Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mɛni Wɔbaanyɛ Wɔkase Kɛjɛ Biblia lɛ Mli?

 YITSO ETƐ

Mɛni Hewɔ Nyɔŋmɔ Bɔ Adesai?

Mɛni Hewɔ Nyɔŋmɔ Bɔ Adesai?

1. Mɛni hewɔ Nyɔŋmɔ bɔ adesai?

YIŊTOO kpakpa ko hewɔ Nyɔŋmɔ bɔ adesai. Ebɔ Adam, ni ji klɛŋklɛŋ nuu lɛ, kɛ Hawa, ni ji klɛŋklɛŋ yoo lɛ, koni amɛhi abɔɔ fɛfɛo ko mli. Ebɔ amɛ ni amɛfɔ, ni amɛsaa shikpɔŋ lɛ nɔ hei krokomɛi ni eshwɛ lɛ ni etsɔ paradeiso, ni amɛkwɛ kooloi lɛ anɔ.1 Mose 1:28; 2:8, 9, 15; kwɛmɔ Wiemɔi Komɛi Amligbalamɔ 6.

2. (a) Te wɔfeɔ tɛŋŋ wɔleɔ akɛ Nyɔŋmɔ baafee nɔ ni eto eyiŋ akɛ ebaafee lɛ? (b) Namɛi Nyɔŋmɔ sumɔɔ ni amɛhi shikpɔŋ lɛ nɔ? Ni eesumɔ ni amɛhi nɔ kɛyashi mɛɛ be?

2 Kɛ́ okwɛ lɛ, ani be ko baashɛ ni wɔbaahi paradeiso mli yɛ shikpɔŋ lɛ nɔ? Yehowa kɛɔ wɔ akɛ: “Mi miwie, ni mi nɔŋŋ mahã aba mli.” (Yesaia 46:9-11; 55:11) Hɛɛ, Yehowa baafee nɔ ni eto eyiŋ akɛ ebaafee lɛ, ni nɔ ko nɔ ko nyɛŋ atsĩ enaa. Yehowa kɛɛ nɔ ko hewɔ ebɔ shikpɔŋ lɛ, “ebɔɔɔ lɛ efolo.” (Yesaia 45:18) Eesumɔ ni mɛi ahi shikpɔŋ lɛ nɔ fɛɛ. Shi namɛi Nyɔŋmɔ sumɔɔ ni amɛhi shikpɔŋ lɛ nɔ, ni eesumɔ ni amɛhi nɔ kɛyashi mɛɛ be? Biblia lɛ kɛɔ akɛ: “Jalɔi lɛ [loo mɛi ni boɔ Nyɔŋmɔ toi lɛ], shikpɔŋ lɛ baatsɔ amɛnɔ ni amɛbaahi nɔ daa.”Lala 37:29; Kpojiemɔ 21:3, 4.

3. Akɛni helai mɔmɔɔ adesai ni amɛgboiɔ hewɔ lɛ, mɛɛ saji wɔbaanyɛ wɔbi wɔhe?

3 Shi ŋmɛnɛ lɛ, helai mɔmɔɔ adesai ni amɛgboiɔ. Adesai kɛ amɛhe nɔɔ ni amɛgbegbeɔ amɛhe. Ekã shi faŋŋ akɛ, jeee nɛkɛ ji bɔ ni Nyɔŋmɔ to eyiŋ akɛ shihilɛ afee.  No hewɔ lɛ, mɛni ba? Mɛni hewɔ shihilɛ lɛ efite nɛkɛ? Biblia lɛ pɛ baanyɛ atsɔɔ wɔ.

NYƆŊMƆ HENYƐLƆ KO

4, 5. (a) Namɔ tsɔ onufu nɔ ekɛ Hawa wie yɛ Eden abɔɔ lɛ mli lɛ? (b) Te feɔ tɛŋŋ ni mɔ ko ni ale lɛ akɛ eyeɔ anɔkwa lɛ batsɔɔ julɔ?

4 Biblia lɛ kɛɔ akɛ, Nyɔŋmɔ yɛ henyɛlɔ ko ni atsɛɔ lɛ “Abonsam kɛ Satan.” Satan tsɔ onufu nɔ ekɛ Hawa wie yɛ Eden abɔɔ lɛ mli. (Kpojiemɔ 12:9; 1 Mose 3:1) Ehã efee tamɔ nɔ ni onufu lɛ ni wieɔ lɛ.—Kwɛmɔ Wiemɔi Komɛi Amligbalamɔ 7.

5 Ani Nyɔŋmɔ bɔ Satan Abonsam? Dabi! Ŋwɛibɔfo ko ni batsɔ Abonsam. Bɔfo nɛɛ yɛ ŋwɛi be ni Nyɔŋmɔ bɔ shikpɔŋ lɛ ehã Adam kɛ Hawa lɛ. (Hiob 38:4, 7) Shi te eba lɛ tɛŋŋ? Susumɔ enɛ he okwɛ. Te feɔ tɛŋŋ ni mɔ ko ni ale lɛ akɛ eyeɔ anɔkwa lɛ batsɔɔ julɔ? Afɔɔɔ mɔ ko mɔ ko julɔ. Shi kɛ́ mɔ ko shwe akɛ ená nɔ ko ni jeee enɔ, ni etee nɔ esusu nakai nɔ lɛ he lɛ, shwelɛ ni eyɔɔ akɛ enine ashɛ nɔ lɛ mli baawa. Enɛ hewɔ lɛ, kɛ́ hegbɛ ko gbele nɔŋŋ lɛ, ebaakɔ. Kɛkɛ lɛ, ebatsɔ julɔ.Kanemɔ Yakobo 1:13-15; kwɛmɔ Wiemɔi Komɛi Amligbalamɔ 8.

6. Te fee tɛŋŋ ni ŋwɛibɔfo ko batsɔ Nyɔŋmɔ henyɛlɔ lɛ?

6 Nakai eba lɛ yɛ ŋwɛibɔfo ni wɔwieɔ ehe lɛ gbɛfaŋ. Be ni Yehowa bɔ Adam kɛ Hawa lɛ, ekɛɛ amɛ akɛ ‘amɛfɔ ni amɛyi afa ni amɛyi shikpɔŋ lɛ nɔ obɔ.’ (1 Mose 1:27, 28) Eeenyɛ efee akɛ, ŋwɛibɔfo nɛɛ kɛɛ ehe akɛ, ‘Gbɔmɛi nɛɛ fɛɛ baanyɛ ajá mi, moŋ fe nɔ ni amɛbaajá Yehowa!’ Nyɔŋmɔ pɛ esa akɛ ajá, shi bɔfo nɛɛ shwe akɛ mɛi ajá lɛ. Kulɛ, ebaanyɛ ejie susumɔ gbonyo nɛɛ kɛje ejwɛŋmɔ mli. Shi efeee nakai, ni enɛ hã eshwelɛ lɛ mli bawa. No hewɔ lɛ, emale etsɔɔ Hawa; elaka lɛ. (Kanemɔ 1 Mose 3:1-5.) Enɛ ni efee lɛ hã ebatsɔ Satan Abonsam, ni ji Nyɔŋmɔ henyɛlɔ.

7. (a) Mɛni hewɔ Adam kɛ Hawa gboi lɛ? (b) Mɛni hewɔ wɔgbɔlɔɔ ni wɔgboiɔ lɛ?

 7 Adam kɛ Hawa gbo Nyɔŋmɔ nɔ toi ni amɛye tso yibii lɛ eko. (1 Mose 2:17; 3:6) Nɔ ni amɛfee lɛ ji esha, no hewɔ lɛ, sɛɛ mli lɛ, amɛgboi, taakɛ Yehowa kɛɛ amɛ lɛ pɛpɛɛpɛ. (1 Mose 3:17-19) Adam kɛ Hawa bii fɛɛ gboiɔ, ejaakɛ amɛ hu amɛji eshafeelɔi. (Kanemɔ Romabii 5:12.) Bɔ ni afee ni wɔnu nɔ hewɔ ni wɔkɛɔ akɛ Adam kɛ Hawa bii fɛɛ ji eshafeelɔi lɛ shishi lɛ, susumɔ nɔkwɛmɔnɔ ni nyiɛ sɛɛ nɛɛ he okwɛ. Ŋɔɔ lɛ akɛ, ooshã blodo, ni tsɛnsi ni oshãa blodo lɛ yɛ mli lɛ he eboda. Te blodo lɛ ni oshãa lɛ baafee tɛŋŋ? Ebaaboda tamɔ tsɛnsi lɛ pɛpɛɛpɛ. Be ni Adam gbo Nyɔŋmɔ nɔ toi lɛ, Adam batsɔ eshafeelɔ. Ni akɛni wɔ fɛɛ wɔji Adam bii hewɔ lɛ, wɔ hu wɔtsɔmɔ eshafeelɔi. Etamɔ tsɛnsi lɛ kɛ blodo lɛ sane lɛ pɛpɛɛpɛ. Enɛ hewɔ wɔ fɛɛ wɔgbɔlɔɔ ni wɔgboiɔ lɛ.Romabii 3:23; kwɛmɔ Wiemɔi Komɛi Amligbalamɔ 9.

8, 9. (a) Te Satan tao akɛ Adam kɛ Hawa ana Yehowa tɛŋŋ? (b) Mɛni hewɔ Yehowa egbeee Satan, Adam, kɛ Hawa amrɔ nɔŋŋ lɛ?

8 Satan te shi ewo Yehowa be ni elaka Adam kɛ Hawa ní ehã amɛgbo Nyɔŋmɔ nɔ toi lɛ. No mli lɛ, eetao ni Adam kɛ Hawa ana Yehowa akɛ eji amalelɔ kɛ nɔyelɔ fɔŋ, mɔ ko ni taooo amɛ ekpakpa. Nɔ ni Satan fee lɛ tsɔɔ akɛ, eetao ekɛɛ adesai akɛ, ehe ehiaaa ni Nyɔŋmɔ atsɔɔ amɛ nɔ ni amɛfee kɛ nɔ ni amɛkafee, ni akɛ esa akɛ Adam kɛ Hawa diɛŋtsɛ atsɔɔ amɛhe nɔ ni ja kɛ nɔ ni ejaaa. Mɛni Yehowa fee yɛ sane nɛɛ he? Kulɛ, Yehowa baanyɛ agbe Satan, Adam, kɛ Hawa fɛɛ, koni sane ajɔ. Shi eji efee nakai kulɛ, te wɔbaafee tɛŋŋ wɔle akɛ nɔ ni Satan wie yɛ ehe lɛ ji amale? Kulɛ, wɔleŋ kɔkɔɔkɔ.

9 No hewɔ lɛ, Yehowa egbeee amɛ amrɔ nɔŋŋ. Moŋ lɛ, eŋmɛ adesai gbɛ ní amɛ diɛŋtsɛ amɛye amɛhe nɔ. Enɛ ni  efee lɛ ehã efee faŋŋ akɛ, Satan ji amalelɔ, ni akɛ Yehowa ji mɔ ni le nɔ ni hi kɛhã adesai. Wɔbaakase enɛ he nii babaoo yɛ Yitso 11 lɛ mli. Shi bo lɛ, susumɔ nɔ ni Adam kɛ Hawa fee lɛ he okwɛ. Ani nɔ ni amɛfee lɛ ja? Ani kulɛ esa akɛ amɛhe nɔ ni Satan kɛɛ amɛ lɛ amɛye ni amɛgbo Nyɔŋmɔ nɔ toi? Yehowa ji mɔ ni hã amɛ nibii fɛɛ ni  amɛyɔɔ lɛ. Ebɔ amɛ akɛ mɛi ni eye emuu, ehã amɛ he ko fɛfɛo ni amɛhi, ni ehã amɛ nitsumɔ kpakpa ni amɛtsu. Shi Satan efeko nɔ ko nɔ ko ehãko amɛ. Eji bo ji Adam loo Hawa kulɛ, ani obaabo Satan toi?

10. Mɛɛ sane ko ni he hiaa esa akɛ wɔteŋ mɔ fɛɛ mɔ akpɛ yiŋ yɛ he?

10 Ŋmɛnɛ hu lɛ, wɔteŋ mɔ fɛɛ mɔ yɛ hegbɛ akɛ eboɔ Yehowa toi loo eboɔ Satan toi. Kɛ́ wɔbo Yehowa toi lɛ, no baatsɔɔ akɛ lɛ ji wɔ-Nɔyelɔ. Shi kɛ́ wɔbo Satan toi lɛ, no baatsɔɔ akɛ wɔhala lɛ akɛ wɔnɔyelɔ. Kɛ́ wɔkpɛ wɔyiŋ akɛ wɔbaabo Yehowa toi lɛ, wɔbaaná wala, ni ebaahã ana akɛ, Satan ji amalelɔ. (Lala 73:28; kanemɔ Abɛi 27:11.) Ŋmɛnɛ lɛ, mɛi fioo pɛ boɔ Nyɔŋmɔ toi, ejaakɛ jeee lɛ eyeɔ je lɛ nɔ. Shi kɛjeee Nyɔŋmɔ yeɔ je lɛ nɔ lɛ, belɛ namɔ yeɔ je lɛ nɔ mɔ?

NAMƆ YEƆ JE LƐ NƆ?

Eji je lɛ maŋtsɛyelii lɛ fɛɛ jeee Satan nɔ kulɛ, ani ebaanyɛ ekɛɛ Yesu akɛ ekɛbaahã lɛ?

11, 12. (a) Mɛni jeŋ maŋtsɛyelii lɛ ni Satan kɛɛ ekɛbaahã Yesu lɛ hãa wɔnaa? (b) Mɛɛ ŋmalɛi hãa wɔnaa akɛ Satan ji mɔ ni yeɔ je lɛ nɔ?

11 Nɔ ko ni ba be ni Yesu yɔɔ shikpɔŋ lɛ nɔ lɛ hãa wɔnaa akɛ, ele mɔ tuuntu ni yeɔ je lɛ nɔ. Be ko lɛ, Satan kɛ “jeŋ maŋtsɛyelii lɛ fɛɛ kɛ amɛnunyam lɛ” tsɔɔ Yesu, ni ekɛɛ lɛ akɛ: “Maŋɔ enɛɛmɛi fɛɛ mahã bo kɛ́ okula shi ojá mi shi kome pɛ.” (Mateo 4:8, 9; Luka 4:5, 6) Bi ohe akɛ, ‘Eji maŋtsɛyelii nɛɛ jeee Satan nɔ kulɛ, ani ebaanyɛ ekɛɛ Yesu akɛ ekɛbaahã lɛ?’ Dabi. Je lɛŋ nɔyelii lɛ fɛɛ lɛ, Satan nɔ ni.

12 Shi ekolɛ obaabi ohe akɛ: ‘Te aaafee tɛŋŋ ni Satan afee je lɛ nɔyelɔ lɛ? Ani jeee Yehowa, Nyɔŋmɔ Ofe lɛ ji mɔ ni bɔ nɔ fɛɛ nɔ?’ (Kpojiemɔ 4:11) Eji anɔkwale akɛ Yehowa ji Nyɔŋmɔ Ofe, shi Yesu tsɛ Satan akɛ “je nɛɛ nɔyelɔ.” (Yohane 12:31; 14:30; 16:11) Bɔfo Paulo tsɛ Satan Abonsam akɛ “shihilɛ gbɛjianɔtoo nɛɛ nyɔŋmɔ.”  (2 Korintobii 4:3, 4) Ni bɔfo Yohane hu ŋma akɛ, “jeŋ muu lɛ fɛɛ kã mɔ fɔŋ lɛ hewalɛ mli.”1 Yohane 5:19.

MƐƐ GBƐ NƆ ABAATSƆ AKPÃTÃ SATAN JE LƐ HIƐ?

13. Mɛni hewɔ esa akɛ wɔná jeŋ hee lɛ?

13 Fitemɔ sɔŋŋ je nɛɛ yaa nɔ efiteɔ. Ŋmɛnɛ lɛ, ojotswaa, osatofeemɔ, yiwalɛ nifeemɔi, kɛ tai miiya nɔ waa yɛ je lɛŋ he fɛɛ he. Adesai nyɛŋ atsu naagbai nɛɛ fɛɛ he nii, ekɔɔɔ he eko bɔ ni amɛbaabɔ he mɔdɛŋ amɛhã. Shi etsɛŋ, Nyɔŋmɔ baakpãtã jeŋ fɔŋ nɛɛ hiɛ yɛ ta ko ni atsɛɔ lɛ Harmagedon lɛ mli, ni ekɛ jeŋ hee ko ni jalɛ baahi mli lɛ baaba.Kpojiemɔ 16:14-16; kwɛmɔ Wiemɔi Komɛi Amligbalamɔ 10.

14. Namɔ Nyɔŋmɔ ehala akɛ e-Maŋtsɛyeli lɛ nɔ Maŋtsɛ? Mɛni Biblia lɛ gba yɛ Yesu he?

14 Yehowa ehala Yesu Kristo akɛ eŋwɛi Maŋtsɛyeli, loo nɔyeli lɛ nɔ Maŋtsɛ. Afii akpei abɔ ni eho lɛ, Biblia lɛ gba akɛ Yesu baafee ‘Toiŋjɔlɛ Lumɔ,’ ni enɔyeli lɛ sɛɛ efoŋ kɔkɔɔkɔ. (Yesaia 9:6, 7) Yesu hã esɛɛnyiɛlɔi lɛ le akɛ, esa akɛ amɛsɔle ni ‘Maŋtsɛyeli lɛ aba, ni afee Nyɔŋmɔ suɔmɔnaa nii yɛ shikpɔŋ lɛ nɔ, taakɛ afeɔ yɛ ŋwɛi lɛ.’ (Mateo 6:10) Yɛ wolo nɛɛ Yitso 8 lɛ mli lɛ, wɔbaana bɔ ni Nyɔŋmɔ Maŋtsɛyeli lɛ baafee ejie je lɛŋ nɔyelii lɛ fɛɛ kɛya. (Kanemɔ Daniel 2:44.) Yɛ Nyɔŋmɔ Maŋtsɛyeli lɛ shishi lɛ, abaasaa shikpɔŋ lɛ nɔ fɛfɛo ni etsɔ Paradeiso.—Kwɛmɔ Wiemɔi Komɛi Amligbalamɔ 11.

JEŊ HEE LƐ EBƐŊKƐ!

15. Mɛni “shikpɔŋ hee” lɛ damɔ shi kɛhã?

15 Biblia lɛ ewo shi akɛ: “Wɔmiimɛ ŋwɛi hee kɛ shikpɔŋ hee, ni nomɛi amli jalɛ baahi.” (2 Petro 3:13; Yesaia 65:17) Bei komɛi lɛ, kɛ́ Biblia lɛ kɛ wiemɔ ni ji “shikpɔŋ lɛ” tsu nii lɛ, ekɔɔ mɛi ni yɔɔ shikpɔŋ lɛ nɔ lɛ  ahe. (1 Mose 11:1) No hewɔ lɛ, “shikpɔŋ hee” ni jalɛ baahi mli lɛ damɔ shi kɛhã mɛi fɛɛ ni boɔ Nyɔŋmɔ toi. Nyɔŋmɔ baajɔɔ amɛ.

16. Mɛni mɛi fɛɛ ni baahi Nyɔŋmɔ jeŋ hee lɛ mli lɛ baaná? Ni mɛni esa akɛ wɔfee koni wɔná eko?

16 Yesu wo mɛi fɛɛ ni baahi Nyɔŋmɔ jeŋ hee lɛ mli lɛ shi akɛ, amɛbaaná “naanɔ wala.” (Marko 10:30) Mɛni esa akɛ wɔfee koni wɔná naanɔ wala? Ofainɛ kanemɔ Yohane 3:16 kɛ Yohane 17:3 lɛ, ni obaana hetoo lɛ. Agbɛnɛ, hã wɔkwɛ bɔ ni shikpɔŋ lɛ nɔ Paradeiso lɛ mli shihilɛ baafee.

17, 18. Mɛni hãa wɔnaa akɛ toiŋjɔlɛ baahi shikpɔŋ lɛ nɔ he fɛɛ he, ni wɔbaahi shi shweshweeshwe yɛ jeŋ hee lɛ mli lɛ?

17 Efɔŋfeemɔ, basabasafeemɔ, awuiyeli, kɛ tai asɛɛ baafo. Nyɔŋmɔ baajie efɔŋfeelɔi fɛɛ kɛje shikpɔŋ lɛ nɔ. (Lala 37:10, 11) Ni ebaahã ‘tai asɛɛ afo’ yɛ shikpɔŋ lɛ nɔ fɛɛ. (Lala 46:9; Yesaia 2:4) Mɛi pɛ ni baashwɛ yɛ shikpɔŋ lɛ nɔ ji mɛi ni sumɔɔ Nyɔŋmɔ ni amɛboɔ lɛ toi. Wɔbaaná toiŋjɔlɛ kɛya naanɔ.Lala 72:7.

18 Yehowa tsuji sheŋ nɔ ko nɔ ko gbeyei. Be ni blema Israelbii lɛ boɔ Nyɔŋmɔ toi lɛ, ebu amɛhe ni amɛhi shi shweshweeshwe. (3 Mose 25:18, 19) Yɛ Paradeiso lɛ mli lɛ, wɔsheŋ mɔ ko mɔ ko loo nɔ ko nɔ ko gbeyei. Wɔbaahi shi shweshweeshwe!Kanemɔ Yesaia 32:18; Mika 4:4.

19. Mɛni hewɔ wɔbaanyɛ wɔkɛɛ kɛ nɔmimaa akɛ yɛ Nyɔŋmɔ jeŋ hee lɛ mli lɛ niyenii baabu lɛ?

19 Niyenii baabu. “Shikpɔŋ lɛ nɔ baaba abele babaoo kɛyashwie gɔji lɛ ayiteaŋ.” (Lala 72:16) Yehowa, “wɔ-Nyɔŋmɔ lɛ baajɔɔ wɔ,” ni ‘shikpɔŋ lɛ baaba enii.’Lala 67:6.

20. Mɛni hãa wɔnaa akɛ shikpɔŋ lɛ baatsɔ paradeiso?

20 Shikpɔŋ muu lɛ fɛɛ baatsɔ paradeiso. Mɛi baamamɔ  tsũi fɛfɛji, ni amɛbaafee abɔi. (Kanemɔ Yesaia 65:21-24; Kpojiemɔ 11:18.) Shikpɔŋ muu lɛ fɛɛ nɔ baafee fɛo tamɔ Eden abɔɔ lɛ. Yehowa baahã wɔ nibii fɛɛ ni he hiaa wɔ lɛ be fɛɛ be. Biblia lɛ wieɔ ehe akɛ: “Ogbɛɔ odɛŋ ni ohãa nɔ fɛɛ nɔ ní hiɛ kã tɔɔ kɛ nii ní etaoɔ.”Lala 145:16.

21. Mɛni hãa wɔnaa akɛ adesai kɛ kooloi baahi shi yɛ toiŋjɔlɛ mli?

21 Adesai kɛ kooloi baahi shi yɛ toiŋjɔlɛ mli. Kooloi yeŋ gbɔmɛi awui dɔŋŋ. Gbekɛbii po sheŋ kooloi ni yeɔ mɛi awui ŋmɛnɛ lɛ agbeyei.Kanemɔ Yesaia 11:6-9; 65:25.

22. Mɛni Yesu baafee ehã mɛi ni he yeɔ lɛ?

22 Hela mɔŋ mɔ ko mɔ ko dɔŋŋ. Be ni Yesu yɔɔ shikpɔŋ lɛ nɔ lɛ, etsa mɛi pii. (Mateo 9:35; Marko 1:40-42; Yohane 5:5-9) No hewɔ lɛ, kɛ́ Yesu bɔi shikpɔŋ lɛ nɔyeli akɛ Nyɔŋmɔ Maŋtsɛyeli lɛ nɔ Maŋtsɛ lɛ, ebaatsa mɛi fɛɛ ni he yeɔ lɛ. Mɔ ko mɔ ko ekɛŋ akɛ ‘mihe miiye.’Yesaia 33:24; 35:5, 6.

23. Mɛni Nyɔŋmɔ baafee ehã mɛi ni egboi lɛ?

23 Gbohii lɛ baaba wala mli ekoŋŋ. Nyɔŋmɔ ewo shi akɛ, ebaatee mɛi akpekpei abɔ ni egboi ashi. Biblia lɛ kɛɔ akɛ: “Abaatee jalɔi kɛ mɛi ni ejaaa fɛɛ shi.”Kanemɔ Yohane 5:28, 29; Bɔfoi 24:15.

24. Ani obaasumɔ ni ohi Paradeiso mli? Mɛni hewɔ?

24 Bianɛ lɛ, wɔ eshwɛɔ. Wɔbaanyɛ wɔkpɛ wɔyiŋ akɛ wɔbaakase Yehowa he nii ni wɔsɔmɔ lɛ, aloo wɔbaanyɛ wɔhala akɛ wɔbaafee nɔ ni wɔ diɛŋtsɛ wɔsumɔɔ. Kɛ́ wɔkpɛ wɔyiŋ akɛ wɔbaasɔmɔ Yehowa lɛ, wɔsɛɛ lɛ, ebaajɔɔ wɔ. Be ko lɛ, nuu ko ni miihe agbo lɛ kɛɛ Yesu akɛ ekai lɛ. Yesu wo lɛ shi akɛ: “Obaafata mihe yɛ Paradeiso.” (Luka 23:43) Yɛ yitso ni nyiɛ sɛɛ lɛ mli lɛ, wɔbaakase Yesu Kristo, ni ji mɔ ni Nyɔŋmɔ baatsɔ enɔ ehã eshiwoi lɛ aba mli lɛ he sane.