Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mɛni Wɔbaanyɛ Wɔkase Kɛjɛ Biblia lɛ Mli?

 YITSO KPAANYƆ

Mɛni Ji Nyɔŋmɔ Maŋtsɛyeli Lɛ?

Mɛni Ji Nyɔŋmɔ Maŋtsɛyeli Lɛ?

1. Mɛɛ sɔlemɔ he wɔbaasusu lɛ?

MƐI akpekpei abɔ le sɔlemɔ ni ehe gbɛ́i waa ni atsɛɔ lɛ Nuŋtsɔ lɛ Sɔlemɔ lɛ. Yesu tsɔ sɔlemɔ nɛɛ nɔ etsɔɔ ekaselɔi lɛ bɔ ni asɔleɔ ahãa. Mɛɛ nibii ahe ewie yɛ sɔlemɔ nɛɛ mli? Ni mɛni hewɔ ehe miihia ni wɔsusu sɔlemɔ nɛɛ he?

2. Mɛɛ nibii etɛ komɛi ni he hiaa Yesu kɛɛ wɔsɔle yɛ he?

2 Yesu kɛɛ akɛ: “Esa akɛ nyɛsɔle yɛ nɛkɛ gbɛ nɔ: ‘Wɔ-Tsɛ ni yɔɔ ŋwɛi, ogbɛ́i lɛ he atse. O-Maŋtsɛyeli lɛ aba. Afee osuɔmɔnaa nii yɛ shikpɔŋ lɛ nɔ, taakɛ afeɔ yɛ ŋwɛi lɛ.’” (Kanemɔ Mateo 6:9-13.) Mɛni hewɔ Yesu kɛɛ wɔsɔle yɛ nibii etɛ nɛɛ ahe lɛ?—Kwɛmɔ Wiemɔi Komɛi Amligbalamɔ 20.

3. Yɛ nikasemɔ nɛɛ mli lɛ, mɛni wɔbaakase yɛ Nyɔŋmɔ Maŋtsɛyeli lɛ he?

3 Wɔkase akɛ, Nyɔŋmɔ gbɛ́i ji Yehowa. Ni wɔsusu bɔ ni eesumɔ ni adesai kɛ shikpɔŋ lɛ nɔ shihilɛ afee lɛ hu he. Shi be ni Yesu wie yɛ sɔlemɔ lɛ mli akɛ, “O-Maŋtsɛyeli lɛ aba” lɛ, no mli lɛ mɛni etsɔɔ lɛ? Yɛ nikasemɔ nɛɛ mli lɛ, wɔbaana nɔ ni Nyɔŋmɔ Maŋtsɛyeli lɛ ji, nɔ ni ebaatsu ehã adesai, kɛ bɔ ni ebaafee etse Nyɔŋmɔ gbɛ́i lɛ he.

MƐNI JI NYƆŊMƆ MAŊTSƐYELI LƐ?

4. Mɛni ji Nyɔŋmɔ Maŋtsɛyeli lɛ? Ni namɔ ji enɔ Maŋtsɛ?

4 Yehowa eto nɔyeli ko yɛ ŋwɛi, ni ehala Yesu akɛ nɔyeli nɛɛ nɔ Maŋtsɛ. Biblia lɛ tsɛɔ nɔyeli nɛɛ akɛ, Nyɔŋmɔ Maŋtsɛyeli lɛ. Yesu ji “mɛi ni yeɔ nɔ akɛ  maŋtsɛmɛi lɛ a-Maŋtsɛ, kɛ mɛi ni yeɔ nɔ akɛ nuŋtsɔmɛi lɛ a-Nuŋtsɔ.” (1 Timoteo 6:15) Nibii kpakpai ni Yesu feɔ lɛ hi kwraa fe nɔ ni adesa nɔyelɔ ko baanyɛ afee, ni eyɛ hewalɛ kwraa fe adesai nɔyelɔi fɛɛ.

5. Nɛgbɛ Nyɔŋmɔ nɔyeli lɛ baaye nɔ kɛjɛ? Ni mɛni nɔ ebaaye?

5 Yesu shitee lɛ sɛɛ gbii 40 lɛ, eku esɛɛ etee ŋwɛi. Sɛɛ mli lɛ, Yehowa wo lɛ Maŋtsɛyeli lɛ nɔ Maŋtsɛ. (Bɔfoi 2:33) Nyɔŋmɔ nɔyeli lɛ baajɛ ŋwɛi eye shikpɔŋ lɛ nɔ. (Kpojiemɔ 11:15) Enɛ hewɔ lɛ, Biblia lɛ tsɛɔ Nyɔŋmɔ Maŋtsɛyeli lɛ akɛ “ŋwɛi Maŋtsɛyeli.”2 Timoteo 4:18.

6, 7. Mɛni hewɔ wɔbaanyɛ wɔkɛɛ akɛ Yesu hi fe adesai nɔyelɔi fɛɛ?

6 Biblia lɛ kɛɔ akɛ Yesu nɔ kwɔ fe adesai nɔyelɔi fɛɛ, ejaakɛ “lɛ ekome pɛ eyɔɔ gbɔmɔtso ni gbooo.” (1 Timoteo 6:16) Adesai nɔyelɔi fɛɛ gboiɔ, shi Yesu gboŋ kɔkɔɔkɔ. Nibii kpakpai fɛɛ ni Yesu baafee ahã wɔ lɛ baahi shi kɛya naanɔ.

7 Yesu baaye jalɛsane ni emusuŋ baatsɔ lɛ yɛ wɔhewɔ, ejaakɛ Biblia lɛ egba akɛ: “Yehowa mumɔ lɛ aaahi enɔ, ŋaalee kɛ sanesɛɛkɔmɔ mumɔ lɛ, ŋaawoo kɛ hewalɛ mumɔ lɛ, nilee kɛ Yehowa gbeyeishemɔ mumɔ lɛ. Ni eeená Yehowa gbeyeishemɔ lɛ he miishɛɛ; bɔ ni ehiŋmɛii naa lɛ, jeee nakai ebaakojo, ni bɔ ni etoii nuɔ lɛ, jeee nakai ebaabu atɛŋ; shi eeekojo ohiafoi yɛ jalɛ naa, ni jajemɔ hu ekɛaakã mɛi lɛ, ni eeebu mɛi ní nii yɔɔ mɔbɔ yɛ shikpɔŋ lɛ nɔ lɛ atɛŋ bɔ ni ja.” (Yesaia 11:2-4) Ani osumɔŋ ni mɔ ko tamɔ nɛkɛ aye onɔ?

8. Mɛni hãa wɔnaa akɛ mɛi komɛi baayafata Yesu he kɛye nɔ akɛ maŋtsɛmɛi?

8 Nyɔŋmɔ ehala adesai komɛi ni amɛyafata Yesu he kɛye nɔ yɛ ŋwɛi. Akɛ nɔkwɛmɔnɔ lɛ, Paulo kɛɛ Timoteo akɛ: “Kɛ́ wɔtee nɔ wɔfi shi lɛ, wɔ kɛ lɛ baaye nɔ akɛ  maŋtsɛmɛi hu.” (2 Timoteo 2:12) Mɛi enyiɛ kɛ Yesu baaye nɔ lɛ?

9. Mɛi enyiɛ kɛ Yesu baaye nɔ akɛ maŋtsɛmɛi? Ni mɛɛ be Nyɔŋmɔ bɔi amɛ halamɔ?

9 Yitso 7 lɛ mli lɛ, wɔsusu ninaa ko ni ajie ahã bɔfo Yohane lɛ he. Yɛ ninaa lɛ mli lɛ, Yohane na Yesu ní awó lɛ Maŋtsɛ yɛ ŋwɛi ní mɛi 144,000 fata ehe. Namɛi ji mɛi 144,000 nɛɛ? Yohane kɛɛ ‘aŋma Yesu kɛ e-Tsɛ gbɛ́i yɛ amɛhiɛŋtsei anɔ.’ Ewie kɛfata he akɛ: “Amɛji mɛi ni yaa nɔ amɛnyiɛɔ Gwantɛŋbi lɛ [ni ji Yesu] sɛɛ kɛyaa he fɛɛ he ni eyaa lɛ. Ahé mɛi nɛɛ kɛjɛ gbɔmɛi ateŋ.” (Kanemɔ Kpojiemɔ 14:1, 4.) Mɛi 144,000 lɛ ji Kristofoi anɔkwafoi ni Nyɔŋmɔ ehala amɛ akɛ amɛyafata Yesu he ni amɛkɛ lɛ ‘aye shikpɔŋ lɛ nɔ akɛ maŋtsɛmɛi.’ Amɛji mɛi ni kɛ́ amɛgboi ni atee amɛ shi lɛ, amɛbaŋ shikpɔŋ lɛ nɔ, shi moŋ amɛbaaya ŋwɛi lɛ. (Kpojiemɔ 5:10) Yehowa bɔi Kristofoi anɔkwafoi 144,000 ni baaye nɔ akɛ maŋtsɛmɛi lɛ halamɔ kɛjɛ bɔfoi lɛ abeiaŋ.

10. Mɛni hewɔ wɔbaanyɛ wɔkɛɛ akɛ gbɛjianɔ ni Yehowa eto koni mɛi 144,000 ayafata Yesu he kɛye wɔnɔ lɛ tsɔɔ akɛ esumɔɔ wɔ waa?

10 Wɔsane kã Yehowa tsui nɔ waa, ni no hewɔ eto gbɛjianɔ koni adesai komɛi ayafata Yesu he kɛye wɔnɔ lɛ. Yesu baafee nɔyelɔ kpakpa, ejaakɛ enuɔ wɔ shishi. Ena nɔ akɛ adesa pɛŋ. Paulo wie akɛ, Yesu jeee “mɔ ni nyɛɛɛ anu wɔgbedemɔi lɛ ahe ehã wɔ, shi moŋ eji mɔ ni aka lɛ yɛ nibii fɛɛ gbɛfaŋ tamɔ wɔ nɔŋŋ.” (Hebribii 4:15; 5:8) Akɛni mɛi 144,000 lɛ ehi shikpɔŋ nɛɛ nɔ pɛŋ hewɔ lɛ, amɛ hu amɛle bɔ ni adesai ashihilɛ yɔɔ hã lɛ jogbaŋŋ. Be ko ni eho lɛ, amɛ hu amɛyeee emuu tamɔ wɔ nɔŋŋ, ni amɛle naagbai ni enɛ kɛbaa. Agbɛnɛ hu, helai emɔmɔ amɛ dã. No hewɔ lɛ, wɔbaanyɛ wɔná  nɔmimaa akɛ, Yesu kɛ mɛi 144,000 lɛ baanu he amɛhã wɔ, ni amɛbaanu naagbai ni wɔkɛkpeɔ lɛ ashishi.

MƐNI NYƆŊMƆ MAŊTSƐYELI LƐ BAAFEE?

11. Mɛni hewɔ Yesu kɛɛ ekaselɔi lɛ akɛ amɛsɔle ni afee Nyɔŋmɔ suɔmɔnaa nii yɛ ŋwɛi lɛ?

11 Yesu kɛɛ ekaselɔi lɛ akɛ, amɛsɔle ni afee Nyɔŋmɔ suɔmɔnaa nii yɛ ŋwɛi. Mɛni hewɔ? Yɛ Yitso 3 lɛ mli lɛ, wɔkase akɛ, Satan Abonsam tse Yehowa hiɛ atua. Shi, be ni efee nakai lɛ, Yehowa eshwieee lɛ amrɔ nɔŋŋ. Yehowa ŋmɛ lɛ kɛ daimonioi lɛ, ni ji ŋwɛibɔfoi ni yanyiɛ esɛɛ lɛ gbɛ ni amɛhi ŋwɛi kɛyashi be ko. No hewɔ lɛ, yɛ nakai be lɛ mli fɛɛ lɛ, wɔbaanyɛ wɔkɛɛ akɛ, jeee mɛi fɛɛ ni yɔɔ ŋwɛi lɛ feɔ Nyɔŋmɔ suɔmɔnaa nii. Kɛ́ wɔshɛ Yitso 10 lɛ, wɔbaakase Satan kɛ daimonioi lɛ ahe saji krokomɛi.

12. Mɛɛ nibii enyɔ komɛi ni he hiaa awie he yɛ Kpojiemɔ 12:10 lɛ?

12 Biblia lɛ hãa wɔleɔ akɛ, kɛ́ awó Yesu Nyɔŋmɔ Maŋtsɛyeli lɛ nɔ Maŋtsɛ nɔŋŋ lɛ, ekɛ Satan baawu. (Kanemɔ Kpojiemɔ 12:7-10.) Kuku 10 lɛ wieɔ nibii enyɔ komɛi ni he hiaa waa ni baaya nɔ lɛ ahe. Yesu Kristo baabɔi nɔyeli akɛ Nyɔŋmɔ Maŋtsɛyeli lɛ nɔ Maŋtsɛ, ni ebaashɛ Satan kɛjɛ ŋwɛi efɔ̃ shikpɔŋ lɛ nɔ. Nibii ni wɔbaakase sɛɛ mli lɛ, baahã wɔna akɛ, nibii enyɔ lɛ fɛɛ eba momo.

13. Be ni ashwie Satan kɛje ŋwɛi lɛ, mɛni ba?

13 Biblia lɛ gbaa wɔ miishɛɛ ni ŋwɛibɔfoi anɔkwafoi lɛ ná be ni ashwie Satan kɛ edaimonioi lɛ kɛje ŋwɛi lɛ. Ewie akɛ: “Nyɛ ŋwɛii kɛ nyɛ mɛi ni nyɛyɔɔ jɛmɛ, nyɛnáa miishɛɛ!” (Kpojiemɔ 12:12) Amrɔ nɛɛ, mɛi fɛɛ ni yɔɔ ŋwɛi lɛ atoiiaŋ ejɔ amɛ, ni amɛfee ekome kɛmiifee Nyɔŋmɔ suɔmɔnaa nii.

Kɛjɛ be ni ashwie Satan kɛ edaimonioi lɛ kɛje ŋwɛi, ni ashɛrɛ amɛ ashwie shikpɔŋ lɛ nɔ lɛ, haomɔi efa yɛ shikpɔŋ lɛ nɔ. Shi etsɛŋ, haomɔi fɛɛ sɛɛ baafo

14. Te shikpɔŋ lɛ nɔ shihilɛ efee tɛŋŋ yɛ shwiemɔ ni ashwie Satan kɛje ŋwɛi lɛ hewɔ?

 14 Shi Satan kɛ edaimonioi lɛ ashwiemɔ lɛ ehã shikpɔŋ lɛ nɔ shihilɛ efite kwraa. Mɛi miina amane ejaakɛ “Abonsam ekpeleke shi kɛba.” Satan “egiri waa diɛŋtsɛ, ejaakɛ ele akɛ be fioo kɛkɛ eyɔɔ.” (Kpojiemɔ 12:12) Akɛni ashɛ lɛ afɔ̃ kɛje ŋwɛi hewɔ lɛ, ele akɛ etsɛŋ kwraa, abaakpãtã ehiɛ. Ni enɛ hewɔ egiri nakai lɛ. Eegba mɛi anaa, eepiŋ mɛi, ni ekɛ hiɛdɔɔ miifite nibii yɛ shikpɔŋ lɛ nɔ fɛɛ.

15. Te Nyɔŋmɔ miisumɔ ni shikpɔŋ lɛ nɔ shihilɛ afee tɛŋŋ?

15 Shi yiŋtoo hewɔ ni Nyɔŋmɔ bɔ shikpɔŋ lɛ tsakeko. Eesumɔ ni adesai aye emuu ni amɛhi shi kɛya naanɔ yɛ Paradeiso lɛ mli yɛ shikpɔŋ lɛ nɔ. (Lala 37:29) Mɛɛ gbɛ nɔ Nyɔŋmɔ Maŋtsɛyeli lɛ baahã Nyɔŋmɔ yiŋtoo lɛ aba mli?

16, 17. Mɛni Daniel 2:44 lɛ tsɔɔ wɔ yɛ Nyɔŋmɔ Maŋtsɛyeli lɛ he?

16 Gbalɛ ni yɔɔ Daniel 2:44 lɛ kɛɔ akɛ: “Nɛkɛ maŋtsɛmɛi nɛɛ ayinɔ lɛ Nyɔŋmɔ ní yɔɔ ŋwɛi lɛ aaatee maŋtsɛyeli ko shi ama shi ni efiteŋ dɔŋŋ kɛaatee naanɔ, ni ashiŋ maŋtsɛyeli nɛɛ ahaŋ maŋ kroko; eeejwara maŋtsɛyelii nɛɛ fɛɛ wɔtsɔwɔtsɔ, ni eeekpãtã amɛhiɛ, shi lɛ diɛŋtsɛ lɛ eeedamɔ shi kɛaatee naanɔ.” Mɛni gbalɛ nɛɛ tsɔɔ wɔ yɛ Nyɔŋmɔ Maŋtsɛyeli lɛ he?

17 Klɛŋklɛŋ kwraa lɛ, etsɔɔ wɔ akɛ, Yesu baabɔi nɔyeli yɛ “maŋtsɛmɛi nɛɛ ayinɔ.” Ni tsɔɔ akɛ, Nyɔŋmɔ Maŋtsɛyeli lɛ baabanina nɔyelii krokomɛi yɛ shikpɔŋ lɛ nɔ. Nɔ ni ji enyɔ lɛ, ehãa wɔleɔ akɛ, nɔyeli ko nɔyeli ko ebayeŋ Nyɔŋmɔ Maŋtsɛyeli lɛ najiaŋ. Moŋ lɛ, Maŋtsɛyeli lɛ baahi shi kɛya naanɔ. Nɔ ni ji etɛ lɛ, etsɔɔ wɔ akɛ, Nyɔŋmɔ Maŋtsɛyeli lɛ kɛ je lɛŋ nɔyelii lɛ baawu,  ni ebaaye amɛnɔ kunim. Yɛ naagbee lɛ, Nyɔŋmɔ Maŋtsɛyeli lɛ pɛ baaye shikpɔŋ muu lɛ fɛɛ nɔ, ni adesai baaná he sɛɛ waa.

18. Te atsɛɔ naagbee ta ni Nyɔŋmɔ Maŋtsɛyeli lɛ kɛ adesai anɔyelii baawu lɛ tɛŋŋ?

18 Dani Nyɔŋmɔ Maŋtsɛyeli lɛ baaye shikpɔŋ lɛ fɛɛ nɔ lɛ, mɛni baaba? Daimonioi lɛ baalaka “shikpɔŋ muu lɛ fɛɛ nɔ maŋtsɛmɛi lɛ,” ni amɛbaabua amɛnaa, koni amɛkɛ “Nyɔŋmɔ Ofe lɛ” awu. Nyɔŋmɔ Maŋtsɛyeli lɛ kɛ adesai anɔyelii baawu. Atsɛɔ naagbee ta nɛɛ akɛ Harmagedon ta lɛ.Kpojiemɔ 16:14, 16; kwɛmɔ Wiemɔi Komɛi Amligbalamɔ 10.

19, 20. Mɛni hewɔ ehe miihia ni Nyɔŋmɔ Maŋtsɛyeli lɛ abaye shikpɔŋ lɛ nɔ lɛ?

19 Mɛni hewɔ Nyɔŋmɔ Maŋtsɛyeli lɛ he hiaa wɔ lɛ? Kɛ́ hooo kwraa lɛ, yɛ yiŋtoi etɛ ahewɔ. Klɛŋklɛŋ lɛ, akɛni wɔji eshafeelɔi hewɔ lɛ, hela mɔɔ wɔ, ni wɔgboiɔ. Shi Biblia lɛ kɛɔ akɛ, kɛ́ Nyɔŋmɔ Maŋtsɛyeli lɛ ye wɔnɔ lɛ, wɔbaahi shi kɛya naanɔ. Yohane 3:16 lɛ kɛɔ akɛ: “Nyɔŋmɔ sumɔ je lɛ jogbaŋŋ aahu akɛ eŋɔ e-Bi koome lɛ ehã, koni mɔ fɛɛ mɔ ni jieɔ hemɔkɛyeli kpo yɛ emli lɛ hiɛ akakpãtã shi moŋ ená naanɔ wala.”

20 Yiŋtoo ni ji enyɔ hewɔ ni Nyɔŋmɔ Maŋtsɛyeli lɛ he hiaa wɔ ji akɛ, mɛi fɔji eyi je nɛŋ obɔ. Amɛmaleɔ, amɛshishiuɔ mɛi, ni amɛjeŋba ekpɔtɔ. Nɔ ko nɔ ko bɛ ni wɔbaanyɛ wɔfee kɛjie mɛi fɔji nɛɛ kɛje je lɛ mli. Shi Nyɔŋmɔ baanyɛ atsu amɛhe nii. Ebaakpãtã mɛi fɛɛ ni yaa nɔ amɛfeɔ nibii fɔji lɛ ahiɛ yɛ Harmagedon ta lɛ mli. (Kanemɔ Lala 37:10.) Yiŋtoo ni ji etɛ hewɔ ni Nyɔŋmɔ Maŋtsɛyeli lɛ he hiaa wɔ ji akɛ, adesai anɔyelii ŋmɛɔ mɛi gbɛ ni amɛfee nɔ ni amɛsumɔɔ. Amɛyitsoŋ wa, ni amɛtswaa mɛi ojo. Nɔyelii lɛ wooo mɛi  hewalɛ ni amɛbo Nyɔŋmɔ toi. Biblia lɛ kɛɔ akɛ, “gbɔmɔ yeɔ enaanyo gbɔmɔ nɔ ni ekɛyeɔ ehe awui.”Jajelɔ 8:9.

21. Mɛɛ gbɛ nɔ Nyɔŋmɔ Maŋtsɛyeli lɛ baahã afee esuɔmɔnaa nii yɛ shikpɔŋ lɛ nɔ?

21 Kɛ́ awu Harmagedon ta lɛ agbe naa lɛ, Nyɔŋmɔ baatsɔ e-Maŋtsɛyeli lɛ nɔ ehã afee esuɔmɔnaa nii yɛ shikpɔŋ lɛ nɔ. Akɛ nɔkwɛmɔnɔ lɛ, ebaajie Satan kɛ edaimonioi lɛ kɛje shikpɔŋ lɛ nɔ. (Kpojiemɔ 20:1-3) Ni naagbee lɛ, ebaahã hela kɛ gbele sɛɛ afo. Kpɔmɔnɔ lɛ hewɔ lɛ, adesai ni yeɔ anɔkwa lɛ baaná hegbɛ akɛ amɛhi shi kɛya naanɔ yɛ Paradeiso lɛ mli. (Kpojiemɔ 22:1-3) Agbɛnɛ hu, Maŋtsɛyeli lɛ baatse Nyɔŋmɔ gbɛ́i lɛ he. Mɛni enɛ tsɔɔ? Etsɔɔ akɛ, kɛ́ Yesu bɔi shikpɔŋ lɛ nɔ yeli lɛ, adesai fɛɛ baawo Nyɔŋmɔ gbɛ́i lɛ hiɛ nyam.—Kwɛmɔ Wiemɔi Komɛi Amligbalamɔ 21.

MƐƐ BE AWO YESU MAŊTSƐ?

22. Mɛni tsɔɔ akɛ awooo Yesu Maŋtsɛ be ni eyɔɔ shikpɔŋ lɛ nɔ lɛ? Mɛni tsɔɔ akɛ awooo lɛ Maŋtsɛ yɛ eshitee lɛ sɛɛ nɔŋŋ?

22 Yesu kɛɛ ekaselɔi lɛ akɛ, amɛsɔle ni ‘Maŋtsɛyeli lɛ aba.’ Ni tsɔɔ akɛ, be ni Yesu yɔɔ shikpɔŋ lɛ nɔ lɛ, Maŋtsɛyeli lɛ bako. Dani Maŋtsɛyeli lɛ baaba shikpɔŋ lɛ nɔ lɛ, esa akɛ Yehowa awó Yesu akɛ Maŋtsɛyeli lɛ nɔ Maŋtsɛ, ni eto mɛi ni baafata Yesu he kɛye nɔ lɛ ahe  gbɛjianɔ. No hewɔ lɛ, mɛɛ be Yehowa wo Yesu Maŋtsɛ? Ani efee nakai be ni Yesu yashɛ ŋwɛi lɛ nɔŋŋ? Dabi, emɛ fioo dã. Yesu shitee lɛ sɛɛ afii komɛi lɛ, Petro kɛ Paulo wie nɔ ko ni maa enɛ nɔ mi. Amɛwie akɛ, gbalɛ ni yɔɔ Lala 110:1 lɛ kɔɔ Yesu he. Nakai gbalɛ lɛ kɛɔ akɛ: “Tá mininejurɔ nɔ kɛyashi beyinɔ ní maŋɔ ohenyɛlɔi lɛ mafee onajiashi maaŋoo.” (Bɔfoi 2:32-35; Hebribii 10:12, 13) Shi mɛɛ be Yesu mɛ kɛyashi dani Yehowa wó lɛ Maŋtsɛ?

Nyɔŋmɔ Maŋtsɛyeli lɛ baahã afee Nyɔŋmɔ suɔmɔnaa nii yɛ shikpɔŋ lɛ nɔ

23. (a) Mɛɛ be awo Yesu Nyɔŋmɔ Maŋtsɛyeli lɛ nɔ Maŋtsɛ? (b) Mɛni wɔbaakase yɛ yitso ni nyiɛ sɛɛ lɛ mli?

23 Afii babaoo dani afi 1914 baashɛ lɛ, anɔkwa Kristofoi komɛi yɔse akɛ, nakai afi lɛ baafee afi ko ni sa kadimɔ waa, ni akɛ Biblia mli gbalɛi komɛi baaba mli yɛ nakai afi lɛ mli. Nibii ni etee nɔ yɛ je lɛ mli kɛjɛ afi 1914 lɛ hãa wɔnaa akɛ, nɔ ni amɛwie lɛ ja. Awó Yesu Maŋtsɛ yɛ nakai afi lɛ mli. (Lala 110:2) No sɛɛ etsɛɛɛ lɛ, ashɛ Satan afɔ̃ shikpɔŋ lɛ nɔ, ni amrɔ nɛɛ “be fioo kɛkɛ eyɔɔ.” (Kpojiemɔ 12:12) Yɛ yitso ni nyiɛ sɛɛ lɛ mli lɛ, wɔbaana nibii komɛi ni yeɔ he odase akɛ, “be fioo” ni eshwɛ nɛɛ mli wɔyɔɔ lɛ. Wɔbaana hu akɛ, etsɛŋ Nyɔŋmɔ Maŋtsɛyeli lɛ baahã afee Nyɔŋmɔ suɔmɔnaa nii yɛ shikpɔŋ lɛ nɔ.—Kwɛmɔ Wiemɔi Komɛi Amligbalamɔ 22.