Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kasemɔ Nii Kɛjɛ Tsɔɔlɔ Kpele Lɛ Ŋɔɔ

 YITSO 21

Ani Esa Akɛ Wɔshwã Yɛ Nɔ Ko He?

Ani Esa Akɛ Wɔshwã Yɛ Nɔ Ko He?

ÁKƐ aaashwã lɛ tsɔɔ mɛni? Ani ole?— Naa nɔkwɛmɔnɔ ko. Ani obɔ mɔdɛŋ akɛ obaafee nɔ ko ni oleee efeemɔ jogbaŋŋ pɛŋ? Ekolɛ obɔ mɔdɛŋ ni otswa bɔɔl ko. Aloo ekolɛ obɔ mɔdɛŋ ni otũ olu kpãa. Ani mɔ ko kɛɛ akɛ: “Ha! Ha! Haa! Manyɛ mafee enɛ jogbaŋŋ fe bo”?— Ojogbaŋŋ, nakai mɔ lɛ miishwã.

Kɛ́ mɛi komɛi fee nakai lɛ te onuɔ he ohaa tɛŋŋ? Ani osumɔɔ?— No lɛ, te osusuɔ akɛ mɛi krokomɛi baanu he aha tɛŋŋ, kɛ́ bo hu oshwã yɛ ohe lɛ?— Ani eji sane kpakpa akɛ obaakɛɛ mɔ ko akɛ, “Mihi fe bo”?— Ani Yehowa sumɔɔ mɛi ni feɔ nakai lɛ?—

Tsɔɔlɔ Kpele lɛ le mɛi ni susu akɛ amɛhi fe mɛi krokomɛi lɛ. Amɛshwãa, loo amɛpupuuɔ amɛhe ni amɛbuuu mɛi krokomɛi. No hewɔ lɛ, gbi ko lɛ, Yesu gba amɛ sane ko, koni ekɛtsɔɔ amɛ bɔ ni ehiii kwraa akɛ amɛaapupuu amɛhe. Nyɛhaa wɔboa toi.

Sane lɛ kɔɔ Farisifonyo ko kɛ toohelɔ ko he. Agbɛnɛ, Farisifoi lɛ ji jamɔ mli nitsɔɔlɔi, ni bei pii lɛ amɛfeɔ amɛhe tamɔ nɔ ni amɛja loo amɛyɛ krɔŋkrɔŋ fe mɛi krokomɛi. Farisifonyo ni yɔɔ Yesu sane lɛ mli lɛ tee Nyɔŋmɔ sɔlemɔwe lɛ yɛ Yerusalem koni eyasɔle.

Mɛni hewɔ Nyɔŋmɔ hiɛ sɔ toohelɔ lɛ shi jeee Farisifonyo lɛ?

Yesu kɛɛ akɛ toohelɔ ko hu tee sɔlemɔwe lɛ koni eyasɔle. Mɛi pii sumɔɔɔ toohelɔi asane. Amɛnuɔ he akɛ toohelɔi miibɔ mɔdɛŋ ni amɛshishiu amɛ. Ni eji anɔkwale akɛ toohelɔi pii yeee anɔkwa be fɛɛ be.

 Farisifonyo lɛ je sɔlemɔ shishi yɛ sɔlemɔwe lɛ kɛmiiha Nyɔŋmɔ akɛ: ‘Oo Nyɔŋmɔ, miida bo shi akɛ jeee eshafeelɔ ji mi tamɔ mɛi krokomɛi. Mishishiuuu mɔ ko ni mifeee nibii fɔji. Mitamɔɔɔ toohelɔ lɛ ni damɔ jɛmɛ lɛ. Jalɔ ji mi. Miyeee niyenii shii enyɔ yɛ otsi mli koni maná bei pii ni mikɛsusu ohe. Ni mijaa nibii fɛɛ ni mináa lɛ mli nyɔŋma, ni mikɛ emli ekome keɔ sɔlemɔwe lɛ.’ Farisifonyo lɛ susu akɛ ehi waa fe mɛi krokomɛi, aloo jeee nakai?— Ni ekɛɛ Nyɔŋmɔ nakai hu.

Shi toohelɔ lɛ tamɔɔɔ nakai. Ewooo ehiɛ nɔ ekwɛɛɛ ŋwɛi po beni esɔleɔ lɛ. Eyadamɔ sɛɛ shɔŋŋ ni ema eyitso shi. Toohelɔ lɛ he eshai lɛ miidɔ lɛ waa, ni ekɛ awerɛho shimɔ etsitsi. Ebɔɔɔ mɔdɛŋ akɛ eeekɛɛ Nyɔŋmɔ bɔ ni eji gbɔmɔ kpakpa ha. Shi moŋ esɔle akɛ: ‘Oo Nyɔŋmɔ, naa mi eshafeelɔ lɛ mɔbɔ.’

Hii enyɔ nɛɛ ateŋ namɔ osusuɔ akɛ esa Nyɔŋmɔ hiɛ? Ani Farisifonyo lɛ, mɔ ni susu akɛ eja lɛ? Aloo toohelɔ lɛ, mɔ ni ye awerɛho yɛ ehe eshai ahe lɛ?—

Yesu kɛɛ akɛ toohelɔ lɛ ji mɔ ni sa Nyɔŋmɔ hiɛ. Mɛni hewɔ? Yesu tsɔɔ mli akɛ: ‘Ejaakɛ mɔ fɛɛ mɔ ni haa mɛi susuɔ akɛ ehi fe mɛi krokomɛi lɛ abaaba lɛ shi. Shi mɔ ni baa ehe shi lɛ abaawó enɔ.’—Luka 18:9-14.

Mɛɛ nikasemɔ Yesu tsɔɔ yɛ esane lɛ mli lɛ?— Eetsɔɔ akɛ ehiii akɛ wɔɔsusu akɛ wɔhi fe mɛi krokomɛi.  Ekolɛ wɔkɛɛŋ akɛ wɔsusuɔ akɛ nakai wɔji, shi, bɔ ni wɔfeɔ wɔnii wɔhaa lɛ baanyɛ atsɔɔ akɛ wɔsusuɔ akɛ wɔhi fe mɛi krokomɛi. Ani ófee onii yɛ nakai gbɛ nɔ pɛŋ?— Susumɔ bɔfo Petro he okwɛ.

Beni Yesu kɛɛ ebɔfoi lɛ akɛ, kɛ́ amɔ lɛ lɛ amɛ fɛɛ amɛbaajo foi amɛshi lɛ lɛ, Petro shwã akɛ: ‘Kɛ́ mɔ fɛɛ mɔ shi bo po lɛ, mi lɛ mishiŋ bo kɔkɔɔkɔ!’ Shi Petro sane lɛ jeee anɔkwale. Ehé lɛ diɛŋtsɛ ehe eye tsɔ. Ejo foi eshi Yesu. Shi eku esɛɛ, taakɛ wɔbaakase yɛ wolo nɛɛ Yitso 30 lɛ.—Mateo 26:31-33.

Nyɛhaa wɔkwɛa ŋmɛnɛŋmɛnɛ beaŋ nɔkwɛmɔnɔ ko. Ekolɛ aabi bo kɛ mɔ ni okɛ lɛ yɔɔ klas kome lɛ saji komɛi. Mɛni obaafee kɛji akɛ onyɛɔ ohaa sanebimɔi lɛ ahetoo amrɔ nɔŋŋ, yɛ be mli ni nikaselɔ kroko lɛ nyɛɛɛ afee nakai? Kɛ́ ole hetooi lɛ, ehaa onáa miishɛɛ. Shi ani ebaafee nɔ̃ kpakpa akɛ okɛ ohe aaato mɔ ni nyɛɛɛ aha hetoo oya lɛ he?— Ani ehi akɛ ooobɔ mɔdɛŋ ni ofee ohe tamɔ nɔ ni ole nii fe lɛ kɛtsɔ mɔ kroko lɛ ni oooha efee tamɔ nɔ ni eleee nɔ ko nɔ ko lɛ nɔ?—

Nakai Farisifonyo lɛ fee. Eshwã akɛ ehi fe toohelɔ lɛ. Shi Tsɔɔlɔ Kpele lɛ kɛɛ akɛ Farisifonyo lɛ sane lɛ jeee anɔkwale. Eji anɔkwale akɛ mɔ ko baanyɛ afee nɔ ko jogbaŋŋ fe mɔ kroko. Shi no etsɔɔɔ akɛ eji gbɔmɔ kpakpa diɛŋtsɛ.

Ani nii ni ole babaoo fe mɔ kroko lɛ haa ofeɔ gbɔmɔ kpakpa?

No hewɔ lɛ, kɛ́ wɔle nii waa fe mɔ kroko lɛ, ani esa akɛ wɔkɛshwã lo?— Susumɔ he okwɛ. Ani wɔ wɔbɔ wɔ diɛŋtsɛ wɔjwɛŋmɔ loo ansɔ̃ lɛ?— Dabi, Nyɔŋmɔ ji mɔ ni kɛ ansɔ̃ ha wɔteŋ mɔ fɛɛ mɔ. Ni wɔkase nibii ni wɔle lɛ ateŋ babaoo kɛjɛ mɔ ko ŋɔɔ. Ekolɛ wɔkane kɛjɛ wolo mli. Aloo ekolɛ mɔ ko gba wɔ. Kɛji akɛ wɔ diɛŋtsɛ wɔna sane ko naa po lɛ, mɛɛ gbɛ nɔ wɔtsɔ wɔfee enɛ yɛ?— Hɛɛ, kɛtsɔ ansɔ̃ ni Nyɔŋmɔ kɛha wɔ lɛ kɛ nitsumɔ nɔ.

 Kɛ́ mɔ ko bɔ mɔdɛŋ waa lɛ, nɔ ni hi ji ni okɛɛ nɔ ko ni baawo lɛ hewalɛ. Kɛɛmɔ lɛ akɛ osumɔɔ nɔ ni efee lɛ. Ekolɛ obaanyɛ oye obua lɛ po koni efee lɛ jogbaŋŋ. Nakai ji bɔ ni obaasumɔ ni mɛi afee aha bo, aloo jeee nakai?—

Mɛni hewɔ esaaa akɛ wɔshwãa kɛ́ wɔhe wa fe mɔ kroko lɛ?

Mɛi komɛi ahe wa fe mɛi krokomɛi. Kɛ́ ohe wa fe onyɛmi nuu loo onyɛmi yoo lɛ, belɛ mɛni? Ani esa akɛ okɛ enɛ ashwã?— Dabi kwraa. Niyenii ni wɔyeɔ lɛ haa wɔhe waa. Ni Nyɔŋmɔ kɛ hulu kɛ nugbɔ ni nɛɔ kɛ nibii krokomɛi fɛɛ ni he hiaa koni eha niyenii aba haa, aloo jeee nakai efeɔ?— No hewɔ lɛ, Nyɔŋmɔ ji mɔ ni esa akɛ wɔda lɛ shi kɛ́ wɔhe wa.—Bɔfoi lɛ Asaji 14:16, 17.

Wɔteŋ mɔ ko mɔ ko sumɔŋ ni enu ni mɔ ko miishwã yɛ lɛ diɛŋtsɛ ehe, aloo wɔsumɔɔ nakai?— Nyɛhaa wɔkaia Yesu wiemɔi lɛ: ‘Bɔ ni osumɔɔ ni mɛi afee aha bo lɛ, bo hu feemɔ nakai nɔŋŋ oha amɛ.’ Kɛ́ wɔfee nakai lɛ, wɔfeŋ tamɔ Farisifonyo lɛ ni shwã yɛ lɛ diɛŋtsɛ ehe yɛ sane ni Tsɔɔlɔ Kpele lɛ gba lɛ mli lɛ.—Luka 6:31.

 Be ko lɛ mɔ ko tsɛ́ Yesu akɛ mɔ kpakpa. Ani Tsɔɔlɔ Kpele lɛ kɛɛ akɛ, ‘Hɛɛ, mɔ kpakpa ji mi’?— Dabi, ekɛɛɛ nakai. Shi moŋ ekɛɛ akɛ: “Mɔ kpakpa ko bɛ akɛ ja Nyɔŋmɔ kome kɛkɛ.” (Marko 10:18) Eyɛ mli akɛ Tsɔɔlɔ Kpele lɛ yeɔ emuu moŋ, shi eshwãaa yɛ lɛ diɛŋtsɛ ehe. Shi moŋ, ekɛ yijiemɔ fɛɛ ha e-Tsɛ, Yehowa.

No hewɔ lɛ, ani mɔ ko yɛ ni wɔbaanyɛ wɔshwã yɛ ehe?— Hɛɛ, mɔ ko yɛ. Wɔbaanyɛ wɔshwã yɛ wɔ-Bɔlɔ lɛ, ni ji Yehowa Nyɔŋmɔ he. Kɛji akɛ wɔna hulu ni miinyɔ shi fɛfɛo loo adebɔɔ mli naakpɛɛ nɔ ko lɛ, wɔbaanyɛ wɔkɛɛ mɔ ko akɛ, ‘Yehowa, wɔ-Nyɔŋmɔ lɛ ni he yɔɔ naakpɛɛ lɛ fee enɛ!’ Nyɛhaa wɔsaa wɔhe be fɛɛ be akɛ wɔbaawie nibii wuji ni yɔɔ fɛo ni Yehowa efee momo kɛ nɔ ni ebaafee yɛ wɔsɛɛ be mli lɛ ahe.

Mɛni gbekɛ nuu nɛɛ shwãa yɛ he lɛ?

Kanemɔ nɔ ni Ŋmalɛi lɛ kɛɔ yɛ shwãa, loo hepupuumɔ he, ni okase bɔ ni esa akɛ wɔkwa shwã ni wɔɔshwã yɛ wɔ diɛŋtsɛ wɔhe lɛ: Abɛi 16:5, 18; Yeremia 9:23, 24; 1 Korintobii 4:7; kɛ 13:4.

Ekrokromɛi Hu Nɛ

YESU​—GBƐ LƐ, ANƆKWALE LƐ, WALA LƐ

Kasemɔ Yesu Sui Nɛɛ . . .

Yesu jie sui kpaanyɔ komɛi akpo daa yɛ eshihilɛ mli fɛɛ.