Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mɛni Wɔbaanyɛ Wɔkase Kɛjɛ Biblia lɛ Mli?

 YITSO ENYƆ

Biblia Lɛ—Wolo ni Jɛ Nyɔŋmɔ Ŋɔɔ

Biblia Lɛ—Wolo ni Jɛ Nyɔŋmɔ Ŋɔɔ

1, 2. Mɛni hewɔ wɔbaanyɛ wɔkɛɛ akɛ Biblia lɛ ji nikeenii ko ni nɔ bɛ ni Nyɔŋmɔ kɛhã wɔ?

KƐ́ ONAANYO ko ke bo nɔ ko lɛ, te onuɔ he ohãa tɛŋŋ? Ohe tswaa shi kɛgbeleɔ naa. Omii shɛɔ ohe waa akɛ onaanyo lɛ esusu ohe, ni odaa lɛ shi.

2 Biblia lɛ ji nikeenii ni jɛ Nyɔŋmɔ ŋɔɔ. Nibii pii yɛ ni kɛjeee Biblia lɛ kulɛ, wɔnyɛŋ wɔle kɔkɔɔkɔ. Akɛ nɔkwɛmɔnɔ lɛ, eji jeee Biblia lɛ kulɛ, wɔleŋ kɔkɔɔkɔ akɛ Nyɔŋmɔ ji mɔ ni bɔ ŋwɛi, shikpɔŋ lɛ, kɛ klɛŋklɛŋ nuu kɛ yoo lɛ. Shishitoo mlai ni yɔɔ Biblia lɛ mli lɛ baanyɛ aye abua wɔ ni wɔtsu wɔnaagbai ahe nii. Biblia lɛ ni tsɔɔ wɔ bɔ ni Nyɔŋmɔ baafee ehã eyiŋtoo lɛ aba mli, ni ehã shikpɔŋ lɛ nɔ shihilɛ aŋɔɔ. Lɛɛlɛŋ, Biblia lɛ ji nikeenii ko ni nɔ bɛ!

3. Kɛ́ okase Biblia lɛ, mɛni obaana?

3 Kɛ́ okase Biblia lɛ, obaana akɛ Nyɔŋmɔ miisumɔ ni okɛ lɛ abɔ naanyo. Ni kɛ́ otee nɔ okase ehe nii lɛ, obaabatsɔ enaanyo kpaakpa.

4. Te nibii ni awie yɛ Biblia lɛ he lɛ ateŋ nɔ ni onya he waa?

4 Atsɔɔ Biblia lɛ shishi kɛtee wiemɔi ni fa fe 2,800 mli, ni akala akpekpe toi akpei abɔ. Mɛi akpekpe toi akpei abɔ baanyɛ akane Biblia lɛ yɛ amɛ diɛŋtsɛ amɛmaŋ wiemɔ mli. Ni daa otsi lɛ, mɛi akpekpe kome kɛ sɛɛ anine shɛɔ Biblia lɛ eko nɔ! Ŋwanejee ko bɛ he akɛ, wɔnyɛŋ wɔkɛ wolo ko wolo ko ato Biblia lɛ he.

5. Mɛni hewɔ wɔbaanyɛ wɔkɛɛ akɛ Biblia lɛ jɛ “Nyɔŋmɔ mumɔ lɛŋ” lɛ?

 5 Biblia lɛ jɛ “Nyɔŋmɔ mumɔ lɛŋ.” (Kanemɔ 2 Timoteo 3:16.) Shi ekolɛ, mɔ ko baabi akɛ, ‘Gbɔmɛi ni ŋma Biblia lɛ, no hewɔ lɛ, mɛni hewɔ akɛɔ akɛ ejɛ Nyɔŋmɔ ŋɔɔ lɛ?’ Biblia lɛ hãa sanebimɔ nɛɛ hetoo, ekɛɔ akɛ: “Mumɔ krɔŋkrɔŋ lɛ tsirɛ gbɔmɛi ni amɛwie wiemɔi ní jɛ Nyɔŋmɔ ŋɔɔ.” (2 Petro 1:21) Wɔbaanyɛ wɔkɛ enɛ ato nitsumɔtsɛ ko ni ekɛɛ ewoloŋmalɔ akɛ eŋma wolo kɛyahã mɔ ko lɛ he. Eyɛ mli akɛ, woloŋmalɔ lɛ ni ŋma wolo lɛ moŋ, shi emli wiemɔi lɛ jeee enɔ. Nitsumɔtsɛ lɛ nɔ ni. Nakai nɔŋŋ eji yɛ Biblia lɛ gbɛfaŋ. Nyɔŋmɔ kɛ emumɔ lɛ kudɔ mɛi ni ŋmala lɛ, koni amɛŋmala esusumɔi. No hewɔ lɛ, eyɛ mli akɛ gbɔmɛi ni ŋmala Biblia lɛ moŋ, shi Nyɔŋmɔ wiemɔi ji  nɔ ni yɔɔ mli. Enɛ hewɔ lɛ, Biblia lɛ ji “Nyɔŋmɔ wiemɔ” diɛŋtsɛ.1 Tesalonikabii 2:13; kwɛmɔ Wiemɔi Komɛi Amligbalamɔ 2.

SAJI FƐƐ NI YƆƆ BIBLIA LƐ MLI LƐ JA

6, 7. Mɛni hewɔ wɔbaanyɛ wɔkɛɛ akɛ Biblia lɛ eteee shi ewooo ehe lɛ?

6 Akɛ afii 1,600 kɛ sɛɛ ŋma Biblia lɛ. Mɛi ni ŋmala lɛ fɛɛ ehiii shi yɛ be kome too lɛ nɔŋŋ mli. Amɛteŋ mɛi komɛi le woloŋ waa, shi mɛi komɛi hu awoloŋlee faaa. Akɛ nɔkwɛmɔnɔ lɛ, dɔkitafonyo ji amɛteŋ mɔ kome. Amɛteŋ mɛi komɛi hu ji okwaafoi, wolɛi, tookwɛlɔi, gbalɔi, kojolɔi, kɛ maŋtsɛmɛi. Fɛɛ sɛɛ lɛ, Biblia lɛ mli woji lɛ fɛɛ kɛ amɛhe kpãa gbee. Emli woji lɛ eko eko bɛ ni teɔ shi woɔ ehe loo teɔ shi woɔ ekroko. *

7 Biblia lɛ mli klɛŋklɛŋ yitsei lɛ hãa wɔnaa nɔ ni kɛ adesai anaagbai lɛ fɛɛ ba, ni naagbee yitsei lɛ tsɔɔ wɔ bɔ ni Nyɔŋmɔ baafee etsu nakai naagbai lɛ ahe nii ni ehã shikpɔŋ lɛ atsɔ abɔɔ fɛfɛo. Biblia lɛ gbaa wɔ adesai ayinɔsane. Ewieɔ nibii ni etee nɔ afii akpei abɔ nɛ, ni ehãa wɔnaa akɛ, nɔ fɛɛ nɔ ni Nyɔŋmɔ toɔ eyiŋ akɛ ebaafee lɛ, efeɔ.

8. Tsɔɔmɔ nibii komɛi ni Biblia lɛ ewie ni hãa wɔnaa akɛ saji ni ewieɔ yɛ jeŋ shikpamɔ he lɛ ja.

8 Eyɛ mli akɛ Nyɔŋmɔ hãaa aŋma Biblia lɛ koni ekɛtsɔɔ wɔ jeŋ shikpamɔ moŋ, shi nɔ fɛɛ nɔ ni Biblia lɛ wieɔ yɛ jeŋ shikpamɔ he lɛ ja. Ni nakai pɛ ji nɔ ni wɔbaakpa gbɛ yɛ wolo ko ni jɛ Nyɔŋmɔ ŋɔɔ lɛ he. Akɛ nɔkwɛmɔnɔ lɛ, yɛ Mose Wolo ni Ji Etɛ lɛ mli lɛ, Nyɔŋmɔ tsɔɔ Israelbii lɛ nɔ ni amɛbaanyɛ amɛfee koni muawai ni kɛ helai baa akagbɛ eshwã amɛteŋ. Be ni Mose ŋma ewolo lɛ, no mli lɛ mɔ ko mɔ ko  leee akɛ muawai ji nɔ ni hãa helai gbɛɔ shwãa. Agbɛnɛ hu, Biblia lɛ wieɔ yɛ gbɛ ni ja nɔ akɛ shikpɔŋ lɛ sɛŋ kɔɔyɔɔ lɛ mli, emaaa nɔ ko nɔ ko nɔ. (Hiob 26:7) Be ko ni eho lɛ, mɛi pii kɛɛ shikpɔŋ lɛ yɛ tɛtrɛɛ. Shi no mli lɛ, Biblia lɛ ewie akɛ eyɛ kokloo.Yesaia 40:22.

9. Mɛni tsɔɔ akɛ mɛi ni ŋma Biblia lɛ yeɔ anɔkwa? Ni mɛni enɛ hãa wɔnaa yɛ Biblia lɛ he?

9 Biblia mli amaniɛbɔi ni kɔɔ nibii ni tee nɔ yɛ blema lɛ ahe lɛ hu ja. Bei komɛi lɛ, mɛi ni ŋmalaa yinɔsane lɛ yeee anɔkwa, no hewɔ lɛ, jeee be fɛɛ be wɔbaanyɛ wɔhe nibii ni amɛŋmala lɛ wɔye. Akɛ nɔkwɛmɔnɔ lɛ, bei komɛi lɛ, kɛ́ amɛtee ta ni aye amɛmaji lɛ anɔ kunim lɛ, amɛŋmaaa he sane. Shi jeee nakai mɛi ni ŋma Biblia lɛ fee, ejaakɛ be ni maji komɛi ye Israelbii lɛ anɔ kunim lɛ, amɛbɔ he amaniɛ. Agbɛnɛ hu, amɛŋmala amɛ diɛŋtsɛ amɛtɔmɔi ahe saji amɛshwie shi. Akɛ nɔkwɛmɔnɔ lɛ, yɛ Mose Wolo ni Ji Ejwɛ lɛ mli lɛ, Mose ŋma tɔmɔ ko ni yɔɔ hiɛdɔɔ ni etɔ̃ lɛ, kɛ bɔ ni Nyɔŋmɔ gbala etoi yɛ he lɛ he sane efɔ̃ shi. (4 Mose 20:2-12) Bɔ ni mɛi ni ŋma Biblia lɛ kɛ anɔkwayeli ŋmala emli saji lɛ hãa wɔnaa akɛ Biblia lɛ jɛ Nyɔŋmɔ ŋɔɔ. Enɛ tsɔɔ akɛ wɔbaanyɛ wɔhe nibii fɛɛ ni Biblia lɛ wieɔ lɛ wɔye.

ŊAAWOI KPAKPAI EYI MLI OBƆ

10. Mɛni hewɔ wɔbaanyɛ wɔná ŋaawoi ni yɔɔ Biblia lɛ mli lɛ ahe sɛɛ lɛ?

10 Biblia lɛ “jɛ Nyɔŋmɔ mumɔ lɛŋ, ni ehe yɛ sɛɛnamɔ kɛhã nitsɔɔmɔ, kɛhã mɔkunemɔ,” kɛ agbɛnɛ hu, “kɛhã nibii ajajemɔ.” (2 Timoteo 3:16) Ni tsɔɔ akɛ, wɔbaanyɛ wɔná ŋaawoi ni yɔɔ mli lɛ ahe sɛɛ. Yehowa le adesai ahe nɔ fɛɛ nɔ, ele bɔ ni wɔsusuɔ nii ahe wɔhãa, kɛ bɔ ni wɔnuɔ he wɔhãa yɛ nibii ahe. Ele wɔ jogbaŋŋ po fe bɔ ni wɔ diɛŋtsɛ wɔle wɔhe, ni eesumɔ ni wɔmii ashɛ wɔhe. Ele nibii ni hi hã wɔ, kɛ nibii ni baanyɛ aye wɔ awui.

11, 12. (a) Mɛni ji nibii komɛi ni Yesu wo wɔ ŋaa yɛ he yɛ Mateo yitso 5 kɛyashi yitso 7 lɛ? (b) Mɛɛ nibii krokomɛi ahe Biblia lɛ wieɔ?

 11 Kɛ́ okane Mateo yitso 5 kɛyashi 7 lɛ, obaana ŋaawoi kpakpai ni Yesu kɛhã yɛ bɔ ni wɔbaafee wɔná miishɛɛ yɛ shihilɛ mli, bɔ ni wɔbaafee wɔsaa wɔkɛ mɛi ateŋ, bɔ ni asɔleɔ, kɛ jwɛŋmɔ ni esa akɛ wɔná yɛ shika he lɛ he. Yesu kɛ ŋaawoi nɛɛ hã aaafee afii 2,000 ni eho nɛ, shi amɛhe yɛ sɛɛnamɔ waa kɛhã wɔ ŋmɛnɛ, ni amɛbaanyɛ amɛye amɛbua wɔ.

12 Yehowa ehã wɔ shishitoo mlai yɛ Biblia lɛ mli. Shishitoo mlai nɛɛ tsɔɔ wɔ bɔ ni wɔbaafee wɔhã miishɛɛ ahi wɔweku lɛ mli, kɛ bɔ ni wɔbaafee wɔkɛ mɛi ahi shi yɛ toiŋjɔlɛ mli. Agbɛnɛ hu, amɛtsɔɔ wɔ bɔ ni wɔɔfee wɔtsɔmɔ nitsulɔi kpakpai. Shishitoo mlai ni yɔɔ Biblia lɛ mli lɛ baanyɛ aye abua wɔ be fɛɛ be, ekɔɔɔ he eko mɛi ni wɔji, he ni wɔyɔɔ, loo naagbai ni wɔkɛkpeɔ.Kanemɔ Yesaia 48:17; kwɛmɔ Wiemɔi Komɛi Amligbalamɔ 3.

GBALƐI FƐƐ NI YƆƆ BIBLIA LƐ MLI LƐ BAABA MLI

Mɛi ni ŋma Biblia lɛ ateŋ mɔ kome ni atsɛɔ lɛ Yesaia lɛ wie akɛ abaaye Babilon nɔ kunim

13. Mɛni Yesaia wie akɛ ebaaba Babilon maŋ lɛ nɔ?

13 Gbalɛi ni yɔɔ Biblia lɛ mli lɛ pii eba mli momo. Akɛ nɔkwɛmɔnɔ lɛ, Yesaia gba akɛ abaakpãtã Babilon maŋ lɛ hiɛ. (Yesaia 13:19) Etsɔɔ gbɛ pɔtɛɛ ni abaatsɔ nɔ aye maŋ lɛ nɔ kunim. Ewie akɛ, abaashi agbói wujiwuji ni yɔɔ maŋ lɛ naa lɛ afɔ̃, ni faa ni hãaa mɛi anyɛ atutua maŋ lɛ hu baamii. Yesaia wie akɛ mɛi ni baatutua Babilon lɛ baaŋɔ maŋ lɛ ni ehe ehiaaa ni amɛwu ta. Yesaia gbalɛ lɛ tsɔɔ nuu ni baaye Babilon nɔ kunim lɛ gbɛ́i po. Atsɛɔ lɛ Koresh.Kanemɔ Yesaia 44:27–45:2; kwɛmɔ Wiemɔi Komɛi Amligbalamɔ 4.

14, 15. Gbaa bɔ ni fee ni Yesaia gbalɛ lɛ ba mli.

14 Be ni Yesaia wie sane nɛɛ sɛɛ afii 200 lɛ, asraafoi komɛi ba ni amɛbatutua Babilon. Ani ole mɔ ni nyiɛ amɛhiɛ? Lɛ ji Persia maŋtsɛ Koresh. Ni lɛ tuuntu ji mɔ ni  Yesaia gba akɛ ebaaye Babilon nɔ kunim lɛ. Ani gbalɛ lɛ fãi krokomɛi ni eshwɛ lɛ hu ba mli? Hã wɔkwɛ.

15 Gbi gbɛkɛ ni asraafoi lɛ baatutua Babilon maŋ lɛ, no mli lɛ aaye gbi jurɔ ko yɛ maŋ lɛ mli. Gbogboi wuji kɛ faa ni hãaa mɛi anyɛ atutua maŋ lɛ ahewɔ lɛ, maŋbii lɛ nu he akɛ amɛyɛ shweshweeshwe. Koresh kɛ esraafoi lɛ gba gbɛ  kroko amɛhã faa lɛ, ni eho aahu kɛyashi eba shi bɔ ni abaanyɛ anyiɛ kɛtsɔ mli. Kɛkɛ ni amɛtsɔ mli kɛyashɛ gbogboi lɛ ahe. Shi te amɛbaafee tɛŋŋ amɛbote maŋ lɛ mli? Nakai gbɛkɛ lɛ, ashi agbói lɛ afɔ̃. No hewɔ lɛ, taakɛ Yesaia gba lɛ, asraafoi lɛ ŋɔ maŋ lɛ ní amɛkɛ mɔ ko wuuu ta.

16. (a) Mɛni Yesaia gba yɛ bɔ ni sɛɛ mli lɛ Babilon maŋ lɛ baafee ahã lɛ he? (b) Mɛni tsɔɔ akɛ Yesaia gbalɛ lɛ ba mli?

16 Yesaia gba akɛ sɛɛ mli lɛ: “Mɔ ko ehiŋ [Babilon] gbi ko gbi ko, ni asaŋ akɛ jɛi efeŋ shihilɛhe yɛ yinɔ ko yinɔ ko nɔ.” (Yesaia 13:20) Ani gbalɛ nɛɛ ba mli? Hɛɛ, eba mli. Ŋmɛnɛ lɛ, kɛ́ ootao ole he ni no mli lɛ Babilon maŋ lɛ yɔɔ lɛ, eyɛ Iraq maŋ lɛ maŋtiase ni atsɛɔ lɛ Baghdad lɛ wuoyi. Jɛmɛ kɛ Baghdad teŋ jekɛmɔ aaafee kilomitai 80. Shi kɛ́ otee jɛmɛ lɛ, nɔ pɛ ni obaana ji tsũ koi, mɔ ko mɔ ko ehiii jɛmɛ. Yehowa kɛ “fitemɔ blɔ” ebɛɛ Babilon.Yesaia 14:22, 23. *

Babilon etsɔ amaŋfɔ̃

17. Mɛni hewɔ wɔbaanyɛ wɔná nɔmimaa akɛ Nyɔŋmɔ shiwoi fɛɛ baaba mli lɛ?

17 Biblia mli gbalɛi pii eba mli momo, ni enɛ hãa  wɔnáa nɔmimaa akɛ, nibii ni Biblia lɛ egba akɛ ebaaba wɔsɛɛ lɛ hu baaba mli. Akɛ nɔkwɛmɔnɔ lɛ, Yehowa ewo shi akɛ ebaahã shikpɔŋ lɛ atsɔ Paradeiso, ni wɔbaanyɛ wɔná nɔmimaa akɛ shiwoo nɛɛ baaba mli. (Kanemɔ 4 Mose 23:19.) “Nyɔŋmɔ, mɔ ni nyɛŋ emale lɛ,” ewo wɔ shi kɛjɛ blema tɔ̃ɔ akɛ, wɔbaahi shi kɛya naanɔ, ni enɛ ji wɔhiɛnɔkamɔ.Tito 1:2. *

BIBLIA LƐ BAANYƐ ATSAKE OSHIHILƐ

18. Mɛni Paulo ŋma yɛ “Nyɔŋmɔ wiemɔ lɛ” he?

18 Wɔna akɛ, wolo ko wolo ko bɛ ni wɔbaanyɛ wɔkɛto Biblia lɛ he. Biblia lɛ mli woji lɛ fɛɛ kɛ amɛhe kpãa gbee, ni nibii fɛɛ ni ewie ni kɔɔ jeŋ shikpamɔ kɛ yinɔsane he lɛ ja. Agbɛnɛ hu, ŋaawoo ni yɔɔ mli lɛ hi, ni nibii ni egba lɛ babaoo eba mli momo. Shi nɔ kroko hu yɛ ni Biblia lɛ feɔ. Bɔfo Paulo ŋma akɛ: “Nyɔŋmɔ wiemɔ lɛ hiɛ kã ni eyɛ hewalɛ.” Mɛni enɛ tsɔɔ?Kanemɔ Hebribii 4:12.

19, 20. (a) Mɛɛ gbɛ nɔ Biblia lɛ baanyɛ aye abua bo ni ona mɔ tuuntu ni oji? (b) Mɛni obaanyɛ ofee kɛtsɔɔ akɛ ohiɛ sɔɔ Biblia lɛ?

19 Biblia lɛ baanyɛ atsake oshihilɛ. Ebaanyɛ eye ebua bo ni ona mɔ tuuntu ni oji kɛ nɔ diɛŋtsɛ ni yɔɔ otsui kɛ ojwɛŋmɔ mli. Akɛ nɔkwɛmɔnɔ lɛ, wɔbaanyɛ wɔkɛɛ akɛ wɔsumɔɔ Nyɔŋmɔ. Shi ja wɔkɛ nibii ni Biblia lɛ wieɔ lɛ etsu nii dani wɔbaanyɛ wɔtsɔɔ akɛ wɔsumɔɔ Nyɔŋmɔ lɛɛlɛŋ.

20 Wɔna faŋŋ akɛ, Biblia lɛ jɛ Nyɔŋmɔ ŋɔɔ. Nyɔŋmɔ miisumɔ ni okane, okase, ni osumɔ Biblia lɛ. Hã ohiɛ asɔ nikeenii nɛɛ, ni oya nɔ okase. Kɛ́ ofee nakai lɛ, obaana nɔ hewɔ ni Nyɔŋmɔ bɔ adesai. Wɔbaasusu enɛ he fitsofitso yɛ yitso ni nyiɛ sɛɛ lɛ mli.

^ kk. 6 Mɛi komɛi kɛɛ Biblia lɛ teɔ shi ewoɔ ehe. Shi enɛ jeee anɔkwale. Kwɛmɔ wolo ni ji The Bible—God’s Word or Man’s? ni Yehowa Odasefoi fee lɛ yitso 7 lɛ.

^ kk. 16 Kɛ́ ootao ole saji krokomɛi ni kɔɔ Biblia mli gbalɛi ahe lɛ, kwɛmɔ wolo ni ji Wolo Kɛha Gbɔmɛi Fɛɛ, ni Yehowa Odasefoi fee lɛ baafa 27-29 lɛ.

^ kk. 17 Babilon hiɛkpatamɔ lɛ ji Biblia mli gbalɛi babaoo ni eba mli lɛ ateŋ ekome pɛ. Awie gbalɛi komɛi ni kɔɔ Yesu Kristo he lɛ ahe yɛ Wiemɔi Komɛi Amligbalamɔ 5 lɛ mli.

Ekrokromɛi Hu Nɛ

Ani Biblia lɛ Ja?

Kɛ́ Nyɔŋmɔ ji Biblia lɛ ŋmalɔ lɛ, belɛ esa akɛ esoro Biblia lɛ yɛ woji krokomɛi fɛɛ he.

Te Fee Tɛŋŋ ni Biblia mli Anɔkwalei lɛ Bafee Faŋŋ Ekoŋŋ Lɛ?

Te wɔbaafee tɛŋŋ wɔná nɔmimaa akɛ wɔnu Biblia tsɔɔmɔi lɛ ashishi jogbaŋŋ lɛ?