Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mɛni Wɔbaanyɛ Wɔkase Kɛjɛ Biblia lɛ Mli?

Wiemɔi Komɛi Amligbalamɔ

Wiemɔi Komɛi Amligbalamɔ

1 YEHOWA

Mɛi babaoo kpɛlɛɔ nɔ akɛ, gbɛ́i Yehowa lɛ shishi ji, “Ehãa Etsɔɔ.” Yehowa ji Nyɔŋmɔ ofe, ni lɛ ebɔ nɔ fɛɛ nɔ. Ebaanyɛ efee nɔ fɛɛ nɔ ni ekpɛ eyiŋ akɛ ebaafee lɛ.

Hebribii lɛ kɛ niŋmaa okadii ejwɛ komɛi ŋma Nyɔŋmɔ gbɛ́i lɛ. Nomɛi ji YHWH loo JHVH. Be ni aŋma Biblia lɛ klɛŋklɛŋ kwraa yɛ Hebri mli lɛ, Nyɔŋmɔ gbɛ́i lɛ je kpo yɛ mli aaafee shii 7,000 sɔŋŋ. Maŋ fɛɛ maŋ kɛ bɔ ni amɛtsɛɔ gbɛ́i Yehowa lɛ amɛhãa.

Yitso 1, kuku 15

2 “NYƆŊMƆ MUMƆ LƐŊ” AJƐ AŊMA BIBLIA LƐ

Biblia lɛ jɛ Nyɔŋmɔ ŋɔɔ, shi ehã adesai ŋma. Wɔbaanyɛ wɔkɛ enɛ ato nitsumɔtsɛ ko ni kɛɛ ewoloŋmalɔ akɛ eŋma wolo eyahã mɔ ko lɛ he. Eyɛ mli akɛ woloŋmalɔ lɛ ni ŋma wolo lɛ moŋ, shi nitsumɔtsɛ lɛ wiemɔi ni yɔɔ mli. Nyɔŋmɔ kɛ emumɔ krɔŋkrɔŋ lɛ kudɔ mɛi ni ŋma Biblia lɛ, koni amɛŋma nɔ ni lɛ etaoɔ ni amɛŋma. Ekɛ emumɔ lɛ tsu nii kɛtsɔ ninai, lamɔi, kɛ gbɛi krokomɛi anɔ ekudɔ amɛ, koni amɛna nɔ ni Nyɔŋmɔ taoɔ ni amɛŋma lɛ.

Yitso 2, kuku 5

3 SHISHITOO MLAI

Shishitoo mlai ji Biblia mli wiemɔi komɛi ni yeɔ amɛbuaa wɔ ni wɔnu anɔkwalei komɛi ni he hiaa waa lɛ ashishi. Akɛ nɔkwɛmɔnɔ lɛ, shishitoo mla ni ji, “naanyobɔɔ gbonyo fiteɔ sui kpakpai” lɛ tsɔɔ wɔ akɛ, mɛi ni wɔkɛbɔɔ lɛ baanyɛ aye abua wɔ loo amɛfite wɔ. (1 Korintobii 15:33) Ni shishitoo mla ni ji, “nɔ fɛɛ nɔ ni gbɔmɔ duɔ lɛ, no nɔŋŋ ebaakpa” lɛ kaiɔ wɔ akɛ, nɔ fɛɛ nɔ ni wɔfeɔ lɛ, kɛ nɔ ni baajɛ mli aba.Galatiabii 6:7.

Yitso 2, kuku 12

  4 GBALƐ

Eji sane ko ni jɛ Nyɔŋmɔ ŋɔɔ. Ebaanyɛ ekɔ Nyɔŋmɔ famɔi, nibii ni etaoɔ ni wɔfee, bɔ ni etaoɔ ni wɔba wɔjeŋ wɔhã, loo yiŋ ni ekpɛ yɛ nɔ ko he lɛ he. Ebaanyɛ ekɔ nɔ ko ni baaba wɔsɛɛ lɛ hu he. Gbalɛi ni yɔɔ Biblia lɛ mli lɛ pii eba mli momo.

Yitso 2, kuku 13

5 GBALƐI NI KƆƆ MESIA LƐ HE

Mesia lɛ he gbalɛi babaoo ni yɔɔ Biblia lɛ mli lɛ fɛɛ ba mli yɛ Yesu nɔ. Kwɛmɔ akrabatsa ni ji, “ Gbalɛi Komɛi ni Kɔɔ Mesia lɛ He.

Yitso 2, kuku 17, shishigbɛ niŋmaa

6 NƆ HEWƆ NI NYƆŊMƆ BƆ SHIKPƆŊ LƐ

Yehowa bɔ shikpɔŋ lɛ ni esaa nɔ fɛfɛo koni adesai ni sumɔɔ lɛ lɛ ahi nɔ. Yiŋtoo hewɔ ni Nyɔŋmɔ bɔ shikpɔŋ lɛ tsakeko. Etsɛŋ, ebaajie mɛi fɔji kɛje shikpɔŋ lɛ nɔ, ni ebaahã mɛi ni feɔ esuɔmɔnaa nii lɛ ahi shi kɛya naanɔ.

Yitso 3, kuku 1

7 SATAN ABONSAM

Satan ji ŋwɛibɔfo, ni lɛ ji mɔ klɛŋklɛŋ ni tse Nyɔŋmɔ hiɛ atua. Egbɛ́i Satan lɛ shishi ji, “Shiteekɛwolɔ.” Gbɛ́i nɛɛ sa lɛ ejaakɛ eteɔ shi ewoɔ Yehowa. Egbɛ́i Abonsam lɛ shishi ji, “Naafolɔlɔ.” Gbɛ́i nɛɛ hu sa lɛ, ejaakɛ elakaa mɛi, ni efiteɔ Nyɔŋmɔ ehãa mɛi.

Yitso 3, kuku 4

  8 ŊWƐIBƆFOI

Yehowa bɔ ŋwɛibɔfoi lɛ afii babaoo sɛɛ dani ebɔ shikpɔŋ lɛ. Ebɔ ŋwɛibɔfoi akpekpei ohai abɔ lɛ fɛɛ ni amɛhi ŋwɛi. (Daniel 7:10) Ŋwɛibɔfoi lɛ ateŋ mɔ fɛɛ mɔ yɛ gbɛ́i ni akɛtsɛɔ lɛ, ni esoro bɔ ni amɛteŋ mɔ fɛɛ mɔ feɔ enii ehãa. Ŋwɛibɔfoi anɔkwafoi lɛ sumɔɔɔ ni adesai jáa amɛ. Amɛtsuɔ nitsumɔi srɔtoi, ni amɛteŋ mɔ fɛɛ mɔ kɛ egbɛnaa. Amɛteŋ mɛi komɛi damɔɔ Yehowa maŋtsɛ sɛi lɛ hiɛ amɛsɔmɔɔ lɛ, amɛteŋ mɛi komɛi buɔ ewebii lɛ ahe, etsuɔ mɛi komɛi hu koni amɛkɛ shɛɛ ayahã mɛi, mɛi komɛi hu buɔ etsuji ni yɔɔ shikpɔŋ lɛ nɔ lɛ ahe ni amɛtsɔɔ amɛ gbɛ, mɛi komɛi hu tsuɔ yiŋ ni ekpɛɔ yɛ nibii ahe lɛ he nii, ni fãbii hu yeɔ amɛbuaa kɛtsuɔ shiɛmɔ nitsumɔ lɛ. (Lala 34:7; Kpojiemɔ 14:6; 22:8, 9) Wɔsɛɛ lɛ, amɛbaafata Yesu he kɛwu Harmagedon ta lɛ.Kpojiemɔ 16:14, 16; 19:14, 15.

Yitso 3, kuku 5; Yitso 10, kuku 1

9 ESHA

Nɔ fɛɛ nɔ ni Yehowa sumɔɔɔ lɛ, esha ni. Ebaanyɛ efee nɔ ko ni yɔɔ wɔjwɛŋmɔ mli, henumɔ ko ni wɔyɔɔ, loo nɔ ko ni wɔfee. Esha baanyɛ afite wɔ kɛ Nyɔŋmɔ teŋ. Enɛ hewɔ lɛ, Nyɔŋmɔ ehã wɔ mlai kɛ shishitoo mlai, koni wɔkaje gbɛ wɔfee nibii ni esumɔɔɔ. Be ni Yehowa bɔ je lɛ, nɔ fɛɛ nɔ ni yɔɔ mli lɛ yeɔ emuu. Shi be ni Adam kɛ Hawa je gbɛ amɛgbo Yehowa nɔ toi lɛ, amɛbatsɔmɔ eshafeelɔi, ni amɛyeee emuu dɔŋŋ. Amɛgbɔlɔ ni amɛgboi. Wɔ hu wɔgbɔlɔɔ ni wɔgboiɔ, ejaakɛ wɔná esha akɛ gboshinii kɛjɛ Adam ŋɔɔ.

Yitso 3, kuku 7; Yitso 5, kuku 3

10 HARMAGEDON

No ji ta ni Nyɔŋmɔ baatsɔ nɔ ekpãtã Satan jeŋ fɔŋ nɛɛ kɛ emli nibii gbohii lɛ fɛɛ hiɛ.

Yitso 3, kuku 13; Yitso 8, kuku 18

 11 NYƆŊMƆ MAŊTSƐYELI

Nyɔŋmɔ Maŋtsɛyeli lɛ ji nɔyeli ko ni Yehowa eto yɛ ŋwɛi. Yesu Kristo ji nɔyeli nɛɛ nɔ Maŋtsɛ, ni amrɔ nɛɛ eeye nɔ. Wɔsɛɛ lɛ, Yehowa baatsɔ Maŋtsɛyeli lɛ nɔ ehã efɔŋfeemɔ fɛɛ sɛɛ afo. Nyɔŋmɔ Maŋtsɛyeli lɛ baaye shikpɔŋ lɛ nɔ.

Yitso 3, kuku 14

12 YESU KRISTO

Nyɔŋmɔ bɔ Yesu dani ebɔ nibii krokomɛi fɛɛ. Yehowa tsu Yesu kɛba shikpɔŋ lɛ nɔ koni ebagbo ehã adesai fɛɛ. Yesu gbele sɛɛ gbii etɛ lɛ, Yehowa tee lɛ shi. Amrɔ nɛɛ, Yesu miiye nɔ yɛ ŋwɛi akɛ Nyɔŋmɔ Maŋtsɛyeli lɛ nɔ Maŋtsɛ.

Yitso 4, kuku 2

13 GBALƐ NI KƆƆ OTSII 70 LƐ AHE

Gbalɛ ko ni yɔɔ Biblia lɛ mli lɛ tsɔɔ be pɔtɛɛ ni Mesia lɛ baajie ehe kpo. Gbalɛ lɛ tsɔɔ akɛ, Mesia lɛ baajie ehe kpo yɛ otsii 69 komɛi anaagbee. Otsii 69 nɛɛ je shishi yɛ afi 455 D.Ŋ.B., ni eba naagbee yɛ afi 29 Ŋ.B.

Mɛni hewɔ wɔkɛɔ akɛ eba naagbee yɛ afi 29 Ŋ.B. lɛ? Otsii 69 lɛ je shishi be ni Nehemia yashɛ Yerusalem ni ebɔi jɛmɛ saamɔ lɛ. Enɛ ba yɛ afi 455 D.Ŋ.B. (Daniel 9:25; Nehemia 2:1, 5-8) Wɔle akɛ gbii kpawo yɔɔ otsi mli. Shi yɛ gbalɛ nɛɛ mli lɛ, afii kpawo yɔɔ otsii lɛ eko fɛɛ eko mli, taakɛ efɔɔ kaa yɛ Biblia mli gbalɛi amli lɛ. Ni tsɔɔ akɛ, wɔmiiŋɔ gbii ni yɔɔ otsi lɛ mli lɛ ateŋ eko fɛɛ eko akɛ afi. (4 Mose 14:34; Ezekiel 4:6) Kɛ́ wɔmiibu lɛ nɛkɛ lɛ, belɛ otsii 69 lɛ feɔ afii 483 (69 x 7). Kɛ́ wɔkane afii 483 kɛjɛ afi 455 D.Ŋ.B. lɛ, ekɛ wɔ baa afi 29 Ŋ.B. Nakai afi lɛ tuuntu abaptisi Yesu ni ebatsɔ Mesia lɛ!Luka 3:1, 2, 21, 22.

 Gbalɛ nɛɛ nɔŋŋ wie otsi kome ko hu he. Otsi kome nɛɛ hu damɔ shi kɛhã afii kpawo. Afii kpawo nɛɛ je shishi yɛ afi 29 Ŋ.B., ni eba naagbee yɛ afi 36 Ŋ.B. Mɛni tee nɔ yɛ be nɛɛ mli? Yɛ afi 33 Ŋ.B. lɛ, agbe Mesia lɛ. Ni kɛjɛ afi 36 Ŋ.B. lɛ, abɔi Nyɔŋmɔ Maŋtsɛyeli lɛ he sane kpakpa lɛ shiɛmɔ kɛhã mɛi fɛɛ ni yɔɔ je lɛ mli, shi jeee kɛhã Yudafoi pɛ.Daniel 9:24-27.

Yitso 4, kuku 7

 14 TRINITI LƐ JI AMALE TSƆƆMƆ

Biblia lɛ hãa wɔleɔ akɛ, Yehowa Nyɔŋmɔ ji mɔ ni bɔ nɔ fɛɛ nɔ, ni akɛ, ebɔ Yesu dani ebɔ nibii krokomɛi fɛɛ. (Kolosebii 1:15, 16) Yesu jeee Nyɔŋmɔ Ofe lɛ, ni ewieee kɔkɔɔkɔ akɛ ekɛ Nyɔŋmɔ yeɔ egbɔ. Anɔkwa, be ko lɛ, ewie akɛ: “Tsɛ lɛ da fe mi.” (Yohane 14:28; 1 Korintobii 15:28) Shi jamɔi komɛi kɛɔ akɛ, Tsɛ lɛ Nyɔŋmɔ ji lɛ, Bi lɛ Nyɔŋmɔ ji lɛ, ni mumɔ krɔŋkrɔŋ lɛ hu Nyɔŋmɔ ji lɛ, ni amɛ fɛɛ lɛ Nyɔŋmɔ kome ni. Ni tsɔɔ akɛ, Nyɔŋmɔ ji mɛi etɛ ni efee ekome. Enɛ ji nɔ ni amɛtsɛɔ lɛ Triniti lɛ. Wiemɔ ni ji “Triniti” lɛ bɛ Biblia lɛ mli he ko he ko. Tsɔɔmɔ nɛɛ ji amale tsɔɔmɔ.

Mumɔ krɔŋkrɔŋ lɛ ji hewalɛ ni akɛ hiŋmɛi enaaa ni Nyɔŋmɔ kɛtsuɔ nibii ni etaoɔ etsu lɛ. Ejeee gbɔmɔ. Akɛ nɔkwɛmɔnɔ lɛ, “mumɔ krɔŋkrɔŋ lɛ bayimɔ” Kristofoi ni hi shi yɛ blema lɛ obɔbɔ. Ni Yehowa hu wie akɛ: “Mafɔse mimumɔ lɛ eko mashwie heloi srɔtoi fɛɛ nɔ.”Bɔfoi 2:1-4, 17.

Yitso 4, kuku 12; Yitso 15, kuku 17

15 KRƆS

Anɔkwa Kristofoi kɛ krɔs tsuuu nii. Mɛni hewɔ?

  1. Amale jamɔi kɛ krɔs lɛ etsu nii afii akpei abɔ. Yɛ blema lɛ, mɛi ni jáa kɔɔyɔɔ, tsei, kooloi, kɛ nibii krokomɛi ni tamɔ nakai lɛ, kɛ agbɛnɛ hu, mɛi ni kɛ bɔlɛnamɔ fataa amɛjamɔŋ kusumii ahe lɛ, kɛ krɔs lɛ tsu nii yɛ amɛkusumii lɛ amli. Yɛ Yesu gbele sɛɛ po lɛ, Kristofoi kɛ krɔs lɛ tsuuu nii. Yesu gbele sɛɛ nɔ ni fa fe afii 300, dani Roma Nɔyelɔ ko ni atsɛɔ lɛ Konstantino lɛ hã krɔs lɛ batsɔ nɔ ko ni Kristofoi kɛtsuɔ nii. Efee nakai kɛ jwɛŋmɔ lɛ akɛ no baahã mɛi pii aná Kristofoi ahe miishɛɛ. Shi krɔs lɛ kɛ Yesu Kristo bɛ tsakpaa ko kwraa. New Catholic Encyclopedia lɛ wie akɛ: “Mɛi komɛi kɛ krɔs lɛ tsu nii yɛ amɛkusumii amli dani Kristo ba, ni agbɛnɛ hu, mɛi komɛi hu ni amɛjeee Kristofoi kɛtsu nii yɛ amɛkusumii amli.”

  2.   Yesu gbooo yɛ krɔs nɔ. Hela wiemɔi ni Biblia shishitsɔɔlɔi komɛi tsɔɔ shishi akɛ “krɔs” lɛ, shishi diɛŋtsɛ ji, “tso ni ma shi jaŋŋ,” “mplaŋ,” loo “tso,” ni ji tso ni woɔ yibii. Biblia ko ni atsɛɔ lɛ The Companion Bible lɛ wie akɛ: “Hela wiemɔi ni yɔɔ [Kpaŋmɔ Hee] lɛ mli lɛ eko eko bɛ ni abaanyɛ atsɔɔ shishi akɛ mplaŋi enyɔ.” Yesu gbo yɛ tso kome ni ma shi jaŋŋ nɔ.

  3. Yehowa sumɔɔɔ ni wɔkɛ amagai loo okadii loo mfonirii tsuɔ nii kɛ́ wɔmiijá lɛ.2 Mose 20:4, 5; 1 Korintobii 10:14.

Yitso 5, kuku 12

16 KAIMƆ LƐ

Yesu fã ekaselɔi lɛ akɛ amɛye gbi jurɔ ko kɛkai egbele lɛ. Amɛyeɔ gbi jurɔ nɛɛ daa afi yɛ Nisan 14 lɛ nɔ. Gbi nɛɛ ji gbi ni Israelbii lɛ kɛyeɔ Hehoo gbi jurɔ lɛ. Aboloo kɛ wain akɛyeɔ Kaimɔ lɛ. Aboloo lɛ damɔ shi kɛhã Yesu gbɔmɔtso lɛ, ni wain lɛ damɔ shi kɛhã elá lɛ. Akɛ aboloo lɛ kɛ wain lɛ hãa mɛi fɛɛ ni eba Kaimɔ lɛ shishi lɛ, shi jeee amɛ fɛɛ amɛyeɔ aboloo lɛ ni amɛnuɔ wain lɛ eko. Mɛi ni baayafata Yesu he kɛye nɔ yɛ ŋwɛi lɛ pɛ yeɔ aboloo lɛ ni amɛnuɔ wain lɛ eko. Mɛi ni yɔɔ hiɛnɔkamɔ akɛ amɛbaahi shi kɛya naanɔ yɛ shikpɔŋ lɛ nɔ lɛ yaa Kaimɔ lɛ shishi, ejaakɛ amɛbuɔ Yesu. Shi, amɛyeee aboloo lɛ eko, ni amɛnuuu wain lɛ hu eko.

Yitso 5, kuku 21

17 SUSUMA

Jeŋ Hee Shishitsɔɔmɔ Biblia lɛ mli lɛ, akɛ wiemɔ ni ji “susuma” lɛ tsuɔ nii ahãa (1) gbɔmɛi, (2) kooloi, loo (3) wala, ni ji gbɔmɔ ko loo kooloo ko wala. Naa ŋmalɛi komɛi ni tsɔɔ nakai:

  • Gbɔmɛi. ‘Yɛ Noa gbii lɛ amli lɛ, abaa mɛi fioo ko, ni ji susumai kpaanyɔ ayi kɛtsɔ nu lɛ mli.’ (1 Petro 3:20) Wiemɔ  ni ji “susumai” ni akɛtsu nii yɛ biɛ lɛ kɔɔ gbɔmɛi ahe. Ekɔɔ Noa kɛ eŋa lɛ, kɛ ebihii etɛ lɛ kɛ amɛŋamɛi lɛ ahe.

  • Kooloi. Be ni Nyɔŋmɔ bɔɔ je lɛ, ewie akɛ: “Bɔɔ nii [‘susumai,’ shishigbɛ niŋmaa] ni hiɛ kamɔ ayi nui lɛ amli obɔbɔ, ni bɔɔ nii ni filikiɔ hu afiliki yɛ kɔɔyɔɔ lɛ mli yɛ ŋwɛi.” Esaa ewie akɛ: “‘Bɔɔ nii [‘susumai,’ shishigbɛ niŋmaa] ni hiɛ kamɔ, eko fɛɛ eko kɛ ehenɔi, shĩa kooloi, kɛ kooloi ni wamɔɔ, kɛ ŋa mli kooloi, eko fɛɛ eko kɛ ehenɔi, aba shikpɔŋ lɛ nɔ.’ Ni eba lɛ nakai.”1 Mose 1:20, 24.

  • Wala, ni ji gbɔmɔ ko loo kooloo ko wala. Yehowa kɛɛ Mose akɛ: “Kuu osɛɛ ní oya Ejipt, ejaakɛ mɛi fɛɛ ní taoɔ bo agbe [‘taoɔ osusuma,’ shishigbɛ niŋmaa] lɛ egboi.” (2 Mose 4:19) Be ni Yesu yɔɔ shikpɔŋ lɛ nɔ lɛ, ewie akɛ: “Miji tookwɛlɔ kpakpa lɛ; tookwɛlɔ kpakpa lɛ ŋɔɔ ewala ‘esusuma,’ shishigbɛ niŋmaa eŋmɛɔ shi ehãa gwantɛŋi lɛ.”Yohane 10:11.

    Kɛfata he lɛ, kɛ́ Biblia lɛ kɛɛ mɔ ko kɛ ‘esusuma muu fɛɛ’ miifee nɔ ko lɛ, etsɔɔ akɛ mɔ lɛ ejɛ esuɔmɔ mli ekɛ enyɛmɔ fɛɛ miifee nii lɛ. (Mateo 22:37; 5 Mose 6:5) Susuma lɛ gboɔ.Hiob 33:22.

Yitso 6, kuku 5; Yitso 15, kuku 17

18 MUMƆ

Hebri kɛ Hela wiemɔi ni atsɔɔ shishi akɛ “mumɔ” yɛ Jeŋ Hee Shishitsɔɔmɔ Biblia lɛ mli lɛ kɔɔ nibii srɔtoisrɔtoi ahe. Nibii nɛɛ ateŋ eko eko bɛ ni adesai baanyɛ ana kɛ amɛhiŋmɛi. Ekomɛi ji, kɔɔyɔɔ ni tswaa, kɛ kɔɔyɔɔ ni jeɔ mɔ ko gugɔŋ kɛ́ eemu lɛ. Ebaanyɛ ekɔ mɛi ni yɔɔ mumɔŋ gbɔmɔtsei, kɛ agbɛnɛ hu, Nyɔŋmɔ mumɔ krɔŋkrɔŋ lɛ, ni ji ehewalɛ ni ekɛtsuɔ nibii ahe nii lɛ hu he. Biblia lɛ ewieko yɛ he ko he ko akɛ, gbɔmɔtso lɛ fã ko yaa nɔ ehiɔ shi yɛ gbele sɛɛ.2 Mose 35:21; Lala 104:29; Mateo 12:43; Luka 11:13.

Yitso 6, kuku 5; Yitso 15, kuku 17

 19 GEHENA

Gehena ji jɔɔ ko ni bɛŋkɛ Yerusalem. Yɛ blema lɛ, ashãa bɔɔla yɛ jɛmɛ. Nɔ ko bɛ ni tsɔɔ akɛ, yɛ Yesu beiaŋ lɛ, ashãa kooloi loo gbɔmɛi hiɛkãalɔi yɛ jɔɔ nɛɛ mli loo apiŋɔ amɛ yɛ jɛmɛ. No hewɔ lɛ, Gehena damɔɔɔ shi kɛhãaa he ko ni anaaa ni akɛ mɛi ni egboi lɛ yaa koni ayapiŋ amɛ loo ashã amɛ kɛya naanɔ. Be ni Yesu wie akɛ, mɛi komɛi baaya Gehena lɛ, no mli lɛ nɔ ni etsɔɔ ji akɛ, amɛhiɛ baakpãtã kwraa.Mateo 5:22; 10:28.

Yitso 7, kuku 20

20 NUŊTSƆ LƐ SƆLEMƆ LƐ

Enɛ ji sɔlemɔ ni Yesu tsɔ nɔ etsɔɔ ekaselɔi lɛ bɔ ni asɔleɔ ahãa. Sɔlemɔ nɛɛ gbɛ́i krokomɛi ji, Wɔ-Tsɛ ni yɔɔ ŋwɛi, kɛ sɔlemɔ he nɔkwɛmɔnɔ lɛ. Yesu tsɔɔ wɔ ni wɔsɔle akɛ:

  • “Ogbɛ́i lɛ he atse”

    Kɛ́ wɔsɔle ni atse Yehowa gbɛ́i lɛ he lɛ, etsɔɔ akɛ wɔmiisɔle ni abu Yehowa bem yɛ amalei srɔtoi ni mɛi eto eshwie enɔ lɛ ahe, koni mɛi akpa egbɛ́i kpakpa lɛ fitemɔ. Kɛ́ atse Yehowa gbɛ́i lɛ he lɛ, mɛi fɛɛ ni yɔɔ ŋwɛi kɛ shikpɔŋ lɛ nɔ lɛ baabu lɛ, ni amɛbaawo ehiɛ nyam.

  • “O-Maŋtsɛyeli lɛ aba”

    Esa akɛ wɔsɔle ni Nyɔŋmɔ nɔyeli lɛ abakpãtã Satan jeŋ fɔŋ nɛɛ hiɛ, ebaye shikpɔŋ muu lɛ fɛɛ nɔ, ni ehã shikpɔŋ lɛ atsɔ paradeiso.

  • “Afee osuɔmɔnaa nii yɛ shikpɔŋ lɛ nɔ”

    Wɔsɔleɔ ni yiŋtoo hewɔ ni Nyɔŋmɔ bɔ shikpɔŋ lɛ aba mli, koni adesai ni boɔ lɛ toi ni eye emuu ahi shi kɛya naanɔ yɛ Paradeiso lɛ mli, taakɛ eto eyiŋ akɛ eba lɛ be ni ebɔ adesai lɛ.

Yitso 8, kuku 2

 21 KPƆMƆNƆ LƐ

Yehowa kɛ kpɔmɔnɔ lɛ hã koni adesai aye amɛhe kɛjɛ esha kɛ gbele dɛŋ. Ekɛ kpɔmɔnɔ lɛ hã koni wɔsɛɛ lɛ wɔnine ashɛ adesa wala ni eye emuu ni Adam ni ji klɛŋklɛŋ adesa ni abɔ lɛ hã eŋmɛɛ wɔ lɛ nɔ, ni agbɛnɛ hu, ekɛsaa adesai kɛ Yehowa teŋ. Nyɔŋmɔ tsu Yesu kɛba shikpɔŋ lɛ nɔ koni ebagbo ehã eshafeelɔi fɛɛ. Yesu gbele lɛ hewɔ lɛ, wɔ fɛɛ wɔbaanyɛ wɔná hegbɛ akɛ wɔhi shi kɛya naanɔ ni wɔye emuu.

Yitso 8, kuku 21; Yitso 9, kuku 13

22 MƐNI HEWƆ AFI 1914 LƐ HE HIAA WAA LƐ?

Gbalɛ ni yɔɔ Daniel yitso 4 lɛ hãa wɔnaa akɛ, Nyɔŋmɔ to e-Maŋtsɛyeli lɛ shishi yɛ afi 1914.

Gbalɛ lɛ: Yehowa hã Maŋtsɛ Nebukadnezar la lamɔ ko ni kɔɔ tso agbo ko ni afo afɔ̃ shi lɛ he. Lamɔ nɛɛ ji gbalɛ. Yɛ lamɔ lɛ mli lɛ, akɛ dade kɛ akɔɔble kɔsɔŋkɔsɔ fi tsoku lɛ, koni ekada kɛyashi “bei kpawo” baaho. “Bei kpawo” lɛ sɛɛ lɛ, tso lɛ baada ekoŋŋ.Daniel 4:1, 10-16.

Nɔ ni wɔkaseɔ yɛ gbalɛ lɛ mli: Tso agbo lɛ damɔ shi kɛhã Nyɔŋmɔ nɔyeli lɛ. Yehowa hã maŋtsɛmɛi ye blema Israel maŋ lɛ nɔ, ni amɛye nɔ kɛjɛ Yerusalem. (1 Kronika 29:23) Shi sɛɛ mli lɛ, maŋtsɛmɛi nɛɛ tɔ̃ enɔ, ni ehã amɛkpa maŋtsɛyeli. Yɛ afi 607 D.Ŋ.B. lɛ, akpãtã Yerusalem hiɛ. Afi nɛɛ nɔ abɔi “bei kpawo” lɛ kanemɔ. (2 Maŋtsɛmɛi 25:1, 8-10; Ezekiel 21:25-27) Be ni Yesu kɛɛ “jeŋmaji lɛ baanaanaa Yerusalem nɔ kɛyashi jeŋmaji lɛ abei ni ato lɛ baaba naagbee” lɛ, no mli lɛ, “bei kpawo” nɛɛ nɔŋŋ he ewieɔ lɛ. (Luka 21:24) Enɛ hãa wɔnaa akɛ, be ni Yesu yɔɔ shikpɔŋ lɛ nɔ lɛ, no mli lɛ “bei kpawo” lɛ bako naagbee. Yehowa wo shi akɛ, kɛ́ “bei kpawo” lɛ ba naagbee lɛ, ebaawo mɔ ko akɛ Maŋtsɛ. Maŋtsɛ hee nɛɛ ji Yesu, ni Nyɔŋmɔ baatsɔ enɔ ejɔɔ ewebii fɛɛ ni yɔɔ shikpɔŋ lɛ nɔ kɛya naanɔ.Luka 1:30-33.

 Afii abɔ ni “bei kpawo” lɛ feɔ: “Bei kpawo” lɛ feɔ afii 2,520. Kɛ́ wɔkane afii 2,520 kɛjɛ afi 607 D.Ŋ.B. lɛ, ekɛ wɔ baa afi 1914. Nakai afi lɛ nɔ Yehowa wo Mesia lɛ, ni ji Yesu, akɛ Nyɔŋmɔ Maŋtsɛyeli lɛ nɔ Maŋtsɛ yɛ ŋwɛi.

Shi te wɔfee tɛŋŋ wɔna akɛ “bei kpawo” lɛ ji afii 2,520 lɛ? Biblia lɛ kɛɔ akɛ, bei etɛ kɛ fã feɔ gbii 1,260. (Kpojiemɔ 12:6, 14) No hewɔ lɛ, “bei kpawo” baafee gbii 1,260 ni akɛbɔ he toi enyɔ, ni no feɔ gbii 2,520. Ni akɛni bei pii lɛ, akɔɔ gbii ni yɔɔ Biblia gbalɛi amli lɛ akɛ afii hewɔ lɛ, gbii 2,520 lɛ bafeɔ afii 2,520.4 Mose 14:34; Ezekiel 4:6.

Yitso 8, kuku 23

23 ŊWƐIBƆFONUKPA MIKAEL

Biblia lɛ tsĩɔ ŋwɛibɔfonukpa kome pɛ tã. Atsɛɔ lɛ Mikael.Daniel 12:1; Yuda 9.

Mikael ji Nyɔŋmɔ ŋwɛibɔfoi anɔkwafoi lɛ a-Hiɛnyiɛlɔ. Kpojiemɔ 12:7 lɛ kɛɔ akɛ: “Mikael kɛ ebɔfoi lɛ fã drako lɛ nɔ ta, ni drako lɛ kɛ ebɔfoi lɛ kɛ amɛ wu.” Kpojiemɔ wolo lɛ hãa wɔleɔ akɛ, Yesu ji mɔ ni nyiɛ Nyɔŋmɔ ta lɛ hiɛ. Enɛ hãa wɔnaa akɛ, Yesu nɔŋŋ ji Mikael lɛ.Kpojiemɔ 19:14-16.

Yitso 9, kuku 4

24 NAAGBEE GBII LƐ

Wiemɔ nɛɛ kɔɔ be fioo ko ni baatsɔ Satan je lɛ hiɛkpatamɔ lɛ hiɛ lɛ he. Nibii komɛi ni sa kadimɔ waa baaya nɔ yɛ be nɛɛ mli. Gbalɛi ni yɔɔ Biblia lɛ mli lɛ kɛ wiemɔi tamɔ “shihilɛ gbɛjianɔtoo lɛ naagbee gbii” kɛ “be ni gbɔmɔ Bi lɛ eba” lɛ tsuɔ nii kɛ́ amɛmiiwie be kome too nɛɛ nɔŋŋ he. (Mateo 24:3, 27, 37) “Naagbee gbii lɛ” je shishi yɛ afi 1914, be ni Yesu bɔi nɔyeli yɛ ŋwɛi akɛ Nyɔŋmɔ Maŋtsɛyeli lɛ nɔ Maŋtsɛ lɛ, ni ebaaba naagbee kɛ́ akpãtã Satan je lɛ hiɛ yɛ Harmagedon ta lɛ mli.2 Timoteo 3:1; 2 Petro 3:3.

Yitso 9, kuku 5

 25 GBOHIIASHITEE

Kɛ́ Nyɔŋmɔ tsɔ naakpɛɛ gbɛ nɔ ehã mɔ ko ni egbo lɛ ba wala mli ekoŋŋ lɛ, akɛɔ akɛ etee lɛ shi. Biblia lɛ wieɔ mɛi nɛɛhu ni atee amɛ shi kɛjɛ gbohii ateŋ lɛ ahe. Nyɔŋmɔ hã Elia, Elisha, Yesu, Petro, kɛ Paulo fɛɛ hewalɛ ni amɛnyɛ amɛtee gbohii ashi. Yehowa ewo shi akɛ ebaatee “jalɔi kɛ mɛi ni ejaaa” fɛɛ shi koni amɛbahi shikpɔŋ lɛ nɔ. (Bɔfoi 24:15) Biblia lɛ wieɔ akɛ, abaatee mɛi komɛi hu ashi koni amɛyahi ŋwɛi. Mɛi nɛɛ ji mɛi ni Nyɔŋmɔ kɛ mumɔ krɔŋkrɔŋ lɛ efɔ amɛ mu loo ehala amɛ koni amɛyafata Yesu he yɛ ŋwɛi lɛ.Yohane 5:28, 29; 11:25; Filipibii 3:11; Kpojiemɔ 20:5, 6.

Yitso 9, kuku 13

26 DAIMONIOI LOO MUMƆI KƐSHARAMƆ

Mɛi nyɛɔ amɛkɛ mumɔi sharaa tɛ̃ɛ loo amɛtsɔɔ tsofatsɛmɛi, mumɔi atsɛlɔi, wɔŋtsɛmɛi, loo okɔmfoi anɔ amɛfeɔ nakai. Mɛi kɛ mumɔi sharaa, ejaakɛ amɛsusuɔ akɛ, kɛ́ mɔ ko gbo lɛ, emumɔ yaa nɔ ehiɔ shi, ni ebatsɔɔ sisa. Shi, susumɔ nɛɛ ejaaa. Daimonioi lɛ sumɔɔ ni amɛhã mɛi agbo Nyɔŋmɔ nɔ toi. Mɛi tsɔɔ ŋulamiiaŋkwɛmɔ, klamɔ, ashwaifeemɔ, ŋkunyaayeli, mumɔi atsɛmɔ, kɛ ekrokomɛi ni tamɔ nakai lɛ anɔ amɛkɛ mumɔi sharaa. Bɔ ni awieɔ nibii nɛɛ ahe yɛ woji, sinii, lalai, kɛ adafitswaa woji amli lɛ hãa efeɔ tamɔ nɔ ni tɔmɔ loo oshara ko kwraa bɛ amɛhe. Nibii pii ni afeɔ kɛ́ mɛi gboi lɛ hu hãa mɛi kɛ mumɔi sharaa. Nibii nɛɛ ekomɛi ji, afɔlei ni ashãa ahãa gbohii, adetsaani, kpeshii, yarafeemɔ afi kaimɔi, kɛ okulafeemɔ. Bei pii lɛ, mɛi ni kɛ daimonioi sharaa lɛ kɛ tsofai komɛi tsuɔ nii.Galatiabii 5:20; Kpojiemɔ 21:8.

Yitso 10, kuku 10; Yitso 16, kuku 4

 27 HEGBƐ NI YEHOWA YƆƆ AKƐ EYEƆ JEŊ MUU LƐ FƐƐ NƆ

Yehowa ji Nyɔŋmɔ Ofe, ni lɛ ebɔ nɔ fɛɛ nɔ. (Kpojiemɔ 15:3) No hewɔ lɛ, nɔ fɛɛ nɔ ni yɔɔ ŋwɛi kɛ shikpɔŋ lɛ ji enɔ, ni eyɛ hegbɛ akɛ eyeɔ nibii ni ebɔ lɛ fɛɛ nɔ. (Lala 24:1; Yesaia 40:21-23; Kpojiemɔ 4:11) Emlai ji nɔ ni kudɔɔ nibii fɛɛ ni ebɔ lɛ. Kɛfata he lɛ, Yehowa yɛ hegbɛ akɛ ehalaa mɛi krokomɛi akɛ nɔyelɔi. Kɛ́ wɔsumɔ Yehowa, ni wɔbo lɛ toi lɛ, no baatsɔɔ akɛ wɔkpɛlɛɔ nɔ akɛ eyɛ hegbɛ akɛ eyeɔ jeŋ muu lɛ fɛɛ nɔ.1 Kronika 29:11.

Yitso 11, kuku 10

28 HƆKPƆMƆ

Kɛ́ mɔ ko je gbɛ egbe gbekɛ ko ni ahiɛ lɛ musu lɛ, ekpɔ hɔ. Shi kɛ́ oshara ko ni nina mɔ ni hiɛ musu lɛ, loo mɔ lɛ yɛ nɔŋŋ ni musu lɛ diɛŋtsɛ fite lɛ, ejeee hɔkpɔmɔ. Kɛ́ aŋɔ gbekɛ ko hɔ lɛ, anyɛŋ abu lɛ akɛ enyɛ lɛ gbɔmɔtso lɛ fã ko kɛkɛ. Lɛ hu gbɔmɔ ni hiɛ ehe ji lɛ.

Yitso 13, kuku 5

29 LÁ HAMƆ

No ji kɛ́ mɔ ko tee helatsamɔhe, ni ahã lɛ lá, loo nibii titrii ejwɛ ni feɔ lá lɛ ateŋ eko. Kɛ́ mɔ lɛ diɛŋtsɛ lá agbala ama shi ni asaa akɛhã lɛ jio, mɔ kroko nɔ ahã lɛ jio, ahã lɛ lá. Nibii titrii ejwɛ ni feɔ lá lɛ ji, plasma, wala yibii tsuji, wala yibii yɛji, kɛ platelets.

Yitso 13, kuku 13

 30 TSƆSEMƆ

Yɛ Biblia lɛ mli lɛ, wiemɔ ni atsɔɔ shishi akɛ “tsɔsemɔ” lɛ kɔɔɔ toigbalamɔ pɛ he. Kɛ́ akɛɛ aatsɔse mɔ ko lɛ, etsɔɔ akɛ, aatsɔɔ lɛ nii, aaye aabua lɛ ni ele nii, ni aajaje lɛ. Yehowa kɛ mlifu tsɔseee mɔ, moŋ lɛ ekɛ tsuishitoo kɛ suɔmɔ feɔ nakai. (Abɛi 4:1, 2) Enɛ ji nɔkwɛmɔnɔ kpakpa kɛhã fɔlɔi. Yehowa tsɔsemɔ lɛ mɔɔ shi aahu akɛ, mɛi ni etsɔseɔ lɛ shweɔ ni etsɔse amɛ be fɛɛ be. (Abɛi 12:1) Yehowa sumɔɔ ewebii lɛ, ni no hewɔ etsɔseɔ amɛ lɛ. Etsɔɔ amɛ nii koni ekɛjaje amɛjwɛŋmɔ, ni eyeɔ ebuaa amɛ koni amɛsusu nii ahe tamɔ lɛ, ni amɛfee nibii ni esumɔɔ. Kɛ́ fɔlɔi miitsɔse amɛbii lɛ, esa akɛ amɛye amɛbua amɛ ni amɛna nɔ hewɔ ni esa akɛ amɛbo amɛ toi. Agbɛnɛ hu, esa akɛ amɛtsɔɔ amɛ ni amɛsumɔ Yehowa kɛ e-Wiemɔ, ni ji Biblia lɛ, ni amɛnu shishitoo mlai ni yɔɔ mli lɛ ashishi.

Yitso 14, kuku 13

31 DAIMONIOI

Daimonioi lɛ ji mumɔi fɔji ni yitseiaŋ wala ni yɔɔ hewalɛ waa, ni anaaa amɛ. Amɛbatsɔmɔ mumɔi fɔji be ni amɛgbo Nyɔŋmɔ nɔ toi ni amɛbatsɔmɔ ehenyɛlɔi lɛ. (1 Mose 6:2; Yuda 6) Amɛyafata Satan he be ni etse Yehowa hiɛ atua lɛ.5 Mose 32:17; Luka 8:30; Bɔfoi 16:16; Yakobo 2:19.

Yitso 16, kuku 4