Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mɛni Wɔbaanyɛ Wɔkase Kɛjɛ Biblia lɛ Mli?

 YITSO NYƆŊMA KƐ ENYƆ

Te Obaafee Tɛŋŋ Otsɔ Nyɔŋmɔ Naanyo?

Te Obaafee Tɛŋŋ Otsɔ Nyɔŋmɔ Naanyo?

1, 2. Namɛi ji Yehowa nanemɛi lɛ ekomɛi?

NAMƆ osumɔɔ ni okɛbɔ naanyo? Mɔ ko ni osumɔɔ esane, ni enuɔ bo shishi ni bo hu onuɔ lɛ shishi, mɔ ko ni mli hi ni oyɛ bɔ ni ebaa ejeŋ ehãa lɛ he miishɛɛ, aloo jeee nakai?

2 Yehowa Nyɔŋmɔ hala adesai komɛi akɛ enanemɛi. Amɛteŋ mɔ kome ji Abraham. (Yesaia 41:8; Yakobo 2:23) Yehowa sumɔ David hu sane. Ekɛɛ akɛ David ji ‘etsui naa nuu.’ (Bɔfoi 13:22) Yehowa ‘sumɔɔ’ gbalɔ Daniel hu ‘sane naakpa.’Daniel 9:23.

3. Te fee tɛŋŋ ni Abraham, David, kɛ Daniel batsɔmɔ Yehowa nanemɛi?

3 Te fee tɛŋŋ ni Abraham, David, kɛ Daniel batsɔmɔ Yehowa nanemɛi? Yehowa kɛɛ Abraham akɛ: “Obo migbee toi.” (1 Mose 22:18) Yehowa kɛ mɛi ni jɛɔ amɛtsui mli amɛboɔ lɛ toi lɛ bɔɔ naanyo. Ekɛ maŋ muu fɛɛ po bɔɔ naanyo. Yehowa kɛɛ Israel maŋ lɛ akɛ: “Nyɛboa migbee toi, ni matsɔ nyɛ-Nyɔŋmɔ, ni nyɛ hu nyɛbaatsɔ miwebii.” (Yeremia 7:23) No hewɔ lɛ, kɛ́ oosumɔ ni otsɔ Yehowa naanyo lɛ, bo hu bo lɛ toi.

YEHOWA BUƆ ENANEMƐI AHE

4, 5. Mɛɛ gbɛ nɔ Yehowa tsɔɔ ebuɔ enanemɛi ahe?

4 Biblia lɛ hãa wɔleɔ akɛ Yehowa miitao gbɛi ni ebaatsɔ nɔ “ekɛ ehewalɛ lɛ aye abua mɛi ni kɛ amɛtsui fɛɛ ehã lɛ lɛ.” (2 Kronika 16:9) Yehowa wo enanemɛi lɛ ashi  Lala 32:8 lɛ akɛ: “Magbele ojwɛŋmɔ mli, ni matsɔɔ bo gbɛ ni onyiɛ nɔ; mihiŋmɛi baakã ohe, ni mawo bo ŋaa.”

5 Henyɛlɔ ko ni yɔɔ hewalɛ lɛ miisumɔ ni efite wɔ kɛ Nyɔŋmɔ teŋ koni wɔkatsɔmɔ Nyɔŋmɔ nanemɛi. Shi Yehowa miisumɔ ni ebu wɔhe. (Kanemɔ Lala 55:22.) Akɛ Yehowa nanemɛi lɛ, wɔjɛɔ wɔtsui fɛɛ mli wɔsɔmɔɔ lɛ. Kɛ́ wɔkɛ shihilɛi ni mli wawai kpe po lɛ, wɔtɔ̃ɔɔ enɔ. Lalatsɛ lɛ ŋma yɛ Yehowa he akɛ: “Akɛni eyɛ mininejurɔ nɔ hewɔ lɛ, mididãŋ kɔkɔɔkɔ.” Nakai nɔŋŋ wɔ hu wɔnuɔ he yɛ Yehowa he. (Lala 16:8; 63:8) Mɛɛ gbɛ nɔ Satan bɔɔ mɔdɛŋ yɛ koni efite wɔ kɛ Nyɔŋmɔ teŋ?

SANE NI SATAN WIE ESHI ADESAI

6. Mɛni Satan wie eshi adesai?

6 Wɔkase yɛ Yitso 11 lɛ akɛ, Satan te shi ewo Yehowa ni ewie eshi lɛ akɛ eji amalelɔ ni enɔyeli lɛ ehiii. Kɛ́ ka ekome lɛ, kulɛ Yehowa ashi Adam kɛ Hawa koni amɛ diɛŋtsɛ amɛtsɔɔ nɔ ni hi kɛ nɔ ni ehiii. Hiob wolo lɛ ni yɔɔ Biblia lɛ mli lɛ, hãa wɔleɔ akɛ Satan wie eshi adesai ni miisumɔ ni amɛtsɔmɔ Nyɔŋmɔ nanemɛi lɛ. Satan tsɔɔ akɛ nɔ ni amɛbaana kɛjɛ Nyɔŋmɔ dɛŋ lɛ hewɔ ni amɛsɔmɔɔ Nyɔŋmɔ lɛ shi jeee suɔmɔ ni amɛsumɔɔ Nyɔŋmɔ lɛ hewɔ. Satan wie po akɛ, ebaanyɛ ehã mɔ fɛɛ mɔ ate shi awo Nyɔŋmɔ. Hã wɔkwɛ nɔ ni wɔbaanyɛ wɔkase yɛ Hiob sane lɛ mli kɛ bɔ ni Yehowa bu Hiob he.

7, 8. (a) Te Yehowa na Hiob tɛŋŋ? (b) Mɛni Satan wie yɛ Hiob he?

7 Namɔ ji Hiob? Eji gbɔmɔ kpakpa ni hi shi aaafee afii 3,600 ni eho nɛ. Yehowa wie akɛ nakai beiaŋ lɛ, mɔ ko mɔ ko bɛ shikpɔŋ lɛ nɔ ni tamɔ Hiob. Hiob buɔ Nyɔŋmɔ waa, ni enyɛɔ efɔŋ. (Hiob 1:8) Hɛɛ, no mli lɛ, Hiob ji Yehowa naanyo lɛɛlɛŋ.

 8 Satan kɛɛ nɔ ni Hiob baana kɛjɛ Nyɔŋmɔ dɛŋ lɛ hewɔ ni esɔmɔɔ Nyɔŋmɔ lɛ. Satan kɛɛ Yehowa akɛ: “Ani jeee afãbaŋ ofo owo ekɛ ewe kɛ nɔ fɛɛ nɔ ní eyɔɔ lɛ he kɛkpe? Ojɔɔ enine naa nitsumɔ nɔ, ni ekooloi eshwere yɛ shikpɔŋ lɛ nɔ. Shi agbɛnɛ kpã onine mli ní ota enii ní eyɔɔ lɛ fɛɛ he; akɛ elomɔŋ bo yɛ ohiɛ lo.”Hiob 1:10, 11.

9. Mɛni Yehowa ŋmɛ Satan gbɛ ni efee?

9 Satan kɛɛ nɔ ni Hiob baaná kɛjɛ Yehowa dɛŋ lɛ pɛ hewɔ ni esɔmɔɔ Yehowa lɛ. Satan kɛɛ hu akɛ, ebaanyɛ ehã Hiob akpa Yehowa sɔɔmɔ. Yehowa kɛ Satan kpãaa gbee, shi eŋmɛ Satan gbɛ koni eyaka Hiob ekwɛ kɛji suɔmɔ ni Hiob yɔɔ kɛhã Yehowa lɛ hewɔ esɔmɔɔ lɛ lɛ.

SATAN TUTUA HIOB

10. Mɛɛ gbɛ nɔ Satan tutua Hiob, ni te Hiob fee enii yɛ he ehã tɛŋŋ?

10 Klɛŋklɛŋ lɛ, Satan hã aju Hiob kooloi lɛ ekomɛi ni ekpãtã nɔ ni shwɛ lɛ fɛɛ hiɛ. Kɛkɛ ni Satan gbegbee Hiob tsuji lɛ ateŋ mɛi babaoo. Hiob nibii fɛɛ ŋmɛɛ lɛ. Naagbee kwraa lɛ, Satan tsɔ ahum ko nɔ egbe Hiob bii nyɔŋma lɛ. Shi loloolo lɛ, Hiob tɔ̃ɔɔ Yehowa nɔ. Biblia lɛ kɛɔ akɛ: “Enɛ fɛɛ mli lɛ Hiob efeee esha ko, ni ekɛ sane gbonyo ko hu shwaaa Nyɔŋmɔ.”Hiob 1:12-19, 22.

Akɛni Hiob ji Yehowa naanyo kpakpa hewɔ lɛ, Yehowa juro lɛ

11. (a) Mɛni ekoŋŋ Satan fee Hiob? (b) Te Hiob fee enii yɛ he ehã tɛŋŋ?

11 Loloolo lɛ, Satan eŋmɛɛɛ saji ahe. Etswa Nyɔŋmɔ mpoa akɛ: “Kpã onine mli, ní ota ewu kɛ eheloo he, akɛ elomɔŋ bo yɛ ohiɛ lo.” No hewɔ lɛ, Satan hã hela ko ni hãa mɔ he jaraa lɛ waa mɔ Hiob. (Hiob 2:5, 7) Shi kome ekoŋŋ lɛ, Hiob tɔ̃ɔɔ Yehowa nɔ. Hiob kɛɛ akɛ: “Minɔkwayeli lɛ miŋmɛŋ he kɛyashi magbo!”Hiob 27:5.

12. Mɛɛ gbɛ nɔ Hiob hã ana yɛ akɛ Satan ji amalelɔ?

 12 No mli lɛ, Hiob leee akɛ Satan ewie eshi lɛ, ni agbɛnɛ hu eleee nɔ hewɔ ni enaa amanehulu lɛ. Eyasusu akɛ Yehowa ji mɔ ni hãa enaa amanehului lɛ. (Hiob 6:4; 16:11-14) Shi fɛɛ sɛɛ po lɛ, Hiob tɔ̃ɔɔ Yehowa nɔ. Sane nɛɛ fɛɛ tsɔɔ akɛ Hiob fooo lɛ pɛ enɔ mli. Eji Nyɔŋmɔ naanyo ejaakɛ esumɔɔ Nyɔŋmɔ. Saji ni Satan wie eshi Hiob lɛ fɛɛ lɛ, amalei sɔŋŋ!

13. Mɛni jɛ Hiob anɔkwayeli lɛ mli kɛba?

13 Eyɛ mli akɛ, no mli lɛ, Hiob leee nɔ ni miiya nɔ yɛ ŋwɛi moŋ, shi etɔ̃ɔɔ Nyɔŋmɔ nɔ ni ekɛ no tsɔɔ akɛ Satan ji bɔfo gbonyo. Akɛni Hiob fee ehe naanyo kpakpa hewɔ lɛ, Yehowa jɔɔ lɛ.Hiob 42:12-17.

SATAN EWIE ESHI BO

14, 15. Mɛɛ sane Satan ewie eshi gbɔmɛi fɛɛ?

14 Obaanyɛ okase nii kɛjɛ nɔ ni ba Hiob nɔ lɛ mli. Ŋmɛnɛ lɛ, Satan wieɔ eshiɔ wɔ akɛ, nɔ ni wɔbaana kɛjɛ Yehowa dɛŋ lɛ hewɔ wɔsɔmɔɔ Yehowa lɛ. Satan wie yɛ Hiob 2:4 lɛ akɛ: “Nɔ fɛɛ nɔ ní gbɔmɔ yɔɔ lɛ, ekɛbaahã yɛ ewala hewɔ.” No hewɔ lɛ, jeee Hiob pɛ Satan wie eshi, shi ewie eshi hii kɛ yei fɛɛ akɛ amɛfoɔ amɛ pɛ amɛnɔ mli. Hiob gbele sɛɛ afii ohai abɔ komɛi po lɛ, Satan kãhe eebɔ Yehowa ahora ni eewie eeshi Yehowa tsuji lɛ. Akɛ nɔkwɛmɔnɔ lɛ, awie yɛ Abɛi 27:11 lɛ akɛ: “Mibi, hã ohiɛ akã shi, ni ohã mitsui anya, koni maná hetoo mahã mɔ ni bɔɔ mi ahora lɛ.”

15 Obaanyɛ ohala akɛ obaabo Yehowa toi ni otsɔ enaanyo ni yeɔ lɛ anɔkwa, bɔ ni afee ni efee faŋŋ akɛ Satan ji amalelɔ. Kɛ́ ebaabi po ni ofee tsakemɔi wuji yɛ oshihilɛ mli koni otsɔ Nyɔŋmɔ naanyo lɛ, feemɔ nakai ejaakɛ no baafee yiŋ ni hi fe fɛɛ ni obaakpɛ yɛ oshihilɛ  mli! Esa akɛ osusu nii ahe jogbaŋŋ dani okpɛ yiŋ nɛɛ. Satan kɛɛ kɛ́ okɛ naagbai kpe lɛ obaaje Nyɔŋmɔ sɛɛ. Ebɔɔ mɔdɛŋ koni elaka wɔ koni wɔgbo Nyɔŋmɔ nɔ toi. Mɛɛ gbɛ nɔ efeɔ nakai?

16. (a) Mɛɛ gbɛi anɔ Satan tsɔɔ koni etsĩ wɔnaa koni wɔkasɔmɔ Yehowa? (b) Kɛ́ okwɛ oshihilɛ mli lɛ, mɛni Abonsam baanyɛ atsɔ nɔ etsĩ onaa koni okasɔmɔ Yehowa?

16 Satan tsɔɔ gbɛi srɔtoi anɔ koni efite wɔ kɛ Nyɔŋmɔ teŋ. Etutuaa wɔ “tamɔ jata ni miihũu, ni eetao mɔ ko emi.” (1 Petro 5:8) Kaahã efee bo naakpɛɛ, kɛ́ onanemɛi, kɛ owekumɛi, kɛ mɛi krokomɛi bɔ mɔdɛŋ akɛ amɛbaatsĩ onaa koni okpa Biblia lɛ kasemɔ ni okpa nibii kpakpai ni ofeɔ lɛ. Obaanu he tamɔ nɔ ni aatutua bo. * (Yohane 15:19, 20) Agbɛnɛ hu, Satan kwaa efeɔ ehe “tamɔ la bɔfo.” No hewɔ lɛ, ebaabɔ mɔdɛŋ elaka wɔ koni wɔgbo Yehowa nɔ toi. (2 Korintobii 11:14) Gbɛ kroko ni Satan tsɔɔ nɔ etsĩɔ wɔnaa koni wɔkasɔmɔ Yehowa ji ni ehã wɔnu he akɛ wɔsaaa mɛi ni jáa Nyɔŋmɔ, ni no hewɔ lɛ enaŋ jamɔ ni wɔkɛhãa lɛ lɛ he miishɛɛ.Abɛi 24:10.

YE YEHOWA KITÃI LƐ ANƆ

17. Mɛni hewɔ wɔboɔ Yehowa toi lɛ?

17 Kɛ́ wɔbo Yehowa toi lɛ, wɔhãa anaa faŋŋ akɛ Satan ji amalelɔ. Mɛni baaye abua wɔ koni wɔbo Yehowa toi? Biblia lɛ kɛɔ akɛ: “Suɔmɔ Yehowa, o-Nyɔŋmɔ lɛ, kɛ otsui fɛɛ kɛ osusuma fɛɛ kɛ ohewalɛ fɛɛ.” (5 Mose 6:5) Wɔboɔ Yehowa toi ejaakɛ wɔsumɔɔ lɛ. Be ni suɔmɔ ni  wɔyɔɔ kɛhã Yehowa lɛ mli waa lɛ, wɔbaasumɔ akɛ wɔfee nɔ fɛɛ nɔ ni ekɛɔ wɔ ni wɔfee lɛ. Bɔfo Yohane ŋma akɛ: “Enɛ ji Nyɔŋmɔ suɔmɔ lɛ, akɛ wɔye ekitãi lɛ anɔ; ni ekitãi lɛ jeee jatsu.”1 Yohane 5:3.

18, 19. (a) Mɛni ji nibii komɛi ni Yehowa sumɔɔɔ ni wɔfeɔ? (b) Mɛni tsɔɔ akɛ Yehowa ekɛɛɛ wɔ ni wɔfee nɔ ko ni wɔnyɛŋ wɔfee?

18 Shi mɛni ji nibii komɛi ni Yehowa sumɔɔɔ ni wɔfeɔ? Ekomɛi ji nɔ ni atsĩ tã yɛ akrabatsa ni ji “ Kaasumɔ Nibii ni Yehowa Sumɔɔɔ Lɛ” mli lɛ. Ekolɛ obaabu nibii nɛɛ ekomɛi akɛ naagba ko bɛ he tsɔ̃ akɛ mɔ ko kɛ ehe aaawo mli. Shi kɛ́ okane ŋmalɛi ni atsĩ tã yɛ jɛmɛ lɛ, ni ojwɛŋ nɔ jogbaŋŋ lɛ, obaana nɔ hewɔ ni nilee yɔɔ mli akɛ obo Yehowa mlai lɛ atoi lɛ. Agbɛnɛ hu lɛ, obaana akɛ esa akɛ ofee tsakemɔi komɛi yɛ oshihilɛ mli. Eyɛ mli akɛ jeee tsakemɔi lɛ fɛɛ obaaná lɛ mlɛo moŋ, shi kɛ́ ofee tsakemɔi nɛɛ, otoiŋ baajɔ bo ni obaaná miishɛɛ ejaakɛ no baatsɔɔ akɛ,  oji Nyɔŋmɔ naanyo ni yeɔ lɛ anɔkwa. (Yesaia 48:17, 18) Mɛni tsɔɔ akɛ wɔbaanyɛ wɔfee tsakemɔi nɛɛ?

19 Yehowa ekɛɛɛ wɔ ni wɔfee nɔ ko ni wɔnyɛŋ wɔfee. (5 Mose 30:11-14) Akɛni Yehowa ji naanyo kpakpa hewɔ lɛ, ele wɔ jogbaŋŋ fe bɔ ni wɔle wɔhe po. Ele wɔnyɛmɔi kɛ wɔgbɔjɔmɔi fɛɛ. (Lala 103:14) Bɔfo Paulo kɛɛ akɛ: “Anɔkwafo ji Nyɔŋmɔ, ni ehãŋ aka nyɛ fe bɔ ni nyɛbaanyɛ naa nyɛdamɔ, shi moŋ yɛ kaa lɛ mli lɛ, ebaaje gbɛ ni nyɛkɛaaje mli hu ehã nyɛ koni nyɛnyɛ naa nyɛdamɔ.” (1 Korintobii 10:13) Wɔbaanyɛ wɔná nɔmimaa akɛ Yehowa baawaje wɔ be fɛɛ be ni wɔfee nɔ ni ja. Ebaahã bo “hewalɛ ni fa kɛteke nɔ” koni ofi shi yɛ shihilɛi ni mli wawai amli. (2 Korintobii 4:7) Be ni Paulo na bɔ ni Yehowa ye ebua lɛ yɛ shihilɛi ni mli wawai ni ekɛkpe lɛ amli lɛ, ewie akɛ: “Yɛ nɔ fɛɛ nɔ mli lɛ, mitsɔɔ mɔ ni wajeɔ mi lɛ nɔ mináa hewalɛ.”Filipibii 4:13.

 KASEMƆ BƆ NI AFEƆ NƆ NI NYƆŊMƆ SUMƆƆ

20. Mɛɛ sui esa akɛ okase, ni mɛni hewɔ esa akɛ okase?

20 Kɛ́ wɔmiisumɔ ni wɔtsɔmɔ Yehowa nanemɛi lɛ, esaaa akɛ wɔfeɔ nibii ni Yehowa sumɔɔɔ ni wɔfeɔ lɛ, shi no pɛ kɛkɛ faaa. (Romabii 12:9) Nyɔŋmɔ nanemɛi sumɔɔ nibii ni Nyɔŋmɔ sumɔɔ. Awie nibii ni Nyɔŋmɔ sumɔɔ lɛ ahe yɛ Lala 15:1-5 lɛ. (Kanemɔ.) Yehowa nanemɛi lɛ kaseɔ esui lɛ ni amɛjieɔ sui ni nyiɛ sɛɛ nɛɛ akpo, nomɛi ji “suɔmɔ, miishɛɛ, toiŋjɔlɛ, tsuishitoo, mlihilɛ, ekpakpafeemɔ, hemɔkɛyeli, mlijɔlɛ, henɔyeli.”Galatiabii 5:22, 23.

21. Te obaafee tɛŋŋ ojie sui ni Nyɔŋmɔ sumɔɔ lɛ akpo?

21 Te obaafee tɛŋŋ ojie sui kpakpai nɛɛ akpo? Esa akɛ okane ni okase Biblia lɛ daa gbi koni ole nibii ni Yehowa sumɔɔ lɛ. (Yesaia 30:20, 21) Be ni oyaa nɔ ofeɔ enɛ lɛ, suɔmɔ ni oyɔɔ kɛhã Yehowa lɛ mli baaya nɔ awa, ni be ni suɔmɔ ni oyɔɔ kɛhã lɛ lɛ mli waa lɛ, obaasumɔ ni obo lɛ toi.

22. Kɛ́ obo Yehowa toi lɛ, mɛni baajɛ mli kɛba?

22 Abaanyɛ akɛ tsakemɔi ni ehe baahia ni ofee lɛ ato bɔ ni mɔ ko jieɔ atadei ni ewo muji ni ewoɔ atadei hei lɛ he. Biblia lɛ kɛɔ akɛ esa akɛ ojie “subaŋ momo lɛ” yɛ ohe ni owo “subaŋ hee lɛ.” (Kolosebii 3:9, 10) Eyɛ mli akɛ ebɛ mlɛo akɛ wɔbaafee tsakemɔi nɛɛ moŋ, shi kɛ́ wɔfee nakai ni wɔbo Yehowa toi lɛ, ewo shi akɛ “ebaajuro wɔ babaoo.” (Lala 19:11) Hɛɛ, bo Yehowa toi koni okɛhã efee faŋŋ akɛ nɔ ni Satan wie eshi bo lɛ ji amale. Sɔɔmɔ Yehowa, jeee yɛ nɔ ni obaaná wɔsɛɛ lɛ hewɔ, shi moŋ akɛni ojɛɔ otsui krɔŋŋ mli osumɔɔ lɛ lɛ hewɔ. No baahã obatsɔ Nyɔŋmɔ naanyo kpakpa!

^ kk. 16 Enɛ etsɔɔɔ akɛ Satan hɔ sɛɛ ni eekudɔ mɛi ni bɔɔ mɔdɛŋ ni amɛtsĩ onaa koni okpa Biblia lɛ kasemɔ lɛ. Shi akɛni Satan ji “shihilɛ gbɛjianɔtoo nɛɛ nyɔŋmɔ” ni ‘jeŋ muu lɛ fɛɛ kã ehewalɛ mli’ hewɔ lɛ, ebɛ naakpɛɛ akɛ mɛi komɛi baatsĩ wɔnaa koni wɔkasɔmɔ Yehowa.2 Korintobii 4:4; 1 Yohane 5:19.

Ekrokromɛi Hu Nɛ

Ani Obaanyɛ ‘Otsi Obɛŋkɛ Nyɔŋmɔ’ Lɛɛlɛŋ?

Yehowa Nyɔŋmɔ, mɔ ni Bɔ ŋwɛi kɛ shikpɔŋ lɛ miifɔ̃ wɔ nine, ni eewo wɔ shi hu.

Mɛni Wɔbaanyɛ Wɔfee Kɛtsɔɔ Yehowa akɛ Wɔsumɔɔ Lɛ?

Esaaa akɛ wɔkɛɔ kɛkɛ akɛ wɔsumɔɔ lɛ; esa akɛ wɔkɛ wɔnifeemɔ atsɔɔ.