Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kasemɔ Nii Kɛjɛ Tsɔɔlɔ Kpele Lɛ Ŋɔɔ

 YITSO 40

Bɔ Ni Wɔɔfee Ni Wɔhã Nyɔŋmɔ Aná Miishɛɛ

Bɔ Ni Wɔɔfee Ni Wɔhã Nyɔŋmɔ Aná Miishɛɛ

MƐNI wɔbaanyɛ wɔfee ni wɔha Nyɔŋmɔ aná miishɛɛ? Ani wɔbaanyɛ ni wɔke lɛ nɔ ko?— Yehowa kɛɔ akɛ: “Kooŋ looi fɛɛ lɛ minɔŋ.” Ekɛɔ hu akɛ: “Minɔ ji jwiɛtɛi lɛ, ni minɔ ji shika lɛ.” (Lala 24:1; 50:10; Hagai 2:8) Shi kɛlɛ, nɔ ko yɛ ni wɔbaanyɛ wɔkɛha Nyɔŋmɔ. Mɛni ji no?—

Yehowa ŋmɛɔ wɔ gbɛ koni wɔhala kɛji wɔbaasɔmɔ lɛ loo wɔsɔmɔŋ lɛ. Enyɛɛɛ wɔnɔ ni wɔfee nɔ ni etaoɔ ni wɔfee lɛ. Nyɛhaa wɔbɔa mɔdɛŋ ni wɔnu nɔ hewɔ ni Nyɔŋmɔ fee wɔ koni wɔhala kɛji wɔbaasɔmɔ lɛ loo wɔsɔmɔŋ lɛ lɛ shishi.

Ekolɛ ole nɔ ni robɔt ji. Eji tsɔne ko ni afee koni etsu nɔ fɛɛ nɔ ni efeelɔ lɛ taoɔ akɛ etsu lɛ. No hewɔ lɛ robɔt nyɛŋ ahala nɔ ni esumɔɔ ni efee. Kulɛ Yehowa baanyɛ afee wɔ fɛɛ tamɔ robɔt. Kulɛ ebaanyɛ ni efee wɔ koni wɔfee nɔ pɛ ni etaoɔ ni wɔfee lɛ. Shi Nyɔŋmɔ efeee nakai. Ani ole nɔ hewɔ?— Ojogbaŋŋ, shwɛmɔ nibii lɛ ekomɛi yɛ ni tamɔ robɔt pɛpɛɛpɛ. Kɛ anyɛ nɔ ko nɔ lɛ, shwɛmɔ nii lɛ feɔ nɔ pɛ ni mɔ ni fee amɛ lɛ eto he gbɛjianɔ ni amɛfee lɛ. Ani ona shwɛmɔ nii ko ni tamɔ nakai pɛŋ?— Bei pii lɛ,  ejeɔ mɛi atsine akɛ amɛkɛ shwɛmɔ nii ni feɔ nɔ̃ pɛ ni efeelɔ lɛ ekpɛ eyiŋ yɛ he, loo ni eto he gbɛjianɔ akɛ efee lɛ aaashwɛ. Nyɔŋmɔ sumɔɔɔ ni wɔbo lɛ toi tamɔ nɔ ni wɔji tsɔji ni ato wɔhe gbɛjianɔ akɛ wɔsɔmɔ lɛ. Yehowa miisumɔ ni wɔsɔmɔ lɛ ejaakɛ wɔsumɔɔ lɛ, ni ákɛ wɔmiisumɔ ni wɔbo lɛ toi.

Mɛni hewɔ ni Nyɔŋmɔ ebɔɔɔ wɔ tamɔ nɛkɛ robɔt nɛɛ lɛ?

Te osusuɔ akɛ wɔŋwɛi Tsɛ lɛ nuɔ he ehaa tɛŋŋ, kɛji wɔbo lɛ toi akɛni wɔmiisumɔ ni wɔfee nakai lɛ hewɔ?— Ojogbaŋŋ, te onifeemɔ saa ofɔlɔi ahe ehaa tɛŋŋ, kɛɛmɔ mi?— Biblia lɛ kɛɔ akɛ, bi nilelɔ “haa etsɛ náa miishɛɛ” shi bi kwashia lɛ, “ehaa enyɛ tsui yeɔ.” (Abɛi 10:1) Ani oyɔse akɛ omami kɛ opapa náa miishɛɛ kɛji ofee nɔ ni amɛkɛɔ bo akɛ ofee lɛ?— Shi kɛji obooo amɛ toi lɛ, te amɛnuɔ he amɛhaa tɛŋŋ?—

Te ooofee tɛŋŋ ni ohã Yehowa kɛ ofɔlɔi aná miishɛɛ lɛ?

Agbɛnɛ, ha wɔsusu Yehowa, wɔŋwɛi Tsɛ lɛ he wɔkwɛ. Ekɛɔ wɔ bɔ ni wɔɔfee ni wɔha ená miishɛɛ. Ofainɛ kɔ o-Biblia lɛ ni ogbele Abɛi 27:11. Nyɔŋmɔ kɛ wɔ miiwie yɛ jɛmɛ akɛ: “Mibi, feemɔ ohe nilelɔ, ni oha mitsui anyɔ mimli, ni maná hetoo maha mɔ ni bɔɔ mi ahora lɛ.” (Wɔma efã ko nɔ mi.) Ani onuɔ nɔ ni mɔ ko ni aaabɔ lɛ ahora lɛ tsɔɔ lɛ shishi?— Ojogbaŋŋ, mɔ ko baanyɛ abɔ bo ahora kɛtsɔ ŋmɔ ni eŋmɔɔ bo kɛ kɛɛmɔ ni ekɛɛɔ akɛ onyɛɛɛ ofee nɔ ni okɛɛ obaanyɛ ofee lɛ nɔ. Mɛɛ gbɛ nɔ Satan bɔɔ Yehowa ahora yɛ?— Ha wɔkwɛ.

 Kaimɔ akɛ, wɔkase yɛ wolo nɛɛ Yitso 8 lɛ mli akɛ, Satan sumɔɔ ni efee Klɛŋklɛŋ Mɔ, ni akɛ eetao ni mɛi fɛɛ abo lɛ toi. Satan kɛɔ akɛ mɛi jáa Yehowa yɛ naanɔ wala ni Yehowa kɛbaaha amɛ kɛji amɛjá lɛ lɛ hewɔ. Beni Satan ha Adam kɛ Hawa gbo Yehowa nɔ toi sɛɛ lɛ, Satan tswa Nyɔŋmɔ mpoa. Ekɛɛ Nyɔŋmɔ akɛ: ‘Gbɔmɛi sɔmɔɔ bo yɛ nɔ ni ohaa amɛ lɛ hewɔ. Bo lɛ ha mi hegbɛ lɛ, ni matsi mɔ fɛɛ mɔ kɛjɛ ohe.’

Be ni Adam kɛ Hawa efee esha sɛɛ lɛ, Satan tswa Yehowa mpoa yɛ mɛɛ gbɛ nɔ?

Eji anɔkwale akɛ nakai wiemɔ lɛ pɛpɛɛpɛ ejeee kpo yɛ Biblia lɛ mli. Shi kɛji wɔkane nuu ni ji Hiob lɛ he sane lɛ, ebafeɔ faŋŋ akɛ Satan kɛɛ nɔ ko ni tamɔ nakai etsɔɔ Nyɔŋmɔ. Ákɛ Hiob yeɔ Nyɔŋmɔ anɔkwa aloo eyeee lɛ anɔkwa lɛ ji sane ko ni he hiaa Satan kɛ Yehowa fɛɛ. Ha wɔgbele wɔ-Biblia lɛ yɛ Hiob yitso 12 ni wɔkwɛ nɔ ni ba.

Kadimɔ yɛ Hiob yitso 1 lɛ mli akɛ, beni ŋwɛibɔfoi lɛ ba Yehowa ŋɔɔ lɛ, no mli lɛ Satan yɛ jɛmɛ. No hewɔ lɛ Yehowa bi Satan akɛ: “Nɛgbɛ ojɛ?” Satan ha hetoo akɛ, ejɛ shikpɔŋ lɛ  nɔ shisharamɔ. No hewɔ lɛ Yehowa bi lɛ akɛ: ‘Ani oyoo akɛ Hiob sɔmɔɔ mi, ni efeee nɔ fɔŋ ko?’—Hiob 1:6-8.

Amrɔ nɔŋŋ kɛkɛ ni Satan bɔi naajiemɔ. ‘Hiob jáa bo akɛni nɔ ko gbaaa enaa lɛ hewɔ. Kɛji okpa ehe buu ni okpa lɛ jɔɔmɔ lɛ, ebaalomɔ bo yɛ ohiɛ.’ No hewɔ lɛ Yehowa ha hetoo akɛ: ‘Ojogbaŋŋ Satan, obaanyɛ ofee lɛ nɔ fɛɛ nɔ ni osumɔɔ, shi kaaye Hiob diɛŋtsɛ awui ko.’—Hiob 1:9-12.

Mɛni Satan fee?— Eha mɛi yaju Hiob tsinai kɛ tejii ni eyɔɔ lɛ, ni amɛgbe mɛi ni kwɛɔ kooloi lɛ anɔ lɛ. No sɛɛ lɛ, sarawa gba ni egbe tooi ni eyɔɔ lɛ kɛ mɛi ni kwɛɔ amɛnɔ lɛ. Sɛɛ mli lɛ, gbɔmɛi baju yoomai ni eyɔɔ lɛ ni amɛgbe mɛi ni kwɛɔ amɛnɔ lɛ. Yɛ naagbee lɛ, Satan ha ahum ko tswa ni ekumɔ tsũ ni Hiob bihii lɛ yɔɔ mli lɛ eshwie shi ni egbe amɛ fɛɛ. Yɛ enɛɛmɛi fɛɛ sɛɛ lɛ, Hiob tee nɔ esɔmɔ Yehowa.—Hiob 1:13-22.

Beni Yehowa na Satan ekoŋŋ lɛ, Yehowa tsɔɔ akɛ Hiob kã he eji anɔkwafo lolo. Satan jie naa ni ekɛɛ: ‘Kɛji oha miye egbɔmɔtso awui lɛ ebaakwa bo yɛ ohiɛ.’ No hewɔ lɛ Yehowa ha Satan ye Hiob gbɔmɔtso awui, shi ebɔ lɛ kɔkɔ ni ekagbe Hiob.

Hiob to etsui shi yɛ mɛni mli, ni mɛni hewɔ enɛ hã Nyɔŋmɔ ná miishɛɛ lɛ?

 Satan tswa Hiob nɔ̃, ni no hewɔ lɛ egbɔmɔtso muu lɛ fɛɛ batsɔ faji. Faji nɛɛ jeɔ fũ waa akɛ, mɔ ko mɔ ko sumɔɔɔ ni ebɛŋkɛ lɛ. Hiob ŋa lɛ po kɛɛ lɛ akɛ: “Kwa Nyɔŋmɔ ni ogbo!” Mɛi ni kwa amɛfee amɛhe Hiob nanemɛi lɛ basara lɛ, ni amɛwo eshihilɛ lɛ mli wu kwraa moŋ kɛtsɔ kɛɛmɔ ni amɛkɛɛ akɛ, ekolɛ nibii fɔji ni efee lɛ hewɔ ni ekɛ haomɔ ni tamɔ nɛkɛ kpeɔ lɛ nɔ. Shi kɛlɛ, yɛ haomɔ kɛ piŋmɔ ni Satan kɛba Hiob nɔ lɛ fɛɛ sɛɛ lɛ, Hiob tee nɔ esɔmɔ Yehowa yɛ anɔkwayeli mli.—Hiob 2:1-13; 7:5; 19:13-20.

Te osusuɔ akɛ Yehowa nu he eha tɛŋŋ yɛ Hiob anɔkwayeli lɛ hewɔ lɛ?— Eha ená miishɛɛ ejaakɛ Yehowa baanyɛ ni ekɛɛ Satan akɛ: ‘Kwɛmɔ Hiob! Esɔmɔɔ mi ejaakɛ eesumɔ ni efee nakai.’ Ani obaafee tamɔ Hiob, mɔ ni Yehowa baanyɛ ni ekɛ enine atsɔɔ akɛ nɔkwɛmɔnɔ ni ha ayoo Satan akɛ amalelɔ lɛ?— Yɛ anɔkwale mli lɛ, ákɛ wɔbaaná hetoo wɔha Satan wiemɔ, akɛ ebaanyɛ ni etsi mɛi fɛɛ kɛjɛ Yehowa sɔɔmɔ he lɛ, ji hegbɛ diɛŋtsɛ. Eka shi faŋŋ akɛ Yesu bu enɛ feemɔ akɛ eji hegbɛ.

Tsɔɔlɔ Kpele lɛ eŋmɛɛɛ Satan gbɛ ko kwraa ni E-ha efee nɔ ko ni ejaaa. Bo lɛ susumɔ bɔ ni enɔkwɛmɔnɔ lɛ ha e-Tsɛ ná miishɛɛ lɛ he okwɛ! Yehowa baanyɛ ni ekɛ enine atsɔɔ Yesu nɔ, ni eha Satan hetoo akɛ: ‘Kwɛmɔ mibi lɛ! Étee nɔ ehiɛ anɔkwa ni eyeɔ yɛ emuuyeli mli kɛhaa mi lɛ mli ejaakɛ esumɔɔ mi!’ Agbɛnɛ, susumɔ miishɛɛ ni Yesu ná yɛ e-Tsɛ tsui ni eha enyɔ emli hewɔ lɛ hu he okwɛ. Yɛ nakai miishɛɛ lɛ hewɔ lɛ, Yesu to etsui shi yɛ sɛŋmɔtso nɔ gbele po mli.—Hebribii 12:2.

Ani oosumɔ ni ofee tamɔ wɔ-Tsɔɔlɔ Kpele lɛ ni oha Yehowa aná miishɛɛ?— Belɛ yaa nɔ ni okase nɔ ni Yehowa taoɔ akɛ ofee lɛ he nii, ni oha ená miishɛɛ kɛtsɔ efeemɔ nɔ!

Kanemɔ nɔ ni Yesu fee ni eha Nyɔŋmɔ ná miishɛɛ kɛ nɔ ni ebaabi ni wɔ hu wɔfee lɛ, yɛ Abɛi 23:22-25; Yohane 5:30; 6:38; 8:28; kɛ 2 Yohane 4.

Ekrokromɛi Hu Nɛ

Wɔnifeemɔi Baanyɛ Adɔ Nyɔŋmɔ—Bɔ ni Wɔbaafee Wɔha Ená Miishɛɛ

Ani ole akɛ onifeemɔ baanyɛ adɔ Yehowa loo ebaaha ená miishɛɛ? Kanemɔ ni ona bɔ ni Adam kɛ Hawa fee Yehowa nidɔɔnii.