Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mɛni Wɔbaanyɛ Wɔkase Kɛjɛ Biblia lɛ Mli?

 YITSO KOME

Namɔ Ji Nyɔŋmɔ?

Namɔ Ji Nyɔŋmɔ?

1, 2. Mɛɛ saji mɛi fɔɔ bimɔ?

GBEKƐBII biɔ saji waa. Bei pii lɛ, kɛ́ amɛbi bo nɔ ko, ni ogbala mli otsɔɔ amɛ lɛ, amɛtsui enyɔɔɔ amɛmli. No hewɔ lɛ, amɛbaabi bo akɛ, ‘Mɛni hewɔ?’ Ni kɛ́ obɔ mɔdɛŋ ohã amɛ hetoo lɛ, ekolɛ amɛbaasaa amɛbi bo akɛ, ‘Ni mɛni hewɔ?’

2 Jeee gbekɛbii pɛ biɔ saji, onukpai hu biɔ saji. Bei komɛi lɛ, kɛ́ wɔmiiya he ko, ni wɔlé jɛmɛ lɛ, wɔbiɔ mɔ ko ni etsɔɔ wɔ gbɛ. Nakai nɔŋŋ kɛ́ wɔmiitao wɔle bɔ ni atswa lɛ, ekolɛ wɔbaabi mɔ ko. Shi wɔbiɔ saji yɛ shihilɛ kɛ bɔ ni nibii baaji wɔsɛɛ lɛ hu ahe. Sanebimɔi ni tamɔ nakai lɛ ahe miihia. Shi kɛ́ wɔnáaa sanebimɔi nɛɛ ahetoi lɛ, ekolɛ wɔgbaŋ wɔhe naa wɔtaoŋ dɔŋŋ.

3. Mɛni hewɔ mɛi pii susuɔ akɛ amɛnyɛŋ amɛná sanebimɔi ni he hiaa amɛ waa lɛ ahetoi lɛ?

3 Ani wɔbaanyɛ wɔná sanebimɔi ni he hiaa wɔ waa lɛ ahetoi yɛ Biblia lɛ mli? Mɛi komɛi kpɛlɛɔ nɔ akɛ wɔbaanyɛ wɔná hetoi lɛ yɛ mli, shi efeɔ amɛ akɛ Biblia lɛ shishinumɔ wa tsɔ. Amɛsusuɔ akɛ mɛi ni le woloŋ waa, jamɔŋ tsɔɔlɔi, loo osɔfoi pɛ baanyɛ ahã amɛsanebimɔi lɛ ahetoi. Ni mɛi komɛi hu nuɔ he akɛ, kɛ́ amɛbi saji ni tamɔ nakai lɛ, amɛshwie amɛhiɛ shi. Te bo hu osusuɔ tɛŋŋ?

4, 5. Mɛni ji sanebimɔi komɛi ni he hiaa ni obaasumɔ ni oná hetoo? Mɛni hewɔ esa akɛ oya nɔ otao hetoi lɛ?

4 Ekolɛ, ootao sanebimɔi tamɔ, ‘Mɛni hewɔ Nyɔŋmɔ bɔ mi? Kɛ́ migbo lɛ, mɛni baaba minɔ? Mɛɛ sui Nyɔŋmɔ yɔɔ?’ loo ekrokomɛi ni tamɔ nakai lɛ ahetoi. Yesu, ni ji  Tsɔɔlɔ ni ehe gbɛ́i waa lɛ wie akɛ: “Nyɛyaa nɔ nyɛbia, ni abaahã nyɛ; nyɛyaa nɔ nyɛtaoa, ni nyɛbaana; nyɛyaa nɔ nyɛshia, ni abaagbele ahã nyɛ.” (Mateo 7:7) No hewɔ lɛ, kaahã onijiaŋ je wui. Yaa nɔ otao sanebimɔi nɛɛ ahetoi kɛyashi otsui baanyɔ omli.

5 Kɛ́ ‘otee nɔ otao’ sanebimɔi nɛɛ ahetoi lɛ, obaana hetoi lɛ yɛ Biblia lɛ mli. (Abɛi 2:1-5) Hetoi lɛ ashishinumɔ waaa. Ni nibii ni obaakase kɛjɛ Biblia lɛ mli lɛ baahã omii ashɛ ohe bianɛ, ni amɛbaahã bo hiɛnɔkamɔ hu. Hã wɔsusu sanebimɔ ko ni gbaa mɛi pii anaa lɛ he wɔkwɛ.

ANI NYƆŊMƆ SUSUƆ WƆHE ALOO EYITSOŊ WA?

6. Mɛni hewɔ mɛi komɛi susuɔ akɛ Nyɔŋmɔ eshi wɔsane ehã wɔ lɛ?

6 Mɛi pii susuɔ akɛ Nyɔŋmɔ eshi wɔsane ehã wɔ. Amɛkɛɔ akɛ eji wɔsane kã etsui nɔ kulɛ, jeee nɛkɛ jeŋ shihilɛ baafee kwraa. Ŋmɛnɛ lɛ, tai, nyɛɛ, kɛ nibii krokomɛi ni hãa mɛi werɛ hoɔ amɛhe miiya nɔ yɛ je lɛŋ he fɛɛ he. Helai mɔmɔɔ mɛi, amɛpiŋɔ, ni amɛgboiɔ. No hewɔ lɛ, mɛi komɛi biɔ amɛhe akɛ, ‘Kɛ́ Nyɔŋmɔ jwɛŋɔ wɔhe lɛɛlɛŋ lɛ, mɛni hewɔ efeee shihilɛ nɛɛ he nɔ ko?’

7. (a) Mɛɛ gbɛ nɔ jamɔŋ hiɛnyiɛlɔi ehã mɛi ená jwɛŋmɔ lɛ akɛ Nyɔŋmɔ yitsoŋ wa? (b) Mɛni hewɔ wɔyɔɔ nɔmimaa akɛ nibii fɔji ni yaa nɔ yɛ je lɛ mli lɛ jɛɛɛ Nyɔŋmɔ?

7 Bei komɛi lɛ, jamɔŋ hiɛnyiɛlɔi lɛ hãa mɛi náa jwɛŋmɔ lɛ akɛ Nyɔŋmɔ yitsoŋ wa. Kɛ́ nɔ ko gbonyo ba lɛ, amɛkɛɔ akɛ Nyɔŋmɔ ji mɔ ni to akɛ eba, ni akɛ, eji esumɔɔɔ ni ebaa kulɛ, ebaŋ. Yɛ gbɛ ko nɔ lɛ, amɛmiishwa Nyɔŋmɔ yɛ nɔ ni eba lɛ hewɔ. Shi Biblia lɛ hãa wɔleɔ akɛ, Nyɔŋmɔ efeee nibii fɔji. Yakobo 1:13 lɛ kɛɔ akɛ, Nyɔŋmɔ kɛ nibii fɔji ekaaa mɔ ko mɔ ko. Awie yɛ nakai ŋmalɛ lɛ mli akɛ: “Kɛ́ mɔ ko kɛ jaramɔ shihilɛ ko miikpe lɛ, ekakɛɛ akɛ: ‘Nyɔŋmɔ miika mi.’ Ejaakɛ anyɛŋ akɛ nibii fɔji aka  Nyɔŋmɔ, ni asaŋ lɛ diɛŋtsɛ hu ekaaa mɔ ko.” Ni tsɔɔ akɛ, eyɛ mli akɛ Nyɔŋmɔ hãko nibii fɔji ni yaa nɔ yɛ je lɛ mli lɛ asɛɛ afo moŋ, shi jeee lɛ ji mɔ ni kɛbaa. (Kanemɔ Hiob 34:10-12.) Hã wɔkɛ nɔkwɛmɔnɔ ni nyiɛ sɛɛ nɛɛ atsɔɔ mli.

8, 9. Mɛni hewɔ esaaa akɛ wɔshwaa Nyɔŋmɔ yɛ wɔnaagbai lɛ ahewɔ lɛ? Okɛ nɔkwɛmɔnɔ ko atsɔɔ mli.

8 Ŋɔɔ lɛ akɛ, ole oblanyo ko ni eda ni kɛ efɔlɔi yɔɔ shĩa. Epapa sumɔɔ esane waa, ni etsɔɔ lɛ bɔ ni akpɛɔ yiŋ kpakpai yɛ shihilɛ mli. Shi trukaa lɛ, oblanyo lɛ tse epapa hiɛ atua, ni eshi shĩa. Eyafee nibii gbohii pii, ni eyagbee amane mli. Ani obaashwa oblanyo lɛ papa yɛ nɔ ni eba lɛ hewɔ, akɛni etsĩii ebi lɛ naa ni ekashi shĩa lɛ hewɔ? Dabi, ofeŋ nakai! (Luka 15:11-13) Wɔbaanyɛ wɔkɛ nakai papa lɛ ato Nyɔŋmɔ he. Be ni adesai tse Nyɔŋmɔ hiɛ atua ni amɛbɔi nibii gbohii feemɔ lɛ, Nyɔŋmɔ etsĩii amɛnaa. No hewɔ lɛ, kɛ́ nɔ ko gbonyo ba lɛ, wɔnyɛŋ wɔkɛɛ akɛ ejɛ Nyɔŋmɔ. Belɛ, esaaa akɛ wɔshwaa Nyɔŋmɔ.

9 Yiŋtoo kpakpa ko hewɔ Nyɔŋmɔ hãko nibii gbohii ni yaa nɔ yɛ je lɛ mli lɛ asɛɛ afo lɛ. Wɔbaakase nɔ ni Biblia lɛ wieɔ yɛ sane nɛɛ he, yɛ Yitso 11 lɛ mli. Shi ná nɔmimaa akɛ, Nyɔŋmɔ sumɔɔ wɔ, ni jeee lɛ ji mɔ ni kɛ wɔnaagbai lɛ baa. Yɛ anɔkwale mli lɛ, lɛ pɛ ji mɔ ni baanyɛ atsu wɔnaagbai lɛ ahe nii ehã wɔ.Yesaia 33:2.

10. Mɛni hewɔ wɔyɔɔ nɔmimaa akɛ Nyɔŋmɔ baatsu naagbai fɛɛ ni mɛi fɔji kɛba lɛ he nii lɛ?

10 Nyɔŋmɔ yɛ krɔŋkrɔŋ. (Yesaia 6:3) Nɔ fɛɛ nɔ ni efeɔ lɛ he tse, sane ko kwraa bɛ he, ni ehi. No hewɔ lɛ, wɔbaanyɛ wɔmu wɔfɔ̃ enɔ. Adesai bɛ nakai, ejaakɛ bei komɛi lɛ, amɛfeɔ nibii ni ejaaa. Adesa nɔyelɔ ni hi fe fɛɛ lɛ po nyɛŋ atsu naagbai fɛɛ ni mɛi fɔji kɛbaa lɛ ahe nii, ejaakɛ ebɛ nakai hewalɛ lɛ. Shi Nyɔŋmɔ yɛ hewalɛ fe mɔ fɛɛ mɔ.  Ebaanyɛ etsu naagbai fɛɛ ni mɛi fɔji kɛbaa lɛ ahe nii, ni ebaafee nakai hu. Ebaahã nibii fɔji fɛɛ sɛɛ afo kɛya naanɔ.Kanemɔ Lala 37:9-11.

KƐ́ NYƆŊMƆ NA BƆ NI ADESAI NAA NƆ LƐ, TE ENUƆ HE EHÃA TƐŊŊ?

11. Te Nyɔŋmɔ nuɔ he ehãa tɛŋŋ yɛ naagbai ni okɛkpeɔ lɛ ahe?

11 Kɛ́ Nyɔŋmɔ na naagbai ni okɛkpeɔ, kɛ nibii fɔji ni yaa nɔ yɛ je lɛ mli lɛ, te enuɔ he ehãa tɛŋŋ? Biblia lɛ kɛɔ akɛ, Nyɔŋmɔ “sumɔɔ jalɛsaneyeli.” (Lala 37:28) No hewɔ lɛ, esumɔɔ ekpakpa, ni enyɛɔ efɔŋ. Kɛ́ ena akɛ mɛi miina nɔ lɛ, edɔɔ lɛ waa. Biblia lɛ kɛɔ akɛ, yɛ blema lɛ, be ni Nyɔŋmɔ na akɛ mɛi miifee nibii fɔji yɛ shikpɔŋ lɛ nɔ lɛ, “edɔ lɛ yɛ etsui mli.” (1 Mose 6:5, 6) Nyɔŋmɔ tsakeko. (Maleaki 3:6) Biblia lɛ kɛɔ akɛ Nyɔŋmɔ susuɔ ohe waa diɛŋtsɛ.Kanemɔ 1 Petro 5:7.

Biblia lɛ kɛɔ akɛ Yehowa ji mɔ ni bɔ nibii fɛɛ, ni eyɛ suɔmɔ

12, 13. (a) Namɔ duro wɔ su ni ji suɔmɔ lɛ? Akɛni wɔsumɔɔ mɛi asane ni wɔsusuɔ amɛhe hewɔ lɛ, te wɔnuɔ he wɔhãa tɛŋŋ kɛ́ wɔna ni mɛi miina nɔ? (b) Mɛni hewɔ wɔyɔɔ nɔmimaa akɛ Nyɔŋmɔ baahã nɔnaa kɛ efɔŋfeemɔ fɛɛ sɛɛ afo lɛ?

12 Biblia lɛ kɛɔ hu akɛ, Nyɔŋmɔ bɔ wɔ tamɔ bɔ ni eyɔɔ lɛ. (1 Mose 1:26) Nɔ ni enɛ tsɔɔ ji akɛ, be ni Nyɔŋmɔ bɔ wɔ lɛ, eduro wɔ esui kpakpai lɛ. Enɛ hewɔ lɛ, kɛ́ mɔ ko efeko efɔŋ ko, ni wɔna akɛ eena nɔ lɛ, edɔɔ wɔ. Ni nakai nɔŋŋ edɔɔ Nyɔŋmɔ. Edɔɔ lɛ waa po fe bɔ ni edɔɔ wɔ! Mɛni hewɔ wɔkɛɔ nakai?

13 Biblia lɛ kɛɔ wɔ akɛ, “Nyɔŋmɔ lɛ, suɔmɔ ji lɛ.” (1 Yohane 4:8) Nɔ fɛɛ nɔ ni Nyɔŋmɔ feɔ lɛ, efeɔ yɛ suɔmɔ ni eyɔɔ lɛ hewɔ. Nyɔŋmɔ ji mɔ ni duro wɔ su ni ji suɔmɔ lɛ, ejaakɛ esumɔɔ wɔ. Adesai nyɛŋ afo nɔnaa kɛ efɔŋfeemɔ ni yaa nɔ yɛ je lɛ mli lɛ fɛɛ sɛɛ. Shi eji obaanyɛ ofee nakai kulɛ, ani ofeŋ? Obaafee tsɔ, ejaakɛ osumɔɔ mɛi asane.  Ni Nyɔŋmɔ hu? Nyɔŋmɔ yɛ nakai hewalɛ lɛ, ni esumɔɔ wɔ. No hewɔ lɛ, wɔle akɛ ebaahã nɔnaa kɛ efɔŋfeemɔ fɛɛ sɛɛ afo. Yɛ wolo nɛɛ shishijee gbɛ lɛ, atsɔɔ wɔ nibii komɛi ni Nyɔŋmɔ ewo shi akɛ ebaafee ehã wɔ. Ná nɔmimaa akɛ, Nyɔŋmɔ baahã fɛɛ aba mli! Shi dani obaanyɛ ohe shiwoi nɛɛ oye lɛ, esa akɛ ole Nyɔŋmɔ jogbaŋŋ.

NYƆŊMƆ MIITAO NI OLE LƐ

Kɛ́ ootao okɛ mɔ ko abɔ naanyo lɛ, otsɔɔ lɛ ogbɛ́i klɛŋklɛŋ. Nyɔŋmɔ etsɔɔ wɔ egbɛ́i yɛ Biblia lɛ mli

14. Mɛni ji Nyɔŋmɔ gbɛ́i? Ni mɛni hãa wɔnaa akɛ esa akɛ wɔkɛtsu nii?

14 Kɛ́ ootao okɛ mɔ ko abɔ naanyo lɛ, bei pii lɛ, mɛni ofeɔ klɛŋklɛŋ? Otsɔɔ lɛ ogbɛ́i. Ani Nyɔŋmɔ yɛ gbɛ́i? Jamɔi pii kɛɔ akɛ egbɛ́i ji Nyɔŋmɔ loo Nuŋtsɔ. Shi nomɛi jeee egbɛ́i diɛŋtsɛ. Egbɛnaa gbɛ́i ni, tamɔ bɔ ni “maŋtsɛ” kɛ “maŋ hiɛnyiɛlɔ” fɛɛ ji gbɛnaa gbɛ́i lɛ. Nyɔŋmɔ ekɛɛ wɔ akɛ, egbɛ́i ji Yehowa. Lala 83:18 lɛ kɛɔ akɛ: “Bo, ni okome too ogbɛ́i ji Yehowa lɛ, bo ji mɔ ni kwɔ fe fɛɛ yɛ shikpɔŋ lɛ nɔ fɛɛ!” Mɛi ni ŋma Biblia lɛ kɛ Nyɔŋmɔ gbɛ́i lɛ tsu nii shii akpei abɔ. Yehowa miisumɔ ni ole egbɛ́i lɛ ni okɛtsu nii. Nyɔŋmɔ etsɔɔ bo egbɛ́i, ejaakɛ eetao ni obatsɔ enaanyo.

15. Mɛni gbɛ́i Yehowa lɛ tsɔɔ?

15 Nɔ ni Nyɔŋmɔ gbɛ́i Yehowa lɛ tsɔɔ lɛ sa kadimɔ waa. Etsɔɔ akɛ, Nyɔŋmɔ baanyɛ aye  eshiwoi fɛɛ nɔ, ni ebaanyɛ etsu nibii fɛɛ ni eto eyiŋ akɛ ebaafee lɛ. Nɔ ko nɔ ko bɛ ni baanyɛ atsĩ enaa. Gbɛ́i nɛɛ esaaa mɔ ko mɔ ko akɛ ja Lɛ pɛ. *

16, 17. (a) Kɛ́ akɛɛ Yehowa ji “Ofe lɛ,” te atsɔɔ tɛŋŋ? (b) Kɛ́ akɛɛ Yehowa ji “Naanɔi a-Maŋtsɛ” lɛ, te atsɔɔ tɛŋŋ? (d) Kɛ́ akɛɛ Yehowa ji “Bɔlɔ lɛ,” te atsɔɔ tɛŋŋ?

16 Kpojiemɔ 15:3 lɛ kɛɔ akɛ: “Yehowa Nyɔŋmɔ, Ofe lɛ,  onitsumɔi lɛ dara ni amɛyɛ naakpɛɛ. Naanɔi a-Maŋtsɛ, ogbɛi lɛ ja ni anɔkwa ji amɛ.” Mɛni gbɛnaa gbɛ́i ni ji “Ofe lɛ” tsɔɔ wɔ yɛ Yehowa he? Etsɔɔ wɔ akɛ, ŋwɛi jio, shikpɔŋ lɛ nɔ jio, mɔ ko mɔ ko bɛ ni yɛ hewalɛ fe Yehowa. Gbɛnaa gbɛ́i ni ji “Naanɔi a-Maŋtsɛ” lɛ tsɔɔ wɔ akɛ, ebɛ shishijee. Lala 90:2 lɛ kɛɔ yɛ Yehowa he akɛ, eyɛ ‘kɛjɛ naanɔ kɛmiiya naanɔ.’ Ani enɛ bɛ naakpɛɛ?

17 Yehowa pɛ ji mɔ ni sa akɛ atsɛɔ lɛ Bɔlɔ. Kpojiemɔ 4:11 lɛ kɛɔ akɛ: “Yehowa wɔ-Nyɔŋmɔ, bo ji mɔ ni sa akɛ oŋɔ anunyam lɛ kɛ woo lɛ kɛ hewalɛ lɛ, ejaakɛ bo obɔ nibii fɛɛ, ni osuɔmɔ naa hewɔ amɛba shihilɛ mli ni abɔ amɛ.” Yehowa ji mɔ ni bɔ nibii fɛɛ. Lɛ ebɔ ŋwɛibɔfoi lɛ, ŋulamii lɛ, aduawai lɛ, ŋshɔŋ loi lɛ, kɛ nibii krokomɛi fɛɛ!

 ANI OBAANYƐ OKƐ YEHOWA ABƆ NAANYO?

18. Mɛni hewɔ mɛi komɛi susuɔ akɛ amɛnyɛŋ amɛkɛ Nyɔŋmɔ abɔ naanyo kɔkɔɔkɔ lɛ? Shi mɛni Biblia lɛ kɛɔ wɔ yɛ Nyɔŋmɔ he?

18 Mɛi komɛi yɛ ni kɛ́ amɛkane bɔ ni Yehowa yɔɔ hã lɛ he sane lɛ, amɛsheɔ gbeyei, ejaakɛ kɛ́ amɛkwɛ bɔ ni Nyɔŋmɔ he wa, bɔ ni enɔ kwɔ, kɛ he ni eyɔɔ lɛ, efeɔ amɛ akɛ egbaŋ ehe naa yɛ amɛ he. Shi ani nakai ji bɔ ni Nyɔŋmɔ sumɔɔ ni wɔnu he wɔhã yɛ ehe? Dabi. Yehowa miisumɔ ni ekɛ wɔ abɔ naanyo. Biblia lɛ kɛɔ akɛ, Nyɔŋmɔ kɛ “wɔteŋ mɔ fɛɛ mɔ teŋ jekɛɛɛ.” (Bɔfoi 17:27) Nyɔŋmɔ miisumɔ ni otsi obɛŋkɛ lɛ, ni ewo shi akɛ, kɛ́ ofee nakai lɛ, ‘ebaatsi ebɛŋkɛ bo.’Yakobo 4:8.

19. (a) Mɛni esa akɛ ofee koni obatsɔ Nyɔŋmɔ naanyo? (b) Te Yehowa sui lɛ ateŋ nɔ ni onyaa he waa lɛ?

19 Mɛni esa akɛ ofee koni obatsɔ Nyɔŋmɔ naanyo? Yesu wie akɛ: “Enɛ ji naanɔ wala lɛ, akɛ amɛbaale bo, anɔkwa Nyɔŋmɔ kome lɛ, kɛ Yesu Kristo, mɔ ni otsu lɛ lɛ.” (Yohane 17:3) Kɛ́ otee nɔ okase Biblia lɛ, obaale Yehowa kɛ Yesu. Ni no baanyɛ ahã oná naanɔ wala. Akɛ nɔkwɛmɔnɔ lɛ, okase momo akɛ “Nyɔŋmɔ lɛ, suɔmɔ ji lɛ.” (1 Yohane 4:16) Shi Nyɔŋmɔ yɛ sui krokomɛi hu ni nɔ bɛ. Biblia lɛ kɛɔ akɛ, Yehowa ‘musuŋ tsɔɔ lɛ, emli fuuu mra, ni emɔbɔnalɛ kɛ anɔkwale fa pii.’ (2 Mose 34:6) Yehowa ‘hi ni ekɛ eshai faa mra.’ (Lala 86:5) Nyɔŋmɔ toɔ etsui shi ni eyeɔ anɔkwa. (2 Petro 3:9; Kpojiemɔ 15:4) Kɛ́ okane Biblia lɛ, obaale Yehowa sui lɛ ahe saji babaoo.

20-22. (a) Eyɛ mli akɛ wɔnaaa Nyɔŋmɔ moŋ, shi mɛni baaye abua wɔ ni wɔkɛ lɛ abɔ naanyo? (b) Kɛ́ mɛi bɔ mɔdɛŋ akɛ amɛbaatsĩ onaa koni okpa Biblia lɛ kasemɔ lɛ, mɛni esa akɛ ofee?

20 Eyɛ mli akɛ onyɛŋ ona Nyɔŋmɔ moŋ, shi obaanyɛ okɛ lɛ abɔ naanyo. (Yohane 1:18; 4:24; 1 Timoteo 1:17) Kɛ́ okane Yehowa he sane yɛ Biblia lɛ mli lɛ, obaana akɛ  eji Mɔ ko ni yɔɔ diɛŋtsɛ. (Lala 27:4; Romabii 1:20) Kɛ́ otee nɔ okase Yehowa he nii lɛ, suɔmɔ ni oyɔɔ kɛhã lɛ lɛ mli baawa, ni obaatsi obɛŋkɛ lɛ kpaakpa.

Yehowa ji wɔ-Tsɛ ni yɔɔ ŋwɛi, ni esumɔɔ wɔ fe bɔ ni tsɛmɛi sumɔɔ amɛbii po

21 Obaana nɔ hewɔ ni Biblia lɛ wieɔ akɛ Yehowa ji wɔ-Tsɛ lɛ. (Mateo 6:9) Lɛ ehã wɔ wala, ni eesumɔ ni wɔná miishɛɛ yɛ shihilɛ mli. (Lala 36:9) Mɛɛ tsɛ kpakpa po yɔɔ ni sumɔŋ ni ebii amii ashɛ amɛhe? No hewɔ lɛ, Biblia lɛ hãa wɔnaa faŋŋ akɛ, obaanyɛ obatsɔ Yehowa naanyo. (Yakobo 2:23) Yehowa, ni ji Mɔ ni bɔ je lɛ kɛ nibii fɛɛ ni yɔɔ mli lɛ miisumɔ ni obatsɔ enaanyo! Enɛ ji miishɛɛ sane diɛŋtsɛ.

22 Mɛi komɛi sumɔŋ ni oya nɔ okase Biblia lɛ, ejaakɛ amɛsumɔɔɔ ni oshiɔ jamɔ mli ni oyɔɔ lɛ. No hewɔ lɛ, amɛbaabɔ mɔdɛŋ ni amɛtsĩ onaa koni okanyɛ otsa nikasemɔ lɛ nɔ. Shi kaahã mɔ ko mɔ ko tsĩ onaa. Yaa nɔ okase Biblia lɛ, ejaakɛ kɛ́ ofee nakai lɛ, obaatsɔ Yehowa naanyo. Ni lɛ ji Naanyo ni fe fɛɛ ni obaanyɛ oná.

23, 24. (a) Mɛni hewɔ esa akɛ obi saji yɛ nɔ ni okaseɔ lɛ he? (b) Mɛni he wɔbaasusu yɛ yitso ni nyiɛ sɛɛ lɛ mli?

23 Be ni okaseɔ Biblia lɛ, ekolɛ obaana nibii komɛi ni onuuu shishi. Kɛ́ onuuu nɔ ko shishi lɛ, bi koni agbala mli atsɔɔ bo. Kaahã efee bo hiɛgbele. Yesu kɛɛ wɔba wɔhe shi tamɔ gbekɛbii bibii. (Mateo 18:2-4) Ni wɔle akɛ gbekɛbii biɔ saji waa. Nyɔŋmɔ miisumɔ ni onu nibii ashishi. No hewɔ lɛ, jiemɔ oyitsoŋ fɛɛ ni okɛkase Biblia lɛ, bɔ ni afee ni oná nɔmimaa akɛ nɔ ni okaseɔ lɛ ji anɔkwale lɛ.Kanemɔ Bɔfoi 17:11.

24 Biblia lɛ ni obaakase lɛ ji gbɛ ni hi fe fɛɛ ni obaanyɛ otsɔ nɔ okase Yehowa he nii. Yɛ yitso ni nyiɛ sɛɛ lɛ mli lɛ, wɔbaana nɔ hewɔ ni esoro Biblia lɛ kwraa yɛ woji krokomɛi fɛɛ ni yɔɔ je lɛ mli lɛ ahe.

^ kk. 15 Kɛ́ gbɛ́i Yehowa lɛ bɛ Biblia ni ohiɛ lɛ mli, loo obaasumɔ ni ole nɔ ni gbɛ́i nɛɛ tsɔɔ kɛ bɔ ni atsɛɔ lɛ ahãa lɛ he saji krokomɛi lɛ, ofainɛ kwɛmɔ Wiemɔi Komɛi Amligbalamɔ 1.

Ekrokromɛi Hu Nɛ

Ani Nyɔŋmɔ yɛ Gbɛ́i?

Nyɔŋmɔ yɛ gbɛnaa gbɛ́i pii, ekomɛi ji Ofe, Bɔlɔ, kɛ Nuŋtsɔ. Shi atsĩ Nyɔŋmɔ diɛŋtsɛ gbɛ́i lɛ tã shii 7,000 kɛ sɛɛ yɛ Biblia lɛ mli.