Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kasemɔ Nii Kɛjɛ Tsɔɔlɔ Kpele Lɛ Ŋɔɔ

 YITSO 22

Nɔ Hewɔ Ni Esaaa Akɛ Wɔmaleɔ

Nɔ Hewɔ Ni Esaaa Akɛ Wɔmaleɔ

ŊƆƆ lɛ akɛ gbekɛ yoo ko kɛɛ emami akɛ: “Hɛɛ, kɛ́ akpa skul pɛ lɛ maba shia oya.” Shi ebaaa mra, ni ekɛ enanemɛi yashwɛ, ni sɛɛ mli lɛ ebakɛɛ emami akɛ: “Mitsɔɔlɔ lɛ ha mimɛ beni wɔkpa skul.” Ani ebaafee nɔ ni hi akɛ abaakɛɛ nɔ ko ni tamɔ nɛkɛ?—

Mɛɛ efɔŋ gbekɛ nuu nɛɛ efee lɛ?

Aloo ekolɛ gbekɛ nuu ko kɛɛ etsɛ akɛ: “Dabi, mitswako bɔɔl yɛ shia lɛ mli.” Shi kɛji akɛ efee nakai diɛŋtsɛ hu? Ani ebaafee nɔ ni ejaaa akɛ ebaakɛɛ akɛ efeko nakai?—

Tsɔɔlɔ Kpele lɛ tsɔɔ wɔ nɔ ni ja ni esa akɛ wɔfee. Ekɛɛ akɛ: ‘Ha owiemɔ ni ji Hɛɛ lɛ afee Hɛɛ, ni o-Dabi, afee Dabi; ejaakɛ nɔ fɛɛ nɔ ni fe enɛ lɛ jɛ mɔ fɔŋ lɛ mli.’ (Mateo 5:37) Mɛni Yesu kɛ wiemɔ nɛɛ tsɔɔ?— Eetsɔɔ akɛ esa akɛ wɔfee nɔ ni wɔkɛɔ lɛ.

Sane ko yɛ Biblia lɛ mli ni tsɔɔ bɔ ni ehe hiaa akɛ wɔwie  anɔkwale. Ekɔɔ gbɔmɛi enyɔ ko ni kɛɛ amɛji Yesu kaselɔi lɛ ahe. Ha wɔkwɛ nɔ ni ba.

Beni Yesu gbo ni eyeko nyɔji enyɔ lɛ, mɛi pii jɛ hei ni yɔɔ shɔŋŋ amɛba Yerusalem koni amɛbaye Yudafoi lɛ agbi jurɔ ko ni he hiaa ni atsɛɔ lɛ Pentekoste lɛ. Bɔfo Petro ha wiemɔ ko ni kanyaa mɔ waa, ni ewie bɔ ni Yehowa tée Yesu shi kɛjɛ gbohii ateŋ lɛ he etsɔɔ gbɔmɛi lɛ. Enɛ ji klɛŋklɛŋ be mli ni mɛi ni ba Yerusalem lɛ ateŋ mɛi pii kase Yesu he nii. Agbɛnɛ, amɛmiisumɔ ni amɛle babaoo. No hewɔ lɛ, mɛni amɛfee?

Amɛhi jɛmɛ be kakadaŋŋ fe bɔ ni amɛsusu. Shi yɛ be ko sɛɛ lɛ, amɛteŋ mɛi komɛi ashika tã, ni ehe bahia ni aye abua amɛ koni amɛnyɛ amɛhé niyenii. Kaselɔi ni yɔɔ Yerusalem lɛ miisumɔ ni amɛye amɛbua gbɔi nɛɛ. No hewɔ lɛ, amɛteŋ mɛi pii hɔ̃ɔ nibii ni amɛyɔɔ, ni amɛkɛ shika lɛ baha Yesu bɔfoi lɛ. Kɛkɛ ni bɔfoi lɛ kɛha mɛi ni ehe hiaa amɛ lɛ.

Anania kɛ eŋa Safira, ni amɛji Kristofoi asafo ni yɔɔ Yerusalem lɛ mli bii lɛ yahɔ̃ɔ amɛshikpɔŋ ko. Mɔ ko mɔ ko ekɛɛɛ amɛ akɛ  amɛyahɔ̃ɔ. Amɛ diɛŋtsɛ amɛkpɛ amɛyiŋ nakai. Shi nɔ ni amɛfee lɛ etsɔɔɔ akɛ amɛsumɔɔ Yesu kaselɔi heei lɛ. Yɛ anɔkwale mli lɛ, Anania kɛ Safira miisumɔ ni amɛha mɛi ale akɛ gbɔmɛi kpakpai ji amɛ fe bɔ ni amɛji diɛŋtsɛ. No hewɔ lɛ, amɛkpɛ amɛyiŋ akɛ, amɛbaakɛɛ akɛ amɛkɛ shika lɛ fɛɛ miiha koni akɛye abua mɛi krokomɛi. Yɛ anɔkwale mli lɛ, amɛkɛ shika lɛ eko pɛ baaha, koni amɛkɛɛ akɛ amɛkɛ fɛɛ miiha. Te osusuɔ enɛ he ohaa tɛŋŋ?—

Ojogbaŋŋ, Anania ba ebana bɔfoi lɛ. Ekɛ shika lɛ ha amɛ. Shi, Nyɔŋmɔ le akɛ jeee fɛɛ ekɛhaa lɛ. No hewɔ lɛ, Nyɔŋmɔ ha bɔfo Petro le akɛ Anania ewieee anɔkwale yɛ sane lɛ he.

Mɛɛ amale Anania maleɔ etsɔɔ Petro lɛ?

Kɛkɛ ni Petro kɛɛ akɛ: ‘Anania, mɛni hewɔ oŋmɛ Satan gbɛ ni eha ofee enɛ? Shikpɔŋ lɛ bo onɔ̃ ni. Ehe ehiaaa ni ohɔ̃ɔ. Ni beni ohɔ̃ɔ shikpɔŋ lɛ sɛɛ po lɛ, bo obaakpɛ oyiŋ yɛ nɔ ni okɛ shika lɛ baafee lɛ he. Shi mɛni hewɔ okwa okɛɛ akɛ okɛ shika lɛ fɛɛ miiha beni emli eko kɛkɛ okɛhaa lɛ? Okɛ enɛ feemɔ miimale, jeee yɛ wɔ pɛ wɔhiɛ, shi omale otsɔɔ Nyɔŋmɔ.’

Eji hiɛdɔɔ sane waa. Anania miimale! Efeee nɔ ni ekɛɛ efeɔ lɛ. Ekwa ekɛɛ kɛkɛ akɛ eefee. Biblia lɛ kɛɔ nɔ ni nyiɛ sɛɛ ba. Ekɛɔ akɛ: ‘Beni Anania nu Petro wiemɔi lɛ, egbee shi ni egbo.’ Nyɔŋmɔ tswa Anania nɔ̃ ni egbo! No sɛɛ lɛ, akɛ egbonyo lɛ je kpo ni ayafu lɛ.

Mɛni ba Anania nɔ akɛni emale hewɔ?

 Aaafee ŋmɛlɛtswai etɛ sɛɛ lɛ, Safira ba. Eleee nɔ ni eba ewu lɛ nɔ. No hewɔ lɛ, Petro bi lɛ akɛ: ‘Ani bɔ ni nyɛhɔ̃ɔ shikpɔŋ lɛ nyɛha lɛ fɛɛ nyɛkɛbaha wɔ lɛ?’

Safira ha hetoo akɛ: ‘Hɛɛ, nakai pɛpɛɛpɛ wɔhɔ̃ɔ shikpɔŋ lɛ.’ Shi eji amale! Amɛkɛ shika ni amɛná kɛjɛ shikpɔŋ ni amɛhɔ̃ɔ lɛ mli lɛ eko eto kɛha amɛ diɛŋtsɛ amɛhe. No hewɔ lɛ, Nyɔŋmɔ tswa Safira nɔ̃ ni lɛ hu egbo.—Bɔfoi lɛ Asaji 5:1-11.

Mɛni esa akɛ wɔkase kɛjɛ nɔ ni ba Anania kɛ Safira nɔ lɛ mli?— Etsɔɔ wɔ akɛ, Nyɔŋmɔ sumɔɔɔ amalelɔi. Eesumɔ ni wɔwie anɔkwale be fɛɛ be. Shi mɛi pii kɛɔ akɛ, kɛ́ omale lɛ efeee nɔ ko. Ani osusuɔ akɛ nakai mɛi lɛ asane ja?— Ani ole akɛ helai, piŋmɔ, kɛ gbele ni ba shikpɔŋ nɔ lɛ fɛɛ jɛ amale?—

Namɔ Yesu kɛɛ akɛ lɛ ji mɔ ni male klɛŋklɛŋ lɛ, ni mɛni jɛ mli ba?

Kaimɔ akɛ, Abonsam male etsɔɔ klɛŋklɛŋ yoo, ni ji Hawa. Ekɛɛ yoo lɛ akɛ kɛ́ ebooo Nyɔŋmɔ toi ni eye tso yibii ni Nyɔŋmɔ kɛɛ ekaye lɛ eko lɛ, egboŋ. Hawa hé Abonsam eye, ni eye tso yibii lɛ. Eha Adam hu ye eko. Agbɛnɛ amɛtsɔmɔ eshafeelɔi, ni amɛbaafɔ́ amɛbii fɛɛ akɛ eshafeelɔi. Ni akɛni Adam bii lɛ ji eshafeelɔi hewɔ lɛ, amɛ fɛɛ amɛna amanehulu ni amɛgboi. Te fee tɛŋŋ ni haomɔ nɛɛ fɛɛ je shishi?— Eje shishi kɛ amale.

Ebɛ naakpɛɛ mɔ akɛ no hewɔ ni Yesu kɛɛ akɛ, Abonsam ji “amalelɔ kɛ malemɔtsɛ” lɛ! Lɛ ji klɛŋklɛŋ mɔ ni male. Kɛ́ mɔ ko male lɛ, eefee nɔ ni Abonsam fee klɛŋklɛŋ kwraa lɛ. Esa akɛ wɔjwɛŋ enɛ he, kɛ́ be ko shɛ ni ebafee kaa kɛha bo koni omale lɛ.—Yohane 8:44.

Mɛɛ be nɛkɛ obaanu he akɛ eefee kaa kɛmiiha bo koni omale?— Ani jeee be mli ni  ofee nɔ ko fɔŋ ko lɛ?— Obaanyɛ ojwa nɔ ko, eyɛ mli moŋ akɛ osumɔŋ ni ofee nakai. Kɛji akɛ abi bo enɛ he sane lɛ, ani esa akɛ okɛɛ akɛ onyɛmi nuu lɛ loo onyɛmi yoo lɛ fee? Aloo esa akɛ okwa ofee tamɔ nɔ ni oleee bɔ ni fee ni nii lɛ jwa?—

Mɛɛ be mli ekolɛ ebaanyɛ efee kaa kɛha bo koni omale?

Kɛ́ esa akɛ otsu nikasemɔ ni okɛjɛ skul kɛba lɛ he nii, shi ofee emli fã pɛ lɛ, no hu? Ani esa akɛ okɛɛ akɛ ófee fɛɛ, kɛ́ ofeko nakai po?— Esa akɛ wɔkai Anania kɛ Safira he sane lɛ. Amɛwieee anɔkwale lɛ fɛɛ. Ni Nyɔŋmɔ tsɔɔ bɔ ni enɛ ehiii lɛ kɛtsɔ gbe ni egbe amɛ lɛ nɔ.

No hewɔ lɛ, yɛ nɔ fɛɛ nɔ ni ekolɛ wɔbaafee lɛ fɛɛ sɛɛ lɛ, kɛji akɛ wɔmale yɛ he lɛ, ebaafite sane lɛ kwraa ni esaaa akɛ wɔwieɔ anɔkwale fã ko kɛkɛ. Biblia lɛ kɛɔ akɛ: ‘Nyɛwiea anɔkwale.’ Ekɛɔ hu akɛ: “Nyɛkamalemalea nyɛhe.” Yehowa wieɔ anɔkwale be fɛɛ be, ni ekpaa wɔ gbɛ ni wɔfee nakai nɔŋŋ.—Efesobii 4:25; Kolosebii 3:9.

Esa akɛ wɔwie anɔkwale be fɛɛ be. No ji sane oti ni amaa nɔ mi yɛ 2 Mose 20:16; Abɛi 6:16-19; 12:19; 14:5; 16:6; kɛ Hebribii 4:13.