amli lɛ akɛ: “Nyɛ lɛ nyɛtsɛ ni nyɛjɛ emli ji abonsam, ni nyɛtsɛ lɛ tsinebaa nii nyɛsumɔɔ akɛ nyɛfee.”—Yohane 8:44.

Gbɔmɛi pii yɛ ni Abonsam sumɔɔ amɛ. Yesu tsɛɔ amɛ akɛ “je lɛ.” Mɛni osusuɔ akɛ “je lɛ” ni Yesu wieɔ he lɛ ji?— Ojogbaŋŋ, ha wɔkwɛ Yohane yitso 15, kuku 19. Wɔkaneɔ Yesu wiemɔi lɛ yɛ jɛmɛ, akɛ: “Eji je lɛŋ nyɛjɛ kulɛ, je lɛ aaasumɔ lɛ diɛŋtsɛ emɛi, shi akɛni nyɛjɛɛɛ je lɛŋ, shi mi moŋ mihala nyɛ kɛjɛ je lɛŋ lɛ, no hewɔ je lɛ nyɛ̃ɛɔ nyɛ lɛ.”

 No hewɔ lɛ, jeŋ ni nyɛ̃ɛɔ Yesu kaselɔi lɛ ji gbɔmɛi fɛɛ ni jeee esɛɛnyiɛlɔi lɛ. Mɛni hewɔ je lɛ nyɛ̃ɛɔ Yesu kaselɔi lɛ?— Susumɔ he okwɛ. Namɔ ji je nɛŋ nɔyelɔ lɛ?— Biblia lɛ kɛɔ akɛ: “Jeŋ muu lɛ fɛɛ kã mɔ fɔŋ lɛ mli.” Nakai mɔ fɔŋ lɛ ji Satan Abonsam.—1 Yohane 5:19.

Agbɛnɛ, ani oona nɔ hewɔ ni ewa waa akɛ aaafee nɔ ni hi lɛ?— Satan kɛ eje lɛ haa efeɔ nɔ ni wa. Shi, yiŋtoo kroko hu yɛ. Ani okaiɔ nɔ ni ji?— Wɔkase yɛ wolo nɛɛ Yitso 23 lɛ mli akɛ, afɔ́ wɔ fɛɛ akɛ eshafeelɔi. Ani efeŋ miishɛɛ sane, kɛji akɛ esha, Abonsam, kɛ eje lɛ bɛ dɔŋŋ?—

Kɛ́ je nɛɛ ho kɛtee lɛ, mɛni baaba mɛi ni feɔ ekpakpa lɛ anɔ?

Biblia lɛ woɔ shi akɛ: “Je lɛ hoɔ eyaa.” Enɛ tsɔɔ akɛ mɛi fɛɛ ni jeee Tsɔɔlɔ Kpele lɛ sɛɛnyiɛlɔi lɛ ehiŋ shi dɔŋŋ. Aŋmɛŋ amɛ gbɛ ni amɛhi shi kɛya naanɔ. Ani ole mɛi ni baahi shi kɛya naanɔ?— Biblia lɛ yaa nɔ ekɛɔ akɛ: “Shi mɔ ni feɔ Nyɔŋmɔ suɔmɔnaa nii lɛ hiɔ shi kɛyaa naanɔ.” (1 Yohane 2:17) Hɛɛ, mɛi ni feɔ ekpakpa, ni feɔ “Nyɔŋmɔ suɔmɔnaa nii lɛ” pɛ baahi shi kɛya naanɔ yɛ Nyɔŋmɔ jeŋ hee lɛ mli. No hewɔ lɛ, kɛji akɛ ewa po lɛ, wɔmiisumɔ ni wɔfee ekpakpa, aloo jeee nakai wɔsumɔɔ?—

Nyɛhaa wɔkanea nɛkɛ ŋmalɛi nɛɛ ni tsɔɔ nɔ hewɔ ni ewa akɛ aaafee ekpakpa lɛ: Mateo 7:13, 14; Luka 13:23, 24; kɛ Bɔfoi lɛ Asaji 14:21, 22.