Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mɛni Wɔbaanyɛ Wɔkase Kɛjɛ Biblia lɛ Mli?

 YITSO NYƆŊMA KƐ ETƐ

Mɛni Tsɔɔ akɛ Wala Jara Wa Kɛhã Bo?

Mɛni Tsɔɔ akɛ Wala Jara Wa Kɛhã Bo?

1. Namɔ hã wɔ wala?

YEHOWA ji “Nyɔŋmɔ hiɛkãalɔ” lɛ. (Yeremia 10:10) Lɛ ji wɔ-Bɔlɔ, ni lɛ ehã wɔ wala. Biblia lɛ kɛɔ akɛ: “Bo obɔ nibii fɛɛ, ni osuɔmɔ naa hewɔ amɛba shihilɛ mli ni abɔ amɛ.” (Kpojiemɔ 4:11) Hɛɛ, Yehowa miisumɔ ni wɔhi wala mli. Wala ji nikeenii ni jara wa ni jɛ eŋɔɔ.Kanemɔ Lala 36:9.

2. Mɛni kɛ́ wɔfee lɛ ebaahi ehã wɔ yɛ wɔshihilɛ mli?

2 Yehowa hãa wɔ nibii tamɔ niyenii kɛ nu ni baahã wɔya nɔ wɔhi wala mli. (Bɔfoi 17:28) Jeee akɛ eesumɔ ni wɔhi wala mli kɛkɛ, shi eesumɔ ni wɔná miishɛɛ hu yɛ shihilɛ mli. (Bɔfoi 14:15-17) Ja wɔbo Nyɔŋmɔ mlai lɛ atoi dani ebaahi ehã wɔ yɛ wɔshihilɛ mli.Yesaia 48:17, 18.

TE NYƆŊMƆ NAA WALA EHÃA TƐŊŊ?

3. Be ni Kain gbe Habel lɛ, mɛni Yehowa fee?

3 Biblia lɛ hãa wɔnaa akɛ wɔwala kɛ mɛi krokomɛi hu awala jara wa yɛ Yehowa hiɛ. Akɛ nɔkwɛmɔnɔ lɛ, be ni Adam kɛ Hawa binuu Kain mli wo la ewo enyɛmi nuu fioo Habel lɛ, Yehowa bɔ Kain kɔkɔ koni eye emlifu lɛ nɔ. Shi Kain booo toi, ni emli fu waa aahu akɛ, ‘etutua enyɛmi nuu Habel ni egbe lɛ.’ (1 Mose 4:3-8) Yehowa gbala Kain toi ejaakɛ egbe Habel. (1 Mose 4:9-11) No hewɔ lɛ, mlifu kɛ nyɛɛ ji sui gbohii ejaakɛ amɛbaanyɛ amɛhã wɔye mɛi awui. Mɔ fɛɛ mɔ ni yɔɔ nakai lɛ naŋ  naanɔ wala. (Kanemɔ 1 Yohane 3:15.) Kɛ́ wɔmiitao ni wɔsa Yehowa hiɛ lɛ, no lɛ esa akɛ wɔsumɔ gbɔmɛi fɛɛ.1 Yohane 3:11, 12.

4. Mɛni kitai ni Nyɔŋmɔ kɛhã Israelbii lɛ ateŋ ekome hãa wɔnaa yɛ wala he?

4 Afii akpei abɔ sɛɛ lɛ, Yehowa kɛ Kitai Nyɔŋma lɛ hã Mose, ni nakai kitai lɛ hãa wɔnaa akɛ wala jara wa yɛ Yehowa hiɛ. Kitai lɛ ekome ji: “Kaagbe gbɔmɔ.” (5 Mose 5:17) Kɛ́ mɔ ko je gbɛ egbe mɔ ko lɛ, agbeɔ lɛ hu.

5. Te Nyɔŋmɔ naa hɔkpɔmɔ ehãa tɛŋŋ?

5 Te Nyɔŋmɔ naa hɔkpɔmɔ ehãa tɛŋŋ? Bi ni yɔɔ enyɛ musu mli po wala jara wa yɛ Yehowa hiɛ. Yehowa kɛɛ yɛ mla ni ekɛhã Israelbii lɛ mli akɛ, kɛ́ mɔ ko pila yoohɔlɔ ko ni bi ni yɔɔ emusu mli lɛ gbo lɛ, esa akɛ agbe mɔ lɛ. (Kanemɔ 2 Mose 21:22, 23; Lala 127:3.) Enɛ hãa wɔnaa akɛ hɔkpɔmɔ ehiii.—Kwɛmɔ Wiemɔi Komɛi Amligbalamɔ 28.

6, 7. Te wɔbaafee tɛŋŋ wɔhã Yehowa ana akɛ wɔnaa wala akɛ ejara wa?

6 Te wɔbaafee tɛŋŋ wɔhã Yehowa ana akɛ wɔ diɛŋtsɛ wɔwala kɛ mɛi krokomɛi awala jara wa kɛhã wɔ? No ji, wɔfeŋ nɔ ko ni kɛ wɔwala loo mɛi krokomɛi awala baawo oshara mli. No hewɔ lɛ, wɔshɛreee zigaret ni wɔfũuu asara loo kokein, ni agbɛnɛ hu wɔkɛ tsofai tsuuu nii yɛ gbɛ ni esaaa nɔ ejaakɛ no baaye wɔ awui loo no baanyɛ agbe wɔ po.

7 Nyɔŋmɔ ji mɔ ni hã wɔ wala kɛ gbɔmɔtso, no hewɔ lɛ, esa akɛ wɔkɛtsu nii yɛ gbɛ ni etaoɔ nɔ. Esa akɛ wɔkwɛ wɔgbɔmɔtsei lɛ jogbaŋŋ. Kɛ́ wɔkwɛɛɛ wɔgbɔmɔtsei lɛ jogbaŋŋ lɛ, wɔhe tseŋ yɛ Nyɔŋmɔ hiɛ. (Romabii 6:19; 12:1; 2 Korintobii 7:1) Kɛ́ wɔnaaa wala akɛ nɔ ko ni jara wa lɛ, no lɛ wɔnyɛŋ wɔjá Yehowa, mɔ ni hã wɔ wala lɛ.  Eyɛ mli akɛ ebɛ mlɛo akɛ wɔbaatsi wɔhe kɛje sui gbohii ahe moŋ, shi kɛ́ wɔnaa wala akɛ ejara wa, ni no hewɔ lɛ, wɔmiibɔ wɔhe mɔdɛŋ koni wɔtsi wɔhe kɛje sui gbohii ahe lɛ, Yehowa baaye abua wɔ.

8. Mɛni esa akɛ wɔfee koni wɔkɛ wɔ diɛŋtsɛ wɔwala loo mɛi krokomɛi awala akawo oshara mli?

8 Wɔna akɛ wala ji nikeenii ni jara wa ni Nyɔŋmɔ kɛhã wɔ. Yehowa yɛ nɔmimaa akɛ wɔkɛ wɔ diɛŋtsɛ wɔwala loo mɛi krokomɛi awala woŋ oshara mli. No hewɔ lɛ, esa akɛ wɔhiɛ wɔkar loo wɔmoto, loo tsɔji krokomɛi bɔ ni ekɛ mɔ ko wala woŋ oshara mli. Esaaa akɛ wɔshwɛɔ shwɛmɔi ni yɔɔ oshara loo nɔ ni ayeɔ mɔ awui yɛ mli. (Lala 11:5) Agbɛnɛ hu, esa akɛ wɔfee bɔ fɛɛ bɔ ni wɔɔnyɛ koni wɔshiai afee shweshweeshwe. Yehowa fã Israelbii lɛ akɛ: “Kɛji omã tsu hee lɛ, foo afabaŋ okɛbɔle otsu lɛ yiteŋ, koni mɔ ko akajɛ jɛi ebagbee shi ní lá ko yi sɔ̃ miiba oshia lɛ nɔ.”5 Mose 22:8.

9. Te esa akɛ wɔkɛ kooloi aye ahã tɛŋŋ?

9 Yehowa kwɛɔ bɔ ni wɔkɛ kooloi po yeɔ hãa. Ehãa wɔgbeɔ kooloi ni wɔye loo ni wɔkɛfee atadei, ni agbɛnɛ hu, kɛ́ kooloo ko baanyɛ aye wɔ awui lɛ, eŋmɛɔ wɔ gbɛ ni wɔgbe lɛ. (1 Mose 3:21; 9:3; 2 Mose 21:28) Shi esaaa akɛ wɔyeɔ kooloi awui loo wɔgbeɔ amɛ kɛkɛ.Abɛi 12:10.

ANI ONAA WALA AKƐ NƆ KO NI YƆƆ KRƆŊKRƆŊ?

10. Mɛni hãa wɔnaa akɛ lá damɔ shi kɛhã wala?

10 Lá yɛ krɔŋkrɔŋ yɛ Yehowa hiɛ ejaakɛ lá damɔ shi kɛhã wala. Be ni Kain gbe Habel lɛ sɛɛ lɛ, Yehowa kɛɛ Kain akɛ: “Onyɛmi nuu lɛ lá miibolɔ miitsɛ mi kɛmiijɛ shikpɔŋ lɛ.” (1 Mose 4:10) Habel lá lɛ damɔ shi kɛhã  ewala, no hewɔ lɛ, be ni Kain gbe Habel lɛ, Yehowa gbala etoi. Yɛ Noa beiaŋ Nu Afua lɛ sɛɛ lɛ, Yehowa hã ana akɛ lá damɔ shi kɛhã wala. Yehowa ŋmɛ Noa kɛ eweku lɛ gbɛ ni amɛye kooloi aloo. Ekɛɛ akɛ: “Kooloo fɛɛ kooloo ni hiɛ kã ni tsiɔ ehe lɛ atsɔ nyɛniyenii. Mikɛ enɛɛmɛi fɛɛ miihã nyɛ, tamɔ bɔ ni mikɛ baa ŋmɔŋ hã nyɛ lɛ.” Shi nɔ kome yɛ ni Yehowa fã amɛ ni amɛkaye, ekɛɛ amɛ akɛ: “Loo kɛ ewala, ni ji elá lɛ, kɛkɛ esaaa akɛ nyɛyeɔ.”1 Mose 1:29; 9:3, 4.

11. Mɛɛ famɔ Nyɔŋmɔ kɛhã Israelbii lɛ yɛ lá he?

11 Be ni Yehowa ekɛɛ Noa akɛ ekaye lá lɛ sɛɛ aaafee afii 800 lɛ, efã ewebii lɛ ekoŋŋ akɛ: “Israelbii lɛ ateŋ mɔ fɛɛ mɔ kɛ gbɔ ni toɔ gbɔ yɛ amɛteŋ lɛ, kɛ́ eyagbɔbi ni egbe kooloo loo loofɔlɔ ni ayeɔ lɛ, efɔse ela lɛ eshwie shi, ni ekɛ su aha nɔ.” Kɛkɛ ni ekɛɛ akɛ: “Nyɛkayea loo ko loo ko lá.” (3 Mose 17:13, 14) Yehowa miisumɔ ni ewebii ni yɔɔ ŋmɛnɛ lɛ hu ana lá akɛ nɔ ko ni yɔɔ krɔŋkrɔŋ. Amɛbaanyɛ amɛye kooloo ko loo shi jeee elá. Kɛ́ amɛmiigbe kooloo koni amɛye lɛ, esa akɛ amɛfɔse lá lɛ amɛshwie shi.

12. Te Kristofoi naa lá amɛhãa tɛŋŋ?

12 Be ni Yesu gbo sɛɛ afii komɛi lɛ, bɔfoi lɛ kɛ asafoŋ onukpai ni yɔɔ Kristofoi asafo ni yɔɔ Yerusalem lɛ mli lɛ kpe koni amɛkpɛ amɛyiŋ yɛ Mla ni akɛhã Israelbii lɛ ateŋ nɔ ni esa akɛ Kristofoi aye nɔ lɛ he. (Kanemɔ Bɔfoi 15:28, 29; 21:25.) Yehowa ye ebua amɛ ni amɛnu shishi akɛ etsakeko jwɛŋmɔ ni ehiɛ yɛ lá he lɛ, ni tsɔɔ akɛ enaa lá akɛ ejara wa, ni no hewɔ lɛ esa akɛ amɛbu lá akɛ nɔ ko ni yɔɔ krɔŋkrɔŋ. Famɔ nɛɛ hã blema Kristofoi lɛ na akɛ, esaaa akɛ amɛyeɔ lá loo amɛnuɔ lá, ni esaaa akɛ amɛyeɔ kooloo ko ni afɔseko elá ashwieko shi lɛ loo  hu. Kɛ́ amɛfee nakai lɛ, amɛmiifee efɔŋ tamɔ mɛi ni jáa amagai loo mɛi ni kɛ amɛhe woɔ bɔlɛnamɔ jeŋba sha mli lɛ nɔŋŋ. Kɛjɛ nakai beiaŋ kɛbaa lɛ, anɔkwa Kristofoi yeee lá ni amɛnuuu lá hu. Ni ŋmɛnɛ hu? Yehowa miisumɔ ni wɔna lá akɛ nɔ ko ni yɔɔ krɔŋkrɔŋ.

13. Mɛni hewɔ Kristofoi heee lá lɛ?

13 Ani enɛ tsɔɔ akɛ esaaa akɛ Kristofoi kpɛlɛɔ ni ahãa amɛ lá? Hɛɛ, nakai etsɔɔ. Yehowa efã wɔ akɛ wɔkaye lá loo wɔkanu lá. Kɛ́ dɔkitafonyo kɛɛ okanu dãa lɛ, ani okɛ dãa baagbu ohe? Ofeŋ nakai kɔkɔɔkɔ! Nakai nɔŋŋ famɔ ni ji akɛ wɔkaye lá loo wɔkanu lá lɛ tsɔɔ akɛ wɔkpɛlɛŋ ni ahã wɔ lá.—Kwɛmɔ Wiemɔi Komɛi Amligbalamɔ 29.

14, 15. Kɛ́ Kristofoi na wala akɛ ejara wa ni amɛbo Yehowa toi lɛ, mɛni amɛbaaná?

14 Ni kɛ́ dɔkitafonyo ko kɛɛ wɔ akɛ, kɛ́ wɔkpɛlɛɛɛ ni ahã wɔ lá lɛ, wɔbaagboi hu? Mɔ fɛɛ mɔ baakpɛ eyiŋ kɛji ebaabo Nyɔŋmɔ mla ni kɔɔ lá he lɛ toi loo eboŋ toi. Kristofoi buɔ wala akɛ nɔ ko ni jara wa waa, ni no hewɔ lɛ, wɔtaoɔ gbɛi krokomɛi ni abaanyɛ atsɔ nɔ atsa wɔ koni wɔya nɔ wɔhi wala mli; shi wɔheŋ lá.

15 Wɔbɔɔ mɔdɛŋ waa koni wɔná gbɔmɔtsoŋ hewalɛ, shi akɛni wala jara wa yɛ Nyɔŋmɔ hiɛ hewɔ lɛ, wɔheee lá. Kɛ́ wɔbo Yehowa toi lɛ ehi fe nɔ ni wɔbaagbo enɔ toi koni wɔtsɛ yɛ jeŋ. Yesu kɛɛ akɛ: “Mɔ fɛɛ mɔ ni miisumɔ akɛ ebaa ewala yi lɛ, ebaaŋmɛɛ lɛ, shi mɔ fɛɛ mɔ ni ewala ŋmɛɔ lɛ yɛ mihewɔ lɛ, enine baashɛ nɔ.” (Mateo 16:25) Wɔsumɔɔ Yehowa, ni no hewɔ lɛ, wɔmiisumɔ ni wɔbo lɛ toi. Ele nɔ ni hi kɛhã wɔ, ni no hewɔ lɛ, wɔnaa wala akɛ nɔ ko ni jara wa ni yɔɔ krɔŋkrɔŋ taakɛ Yehowa naa lɛ lɛ pɛpɛɛpɛ.Hebribii 11:6.

16. Mɛni hewɔ Nyɔŋmɔ tsuji lɛ boɔ lɛ toi lɛ?

 16 Nyɔŋmɔ anɔkwa tsuji lɛ etswa amɛfai shi akɛ amɛbaabo Nyɔŋmɔ mla ni kɔɔ lá he lɛ toi. Amɛyeee lá ni amɛnuuu lá hu, ni kɛ́ amɛbɛ hewalɛ lɛ, amɛheee lá koni akɛtsa amɛ. * Shi amɛkpɛlɛɔ ni atsɔ gbɛi krokomɛi anɔ atsa amɛ. Amɛyɛ nɔmimaa akɛ Mɔ ni bɔ wala kɛ lá lɛ le nɔ ni hi kɛhã amɛ. Ani oheɔ oyeɔ akɛ ele nɔ ni hi kɛhã bo?

NƆ NI YEHOWA KPƐLƐ NI AKƐ LÁ AFEE

17. Mɛni ji nɔ ni Yehowa kpɛlɛ ni Israelbii lɛ kɛ lá afee?

17 Yehowa kɛɛ Israelbii lɛ yɛ Mla ni ekɛhã Mose lɛ mli akɛ: “Bɔɔ nɔ ni hiɛ kã lɛ wala yɛ elá lɛ mli, ni mi lɛ mikɛhã nyɛ yɛ afɔleshãa latɛ lɛ nɔ, koni akɛkpãtã ahã nyɛ [loo koni nyɛbi ni akɛ nyɛhe eshai ake nyɛ]; ejaakɛ nɔ ni akɛkpãtãa ji lá lɛ.” (3 Mose 17:11) Kɛ́ Israelbii lɛ fee esha lɛ amɛbaanyɛ amɛkɛ kooloo ashã afɔle ni amɛbi osɔfo lɛ ni efɔse kooloo lɛ lá lɛ eko eshwie afɔleshaa latɛ ni yɔɔ sɔlemɔwe lɛ nɔ koni Yehowa kɛ amɛhe esha lɛ ake amɛ. Enɛ ji nɔ ni Yehowa kpɛlɛ ni Israelbii lɛ kɛ lá afee.

18. Mɛni Yesu afɔle lɛ hãa wɔnáa?

18 Be ni Yesu ba shikpɔŋ lɛ nɔ lɛ, ekɛ ewala loo elá lɛ hã koni akɛ wɔhe eshai lɛ ake wɔ, ni ekɛ no ye mla ni kɔɔ kooloi ni akɛshãa afɔle lɛ he lɛ najiaŋ. (Mateo 20:28; Hebribii 10:1) Yesu wala jara wa aahu akɛ Yehowa baanyɛ adamɔ Yesu afɔle lɛ nɔ ehã adesai fɛɛ ahi shi kɛya naanɔ.Yohane 3:16; Hebribii 9:11, 12; 1 Petro 1:18, 19.

Te wɔɔfee tɛŋŋ wɔtsɔɔ akɛ wɔbuɔ wala kɛ lá akɛ nibii ni jara wa?

19. Mɛni esa akɛ wɔfee koni ‘wɔkaye gbɔmɔ ko gbɔmɔ ko lá yi sɔ̃’?

 19 Wɔmiida Yehowa shi waa akɛ ehã wɔ wala ni ji nɔ ko ni nɔ bɛ lɛ! Ni wɔmiisumɔ ni wɔkɛɛ mɛi akɛ, kɛ́ amɛhe Yesu nɔ amɛye lɛ, amɛbaanyɛ amɛhi shi kɛya naanɔ. Wɔsumɔɔ gbɔmɛi, ni wɔmiisumɔ ni wɔfee nɔ fɛɛ nɔ ni wɔbaanyɛ koni wɔtsɔɔ amɛ bɔ ni amɛbaafee amɛná wala. (Ezekiel 3:17-21) Kɛkɛ lɛ, wɔ hu wɔbaakɛɛ taakɛ bɔfo Paulo kɛɛ lɛ, akɛ: “Miyeee gbɔmɔ ko gbɔmɔ ko lá yi sɔ̃, ejaakɛ mishashaooo shi akɛ makɛɛ nyɛ Nyɔŋmɔ yiŋtoi lɛ fɛɛ.” (Bɔfoi 20:26, 27) Hɛɛ, kɛ́ wɔgba mɛi Yehowa he saji ni wɔhã amɛna akɛ wala jara wa yɛ ehiɛ lɛ, no tsɔɔ akɛ wɔ hu wɔbuɔ wala kɛ lá akɛ nibii ni jara wa waa.

^ kk. 16 Kɛ́ ootao ole láhemɔ he saji lɛ, kwɛmɔ wolo ni ji Nyɛhia Nyɔŋmɔ Suɔmɔ lɛ Mli’ ni Yehowa Odasefoi fee lɛ baafa 77-79.