Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kasemɔ Nii Kɛjɛ Tsɔɔlɔ Kpele Lɛ Ŋɔɔ

 YITSO 42

Nɔ Hewɔ Ni Esa Akɛ Wɔtsu Nii

Nɔ Hewɔ Ni Esa Akɛ Wɔtsu Nii

MƐNI osumɔɔ fe fɛɛ, ákɛ otsu nii loo oshwɛ?— Yɛ anɔkwale mli lɛ, nɔ fɔŋ ko bɛ shwɛmɔ he. Biblia lɛ wieɔ Yerusalem he akɛ ‘eblohui lɛ amli eyi tɔ kɛ gbekɛbii hii kɛ gbekɛbii yei sɔŋŋ ni miishwɛ.’—Zakaria 8:5.

Tsɔɔlɔ Kpele lɛ ná gbekɛbii ni miishwɛ lɛ akwɛmɔ he miishɛɛ. Dani eeeba shikpɔŋ nɔ lɛ, ekɛɛ akɛ: “Miyɛ [Nyɔŋmɔ] emasɛi akɛ ŋaalɔ; . . . mishwɛɔ yɛ ehiɛ be fɛɛ be.” Kadimɔ akɛ Yesu kɛ Yehowa tsu nii yɛ ŋwɛi. Ni beni eyɔɔ jɛmɛ lɛ, ekɛɛ akɛ: “Mináa gbɔmɛi abii ahe miishɛɛ.” Hɛɛ, taakɛ wɔtsɔ hiɛ wɔkase lɛ, Tsɔɔlɔ Kpele lɛ yɛ mɔ fɛɛ mɔ he miishɛɛ waa, ni gbekɛbii fata he.—Abɛi 8:30, 31.

Mɛni Tsɔɔlɔ Kpele lɛ ná he miishɛɛ dani eba shikpɔŋ nɔ?

 Ani osusuɔ akɛ Yesu shwɛ beni eji gbekɛ lɛ?— Ekolɛ efee nakai. Shi akɛni ehi shi akɛ ‘nitsulɔ ŋaalɔ’ yɛ ŋwɛi hewɔ lɛ, ani etsu nii yɛ shikpɔŋ nɔ hu?— Ojogbaŋŋ, atsɛ Yesu akɛ ‘kapintɛfonyo lɛ bi.’ Shi atsɛ lɛ hu akɛ ‘kapintɛfonyo lɛ.’ Mɛni enɛ tsɔɔ?— Ekolɛ Yosef, ní tsɔse Yesu akɛ ebi lɛ tsɔɔ lɛ. No hewɔ lɛ, Yesu hu batsɔ kapintɛfonyo.—Mateo 13:55; Marko 6:3.

Mɛɛ kapintɛfonyo nɛkɛ Yesu ji?— Akɛni eji nitsulɔ ŋaalɔ yɛ ŋwɛi hewɔ lɛ, ani osusuuu akɛ ebatsɔ kapintɛfonyo ni he esa hu yɛ shikpɔŋ nɔ?— Susumɔ bɔ ni kapintɛfonyo ni mɔ ko ji yɛ nakai be lɛ mli lɛ ji nitsumɔ ni wa lɛ he okwɛ. Ekolɛ Yesu baaya ayafo tso, ni ebaafolɔ tso lɛ mli kukuji, ni ebaatere tso lɛ  kɛba shia, kɛkɛ lɛ ebaasaa tso lɛ he koni ekɛkpɛ okpɔlɔi, sɛii kakadaji, kɛ nibii krokomɛi.

Ani osusuɔ akɛ nitsumɔ nɛɛ ha Yesu tsui nyɔ emli?— Ani obaaná miishɛɛ kɛ onyɛɔ okpɛɔ okpɔlɔi kɛ sɛii kɛ nibii krokomɛi ni mɛi kɛtsuɔ nii?— Biblia lɛ kɛɔ akɛ ehi akɛ mɔ ko “mii aaashɛ ehe yɛ enitsumɔi amli.” Nitsumɔ haa mɔ náa miishɛɛ ko ni onáŋ yɛ shwɛmɔ mli.—Jajelɔ 3:22.

Yɛ anɔkwale mli lɛ, nitsumɔ hi kɛha wɔjwɛŋmɔi kɛ wɔgbɔmɔtsei. Gbekɛbii pii taa shi kɛkɛ ni amɛkwɛɔ TV loo amɛkɛ vidioi shwɛɔ. Ehaa amɛshwiɔ agboi ni amɛgbɔjɔɔ, ni amɛnáaa miishɛɛ kwraa. Ni amɛhaaa mɛi krokomɛi aná miishɛɛ hu. Mɛni ehe hiaa ni wɔfee koni wɔná miishɛɛ?—

Wɔkase yɛ wolo nɛɛ Yitso 17 lɛ mli akɛ nii ni akɛkeɔ mɔ kɛ nii ni afeɔ koni akɛye abua mɛi krokomɛi lɛ haa mɔ náa miishɛɛ. (Bɔfoi lɛ Asaji 20:35) Biblia lɛ tsɛɔ Yehowa akɛ ‘miishɛɛ Nyɔŋmɔ.’ (1 Timoteo 1:11) Ni tamɔ bɔ ni wɔkane yɛ Abɛi lɛ, Yesu ‘mii shɛɔ ehe daa yɛ ehiɛ.’ Mɛni hewɔ Yesu yɔɔ miishɛɛ lɛ?— Ojogbaŋŋ, etsɔɔ yiŋtoi lɛ ekome mli beni ekɛɛ akɛ: “Mitsɛ miitsu nii kɛbashi be nɛɛ, no hewɔ ni mi hu mitsuɔ lɛ.”—Yohane 5:17.

Beni Yesu yɔɔ shikpɔŋ nɔ lɛ, ekɛ ewala be fɛɛ tsuuu nii akɛ kapintɛfonyo. Yehowa Nyɔŋmɔ yɛ nitsumɔ krɛdɛɛ ko kɛha lɛ ni ebaatsu yɛ shikpɔŋ nɔ. Ani ole nɔ ni ji?— Yesu kɛɛ akɛ: “Esa akɛ miyajajeɔ Nyɔŋmɔ maŋtsɛyeli lɛ he sanekpakpa lɛ mitsɔɔ maji krokomɛi hu, ejaakɛ no hewɔ atsu mi.” (Luka 4:43) Bei komɛi, kɛ́ Yesu shiɛ etsɔɔ mɛi lɛ, amɛheɔ lɛ amɛyeɔ, ni amɛkɛɔ mɛi krokomɛi nibii ni ekɛɛ amɛ lɛ, tamɔ bɔ ni Samaria yoo ni onaa lɛ yɛ biɛ nɛɛ fee lɛ.—Yohane 4:7-15, 27-30.

Mɛɛ nitsumɔi srɔtoi enyɔ Yesu tsu be ni eyɔɔ shikpɔŋ nɔ lɛ?

Te Yesu nuɔ nitsumɔ ni etsuɔ nɛɛ he ehaa tɛŋŋ? Ani osusuɔ akɛ eesumɔ ni efee nakai?— Yesu kɛɛ akɛ: “Miŋmãa ji akɛ mafee mɔ ni  tsu mi lɛ suɔmɔnaa nii, ni magbe enitsumɔ lɛ naa.” (Yohane 4:34) Shii enyiɛ osumɔɔ ni oye niyenii ni ŋɔɔ onaa fe fɛɛ lɛ?— Enɛ haa onaa bɔ ni Yesu sumɔɔ nitsumɔ ni Nyɔŋmɔ kɛha lɛ akɛ etsu lɛ.

Nyɔŋmɔ fee wɔ koni wɔná miishɛɛ kɛji akɛ wɔmiikase bɔ ni atsuɔ nii ahaa. Ekɛɔ akɛ nii ni E-kɛke adesa ji ni “emii ashɛ yɛ edeŋmegbomɔ mli.” No hewɔ lɛ kɛ okase bɔ ni atsuɔ nii beni odako lɛ, obaaná miishɛɛ waa yɛ owala shihilɛ be fɛɛ mli.—Jajelɔ 5:18.

No etsɔɔɔ akɛ gbekɛ baanyɛ atsu onukpa nitsumɔ, shi wɔ fɛɛ wɔbaanyɛ wɔtsu nitsumɔ ko. Ekolɛ ofɔlɔi baatsu nii daa koni amɛná shika, bɔni afee ni nyɛweku lɛ aná niyenii ni amɛbaaye kɛ shia ni amɛbaahi mli. Ni taakɛ esa akɛ ole lɛ, nitsumɔ babaoo yɛ ni ehe miihia ni atsu yɛ shia lɛ mli bɔni afee ni shia lɛ he atse ni efee falefale.

Mɛɛ nitsumɔ ni he baanyɛ aba sɛɛnamɔ kɛha weku muu lɛ fɛɛ yɔɔ ni obaanyɛ otsu?— Obaanyɛ oye obua ni ato okpɔlɔ lɛ, oshá tsɛŋsii amli, oyatsi jwɛi oshwie, osaa otsũ mli, ni oloo oshwɛmɔ nibii lɛ kɛwo hei ni akɛwoɔ. Ekolɛ oofee nibii nɛɛ ateŋ ekomɛi momo. Nakai nitsumɔ lɛ ji jɔɔmɔ diɛŋtsɛ kɛha weku lɛ.

Mɛni hewɔ ehe hiaa ni okɛ oshwɛmɔ nii lɛ ato kɛji okɛshwɛ́ ogbe naa lɛ?

Ha wɔkwɛ bɔ ni nitsumɔ ni tamɔ nakai lɛ ji jɔɔmɔ ha. Esa akɛ okɛ shwɛmɔ nii awo hei ni akɛtoɔ kɛ́ okɛshwɛ ogbe naa. Mɛni hewɔ obaakɛɛ akɛ enɛ he hiaa lɛ?— Eyeɔ ebuaa ni ehaa shia lɛ mli tseɔ, ni ebaanyɛ etsĩ oshara naa hu. Kɛ́ okɛ oshwɛmɔ nii lɛ etooo lɛ, ekolɛ omami baaba tsũ lɛ mli gbi ko ni ehiɛ nibii ni ebaanaa eko nɔ. Ekolɛ ebaashane ni ebaagbee shi ni ebaapila. Ekolɛ ehe baahia po ni akɛ lɛ aya helatsamɔhe. Ani no ebafeŋ nɔ ko ni ehiii kwraa?— No hewɔ lɛ, kɛ́ okɛ oshwɛmɔ nii lɛ to beni okɛshwɛ ogbe naa lɛ, ebafeɔ jɔɔmɔ kɛhaa mɔ fɛɛ mɔ.

Gbekɛbii yɛ nitsumɔ kroko hu. Ákɛ nɔkwɛmɔnɔ lɛ, skul nifeemɔ. Okaseɔ bɔ ni akaneɔ nii ahaa yɛ skul. Gbekɛbii komɛi náa nikanemɔ  he miishɛɛ, shi mɛi krokomɛi kɛɔ akɛ ewa tsɔ̃. Kɛji akɛ kɛjɛ shishijee lɛ etamɔ nɔ ni wa po lɛ, kɛ́ okase bɔ ni akaneɔ nii jogbaŋŋ lɛ obaaná miishɛɛ. Kɛ́ ole bɔ ni akaneɔ nii ahaa lɛ, nibii babaoo yɛ ni yɔɔ miishɛɛ ni obaanyɛ okase. Obaanyɛ okane Nyɔŋmɔ diɛŋtsɛ wolo lɛ ni ji Biblia lɛ po bo diɛŋtsɛ. No hewɔ lɛ, kɛ́ otsu oskul nifeemɔi lɛ ahe nii jogbaŋŋ lɛ, sɛɛnamɔ baa he diɛŋtsɛ, aloo jeee nakai?—

Mɛi komɛi yɛ ni amɛjoɔ nitsumɔ naa foi. Ekolɛ ole mɔ ko ni feɔ nakai. Shi akɛni Nyɔŋmɔ fee wɔ koni wɔtsu nii hewɔ lɛ, esa akɛ wɔkase bɔ ni wɔbaafee ni wɔná he miishɛɛ. Te Tsɔɔlɔ Kpele lɛ ná enitsumɔ lɛ he miishɛɛ eha tɛŋŋ?— Etamɔ nɔ ni eeye niyenii ni ŋɔɔ enaa waa. Ni mɛɛ nitsumɔ he ewieɔ lɛ?— Mɛi krokomɛi ni egbaa amɛ Yehowa Nyɔŋmɔ he sane, ní ekɛɔ amɛ bɔ ni amɛbaafee ni amɛná naanɔ wala.

No hewɔ lɛ naa nɔ ko ni baaye abua wɔ koni wɔná nitsumɔ he miishɛɛ. Bi ohe akɛ, ‘Mɛni hewɔ ehe hiaa ni atsu nitsumɔ nɛɛ?’ Kɛ́ ole nɔ hewɔ ni nɔ ko he hiaa lɛ, ewaaa kwraa akɛ obaafee. Ni kɛ́ nitsumɔ lɛ da aloo edaaa hu lɛ, tsu lɛ jogbaŋŋ. Kɛ́ ofee nakai lɛ, obaaná bo diɛŋtsɛ onitsumɔ lɛ he miishɛɛ tamɔ wɔ-Tsɔɔlɔ Kpele lɛ pɛpɛɛpɛ.

Biblia lɛ baanyɛ aye abua mɔ koni mɔ lɛ atsɔ nitsulɔ kpakpa. Kanemɔ nɔ ni ekɛɔ lɛ yɛ Abɛi 10:4; 22:29; Jajelɔ 3:12, 13; kɛ Kolosebii 3:23.