Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mɛni Wɔbaanyɛ Wɔkase Kɛjɛ Biblia lɛ Mli?

 YITSO NYƆŊMA KƐ NƐƐHU

Hii Yehowa Masɛi Daa

Hii Yehowa Masɛi Daa

1, 2. Ŋmɛnɛ lɛ, nɛgbɛ wɔbaanyɛ wɔná hebuu yɛ?

ŊƆƆ lɛ akɛ be ko lɛ onyiɛ he ko ni ahum bɔi tswaa. Ŋwɛi bɔi dimɔ, sarawai bɔi gbalamɔ, ni nugbɔ bɔi shiimɔ. Etsɛɛɛ ni nugbɔ lɛ bɔi nɛmɔ. Otao he ko ni obaatee ohe yɛ. Kwɛ bɔ ni otsui baanyɔ omli waa kɛ́ oná he ko ni yɔɔ shweshweeshwe, ni jɛmɛ egbi hu lɛ!

2 Ŋmɛnɛ lɛ, wɔyɛ shihilɛ ni tamɔ nakai nɔŋŋ mli. Je lɛŋ shihilɛ miifite kwraa. Ekolɛ obaabi akɛ, ‘Nɛgbɛ maná hebuu yɛ?’ Biblia mli lalatsɛ ko ŋma akɛ: “Makɛɛ Yehowa akɛ: ‘Bo ji mibobaahe kɛ mimɔɔ, mi-Nyɔŋmɔ hu ní mihiɛ kã enɔ!’” (Lala 91:2) Hɛɛ, Yehowa baanyɛ awa wɔ kɛkpee wɔnaagbai lɛ anaa amrɔ nɛɛ, ni ehã wɔná hiɛnɔkamɔ hu ni nɔ bɛ kɛhã wɔsɛɛ.

3. Te wɔɔfee tɛŋŋ wɔkɛ Yehowa afee wɔbobaahe?

3 Mɛɛ gbɛ nɔ Yehowa baanyɛ atsɔ abu wɔhe? Ebaanyɛ ewa wɔ kɛtsu naagba fɛɛ naagba ni wɔkɛkpeɔ lɛ he nii, ni ehe wa kwraa fe mɔ fɛɛ mɔ ni baaka akɛ ebaaye wɔ awui. Kɛ́ nɔ ko ni ehiii ba wɔnɔ amrɔ nɛɛ po lɛ, wɔle akɛ wɔsɛɛ lɛ Yehowa baasaa nɔ ni fite lɛ. Biblia lɛ woɔ wɔ hewalɛ akɛ: ‘Nyɛyaa nɔ nyɛhia Nyɔŋmɔ suɔmɔ lɛ mli.’ (Yuda 21) Kɛ́ wɔmiitao ni Yehowa awa wɔ yɛ jaramɔ bei amli lɛ, esa akɛ wɔhi emasɛi daa. Shi te wɔɔfee tɛŋŋ wɔfee nakai?

TSƆƆMƆ AKƐ OHIƐ SƆƆ NYƆŊMƆ SUƆMƆ LƐ

4, 5. Mɛɛ gbɛi anɔ Yehowa etsɔɔ yɛ akɛ esumɔɔ wɔ?

4 Kɛ́ wɔɔhi Yehowa masɛi daa lɛ, no lɛ, ehe miihia ni wɔle bɔ ni esumɔɔ wɔ waa ehãa. Susumɔ nibii fɛɛ ni  Yehowa efee ehã wɔ lɛ he okwɛ. Ehã wɔ shikpɔŋ fɛfɛo, ni ekɛ tsei kɛ kooloi fɛfɛji babaoo ewo nɔ. Ehã wɔ niyenii ni ŋɔɔŋɔi kɛ nu ni mli tse hu ni wɔnu. Yehowa etsɔ Biblia lɛ nɔ ehã wɔle egbɛ́i kɛ esui ni nɔ bɛ lɛ. Nɔ ni fe fɛɛ lɛ, ehã wɔna akɛ esumɔɔ wɔ be ni etsu Yesu, ni ji e-Bi ni esumɔɔ lɛ lɛ kɛba shikpɔŋ lɛ nɔ koni ekɛ ewala abafɔ̃ shi ahã wɔ lɛ. (Yohane 3:16) Ni nakai afɔleshaa lɛ hewɔ lɛ, wɔyɛ hiɛnɔkamɔ ni nɔ bɛ kɛhã wɔsɛɛ.

5 Yehowa eto Mesia Maŋtsɛyeli lɛ shishi, ni eji ŋwɛi nɔyeli ni etsɛŋ ebaafo piŋmɔi fɛɛ sɛɛ. Maŋtsɛyeli nɛɛ baafee shikpɔŋ lɛ paradeiso, ni mɔ fɛɛ mɔ baahi shi yɛ toiŋjɔlɛ kɛ miishɛɛ mli kɛya naanɔ yɛ paradeiso lɛ mli. (Lala 37:29) Gbɛ kroko ni Yehowa tsɔɔ nɔ etsɔɔ akɛ esumɔɔ wɔ ji, etsɔɔ wɔ bɔ ni wɔɔfee wɔhi shi yɛ gbɛ ni hi fe fɛɛ nɔ amrɔ nɛɛ. Agbɛnɛ hu, ekɛɛ wɔsɔle wɔhã lɛ, ni efee klalo be fɛɛ be akɛ ebaabo wɔsɔlemɔi lɛ atoi. Yehowa etsɔɔ faŋŋ akɛ, esumɔɔ wɔteŋ mɔ fɛɛ mɔ.

6. Mɛni esa akɛ ofee kɛtsɔɔ akɛ ohiɛ sɔɔ Yehowa suɔmɔ lɛ?

6 Mɛni esa akɛ ofee kɛtsɔɔ akɛ ohiɛ sɔɔ Yehowa suɔmɔ lɛ? Hã ena akɛ ohiɛ sɔɔ nibii fɛɛ ni efee ehã bo lɛ. Dɔlɛ sane ji akɛ, ŋmɛnɛ lɛ mɛi babaoo hiɛ esɔɔɔ nii. Nakai nɔŋŋ eji be ni Yesu yɔɔ shikpɔŋ lɛ nɔ lɛ. Be ko lɛ, Yesu tsa kpitiyelɔi nyɔŋma, shi amɛteŋ mɔ ko pɛ bada lɛ shi. (Luka 17:12-17) Wɔmiisumɔ ni wɔfee wɔnii tamɔ nuu ni bada Yesu shi lɛ. Wɔmiisumɔ ni wɔda Yehowa shi be fɛɛ be.

7. Te esa akɛ wɔsumɔ Yehowa jogbaŋŋ wɔhã tɛŋŋ?

7 Agbɛnɛ hu, esa akɛ wɔtsɔɔ akɛ wɔsumɔɔ Yehowa. Yesu kɛɛ ekaselɔi lɛ akɛ, amɛsumɔ Yehowa kɛ amɛtsui muu fɛɛ, amɛsusuma muu fɛɛ, kɛ amɛjwɛŋmɔ muu fɛɛ. (Kanemɔ Mateo 22:37.) Mɛni enɛ tsɔɔ?

8, 9. Te wɔɔfee tɛŋŋ wɔhã Yehowa ana akɛ wɔsumɔɔ lɛ?

 8 Kɛ́ wɔkɛɛ wɔsumɔɔ Yehowa lɛ, ani no pɛ kɛkɛ fa? Dabi. Kɛ́ wɔsumɔɔ Yehowa kɛ wɔtsui muu fɛɛ, wɔsusuma muu fɛɛ, kɛ wɔjwɛŋmɔ muu fɛɛ lɛ, wɔbaajie suɔmɔ ni wɔyɔɔ kɛhã lɛ lɛ kpo yɛ wɔnifeemɔi amli. (Mateo 7:16-20) Biblia lɛ tsɔɔ faŋŋ akɛ, kɛ́ wɔsumɔɔ Nyɔŋmɔ lɛ, wɔbaaye ekitãi lɛ anɔ. Ani enɛ feemɔ wa? Dabi, ejaakɛ Yehowa “kitãi lɛ jeee jatsu.”Kanemɔ 1 Yohane 5:3.

9 Kɛ́ wɔbo Yehowa toi lɛ, wɔmii shɛɔ wɔhe ni wɔtsui hu nyɔɔ wɔmli. (Yesaia 48:17, 18) Shi mɛni baawa wɔ koni wɔhi Yehowa masɛi daa? Hã wɔkwɛ.

YAA NƆ OTSI OBƐŊKƐ YEHOWA KPAAKPA

10. Mɛni hewɔ esa akɛ oya nɔ okase Yehowa he nii lɛ?

10 Te fee tɛŋŋ obatsɔ Yehowa naanyo? Biblia lɛ ni okaseɔ lɛ hã obale Yehowa jogbaŋŋ, ni okɛ lɛ bafee naanyo. Naanyobɔɔ nɛɛ tamɔ la ko ní ebaabi ni ohã eya nɔ etso. Tamɔ bɔ ni ehe hiaa ni akɛ lai awo la mli koni eya nɔ etso lɛ, esa akɛ oya nɔ okase Yehowa he nii koni okɛ lɛ teŋ naanyobɔɔ lɛ mli akã he awa.Abɛi 2:1-5.

Taakɛ lai hãa la yaa nɔ etsoɔ lɛ, esa akɛ ofee nibii ni baahã suɔmɔ ni oyɔɔ kɛhã Yehowa lɛ mli aya nɔ awa

11. Kɛ́ okase Biblia lɛ, te ebaaná onɔ hewalɛ ehã tɛŋŋ?

11 Be ni oyaa nɔ okaseɔ Biblia lɛ, obaana nibii ni baata otsuiŋ waa. Kwɛmɔ bɔ ni Yesu kaselɔi enyɔ komɛi nu he amɛhã be ni egbalaa Biblia mli gbalɛi amli etsɔɔ amɛ lɛ. Amɛwie akɛ: “Ani wɔtsuii ahe edɔɔɔ la be ni ekɛ wɔ wieɔ yɛ gbɛ lɛ nɔ, ni egbeleɔ Ŋmalɛi lɛ anaa kwraa etsɔɔ wɔ lɛ?”Luka 24:32.

12, 13. (a) Mɛni baanyɛ aba suɔmɔ ni wɔyɔɔ kɛhã Nyɔŋmɔ lɛ nɔ? (b) Te wɔɔfee tɛŋŋ wɔhã suɔmɔ ni wɔyɔɔ kɛhã Yehowa lɛ mli aya nɔ awa?

12 Bɔ ni kaselɔi lɛ nu Ŋmalɛi lɛ ashishi ni eta amɛtsuiŋ waa lɛ, ekolɛ bo hu nakai nɔŋŋ oná miishɛɛ waa  be ni obɔi Biblia lɛ shishinumɔ lɛ. Enɛ ye ebua bo ni obale Yehowa, ni osumɔ lɛ. Osumɔŋ kwraa ni suɔmɔ nɛɛ he ajɔ.Mateo 24:12.

13 Kɛ́ obatsɔ Nyɔŋmɔ naanyo lɛ, esa akɛ omia ohiɛ waa ni ohã nyɛnaanyobɔɔ lɛ mli aya nɔ awa. Esa akɛ oya nɔ okase lɛ kɛ Yesu he nii, ní ojwɛŋ nɔ ni okaseɔ lɛ nɔ, ní okwɛ bɔ ni obaafee okɛtsu nii yɛ oshihilɛ mli. (Yohane 17:3) Kɛ́ ookane loo ookase Biblia lɛ, bi ohe akɛ: ‘Mɛni enɛ tsɔɔ mi yɛ Yehowa Nyɔŋmɔ he? Mɛni hewɔ esa akɛ masumɔ lɛ kɛ mitsui muu fɛɛ kɛ misusumɔ muu fɛɛ lɛ?’1 Timoteo 4:15.

14. Mɛɛ gbɛ nɔ sɔlemɔ hãa suɔmɔ ni wɔyɔɔ kɛhã Yehowa lɛ mli yaa nɔ ewaa?

14 Kɛ́ oyɛ naanyo ko ní osumɔɔ esane waa lɛ, okɛ lɛ fɔɔ sanegbaa, ni no hãa nyɛnaanyobɔɔ lɛ mli yaa nɔ ewaa. Nakai nɔŋŋ kɛ́ wɔkɛ Yehowa gbaa sane be fɛɛ be  yɛ sɔlemɔ mli lɛ, no hãa suɔmɔ ni wɔyɔɔ kɛhã lɛ lɛ mli waa. (Kanemɔ 1 Tesalonikabii 5:17.) Sɔlemɔ ji nikeenii ko ni nɔ bɛ ni wɔŋwɛi Tsɛ lɛ kɛhã wɔ. Esa akɛ wɔjɛ wɔtsuiŋ wɔkɛ lɛ agba sane be fɛɛ be. (Lala 62:8) Esaaa akɛ wɔkpeɔ sɔlemɔ ko wɔwoɔ wɔyitsoŋ ni wɔkɛɔ be fɛɛ be, shi moŋ esa akɛ nɔ ni wɔkɛɔ lɛ ajɛ wɔtsuiŋ diɛŋtsɛ. Hɛɛ, kɛ́ wɔtee nɔ wɔkase Biblia lɛ, ni wɔjɛ wɔtsuiŋ wɔsɔle lɛ, no baahã suɔmɔ ni wɔyɔɔ kɛhã Yehowa lɛ mli aya nɔ awa.

GBAA MƐI KROKOMƐI YEHOWA HE SANE

15, 16. Te onaa shiɛmɔ nitsumɔ lɛ ohãa tɛŋŋ?

15 Kɛ́ wɔmiitao wɔhi Yehowa masɛi daa lɛ, no lɛ, esa akɛ wɔgba mɛi krokomɛi wɔhemɔkɛyeli lɛ he sane hu. Eji hegbɛ kpele akɛ wɔɔgba mɛi krokomɛi Yehowa he sane. (Luka 1:74) Ni eji nitsumɔ ni Yesu kɛhã anɔkwa Kristofoi fɛɛ. Esa akɛ wɔteŋ mɔ fɛɛ mɔ ashiɛ Nyɔŋmɔ Maŋtsɛyeli lɛ he sane kpakpa lɛ. Ani oofee nakai?Mateo 24:14; 28:19, 20.

16 Bɔfo Paulo na akɛ shiɛmɔ nitsumɔ lɛ ji nɔ ko ni jara wa waa; etsɛ lɛ akɛ “jwetri.” (2 Korintobii 4:7) Yehowa kɛ eyiŋtoo lɛ he sane ni ooogba mɛi lɛ ji nitsumɔ ni he hiaa fe fɛɛ ni obaanyɛ otsu. Eji gbɛi ni obaanyɛ otsɔ nɔ osɔmɔ Yehowa lɛ ateŋ ekome, ni ehiɛ sɔɔ nɔ ni ofeɔ ohãa lɛ lɛ. (Hebribii 6:10) Agbɛnɛ hu, shiɛmɔ ni oooshiɛ lɛ he baanyɛ aba sɛɛnamɔ kɛhã bo kɛ mɛi ni boɔ bo toi lɛ, ejaakɛ kɛ́ ofee nakai lɛ, obaaye obua bo diɛŋtsɛ ohe kɛ mɛi krokomɛi hu koni nyɛtsi nyɛbɛŋkɛ Yehowa, ni nyɛná naanɔ wala. (Kanemɔ 1 Korintobii 15:58.) Ani nitsumɔ kroko yɛ ni baanyɛ ahã otsui anyɔ omli fe enɛ?

17. Mɛni hewɔ esa akɛ akɛ oyaiyeli atsu shiɛmɔ nitsumɔ lɛ?

 17 Shiɛmɔ nitsumɔ lɛ ji nitsumɔ ni biɔ ni akɛ oyaiyeli atsu. Esa akɛ ‘wɔshiɛ wiemɔ lɛ’ ni “wɔhe atswa shi kɛtsu.” (2 Timoteo 4:2) Esa akɛ mɛi anu Nyɔŋmɔ Maŋtsɛyeli lɛ he sane. Biblia lɛ kɛɔ akɛ: “Yehowa gbi wulu lɛ ebɛŋkɛ! Ebɛŋkɛ, ni eeba kɛ foi.” Naagbee lɛ “ekpeŋ sɛɛ!” (Zefania 1:14; Habakuk 2:3) Hɛɛ, etsɛŋ kwraa, Yehowa baakpãtã Satan jeŋ fɔŋ nɛɛ hiɛ. Shi dani nakai be lɛ baashɛ lɛ, esa akɛ abɔ mɛi kɔkɔ bɔ ni afee ni amɛhala akɛ amɛbaasɔmɔ Yehowa.

18. Mɛni hewɔ esa akɛ wɔfata anɔkwa Kristofoi krokomɛi ahe kɛjá Yehowa lɛ?

18 Yehowa miisumɔ ni wɔfata anɔkwa Kristofoi krokomɛi ahe kɛjá lɛ. Biblia lɛ kɛɔ akɛ: “Nyɛhãa wɔteŋ mɔ fɛɛ mɔ asusua enyɛmi he bɔ ni afee ni wɔkanyakanyaa wɔhe koni wɔjie suɔmɔ kpo ní wɔtsu nitsumɔi kpakpai, ni wɔkakwa kpe ni wɔkpeɔ kutuu lɛ, tamɔ bɔ ni eji mɛi komɛi asu lɛ, shi moŋ wɔwowoo wɔhe hewalɛ, ni titri lɛ, akɛni nyɛmiina akɛ gbi lɛ miibɛŋkɛ nɛɛ.” (Hebribii 10:24, 25) Esa akɛ wɔbɔ mɔdɛŋ ni wɔya asafoŋ kpeei lɛ fɛɛ. Kpeei nɛɛ hãa wɔnáa hegbɛ kɛwowoɔ wɔhe hewalɛ, ni wɔkɛtswaa wɔhe wɔmaa shi.

19. Mɛni kɛ́ wɔfee lɛ ebaahã wɔsumɔ wɔnyɛmimɛi Kristofoi lɛ?

19 Kɛ́ otee asafoŋ kpeei lɛ, obaaná nanemɛi kpakpai ni baawa bo koni ojá Yehowa. Obaana nyɛmimɛi hii kɛ yei pii ni miibɔ mɔdɛŋ fɛɛ ni amɛbaanyɛ kɛsɔmɔ Yehowa, tamɔ bo hu ofeɔ lɛ nɔŋŋ. Ni amɛ hu amɛyeee emuu tamɔ bo nɔŋŋ, ni amɛtɔ̃ɔ. Kɛ́ amɛtɔ̃ onɔ lɛ, okɛke amɛ. (Kanemɔ Kolosebii 3:13.) Be fɛɛ be lɛ, okɛ ojwɛŋmɔ ama onyɛmimɛi Kristofoi lɛ asui kpakpai lɛ anɔ, ejaakɛ kɛ́ ofee nakai lɛ, ebaahã osumɔ amɛ, ní otsi obɛŋkɛ Yehowa kpaakpa.

 WALA DIƐŊTSƐ LƐ

20, 21. Mɛni ji “wala diɛŋtsɛ lɛ”?

20 Yehowa miisumɔ ni enanemɛi lɛ fɛɛ aná shihilɛ ni hi fe fɛɛ. Biblia lɛ hãa wɔleɔ akɛ, shihilɛ ni wɔbaaná wɔsɛɛ lɛ baafee srɔto kwraa kɛ́ akɛto shihilɛ ni wɔyɔɔ mli ŋmɛnɛ lɛ he.

Yehowa miisumɔ ni oná “wala diɛŋtsɛ lɛ.” Ani obaamɔ mli?

21 Wɔsɛɛ lɛ, wɔbaahi shi kɛya naanɔ, jeee afii 70 loo 80 ko pɛ. Wɔbaaná “naanɔ wala,” ni wɔbaaná gbɔmɔtsoŋ hewalɛ ni eye emuu, toiŋjɔlɛ, kɛ miishɛɛ yɛ paradeiso fɛfɛo mli. No ji nɔ ni Biblia lɛ tsɛɔ lɛ akɛ “wala diɛŋtsɛ lɛ.” Yehowa ewo shi akɛ ekɛ wala diɛŋtsɛ nɛɛ baahã wɔ, shi amrɔ nɛɛ, esa akɛ wɔfee bɔ fɛɛ bɔ ni wɔbaanyɛ, koni ‘wɔmɔ mli kpɛŋŋ.’1 Timoteo 6:12, 19.

22. (a) Te wɔɔfee tɛŋŋ ‘wɔmɔ wala diɛŋtsɛ lɛ mli kpɛŋŋ’ lɛ? (b) Mɛni hewɔ wɔnyɛŋ wɔfee nɔ ko kɛná naanɔ wala lɛ?

22 Te wɔɔfee tɛŋŋ ‘wɔmɔ wala diɛŋtsɛ lɛ mli kpɛŋŋ’ lɛ? Esa akɛ wɔtsu “nitsumɔ kpakpa” ní ‘wɔteke nɔ yɛ nitsumɔi kpakpai amli.’ (1 Timoteo 6:18) Enɛ tsɔɔ akɛ, esa akɛ wɔkɛ nɔ ni wɔkaseɔ yɛ Biblia lɛ mli lɛ atsu nii. Shi wala diɛŋtsɛ lɛ námɔ lɛ damɔɔɔ wɔ diɛŋtsɛ wɔmɔdɛŋbɔɔ nɔ. Wɔnyɛŋ wɔfee nɔ ko kɛná naanɔ wala kɔkɔɔkɔ. Eji nikeenii ni Yehowa kɛhãa etsuji anɔkwafoi lɛ tswaa, ni no tsɔɔ akɛ ‘durolɔ’ ji lɛ. (Romabii 5:15) Wɔ-Tsɛ ni yɔɔ ŋwɛi lɛ miisumɔ ni ekɛ nikeenii nɛɛ ahã etsuji anɔkwafoi lɛ lɛɛlɛŋ.

23. Mɛni hewɔ esa akɛ okpɛ yiŋ ni sa amrɔ nɛɛ?

23 Bi ohe akɛ, ‘Ani miijá Nyɔŋmɔ yɛ gbɛ ni sa ehiɛ lɛ nɔ?’ Kɛji ona akɛ ehe miihia ni ofee tsakemɔi komɛi lɛ, feemɔ nakai amrɔ nɔŋŋ. Kɛ́ wɔkɛ wɔhiɛ fɔ̃ Yehowa nɔ, ni wɔfee bɔ fɛɛ bɔ ni wɔɔnyɛ kɛbo lɛ toi lɛ, ebaatsɔ wɔbobaahe. Ebaabu ewebii anɔkwafoi lɛ ahe yɛ Satan jeŋ fɔŋ  nɛɛ naagbee gbii lɛ amli. Kɛkɛ lɛ, Yehowa baakwɛ koni wɔhi shi yɛ Paradeiso lɛ mli kɛya naanɔ, taakɛ ewo shi lɛ pɛpɛɛpɛ. Hɛɛ, obaanyɛ oná wala diɛŋtsɛ lɛ, kɛ́ okpɛ yiŋ ni sa amrɔ nɛɛ!

Ekrokromɛi Hu Nɛ

Tsi Obɛŋkɛ Yehowa

Nyɔŋmɔ miifɔ̃ bo nine ni otsi obɛŋkɛ lɛ. Wolo nɛɛ baajɛ Biblia lɛ mli etsɔɔ bo gbɛ ni oootsɔ nɔ ofee nakai.