Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mɛni Wɔbaanyɛ Wɔkase Kɛjɛ Biblia lɛ Mli?

 YITSO EKPAA

Kɛ́ Wɔgboi lɛ, Nɛgbɛ Wɔyaa?

Kɛ́ Wɔgboi lɛ, Nɛgbɛ Wɔyaa?

1-3. Mɛɛ saji mɛi fɔɔ bimɔ yɛ mɛi ni egboi lɛ ahe? Ni te jamɔi komɛi hãa sanebimɔi nɛɛ ahetoo tɛŋŋ?

BIBLIA lɛ kɛɔ akɛ, be ko baaba ni “gbele bɛ dɔŋŋ.” (Kpojiemɔ 21:4) Yɛ Yitso 5 lɛ mli lɛ, wɔkase akɛ, kpɔmɔnɔ lɛ hewɔ lɛ, wɔsɛɛ lɛ, wɔbaanyɛ wɔhi shi kɛya naanɔ. Shi amrɔ nɛɛ, mɛi gboiɔ. (Jajelɔ 9:5) No hewɔ lɛ, sane kome ni mɛi fɔɔ bimɔ ji akɛ, ‘Kɛ́ wɔgboi lɛ, nɛgbɛ wɔyaa?’

2 Be ni mɛi fɔɔ nakai sane lɛ bimɔ ji, be ni mɔ ko ni amɛsumɔɔ esane waa lɛ egbo. Ekolɛ amɛbaabi akɛ: ‘Nɛgbɛ etee? Ani eena wɔ? Ani ebaanyɛ eye ebua wɔ? Ani wɔbaana lɛ ekoŋŋ?’

3 Esoro bɔ ni jamɔ fɛɛ jamɔ hãa sanebimɔi nɛɛ ahetoo ehãa. Jamɔi lɛ ekomɛi tsɔɔ akɛ, kɛ́ ofee ekpakpa ni ogbo lɛ, obaaya ŋwɛi, shi kɛ́ ofee esha lɛ, obaaya Abonsam la lɛ mli. Mɛi komɛi hu kɛɔ akɛ, kɛ́ ogbo lɛ, obaatsɔ sisa ní okɛ owekumɛi ni egboi lɛ ayahi shi. Mɛi krokomɛi hu kɛɛ kɛ́ ogbo lɛ, abaakojo bo ni afɔ bo ekoŋŋ akɛ gbɔmɔ kroko aloo kooloo po.

4. Mɛɛ susumɔ jamɔi srɔtoi lɛ fɛɛ kpɛlɛɔ nɔ?

4 Eyɛ mli akɛ esoro nɔ ni jamɔ fɛɛ jamɔ yɔɔ kɛɛmɔ yɛ sanebimɔi nɛɛ ahe moŋ, shi etamɔ nɔ ni nɔ kome ko yɛ ni no lɛ, amɛ fɛɛ amɛkpɛlɛɔ nɔ. No ji akɛ, amɛ fɛɛ amɛheɔ amɛyeɔ akɛ kɛ́ mɔ ko gbo lɛ, nɔ ko yɛ emli ni gbooo. Ani susumɔ nɛɛ ja?

 KƐ́ WƆGBOI LƐ, NƐGBƐ WƆYAA?

5, 6. Kɛ́ wɔgboi lɛ, mɛni baa wɔnɔ?

5 Yehowa le nɔ ni baa wɔnɔ kɛ́ wɔgboi, ni ekɛɛ wɔ akɛ, kɛ́ mɔ ko gbo lɛ, ebɛ wala mli dɔŋŋ. Mɛi ni egboi lɛ eyaaa he ko he ko, amɛgboi. * No hewɔ lɛ, kɛ́ mɔ ko gbo lɛ, enyɛŋ enu nii ahe, ekai nɔ ko, ena nii, enu nii, loo esusu nii ahe dɔŋŋ.

6 Maŋtsɛ Solomon ŋma akɛ, “gbohii lɛ, amɛleee nɔ ko nɔ ko.” Gbohii lɛ nyɛŋ asumɔ mɔ ko loo amɛnyɛ mɔ ko, ni “nitsumɔ loo yiŋshwiemɔ loo nilee loo ŋaa ko bɛ gbohiiaje.” (Kanemɔ Jajelɔ 9:5, 6, 10.) Lala 146:4 lɛ kɛɔ akɛ, kɛ́ mɔ ko gbo lɛ, “eyiŋtoi” loo esusumɔi gboɔ.

NƆ NI YESU WIE YƐ GBELE HE

Yehowa bɔ adesai ni amɛhi shi kɛya naanɔ yɛ shikpɔŋ lɛ nɔ

7. Mɛni Yesu wie yɛ gbele he?

7 Be ni Yesu naanyo ko ni esumɔɔ esane waa ni atsɛɔ lɛ Lazaro lɛ gbo lɛ, Yesu kɛɛ ekaselɔi lɛ akɛ: “Wɔnaanyo Lazaro ewɔ.” No mli lɛ jeee wɔ diɛŋtsɛ he Yesu wieɔ lɛ, ejaakɛ sɛɛ mli lɛ, ewie akɛ: “Lazaro egbo.” (Yohane 11:11-14) No hewɔ lɛ, Yesu kɛ Lazaro gbele lɛ to wɔ he. Ekɛɛɛ akɛ Lazaro etee ŋwɛi, loo eyafata ewekumɛi ni egboi lɛ ahe. Ni ekɛɛɛ hu akɛ, etee Abonsam la lɛ mli, loo asaa afɔ lɛ yɛ he kroko akɛ gbɔmɔ loo kooloo. Moŋ lɛ, be ni Lazaro gbo lɛ, etamɔ nɔ ni wɔ ni tsii enyɔ enɔ. Ŋmalɛi krokomɛi hu kɛ gbele toɔ wɔ ni tsii he. Be ni Stefano gbo lɛ, Biblia lɛ wie akɛ, “ewɔ yɛ gbele mli.” (Bɔfoi 7:60) Bɔfo Paulo hu wie yɛ Kristofoi komɛi ahe akɛ, ‘amɛwɔ yɛ gbele mli.’1 Korintobii 15:6.

8. Mɛni tsɔɔ akɛ Nyɔŋmɔ ebɔɔɔ adesai ni amɛgboi?

 8 Ani Nyɔŋmɔ bɔ Adam kɛ Hawa ni amɛgboi? Dabi! Yehowa bɔ amɛ ni amɛhi shi kɛya naanɔ, ni amɛná miishɛɛ. Be ni ebɔ amɛ lɛ, hela mɔɔɔ amɛ, ni amɛgbɔlɔɔɔ. Bɔ ni Yehowa bɔ adesai ehã lɛ hewɔ lɛ, amɛshweɔ ni amɛhi shi kɛya naanɔ. (Jajelɔ 3:11) Fɔlɔi sumɔɔɔ ni amɛbii agbɔlɔ ni amɛgboi, ni nakai nɔŋŋ Yehowa hu sumɔɔɔ ni wɔgbɔlɔɔ ni wɔgboiɔ. Shi kɛ́ Nyɔŋmɔ bɔ wɔ ni wɔhi shi kɛya naanɔ lɛ, mɛni hewɔ wɔgboiɔ mɔ?

 MƐNI HEWƆ WƆGBOIƆ?

9. Mɛni hewɔ kulɛ esa akɛ Adam kɛ Hawa aye Yehowa famɔ lɛ nɔ lɛ?

9 Be ni Yehowa bɔ Adam lɛ, ekɛɛ lɛ akɛ: “Trom lɛ mli tsei lɛ fɛɛ nɔ yibii lɛ ye bɔ ni osumɔɔ; shi ekpakpa kɛ efɔŋ lee tso lɛ yibii lɛ kaaye eko; ejaakɛ gbi nɔ ni oooye eko lɛ, gbo ooogbo!” (1 Mose 2:9, 16, 17) Nɔ ni Yehowa fã Adam akɛ ekafee lɛ jeee nɔ ko ni wa. Kɛfata he lɛ, Yehowa yɛ hegbɛ ni etsɔɔ Adam kɛ Hawa nɔ ni amɛfee kɛ nɔ ni amɛkafee. Eji amɛbo lɛ toi kulɛ, no baatsɔɔ akɛ amɛbuɔ lɛ. Ni ebaatsɔɔ hu akɛ, amɛhiɛ sɔɔ nibii fɛɛ ni efee ehã amɛ lɛ.

10, 11. (a) Te Satan fee tɛŋŋ ehã Adam kɛ Hawa fee esha? (b) Mɛni hewɔ nɔ ni amɛfee lɛ ehiii kwraa lɛ?

10 Dɔlɛ sane ji akɛ, Adam kɛ Hawa je gbɛ amɛgbo Yehowa nɔ toi. Satan bi Hawa akɛ: “Lɛɛlɛŋ, Nyɔŋmɔ kɛɛ akɛ: Nyɛkaye trom lɛ mli tsei ayibii lɛ fɛɛ eko lɛ?” Hawa hã lɛ hetoo akɛ: “Trom lɛ mli tsei ayibii lɛ eko wɔyeɔ; shi tso ni yɔɔ trom lɛ teŋ lɛ nɔ yibii lɛ ni Nyɔŋmɔ kɛɛ: Nyɛkayea eko, ni nyɛkataa he tete, koni nyɛkagboi.”1 Mose 3:1-3.

11 Kɛkɛ ni Satan tsa nɔ akɛ: “Jeee gboimɔ nyɛaagboi; shi moŋ le Nyɔŋmɔ le akɛ gbi nɔ ni nyɛaaye eko lɛ, nyɛhiŋmɛii aaagbele, ni nyɛaatsɔmɔ tamɔ Nyɔŋmɔ, ni nyɛaale ekpakpa kɛ efɔŋ.” (1 Mose 3:4-6) Satan je gbɛ ekɛɛ Hawa nakai, koni ená jwɛŋmɔ lɛ akɛ, esaaa akɛ mɔ ko tsɔɔ lɛ nɔ ni efee kɛ nɔ ni ekafee. Satan laka Hawa. Ekɛɛ lɛ akɛ, kɛ́ eye aduawa lɛ, egboŋ. No hewɔ lɛ, Hawa ye aduawa lɛ, ni sɛɛ mli lɛ, ehã ewu lɛ eko ni eye. Adam kɛ Hawa le faŋŋ akɛ, Yehowa kɛɛ amɛkaye tso lɛ nɔ yibii lɛ eko. Shi amɛje gbɛ amɛgbo Yehowa nɔ toi, ni amɛkɛ gbɛtsɔɔmɔ ni waaa ni ekɛhã amɛ lɛ tsuuu  nii. Nɔ ni amɛfee lɛ tsɔɔ akɛ, amɛbuuu amɛ-Tsɛ ni yɔɔ ŋwɛi ni sumɔɔ amɛsane lɛ. Anɔkwa, nɔ ni amɛfee lɛ ehiii kwraa!

12. Mɛni hewɔ nɔ ni Adam kɛ Hawa fee lɛ baadɔ Yehowa waa lɛ?

12 Eyɛ mɔbɔ waa akɛ, wɔ-klɛŋklɛŋ fɔlɔi lɛ ebuuu Mɔ ni bɔ amɛ lɛ! Kɛ́ ogbo deŋme okwɛ obi ko, ni sɛɛ mli lɛ, egbo onɔ toi, ni eje gbɛ efee nɔ ko ni okɛɛ lɛ akɛ ekafee lɛ, ani edɔŋ bo? Ekã shi faŋŋ akɛ, ebaadɔ bo waa.

Adam jɛ sũ mli, ni eku esɛɛ etee sũ mli

13. Be ni Yehowa kɛɛ Adam akɛ ‘ebaaku esɛɛ eya sũ mli lɛ,’ no mli lɛ, mɛni etsɔɔ lɛ?

13 Adam kɛ Hawa toigbele lɛ hewɔ lɛ, naanɔ wala ŋmɛɛ amɛ. Yehowa kɛɛ Adam akɛ: “Sũ jio, ni sũ mli oooku osɛɛ kɛaatee!” (Kanemɔ 1 Mose 3:19.) No hewɔ lɛ, Adam baatsɔ sũ ekoŋŋ, tamɔ nɔ ni anáaa abɔ lɛ. (1 Mose 2:7) Be ni Adam fee esha lɛ, egbo. Ewala sɛɛ fo.

14. Mɛni hewɔ wɔgboiɔ?

14 Eji Adam kɛ Hawa bo Nyɔŋmɔ toi kulɛ, ŋmɛnɛ lɛ amɛyɛ wala mli lolo. Shi amɛgbo enɔ toi, amɛfee esha amɛshi lɛ, ni sɛɛ mli lɛ, amɛgboi. Esha tamɔ hela fɔŋ ko ni wɔná kɛjɛ wɔ-klɛŋklɛŋ fɔlɔi lɛ aŋɔɔ. Enɛ hewɔ lɛ, wɔ fɛɛ wɔfeɔ esha, ni no hewɔ wɔ fɛɛ wɔgboiɔ lɛ. (Romabii 5:12) Shi jeee nakai Nyɔŋmɔ to akɛ eba  lɛ, ebɔɔɔ adesai ni amɛgboi. Biblia lɛ tsɛɔ gbele akɛ “henyɛlɔ.”1 Korintobii 15:26.

ANƆKWALE LƐ HÃA WƆYEƆ WƆHE

15. Kɛ́ wɔle anɔkwale ni kɔɔ gbohii lɛ ahe lɛ, mɛɛ gbɛ nɔ ebaahã wɔye wɔhe?

15 Kɛ́ wɔle nɔ ni Biblia lɛ kɛɔ yɛ gbohii lɛ ahe lɛ, ehãa wɔyeɔ wɔhe kɛjɛɔ susumɔi pii ni ejaaa ahe. Biblia lɛ hãa wɔleɔ akɛ, mɛi ni egboi lɛ nuuu piŋmɔ ko he, ni amɛyeee awerɛho hu. Wɔnyɛŋ wɔkɛ amɛ awie, ni amɛ hu amɛnyɛŋ amɛkɛ wɔ awie. Wɔnyɛŋ wɔye wɔbua amɛ, ni amɛ hu amɛnyɛŋ amɛye amɛbua wɔ. Amɛnyɛŋ amɛye wɔ awui, no hewɔ lɛ, esaaa akɛ wɔsheɔ amɛ gbeyei. Kɛ̃lɛ, jamɔi pii kɛɔ akɛ gbohii lɛ yahiɔ he ko, ni akɛ, kɛ́ wɔhã osɔfoi lɛ, loo jamɔŋ hiɛnyiɛlɔi lɛ shika lɛ, amɛbaanyɛ amɛye amɛbua amɛ amɛhã wɔ. Shi kɛ́ wɔle nɔ ni Biblia lɛ kɛɔ yɛ gbohii lɛ ahe lɛ, mɔ ko mɔ ko nyɛŋ ekɛ enɛ alaka wɔ.

16. Mɛɛ amale ehe shi yɛ jamɔi pii amli?

16 Satan tsɔɔ amale jamɔi anɔ elakaa mɛi, koni amɛsusu akɛ gbohii lɛ yɛ shihilɛ mli lolo. Akɛ nɔkwɛmɔnɔ lɛ, jamɔi komɛi tsɔɔ mɛi akɛ kɛ́ mɔ ko gbo lɛ, nɔ ko fãa yɛ emli ni eyahiɔ he ko. Ani nakai atsɔɔ bo yɛ jamɔ mli ni oyɔɔ lɛ? Aloo atsɔɔ bo nɔ ni Biblia lɛ kɛɔ lɛ? Satan tsɔɔ saji ni tamɔ nɛkɛ lɛ anɔ elakaa mɛi koni amɛkɛ Yehowa akabɔ naanyo.

17. Mɛni hewɔ kɛ́ mɛi kɛɛ akɛ Yehowa shãa mɛi yɛ Abonsam la lɛ mli lɛ, belɛ amɛmiigbe ehe guɔ lɛ?

17 Nibii ni jamɔi pii tsɔɔ mɛi yɛ Yehowa he lɛ yɛ ahuntoo waa. Akɛ nɔkwɛmɔnɔ lɛ, jamɔi komɛi kɛɔ akɛ, kɛ́ mɔ ko fee esha lɛ, abaashã lɛ yɛ Abonsam la mli kɛya naanɔ. Amale nɛɛ gbeɔ Yehowa he guɔ. Yehowa  haŋ mɛi apiŋ nakai kɔkɔɔkɔ! (Kanemɔ 1 Yohane 4:8.) Kɛ́ mɔ ko bi fee lɛ nɔ ko, ni emɔ gbekɛ lɛ nine ni ekɛwo la mli lɛ, te obaana nakai mɔ lɛ ohã tɛŋŋ? Ani okɛŋ akɛ eyitsoŋ wa waa? Ani obaasumɔ ni okɛ mɔ ko ni tamɔ nakai lɛ abɔ naanyo? Nakai pɛpɛɛpɛ Satan taoɔ ni wɔna Yehowa!

18. Mɛni hewɔ esaaa akɛ wɔsheɔ gbohii lɛ agbeyei?

18 Jamɔi komɛi kɛɔ akɛ kɛ́ mɛi gboi lɛ, amɛtsɔmɔɔ sisai. Amɛkɛɔ akɛ, esa akɛ wɔshe sisai nɛɛ gbeyei ni wɔbu amɛ, ejaakɛ kɛ́ wɔfee nakai lɛ, amɛbaasumɔ wɔsane, shi kɛ́ wɔfeee nakai lɛ, amɛbaanyɛ wɔ. Mɛi babaoo heɔ amale nɛɛ amɛyeɔ. No hewɔ lɛ, amɛsheɔ gbohii lɛ gbeyei, ni amɛjáa amɛ moŋ fe ni amɛbaajá Yehowa. Shi taakɛ wɔkase lɛ, mɛi ni egboi lɛ nyɛŋ anu nii ahe dɔŋŋ, ni amɛleee nɔ ko nɔ ko. No hewɔ lɛ, esaaa akɛ wɔsheɔ amɛ gbeyei. Yehowa ji Mɔ ni bɔ wɔ, ni lɛ ji anɔkwa Nyɔŋmɔ lɛ. No hewɔ lɛ, lɛ pɛ esa akɛ wɔjá.Kpojiemɔ 4:11.

19. Kɛ́ wɔle nɔ ni Biblia lɛ kɛɔ yɛ gbohii lɛ ahe lɛ, mɛɛ gbɛ nɔ ebaaye ebua wɔ?

19 Kɛ́ wɔle nɔ ni Biblia lɛ kɛɔ yɛ gbohii lɛ ahe lɛ, mɔ ko mɔ ko nyɛŋ alaka wɔ. Ni ebaaye ebua wɔ ni wɔnu nibii kpakpai ni Yehowa ewo shi akɛ ebaafee ehã wɔ ŋmɛnɛ kɛ wɔsɛɛ lɛ ashishi jogbaŋŋ.

20. Mɛni wɔbaakase yɛ yitso ni nyiɛ sɛɛ lɛ mli?

20 Nyɔŋmɔ tsulɔ ko ni hi shi yɛ blema ni atsɛɔ lɛ Hiob lɛ bi akɛ: “Kɛji gbɔmɔ gbo lɛ, ani ehiɛ aaakã ekoŋŋ?” (Hiob 14:14) Ani mɔ ko ni egbo lɛ baanyɛ aba wala mli ekoŋŋ? Nyɔŋmɔ ehã sanebimɔ nɛɛ hetoo yɛ Biblia lɛ mli, ni hetoo lɛ shɛjeɔ mɔ mii waa. Wɔbaakase enɛ he sane yɛ yitso ni nyiɛ sɛɛ lɛ mli.

^ kk. 5 Mɛi komɛi heɔ amɛyeɔ akɛ kɛ́ mɔ ko gbo lɛ, esusuma loo emumɔ fãa kɛjeɔ emli ni eyahiɔ he ko. Kɛ́ ootao ole enɛ he saji babaoo lɛ, kwɛmɔ Wiemɔi Komɛi Amligbalamɔ 17 kɛ 18 .

Ekrokomɛi Hu Nɛ

BUU-MƆƆ—NIKASEMƆ NƆ

Bɔ ni Ooofee Okpee Ohefatalɔ Gbele Naa

Kɛ́ mɔ ko hefatalɔ gbo lɛ eyɛ dɔlɛ waa, ni dɔlɛ nɛɛ sɛɛ tsɛɔ. Kanemɔ bɔ ni gbohiiashitee he hiɛnɔkamɔ ni yɔɔ Biblia lɛ mli lɛ shɛjeɔ mɔ mii lɛ he sane.