Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kasemɔ Nii Kɛjɛ Tsɔɔlɔ Kpele Lɛ Ŋɔɔ

 YITSO 16

Mɛni He Hiaa Waa Diɛŋtsɛ Lɛ?

Mɛni He Hiaa Waa Diɛŋtsɛ Lɛ?

Mɛni gbáa nɛkɛ nuu nɛɛ naa?

NUU ko ba Yesu ŋɔɔ gbi ko. Ele akɛ Yesu le nii jogbaŋŋ, no hewɔ lɛ ekɛɛ lɛ akɛ: ‘Tsɔɔlɔ, kɛɛmɔ minyɛmi lɛ koni eha mi nibii ni eyɔɔ lɛ eko.’ Nuu lɛ susu akɛ esa akɛ lɛ hu ená nibii ni enyɛmi lɛ yɔɔ lɛ eko.

Eji bo ji Yesu kulɛ, mɛni obaakɛɛ lɛ?— Yesu na akɛ nɔ ko miigba nuu lɛ naa. Shi nɔ ni gbaa enaa lɛ etsɔɔɔ akɛ nɔ ni enyɛmi lɛ yɔɔ lɛ he miihia lɛ. Nɔ ni gbaa nuu lɛ naa ji akɛ eleee nɔ ni he hiaa waa diɛŋtsɛ yɛ shihilɛ mli.

Nyɛhaa wɔsusua enɛ he wɔkwɛa. Mɛni esa akɛ efee nɔ ni he hiaa wɔ fe fɛɛ? Ani esa akɛ efee shwɛmɔ nii fɛfɛo, atadei heei, loo nibii ni tamɔ nakai ni wɔɔná?— Dabi, nɔ ko yɛ ni he hiaa waa fe nomɛi. Ni enɛ ji nikasemɔ ni Yesu taoɔ atsɔɔ lɛ. No hewɔ lɛ, egba sane ko ni kɔɔ nuu ko ni hiɛ kpa Nyɔŋmɔ nɔ lɛ he. Ani obaasumɔ ni onu sane nɛɛ?—

Nuu nɛɛ yɛ shika waa. Eyɛ shikpɔji kɛ niyenii babaoo ni ebua naa eto aboŋoi amli. Ŋmɔshi nibii ni edu lɛ ba waa. Gbɛ ko bɛ eboŋoi lɛ amli dɔŋŋ ni ekɛ eŋmɔshi nibii lɛ fɛɛ aaato mli. No hewɔ lɛ, mɛni ebaafee? Eto eyiŋ akɛ: ‘Makumɔ miboŋoi lɛ, ni mamãmɔ agboi. Kɛkɛ lɛ mikɛ miŋmɔshi nibii lɛ fɛɛ kɛ minibii kpakpai lɛ fɛɛ baato aboŋoi heei nɛɛ amli.’

 Nuu shikatsɛ lɛ susu akɛ enɛ ji gbɛ ni jwɛŋmɔ yɔɔ mli ni esa akɛ etsɔ nɔ. Esusu akɛ nibii pii ni ebua naa eto lɛ tsɔɔ akɛ ele nii waa diɛŋtsɛ. Kɛkɛ ni ekɛɛ akɛ: ‘Miyɛ nibii pii ni mibua naa. Ebaaye afii pii dani fɛɛ baatã. No hewɔ lɛ, agbɛnɛ majɔɔ mihe. Maye nii, manu nii, ni maná mihe miishɛɛ.’ Shi nɔ ko yɛ ni ejaaa yɛ shikatsɛ lɛ susumɔ he. Ani ole nɔ ni ji?— Eesusu lɛ ekome pɛ kɛ emiishɛɛ ni ebaaná he. Ehiɛ kpa Nyɔŋmɔ nɔ.

Mɛni shikatsɛ nɛɛ susuɔ he lɛ?

No hewɔ lɛ, Nyɔŋmɔ kɛ shikatsɛ lɛ wie. Ekɛɛ akɛ: ‘Bo nuu kwashia. Obaagbo gbɛkɛ nɛɛ. Namɔ nibii ni obua naa nɛɛ fɛɛ baatsɔ enɔ̃?’ Ani nakai shikatsɛ lɛ baanyɛ ni ekɛ nakai nibii lɛ atsu nii kɛ́ egbo?— Dabi, mɔ kroko baaloo fɛɛ. Yesu kɛɛ akɛ: “Nakai mɔ ni bɔɔ jwetri ehaa lɛ diɛŋtsɛ ehe, shi ejeee niiatsɛ yɛ Nyɔŋmɔ gbɛfaŋ lɛ yɔɔ.”—Luka 12:13-21.

 Osumɔɔɔ ni ofee tamɔ nakai nuu shikatsɛ lɛ, aloo jeee nakai?— Nɔ ni ma ehiɛ yɛ shihilɛ mli ji ni ená heloonaa nibii pii. Enɛ ehiii. Eetao pii be fɛɛ be. Shi “ejeee niiatsɛ yɛ Nyɔŋmɔ gbɛfaŋ.”

Mɛi pii tamɔ nakai nuu shikatsɛ lɛ. Amɛmiitao babaoo be fɛɛ be. Shi enɛ baanyɛ ekɛ haomɔi wuji aba. Ákɛ nɔkwɛmɔnɔ lɛ, oyɛ nibii ni okɛshwɛɔ, aloo jeee nakai?— Mɛni ji oshwɛmɔ nibii lɛ ekomɛi? Kɛɛmɔ mi.— Kɛji akɛ onanemɛi lɛ ateŋ mɔ ko yɛ bɔɔl loo tsobi loo shwɛmɔ nii ko ni obɛ eko lɛ, mɛni obaafee? Ani ebaafee nɔ ni ja akɛ ooobɔ mɔdɛŋ ni oha opapa kɛ omami ahe eko aha bo?—

Bei komɛi lɛ shwɛmɔ nii ko feɔ tamɔ nɔ ni he hiaa waa. Shi mɛni baa nɔ yɛ be fioo ko sɛɛ?— Etsɔɔ emomo. Ekolɛ ebaafite, kɛkɛ lɛ osumɔɔɔ dɔŋŋ po. Yɛ anɔkwale mli lɛ, oyɛ nɔ ko ni jara wa kwraa fe shwɛmɔ nibii. Ani ole nɔ ni ji?—

Mɛni oyɔɔ ni jara wa waa fe shwɛmɔ nii?

No ji owala. Owala he hiaa waa diɛŋtsɛ, ejaakɛ kɛ́ no bɛ lɛ, onyɛŋ ofee nɔ ko nɔ ko. Shi owala damɔ nɔ ni saa Nyɔŋmɔ hiɛ ni ooofee lɛ nɔ, aloo jeee nakai?— No hewɔ lɛ, nyɛkahaa wɔtamɔa nakai nuu shikatsɛ kwashia lɛ ni hiɛ kpa Nyɔŋmɔ nɔ lɛ.

 Jeee gbekɛbii pɛ ekolɛ amɛbaafee buuluianii tamɔ nakai nuu shikatsɛ lɛ. Onukpai pii hu feɔ nakai. Amɛteŋ mɛi komɛi sumɔɔ ni amɛná nibii pii fe bɔ ni amɛyɔɔ. Ekolɛ amɛyɛ niyenii kɛha gbi lɛ, atade ni amɛbaawo kɛ mama, kɛ shia ni amɛhiɔ mli. Shi amɛmiitao pii lolo. Amɛmiitao atadei babaoo. Ni amɛmiitao ni amɛmamɔ shiai wuji. Enɛɛmɛi biɔ shika babaoo. No hewɔ lɛ, amɛtsuɔ nii waa koni amɛná shika pii. Ni shika pii ni amɛnáa lɛ haa amɛtaoɔ pii lolo.

Mɛi ni amɛdara lɛ ateŋ mɛi komɛi feɔ mɛi ni bɛ dekã kwraa ni amɛmiitao shika aahu akɛ amɛbɛ be po ni amɛkɛ amɛweku lɛ aaagba sane. Ni amɛbɛ be kɛha Nyɔŋmɔ. Ani amɛshika lɛ baanyɛ aha amɛhi wala mli?— Dabi, enyɛŋ. Ani amɛbaanyɛ ni amɛkɛ amɛshika lɛ afee nɔ ko beni amɛgboi?— Dabi. Ejaakɛ mɛi ni egboi lɛ nyɛɛɛ afee nɔ ko nɔ ko kwraa.—Jajelɔ 9:5, 10.

Ani enɛ tsɔɔ akɛ ehiii akɛ anáa shika?— Dabi. Wɔbaanyɛ ni wɔkɛ shika ahe niyenii kɛ atade. Biblia lɛ kɛɔ akɛ ebuɔ wɔhe. (Jajelɔ 7:12) Shi kɛji akɛ wɔsumɔɔ shika lɛ, no lɛ, wɔbaaná haomɔ. Wɔbaatamɔ nakai nuu shikatsɛ kwashia lɛ ni bua nibii pii anaa kɛha ehe shi ejeee shikatsɛ yɛ Nyɔŋmɔ gbɛfaŋ lɛ.

Mɛni ji shikatsɛ ni aaafee yɛ Nyɔŋmɔ gbɛfaŋ lɛ shishi?— Etsɔɔ akɛ ni wɔɔha Nyɔŋmɔ aba klɛŋklɛŋ yɛ wɔshihilɛi amli. Mɛi komɛi kɛɔ akɛ amɛheɔ Nyɔŋmɔ nɔ amɛyeɔ. Amɛsusuɔ akɛ ni aaahe aye kɛkɛ lɛ pɛ ji nɔ̃ ni he hiaa. Shi ani amɛji shikatsɛmɛi lɛɛlɛŋ yɛ Nyɔŋmɔ gbɛfaŋ?— Dabi, amɛtamɔ shikatsɛ lɛ ni hiɛ kpa Nyɔŋmɔ nɔ lɛ.

Yesu hiɛ kpaaa e-Tsɛ ni yɔɔ ŋwɛi lɛ nɔ kɔkɔɔkɔ. Ebɔɔɔ mɔdɛŋ akɛ eeetao shika babaoo. Ni ebɛ heloo gbɛfaŋ nibii babaoo. Yesu le nɔ ni he hiaa diɛŋtsɛ yɛ shihilɛ mli. Ani ole nɔ ni enɛ ji?— No ji koni otsɔ shikatsɛ yɛ Nyɔŋmɔ gbɛfaŋ.

Mɛni nɛkɛ gbekɛ nɛɛ feɔ ni he hiaa lɛɛlɛŋ lɛ?

Kɛɛmɔ mi, te wɔɔfee tɛŋŋ wɔtsɔmɔ shikatsɛmɛi yɛ Nyɔŋmɔ gbɛfaŋ?— Wɔbaanyɛ wɔtsɔ shikatsɛ yɛ Nyɔŋmɔ gbɛfaŋ kɛtsɔ nɔ ni saa  ehiɛ ni wɔɔfee lɛ nɔ. Yesu kɛɛ akɛ: “Nɔ ni sa ehiɛ mifeɔ daa.” (Yohane 8:29) Kɛ wɔfee nibii ni Nyɔŋmɔ sumɔɔ akɛ wɔfee lɛ, eŋɔɔ enaa. Agbɛnɛ kɛɛmɔ mi, mɛɛ nibii obaanyɛ ofee ni okɛsa Nyɔŋmɔ hiɛ?— Hɛɛ, obaanyɛ okane Biblia lɛ, oya Kristofoi akpeei, osɔle oha Nyɔŋmɔ, ni oye obua mɛi krokomɛi ni amɛkase ehe nii. Enɛɛmɛi ji nibii ni he hiaa fe fɛɛ yɛ shihilɛ mli.

Akɛni Yesu ji shikatsɛ yɛ Nyɔŋmɔ gbɛfaŋ hewɔ lɛ, Yehowa kwɛ enɔ. Ekɛ naanɔ wala wo Yesu nyɔmɔ. Kɛji akɛ wɔtamɔ Yesu lɛ, Yehowa baasumɔ wɔ ni ebaakwɛ wɔ nɔ hu. No hewɔ lɛ, eba akɛ wɔɔtamɔ Yesu, ni wɔkatamɔ nakai shikatsɛ ni hiɛ kpa Nyɔŋmɔ nɔ lɛ kɔkɔɔkɔ.

Naa Biblia mli ŋmalɛi komɛi ni tsɔɔ bɔ ni esa akɛ wɔná heloonaa nibii ahe jwɛŋmɔ kpakpa: Abɛi 23:4; 28:20; 1 Timoteo 6:6-10; kɛ Hebribii 13:5.

Ekrokromɛi Hu Nɛ

Yesu Hã Oblanyo Niiatsɛ ko ni Ji Nɔyelɔ Hetoo

Mɛni hã Yesu wie akɛ ewaaa hãaa yoma akɛ eeetsɔ nikpɛɛ abui hiŋmɛi mli fe nɔ ni niiatsɛ aaabote Nyɔŋmɔ Maŋtsɛyeli lɛ mli lɛ?