Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kasemɔ Nii Kɛjɛ Tsɔɔlɔ Kpele Lɛ Ŋɔɔ

 YITSO 9

Ehe Miihia Ni Wɔte Shi Wɔwo Kaai

Ehe Miihia Ni Wɔte Shi Wɔwo Kaai

ANI mɔ ko ebi ni ofee nɔ ko ni ejaaa pɛŋ?— Ani eka bo koni ofee nakai? Aloo ani ekɛɛ bo akɛ eji shwɛmɔ ko kɛkɛ, ni ákɛ ejeee efɔŋ akɛ ooofee nakai?— Kɛji akɛ mɔ ko kɛɛ wɔ nakai lɛ, belɛ eebɔ mɔdɛŋ ni eka wɔ.

Kɛ́ aaka wɔ lɛ, mɛni esa akɛ wɔfee? Ani esa akɛ wɔkpɛlɛ nɔ, ni wɔfee nɔ ni ejaaa lɛ?— No esaŋ Yehowa Nyɔŋmɔ hiɛ. Shi ani ole mɔ ni baaná miishɛɛ?— Hɛɛ, Satan Abonsam ji mɔ ni baaná miishɛɛ.

Satan ji Nyɔŋmɔ henyɛlɔ, ni Satan ji wɔ hu wɔhenyɛlɔ. Wɔnyɛɛɛ wɔna lɛ, ejaakɛ mumɔ ji lɛ. Shi ebaanyɛ ena wɔ. Gbi ko lɛ Abonsam kɛ Yesu, Tsɔɔlɔ Kpele lɛ wie, ni ebɔ mɔdɛŋ ni eka lɛ. Nyɛhaa wɔkwɛa nɔ ni Yesu fee. Kɛkɛ lɛ wɔbaale nɔ ni ja ni esa akɛ wɔfee kɛji aaka wɔ.

Mɛni ekolɛ Yesu je shishi ekai be ni abaptisi lɛ lɛ?

Yesu miisumɔ ni efee Nyɔŋmɔ suɔmɔnaa nii be fɛɛ be. Etsɔɔ enɛ yɛ faŋŋ mli kɛtsɔ Yordan Faa lɛ mli ni abaptisi lɛ yɛ lɛ nɔ. Yesu baptisimɔ lɛ sɛɛ nɔŋŋ ni Satan bɔ mɔdɛŋ koni eka Lɛ. Biblia lɛ kɛɔ akɛ, ‘agbele ŋwɛi naa’ aha Yesu. (Mateo 3:16) Enɛ baanyɛ atsɔɔ akɛ Yesu je shishi ekai emra be mli shihilɛ ni ekɛ Nyɔŋmɔ yɔɔ yɛ ŋwɛi lɛ fɛɛ.

 Yɛ Yesu baptisimɔ lɛ sɛɛ lɛ, etee ŋa ko nɔ koni eyajwɛŋ nibii ni eje shishi ekaiɔ lɛ ahe. Jetsɛremɔi kɛ jenamɔi gbii 40 ho. Yesu yeee nii yɛ nɛkɛ be nɛɛ mli fɛɛ, no hewɔ lɛ amrɔ nɛɛ hɔmɔ miiye lɛ waa. Yɛ nɛkɛ be nɛɛ mli Satan bɔ mɔdɛŋ koni eka Yesu lɛ.

Abonsam kɛ tɛi tsu nii koni ekɛka Yesu yɛ mɛɛ gbɛ nɔ?

Abonsam kɛɛ akɛ: “Kɛji Nyɔŋmɔ bi jio lɛ, kɛɛmɔ koni tɛi nɛɛ atsɔmɔ aboloo.” Kwɛ bɔ ni aboloo baaŋɔɔ waa aha yɛ nɛkɛ be nɛɛ mli! Shi ani kulɛ Yesu baanyɛ aha tɛi atsɔmɔ aboloo?— Hɛɛ, kulɛ ebaanyɛ efee. Mɛni hewɔ? Ejaakɛ Yesu ni ji Nyɔŋmɔ Bi lɛ, yɛ hewalɛi krɛdɛɛi komɛi.

Ani obaaha tɛ atsɔ aboloo kɛji akɛ Abonsam kɛɛ bo akɛ ofee nakai?— Hɔmɔ miiye Yesu. No hewɔ lɛ, kulɛ ani efeŋ nɔ ni ja akɛ eeefee enɛ shikome pɛ?— Yesu le akɛ ejaaa akɛ ekɛ ehewalɛ lɛ aaatsu nii yɛ nɛkɛ gbɛ nɔ. Yehowa kɛ nakai hewalɛi lɛ ha lɛ koni ekɛgbala gbɔmɛi kɛba Nyɔŋmɔ ŋɔɔ, shi jeee ni ekɛtsu nii kɛha lɛ diɛŋtsɛ esɛɛnamɔ.

No hewɔ lɛ, Yesu kɛɛ Satan nɔ ni aŋma yɛ Biblia lɛ mli lɛ moŋ, akɛ: ‘Jeee aboloo kɛkɛ haa gbɔmɔ yi náa wala, shi moŋ wiemɔ fɛɛ wiemɔ ni baa kɛjɛɔ Yehowa daaŋ lɛ ni.’ Yesu le akɛ nɔ ni saa Yehowa hiɛ ni eeefee lɛ he hiaa kwraa fe niyenii ni eeená eye.

 Shi Abonsam ka lɛ ekoŋŋ. Ekɛ Yesu tee Yerusalem, ni eha eyadamɔ sɔlemɔtsu lɛ yiteŋ he ni kwɔ fe fɛɛ lɛ nɔ. Kɛkɛ ni Satan kɛɛ akɛ: ‘Kɛji Nyɔŋmɔ bi ji bo lɛ, shɛ ohe ofɔ̃ kɛjɛ biɛ. Ejaakɛ aŋma akɛ, Nyɔŋmɔ bɔfoi haŋ oye ohe awui.’

Mɛni hewɔ Satan kɛɛ nakai?— Ekɛɛ nakai koni eha Yesu afee nɔ ko ni jwɛŋmɔ bɛ mli. Shi Yesu booo Satan toi ekoŋŋ. Ekɛɛ Satan akɛ: “Aŋma ekoŋŋ akɛ: ‘Kaaka [Yehowa, NW] o-Nyɔŋmɔ lɛ.’” Yesu le akɛ ejaaa akɛ eeeka Yehowa kɛtsɔ ewala ni ekɛaawo oshara mli lɛ nɔ.

Shi, Satan eŋmɛɛɛ he lolo. No sɛɛ lɛ, eŋɔ Yesu kɛtee gɔŋ ni kwɔ ko nɔ. Ni etsɔɔ lɛ je lɛŋ maŋtsɛyelii kɛ nɔyelii kɛ amɛ anunyam lɛ fɛɛ yɛ jɛmɛ. Kɛkɛ ni Satan kɛɛ Yesu akɛ: “Maŋɔ enɛɛmɛi fɛɛ mahao, kɛji okula shi ojá mi lɛ.”

Susumɔ nɔ ni Abonsam kɛhaa lɛ lɛ he okwɛ. Ani nɛkɛ gbɔmɛi amaŋtsɛyelii loo nɔyelii nɛɛ fɛɛ ji Satan nii diɛŋtsɛ?— Ojogbaŋŋ, Yesu ekɛɛɛ akɛ amɛjeee Satan nii. Eji amɛjeee Satan nii kulɛ, ebaawie. Hɛɛ, Satan ji je lɛŋ jeŋmaji lɛ fɛɛ anɔyelɔ diɛŋtsɛ. Biblia lɛ tsɛɔ lɛ po akɛ ‘je nɛŋ nɔyelɔ.’—Yohane 12:31.

Mɛni hewɔ Satan baanyɛ ni ekɛ nɛkɛ maŋtsɛyelii nɛɛ fɛɛ ahã Yesu lɛ?

Kɛji akɛ Abonsam wo bo shi akɛ ekɛ nɔ ko baaha bo kɛji akɛ ojá lɛ lɛ, mɛni obaafee?— Yesu le akɛ ebaafee nii ni ehiii akɛ eeejá Abonsam ni nɔ fɛɛ nɔ ni E-baaná lɛ kɔɔɔ he eko. No hewɔ lɛ, Yesu kɛɛ: ‘Jée jɛmɛ ni oya, Satan! Ejaakɛ Biblia lɛ kɛɔ akɛ Yehowa, o-Nyɔŋmɔ lɛ, ojá, ni lɛ kɛkɛ osɔmɔ!’—Mateo 4:1-10; Luka 4:1-13.

Kɛ́ aaka bo lɛ mɛni obaafee?

Wɔ hu wɔkɛ kaai kpeɔ. Ani ole ekomɛi?— Naa nɔkwɛmɔnɔ ko. Ekolɛ omami baashã keeki aloo ebaashĩ tatale akɛ daaŋjiemɔ nii. Ekolɛ ebaakɛɛ bo akɛ okaye eko kɛyashi niyeli be baashɛ dã. Shi hɔmɔ miiye bo waa, no hewɔ lɛ ekolɛ obaanu he akɛ esa akɛ oye eko. Ani obaabo omami toi?— Satan miisumɔ ni ofee mɔ ni booo lɛ toi.

 Kaimɔ Yesu. Lɛ hu hɔmɔ ye lɛ waa. Shi ele akɛ Nyɔŋmɔ hiɛ ni eeesa lɛ moŋ he hiaa fe niyeli. Kɛji akɛ obo omami toi lɛ, etsɔɔ akɛ otamɔ Yesu.

Ekolɛ gbekɛbii komɛi baakɛɛ bo koni omi tsofai komɛi. Amɛbaakɛɛ bo akɛ enɛ baaha onu he akɛ oyɛ miishɛɛ waa diɛŋtsɛ. Shi ekolɛ enɛ baanyɛ afee tsofa fɔŋ. Ebaaha ohe aye ni  ebaanyɛ egbe bo po. Aloo ekolɛ mɔ ko baaha bo zigaret, ni tsofai hu yɔɔ mli, ni ebaalaka bo koni oshɛre. Mɛni obaafee?—

Kaimɔ Yesu. Satan bɔ mɔdɛŋ koni eha Yesu kɛ ewala awo oshara mli kɛtsɔ kɛɛmɔ ni ekɛɛ lɛ akɛ etu kɛjɛ sɔlemɔtsu lɛ yiteŋ lɛ nɔ. Shi Yesu efeee nakai. Kɛji akɛ mɔ ko ka bo koni ofee nɔ ko ni yɔɔ oshara lɛ, mɛni obaafee?— Yesu booo Satan toi. Nakai nɔŋŋ esaaa akɛ oboɔ mɔ ko ni bɔɔ mɔdɛŋ ni elaka bo koni ofee nibii ni ejaaa lɛ toi.

Mɛni hewɔ ejaaa ákɛ akɛ amagai aaatsu nii yɛ jamɔ mli?

Gbi ko baaba ni abaakɛɛ bo akɛ ofee jamɔ nifeemɔ ko oha amaga ko, nɔ ko ni Biblia lɛ kɛɛ esaaa akɛ wɔfeɔ. (2 Mose 20:4, 5) Ebaanyɛ efee skul nifeemɔ lɛ eko. Ekolɛ abaakɛɛ bo akɛ, kɛji akɛ okɛɛ ofeee lɛ, onyɛŋ oya skul dɔŋŋ. Mɛni obaafee?—

Ewaaa akɛ ooofee nɔ ko ni ja ni mɔ fɛɛ mɔ miifee. Shi nɔ ni ja lɛ feemɔ baanyɛ afee nɔ ni wa waa kɛji akɛ mɛi krokomɛi miibɔ mɔdɛŋ ni amɛha wɔfee nɔ ni ejaaa lɛ. Amɛbaakɛɛ akɛ jeee akɛ nɔ ni amɛfeɔ lɛ ehiii moŋ. Shi sanebimɔ ni he hiaa lɛ ji akɛ, Mɛni Nyɔŋmɔ kɛɔ yɛ enɛ he? Lɛ ji mɔ ni le nɔ ni hi fe fɛɛ.

No hewɔ lɛ, yɛ nɔ fɛɛ nɔ ni mɛi krokomɛi aaawie lɛ fɛɛ sɛɛ lɛ, esaaa akɛ wɔfeɔ nibii ni Nyɔŋmɔ kɛɔ akɛ ejaaa lɛ kɔkɔɔkɔ. Enɛ baaha Nyɔŋmɔ mii ashɛ ehe be fɛɛ be, ni wɔsaŋ Abonsam hiɛ kɔkɔɔkɔ.

Obaanyɛ ona saji babaoo ni kɔɔ bɔ ni ooofee odamɔ kaai ni baaha ofee efɔŋ lɛ anaa lɛ yɛ Lala 1:1, 2; Abɛi 1:10, 11; Mateo 26:41; kɛ 2 Timoteo 2:22.

Ekrokromɛi Hu Nɛ

Ani Onanemɛi Miinyɛ Onɔ Koni Ofee Nibii Fɔji?

Kanemɔ koni ole nibii pɔtɛɛ ni obaafee kɛba nɔnyɛɛ lɛ shi loo ojie yɛ jɛmɛ kwraa.