Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kasemɔ Nii Kɛjɛ Tsɔɔlɔ Kpele Lɛ Ŋɔɔ

 YITSO 18

Ani Okaiɔ Akɛ Obaakɛɛ Akɛ Miida Bo Shi?

Ani Okaiɔ Akɛ Obaakɛɛ Akɛ Miida Bo Shi?

ANI oye niyenii ko ŋmɛnɛ?— Ani ole mɔ ni hoo niyenii lɛ?— Ekolɛ omami hoo niyenii lɛ loo mɔ kroko fee nakai, shi mɛni hewɔ esa akɛ wɔda Nyɔŋmɔ shi yɛ enɛ hewɔ?— Ejaakɛ Nyɔŋmɔ ji mɔ ni haa niyenii lɛ baa. Shi kɛlɛ, esa akɛ wɔda mɔ ni hoo lɛ kɛ mɔ ni kɛha wɔ lɛ hu shi.

Yɛ bei komɛi amli lɛ wɔhiɛ kpaa nɔ akɛ wɔbaada mɛi ni feɔ nibii kpakpai amɛhaa wɔ lɛ shi, aloo jeee nakai? Beni Tsɔɔlɔ Kpele lɛ yɔɔ shikpɔŋ nɔ lɛ, kpitiyelɔi komɛi ahiɛ kpa nɔ akɛ amɛbaada lɛ shi.

Ani ole mɔ ni kpitiyelɔ ji?— Kpitiyelɔ ji mɔ ko ni yeɔ hela ni atsɛɔ lɛ akɛ kpiti lɛ. Nakai hela lɛ baanyɛ afolɔ helatsɛ lɛ heloo. Beni Yesu yɔɔ shikpɔŋ nɔ lɛ, kpitiyelɔi hiɔ shɔŋŋ ni amɛbɛŋkɛɛɛ mɛi krokomɛi. Ni kɛ́ kpitiyelɔ na ni mɔ ko miiba lɛ, esa akɛ ebolɔ koni ekɛbɔ mɔ lɛ kɔkɔ akɛ eya sɛɛ. Afeɔ nakai koni mɛi krokomɛi akabɛŋkɛ tsɔ̃ ní ekolɛ kpitiyelɔ lɛ hela lɛ tsɛŋe amɛ.

Yesu mli hi waa kɛha kpitiyelɔi. Gbi ko, beni enyiɛ gbɛ kɛyaa Yerusalem lɛ, ehe bahia ni Yesu atsɔ maŋ bibioo ko mli. Beni ebɛŋkɛ maŋ lɛ, kpitiyelɔi nyɔŋma je kpo koni amɛbana lɛ. Amɛnu akɛ Yesu yɛ hewalɛ ni jɛ Nyɔŋmɔ ŋɔɔ ni ebaanyɛ etsa helai srɔtoi fɛɛ.

Kpitiyelɔi lɛ bɛŋkɛɛɛ Yesu. Amɛyadamɔ sɛɛ tɔ̃ɔ. Shi amɛhé amɛye akɛ Yesu baanyɛ atsá amɛkpiti lɛ. No hewɔ lɛ, beni kpitiyelɔi lɛ na Tsɔɔlɔ Kpele lɛ, amɛbolɔ amɛtsɛ lɛ akɛ: ‘Yesu, Tsɔɔlɔ, ye obua wɔ!’

 Ani gbɔmɛi ni he yeɔ lɛ anii feɔ bo mɔbɔ?— Amɛnii fee Yesu mɔbɔ. Ele awerɛho ni kpitiyelɔ yeɔ. No hewɔ lɛ, eha amɛ hetoo ni ekɛɛ akɛ: “Nyɛyaa nyɛkɛ nyɛhe ayatsɔɔa osɔfoi lɛ.”—Luka 17:11-14.

Mɛni Yesu kɛɔ nɛkɛ kpitiyelɔi nɛɛ koni amɛfee?

Mɛni hewɔ Yesu kɛɛ amɛ akɛ amɛyafee enɛ? Ejɛ mla ni Yehowa kɛha E-webii lɛ ni kɔɔ kpitiyelɔi ahe lɛ hewɔ. Nɛkɛ mla nɛɛ tsɔɔ akɛ esa akɛ Nyɔŋmɔ osɔfo lɛ akwɛ kpitiyelɔ lɛ heloo lɛ hiɛ. Osɔfo lɛ baakɛɛ kpitiyelɔ lɛ akɛ ehela lɛ fɛɛ etã kɛji akɛ ehela lɛ tã. Kɛ́ ehela lɛ tã lɛ, ebaanyɛ ni ekɛ mɛi ni hela ko bɛ amɛhe lɛ ahi shi ekoŋŋ.—3 Mose 13:16, 17.

Shi hela lɛ yɛ kpitiyelɔi lɛ ahe lolo. No hewɔ lɛ, ani amɛtee osɔfo lɛ ŋɔɔ taakɛ Yesu kɛɛ amɛ lɛ?— Hɛɛ, amɛfee nakai amrɔ nɔŋŋ.  Nɛkɛ hii nɛɛ hé amɛye akɛ Yesu baatsa amɛhela lɛ. Mɛni jɛ mli ba?

Ojogbaŋŋ, beni amɛnyiɛ gbɛ kɛyaa osɔfo lɛ ŋɔɔ lɛ, amɛhela lɛ tã yɛ amɛhe. Atsá amɛheloo lɛ. Amɛná hewalɛ ekoŋŋ! Awo amɛ nyɔmɔ yɛ hemɔkɛyeli ni amɛyɔɔ yɛ Yesu hewalɛ mli lɛ hewɔ. Mɛɛ miishɛɛ waa po amɛná nɛkɛ! Shi agbɛnɛ, mɛni kulɛ esa akɛ amɛfee ni amɛkɛtsɔɔ amɛ shidaa? Kɛ́ bo ni kulɛ mɛni obaafee?—

Mɛni nɛkɛ kpitiyelɔ nɛɛ kai akɛ ebaafee?

Mɛi ni atsá amɛhela lɛ ateŋ mɔ kome ku sɛɛ kɛba Yesu ŋɔɔ. Eje shishi ewo Yehowa hiɛ nyam, ni ewie nibii kpakpai yɛ Nyɔŋmɔ he. No ji nii ni ja ni esa akɛ afee, ejaakɛ hewalɛ ni akɛtsá lɛ lɛ jɛ Nyɔŋmɔ ŋɔɔ kɛba. Nuu lɛ kula shi hu yɛ Tsɔɔlɔ Kpele lɛ najianaa ni eda lɛ shi. Ehiɛ esɔ nɔ ni Yesu fee kɛha lɛ lɛ waa diɛŋtsɛ.

Shi hii krokomɛi nɛɛhu lɛ hu? Yesu bi akɛ: ‘Kpitiyelɔi nyɔŋma atsá amɛ lɛ, aloo jeee nakai? Nɛgbɛ mɛi nɛɛhu lɛ yɔɔ? Ani mɔ kome pɛ eku esɛɛ koni ebawo Nyɔŋmɔ hiɛ nyam?’

Hɛɛ, eji anɔkwale. Mɛi nyɔŋma lɛ ateŋ mɔ kome pɛ wo Nyɔŋmɔ hiɛ nyam loo ejie eyi, ni eku esɛɛ kɛba koni  ebada Yesu shi. Ni nɛkɛ nuu nɛɛ ji Samarianyo, nuu ni jɛ maŋ kroko nɔ. Mɛi krokomɛi nɛɛhu lɛ edaaa Nyɔŋmɔ shi, ni amɛdaaa Yesu shi hu.—Luka 17:15-19.

Nakai hii lɛ ateŋ namɔ otamɔ? Wɔmiisumɔ ni wɔtamɔ Samarianyo lɛ, aloo jeee nakai?— No hewɔ lɛ, kɛji akɛ mɔ ko fee wɔ ekpakpa lɛ, mɛni esa akɛ wɔkai ni wɔfee?— Esa akɛ wɔjie wɔ shidaa kpo. Mɛi pii ahiɛ kpaa nɔ akɛ amɛaakɛɛ akɛ miida bo shi. Shi ehi akɛ aaakɛɛ akɛ miida bo shi. Kɛ́ wɔda shi lɛ, Yehowa Nyɔŋmɔ kɛ e-Bi, Yesu náa miishɛɛ.

Te ooofee tɛŋŋ okase kpitiyelɔ ni ku esɛɛ kɛba Yesu ŋɔɔ lɛ?

Kɛ́ osusu he lɛ, obaakai akɛ mɛi pii efee nibii kpakpai pii amɛha wɔ. Ákɛ nɔkwɛmɔnɔ lɛ, ani ohe eye pɛŋ?— Ekolɛ ohe yeko tamɔ nakai kpitiyelɔi nyɔŋma lɛ, shi ekolɛ atridii ko ha ohe ye waa, aloo omusuŋ kɔ̃ bo waa. Ani mɔ ko kwɛ bo?— Ekolɛ amɛha bo tsofa ko, ni amɛfee nibii krokomɛi amɛha bo. Ani oná miishɛɛ akɛ amɛye amɛbua bo ni ohe wa bo?—

Samarianyo lɛ da Yesu shi akɛ eha ehe ewa lɛ, ni enɛ ha Yesu ná miishɛɛ. Ani osusuɔ akɛ omami kɛ opapa baaná miishɛɛ kɛ́ amɛfee nɔ ko amɛha bo ni oda amɛ shi?— Hɛɛ, amɛbaaná miishɛɛ.

Mɛni hewɔ ehe hiaa waa akɛ obaakɛɛ akɛ oyiwaladɔŋŋ lɛ?

Mɛi komɛi feɔ nibii amɛhaa bo daa gbi loo daa otsi. Ekolɛ amɛnitsumɔ ji ni amɛfee nɛkɛ nibii nɛɛ. Ekolɛ amɛyɛ miishɛɛ po akɛ  amɛaafee nakai. Shi ekolɛ ohiɛ baakpa nɔ akɛ oookɛɛ amɛ akɛ ooda amɛ shi. Oskul tsɔɔlɔ lɛ baatsu nii waa koni eye ebua bo ni okase nii. Enitsumɔ ji enɛ. Shi ebaaŋɔɔ enaa kɛji akɛ oda lɛ shi akɛ eye ebua bo koni okase nii.

Yɛ bei komɛi amli lɛ, mɛi feɔ nibii bibii amɛhaa bo. Ani mɔ ko emɔ shinaa mli kɛha bo pɛŋ koni otsɔ mli? Aloo ani mɔ ko ekpã enine mli ekɛ niyenii eha bo yɛ niyeli okpɔlɔ he pɛŋ? Ehi akɛ oookɛɛ akɛ oyiwaladɔŋŋ kɛha nɛkɛ nibii bibii nɛɛ po.

Kɛji akɛ wɔkai ni wɔda gbɔmɛi ni yɔɔ shikpɔŋ nɔ lɛ ashi lɛ, no lɛ wɔbaakai ni wɔda wɔ-Tsɛ ni yɔɔ ŋwɛi lɛ shi babaoo. Ni kwɛ nibii babaoo ni yɔɔ ni wɔɔda Yehowa shi yɛ he! Eha wɔ wala kɛ nibii kpakpai fɛɛ ni haa wala feɔ nɔ ni ŋɔɔ lɛ. No hewɔ lɛ, wɔyɛ nɔ fɛɛ nɔ ni wɔɔdamɔ nɔ wɔwo Nyɔŋmɔ hiɛ nyam kɛtsɔ saji kpakpai ni wɔɔwie yɛ ehe daa gbi lɛ nɔ.

Yɛ shidaa wiemɔi agbɛfaŋ lɛ, kanemɔ Lala 92:2; Efesobii 5:20; Kolosebii 3:17; kɛ 1 Tesalonikabii 5:18.