Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mɛni Wɔbaanyɛ Wɔkase Kɛjɛ Biblia lɛ Mli?

 YITSO NYƆŊMA KƐ KPAWO

Hegbɛ Kpele ni Wɔná akɛ Wɔbaasɔle

Hegbɛ Kpele ni Wɔná akɛ Wɔbaasɔle

“Ŋwɛi kɛ shikpɔŋ Feelɔ lɛ” miisumɔ ni ebo wɔsɔlemɔi atoi.Lala 115:15

1, 2. Kɛ́ okwɛ lɛ, mɛni hewɔ sɔlemɔ ji nikeenii krɛdɛɛ lɛ? Mɛni hewɔ esa akɛ wɔle nɔ ni Biblia lɛ kɛɔ yɛ sɔlemɔ he lɛ?

KƐ́ AKƐ shikpɔŋ lɛ to jeŋ muu lɛ fɛɛ he lɛ, onaa akɛ shikpɔŋ lɛ edaaa kwraa. Kɛ́ Yehowa kwɛ shikpɔŋ lɛ nɔ lɛ, enaa gbɔmɛi fɛɛ ni yɔɔ majimaji fɛɛ mli lɛ tamɔ nu kɔi kome kɛkɛ ni jɛ goga mli. (Lala 115:15; Yesaia 40:15) Eyɛ mli akɛ kɛ́ akɛ wɔ to jeŋ muu lɛ fɛɛ he lɛ, wɔdaraaa kwraa moŋ, shi Lala 145:18, 19 lɛ kɛɔ akɛ: ‘Yehowa bɛŋkɛɔ mɛi fɛɛ ni tsɛɔ lɛ lɛ, mɛi fɛɛ ni tsɛɔ lɛ yɛ anɔkwale mli lɛ. Mɛi ni sheɔ lɛ gbeyei lɛ, efeɔ nɔ ni amɛtaoɔ ehãa amɛ, eboɔ amɛbolɔmɔ toi, ni ehereɔ amɛyiwala.’ Enɛ ji hegbɛ ni nɔ bɛ ni wɔná! Yehowa, ni ji Bɔlɔ ofe lɛ miisumɔ ni ebɛŋkɛ wɔ, ni eesumɔ ni ebo wɔsɔlemɔi atoi. Hɛɛ, sɔlemɔ ji hegbɛ loo nikeenii krɛdɛɛ ko ni Yehowa kɛhã wɔteŋ mɔ fɛɛ mɔ.

2 Shi ja wɔkɛ Yehowa ewie yɛ gbɛ ni ekpɛlɛɔ nɔ lɛ nɔ dani ebaabo wɔ toi. Te wɔɔfee tɛŋŋ wɔfee nakai? Hã wɔkwɛ nɔ ni Biblia lɛ kɛɔ yɛ sɔlemɔ he.

MƐNI HEWƆ ESA AKƐ OSƆLE OHÃ YEHOWA?

3. Mɛni hewɔ esa akɛ osɔle ohã Yehowa?

3 Yehowa miisumɔ ni osɔle ohã lɛ loo okɛ lɛ agba sane. Te wɔfeɔ tɛŋŋ wɔleɔ enɛ lɛ? Ofainɛ kanemɔ Filipibii 4:6, 7 lɛ. Susumɔ nakai ninefɔɔ ni tsɔɔ akɛ esusuɔ ohe lɛ he okwɛ. Jeŋ muu fɛɛ Nɔyelɔ lɛ sumɔɔ osane waa, ni eetao ni ogba lɛ bɔ ni onuɔ he ohãa kɛ nibii ni gbaa onaa.

4. Kɛ́ osɔleɔ ohãa Yehowa be fɛɛ be lɛ, mɛɛ gbɛ nɔ no baahã okɛ lɛ teŋ naanyobɔɔ lɛ mli awa waa?

 4 Kɛ́ wɔsɔle wɔhã Yehowa lɛ, no hãa naanyobɔɔ ni mli wa bakãa wɔ kɛ lɛ teŋ. Kɛ́ nanemɛi kɛ amɛhe fɔɔ sanegbaa, ni amɛgbaa amɛsusumɔi, amɛnaagbai, kɛ bɔ ni amɛnuɔ nii ahe amɛhãa lɛ he sane lɛ, ehãa amɛnaanyobɔɔ lɛ mli waa. Nakai nɔŋŋ eji yɛ sɔlemɔ ni asɔleɔ ahãa Yehowa lɛ gbɛfaŋ. Kɛtsɔ Biblia lɛ nɔ lɛ, ehãa oleɔ esusumɔi kɛ bɔ ni enuɔ nii ahe ehãa, ni ehãa oleɔ nɔ ni ebaafee wɔsɛɛ hu. Obaanyɛ okɛ lɛ agba sane be fɛɛ be, ní ogba lɛ nibii ni haoɔ bo waa lɛ po. Kɛ́ ofee nakai lɛ, okɛ Yehowa teŋ naanyobɔɔ lɛ mli baawa waa.Yakobo 4:8.

MƐNI ESA AKƐ WƆFEE KONI NYƆŊMƆ ABO WƆSƆLEMƆI ATOI?

5. Mɛni tsɔɔ akɛ jeee sɔlemɔi fɛɛ toi Yehowa boɔ?

5 Ani Yehowa boɔ sɔlemɔi fɛɛ toi? Dabi, jeee fɛɛ toi eboɔ. Yɛ gbalɔ Yesaia beiaŋ lɛ, Yehowa kɛɛ Israelbii lɛ akɛ: “Kɛ́ nyɛsɔle babaoo tete lɛ, miboŋ nyɛ toi: nyɛniji  ahe eyimɔ kɛ lá!” (Yesaia 1:15) No hewɔ lɛ, kɛ́ wɔkwɛɛɛ ni ahi lɛ, wɔbaafee nibii komɛi ni baahã wɔtsi wɔhe kɛje Yehowa he, ni no hãŋ ebo wɔsɔlemɔi atoi.

6. Mɛni hewɔ ehe hiaa waa ni oná hemɔkɛyeli lɛ? Mɛni obaafee kɛtsɔɔ akɛ oyɛ hemɔkɛyeli?

6 Kɛ́ wɔmiisumɔ ni Yehowa abo wɔsɔlemɔi atoi lɛ, no lɛ, esa akɛ wɔná hemɔkɛyeli yɛ emli. (Marko 11:24) Bɔfo Paulo tsɔɔ mli akɛ: “Kɛ́ hemɔkɛyeli bɛ lɛ, anyɛŋ asa Nyɔŋmɔ hiɛ jogbaŋŋ, ejaakɛ mɔ fɛɛ mɔ ni bɛŋkɛɔ Nyɔŋmɔ lɛ, esa akɛ ehe eye akɛ eyɛ ni eji mɛi ni kɛ hiɛdɔɔ taoɔ esɛɛ gbɛ lɛ ajurolɔ.” (Hebribii 11:6) Shi kɛ́ wɔkɛɛ wɔyɛ hemɔkɛyeli lɛ, no pɛ kɛkɛ faaa. Esa akɛ wɔhã ana faŋŋ akɛ wɔyɛ hemɔkɛyeli, kɛtsɔ Yehowa toi ni wɔbaabo gbi fɛɛ gbi lɛ nɔ.Kanemɔ Yakobo 2:26.

7. (a) Mɛni hewɔ kɛ́ wɔmiisɔle wɔmiihã Yehowa lɛ, esa akɛ wɔba wɔhe shi ní wɔjie bulɛ kpo lɛ? (b) Kɛ́ wɔmiisɔle lɛ, mɛni wɔbaafee kɛtsɔɔ akɛ wɔsɔlemɔ lɛ jɛ wɔtsui mli?

7 Kɛ́ wɔmiisɔle wɔmiihã Yehowa lɛ, esa akɛ wɔba wɔhe shi, ní wɔjie bulɛ kpo hu. Mɛni hewɔ? Kɛ́ wɔkɛ maŋtsɛ loo maŋ nɔyelɔ ko yaawie lɛ, wɔkɛ lɛ baawie yɛ bulɛ mli. Yehowa ji Nyɔŋmɔ Ofe, no hewɔ lɛ, ani esaaa akɛ wɔbaa wɔhe shi, ní wɔjieɔ bulɛ ni mli kwɔ fe nakai kpo wɔtsɔɔ lɛ kɛ́ wɔkɛ lɛ miiwie? (1 Mose 17:1; Lala 138:6) Agbɛnɛ hu, kɛ́ wɔmiisɔle wɔhã Yehowa lɛ, esa akɛ wɔwie nɔ ni kã wɔtsui nɔ diɛŋtsɛ shi jeee akɛ wɔbaatĩ wiemɔ kome too lɛ nɔŋŋ mli shii abɔ.Mateo 6:7, 8.

8. Kɛ́ wɔsɔle yɛ nɔ ko he lɛ, mɛni hu esa akɛ wɔfee?

8 Naagbee lɛ, kɛ́ wɔsɔle yɛ nɔ ko he lɛ, esa akɛ wɔfee bɔ fɛɛ bɔ ni wɔɔnyɛ kɛtsu nɔ ni wɔsɔleɔ yɛ he lɛ he nii. Akɛ nɔkwɛmɔnɔ lɛ, kɛ́ wɔsɔle wɔbi Yehowa koni ehã wɔ wɔdaa gbi hiamɔ nii lɛ, no lɛ, esaaa akɛ wɔfeɔ anihao ni wɔkpaa gbɛ akɛ Yehowa baahã wɔ nɔ fɛɛ nɔ, tsɛbelɛ wɔbaanyɛ  wɔtsu nɔ ko yɛ nɔ ni wɔbiɔ lɛ lɛ he. Esa akɛ wɔfee mɛi ni tsuɔ nii waa, ni wɔmɔ nitsumɔ fɛɛ nitsumɔ ni hi ni wɔbaaná lɛ mli. (Mateo 6:11; 2 Tesalonikabii 3:10) Aloo kɛ́ wɔsɔle wɔbi Yehowa koni ewa wɔ ni wɔkpa nɔ gbonyo ko feemɔ lɛ, esa akɛ wɔtsi wɔhe kɛje shihilɛi fɛɛ ni baahã wɔkɛ wɔhe awo nakai nifeemɔ lɛ mli lɛ ahe. (Kolosebii 3:5) Agbɛnɛ, hã wɔsusu saji komɛi ni afɔɔ bimɔ yɛ sɔlemɔ he lɛ ahe wɔkwɛ.

SAJI NI AFƆƆ BIMƆ YƐ SƆLEMƆ HE

9. Namɔ esa akɛ wɔsɔle wɔhã? Mɛni Yohane 14:6 lɛ tsɔɔ wɔ yɛ sɔlemɔ he?

9 Namɔ esa akɛ wɔsɔle wɔhã? Yesu tsɔɔ esɛɛnyiɛlɔi lɛ akɛ amɛsɔle amɛhã “wɔ-Tsɛ ni yɔɔ ŋwɛi” lɛ. (Mateo 6:9) Ekɛɛ hu akɛ: “Miji gbɛ lɛ kɛ anɔkwale lɛ kɛ wala lɛ. Mɔ ko mɔ ko baaa Tsɛ lɛ ŋɔɔ akɛ ja etsɔ minɔ.” (Yohane 14:6) No hewɔ lɛ, esa akɛ wɔsɔle wɔhã Yehowa pɛ, ní wɔkɛtsɔ Yesu nɔ. Kɛ́ akɛɛ asɔle kɛtsɔ Yesu nɔ lɛ, mɛni etsɔɔ? Kɛ́ wɔmiitao ní Yehowa abo wɔsɔlemɔi atoi lɛ, esa akɛ wɔtsɔɔ akɛ wɔbuɔ hegbɛ krɛdɛɛ ni Yehowa kɛhã Yesu lɛ. Taakɛ wɔkase lɛ, Yesu ba shikpɔŋ lɛ nɔ koni ebahere wɔ kɛjɛ esha kɛ gbele mli. (Yohane 3:16; Romabii 5:12) Agbɛnɛ hu, Yehowa ewó Yesu Osɔfonukpa kɛ Kojolɔ.Yohane 5:22; Hebribii 6:20.

Obaanyɛ osɔle be fɛɛ be

10. Ani esa akɛ wɔkula shi, wɔta shi, loo wɔdamɔ shi kɛ́ wɔmiisɔle? Tsɔɔmɔ mli.

10 Ani esa akɛ wɔkula shi, wɔta shi, loo wɔdamɔ shi kɛ́ wɔmiisɔle? Dabi, Yehowa biii ní wɔfee nakai kɛ́ wɔmiisɔle. Biblia lɛ tsɔɔ akɛ, wɔbaanyɛ wɔsɔle wɔhã Yehowa yɛ gbɛ fɛɛ gbɛ ni bulɛ yɔɔ mli lɛ nɔ. (1 Kronika 17:16; Nehemia 8:6; Daniel 6:10; Marko 11:25) Nɔ ni he hiaa Yehowa titri ji, ní wɔbaajɛ tsui krɔŋŋ mli wɔsɔle wɔhã lɛ,  shi jeee bɔ ni wɔbaafee wɔgbɔmɔtso wɔhã kɛ́ wɔmiisɔle. Wɔbaanyɛ wɔsɔle waa loo wɔsɔle yɛ wɔyitsoŋ, ekɔɔɔ he eko he ni wɔyɔɔ, ni wɔbaanyɛ wɔfee nakai be fɛɛ be, leebi jio, gbɛkɛ jio. Kɛ́ wɔsɔle wɔhã Yehowa lɛ, esa akɛ wɔná nɔmimaa akɛ ebaanu nɔ ni wɔwieɔ lɛ, kɛ́ mɔ ko mɔ ko nuuu po.Nehemia 2:1-6.

11. Mɛɛ nibii komɛi wɔbaanyɛ wɔkɛ Yehowa agba he sane yɛ sɔlemɔ mli?

11 Mɛni wɔbaanyɛ wɔbi kɛ́ wɔmiisɔle? Wɔbaanyɛ wɔsɔle wɔbi nɔ fɛɛ nɔ ni sa Yehowa hiɛ. Biblia lɛ kɛɔ akɛ: “Nɔ fɛɛ nɔ ni wɔbiɔ ní kɛ esuɔmɔnaa nii kpãa gbee lɛ, eboɔ wɔ toi.” (1 Yohane 5:14) Ani wɔbaanyɛ wɔbi wɔ diɛŋtsɛ wɔhiamɔ nii? Hɛɛ. Kɛ́ wɔmiisɔle wɔmiihã Yehowa lɛ, esa akɛ efee tamɔ nɔ ni wɔkɛ wɔnaanyo ko ni wɔsumɔɔ esane miigba sane. Wɔbaanyɛ wɔkɛɛ Yehowa nɔ fɛɛ nɔ ni gbaa wɔnaa kɛ nɔ fɛɛ nɔ ni yɔɔ wɔtsui mli. (Lala 62:8) Wɔbaanyɛ wɔbi ní ehã wɔ emumɔ krɔŋkrɔŋ ni yɔɔ hewalɛ waa lɛ koni ewa wɔ ni wɔfee nɔ ni ja. (Luka 11:13) Agbɛnɛ hu, wɔbaanyɛ wɔbi Yehowa ní ehã wɔ hiɛshikamɔ ni wɔkɛkpɛ yiŋ ni ja, ni wɔbaanyɛ wɔbi lɛ ekãa ni wɔkɛkpee naagbai anaa. (Yakobo 1:5) Esa akɛ wɔbi Yehowa ni ekɛ wɔhe eshai ake wɔ. (Efesobii 1:3, 7) Agbɛnɛ hu, esa akɛ wɔsɔle wɔhã mɛi krokomɛi, ní wɔwekumɛi kɛ nyɛmimɛi hii kɛ yei ni yɔɔ asafo lɛ mli lɛ fata he.Bɔfoi 12:5; Kolosebii 4:12.

12. Mɛni esa akɛ efee nɔ ni he hiaa fe fɛɛ yɛ wɔsɔlemɔi amli?

12 Mɛni esa akɛ efee nɔ ni he hiaa fe fɛɛ yɛ wɔsɔlemɔi amli? No ji Yehowa kɛ esuɔmɔnaa nii. Esa akɛ wɔjɛ wɔtsuiŋ wɔda lɛ shi yɛ nibii fɛɛ ni efee ehã wɔ lɛ hewɔ. (1 Kronika 29:10-13) Wɔle enɛ, ejaakɛ be ni Yesu yɔɔ shikpɔŋ lɛ nɔ lɛ, etsɔɔ ekaselɔi lɛ bɔ ni asɔleɔ ahãa. (Kanemɔ Mateo 6:9-13.) Ekɛɛ, klɛŋklɛŋ lɛ amɛsɔle koni atse Nyɔŋmɔ gbɛ́i lɛ he, ni tsɔɔ akɛ, ahiɛ lɛ krɔŋkrɔŋ loo  atsuu he. No sɛɛ lɛ, Yesu tsɔɔ akɛ esa akɛ wɔsɔle ni Nyɔŋmɔ Maŋtsɛyeli lɛ aba, ní afee Yehowa suɔmɔnaa nii yɛ shikpɔŋ lɛ nɔ fɛɛ. Yesu tsɔɔ akɛ, wɔsɔle yɛ nibii ni he hiaa waa nɛɛ ahe dani wɔbi wɔ diɛŋtsɛ wɔhiamɔ nii. Kɛ́ wɔkɛ Yehowa kɛ esuɔmɔnaa nii ye klɛŋklɛŋ lɛ gbɛhe yɛ wɔsɔlemɔi amli lɛ, wɔhãa anaa nɔ ni he hiaa wɔ fe fɛɛ.

13. Be enyiɛ esa akɛ wɔsɔlemɔi ahe?

13 Be enyiɛ esa akɛ wɔsɔlemɔi ahe? Biblia lɛ etsɔɔɔ.  Wɔsɔlemɔi baanyɛ afee kuku loo kakadaŋŋ, shi fɛɛ damɔ nɔ ni wɔsɔleɔ yɛ he kɛ shihilɛ mli ni wɔsɔleɔ yɛ lɛ nɔ. Akɛ nɔkwɛmɔnɔ lɛ, kɛ́ wɔyaaye nii lɛ wɔbaanyɛ wɔsɔle kuku, shi kɛ́ wɔmiida Yehowa shi loo wɔmiikɛɛ lɛ wɔnaagbai lɛ, wɔsɔlemɔ lɛ sɛɛ baanyɛ akɛ. (1 Samuel 1:12, 15) Wɔsumɔŋ ni wɔsɔle kakadaŋŋ koni ana akɛ wɔhe esa kɛ sɔlemɔ, taakɛ mɛi komɛi fee yɛ Yesu beiaŋ lɛ. (Luka 20:46, 47) Yehowa nyaaa sɔlemɔi ni tamɔ nakai lɛ ahe. Nɔ ni Yehowa taoɔ ji, ni wɔjɛ wɔtsuiŋ wɔsɔle.

14. Shii enyiɛ esa akɛ wɔsɔle, ni mɛni enɛ tsɔɔ wɔ yɛ Yehowa he?

14 Shii enyiɛ esa akɛ wɔsɔle? Yehowa kɛɛ wɔkɛ lɛ agba sane daa. Biblia lɛ kɛɔ akɛ, ‘wɔsɔle daa,’ ‘wɔhiɛ sɔlemɔ mli daa,’ ni ‘wɔsɔle daa ni wɔkafɔ̃ɔ.’ (Mateo 26:41; Romabii 12:12; 1 Tesalonikabii 5:17) Yehowa efee klalo be  fɛɛ be akɛ ebaabo wɔ toi. Wɔbaanyɛ wɔda lɛ shi gbi fɛɛ gbi yɛ esuɔmɔ kɛ ejurɔ ni efeɔ wɔ lɛ hewɔ. Agbɛnɛ hu, wɔbaanyɛ wɔbi lɛ ni etsɔɔ wɔ gbɛ, ehã wɔ hewalɛ, ni eshɛje wɔmii. Kɛ́ wɔhiɛ sɔɔ hegbɛ ni wɔná akɛ wɔbaasɔle wɔhã Yehowa lɛ, no lɛ, wɔkɛ lɛ baagba sane be fɛɛ be.

15. Mɛni hewɔ esa akɛ wɔkɛɛ “amen” yɛ sɔlemɔ naagbee lɛ?

15 Mɛni hewɔ esa akɛ wɔkɛɛ “amen” yɛ sɔlemɔ naagbee lɛ? Wiemɔ ni ji “amen” lɛ shishi ji, “lɛɛlɛŋ” loo “aba mli nakai.” Wɔkɛtsɔɔ akɛ, nɔ ni wɔwie yɛ wɔsɔlemɔ lɛ mli lɛ yɛ mli, ni tsɔɔ akɛ, wɔjɛ wɔtsuiŋ wɔwie. (Lala 41:13) Biblia lɛ tsɔɔ akɛ, kɛ́ mɔ ko miisɔle yɛ wɔnajiaŋ ni egbe naa lɛ, wɔbaanyɛ wɔkɛɛ “amen” lɛ yɛ wɔyitsoŋ loo wɔkɛɛ lɛ waa ní wɔkɛtsɔɔ akɛ wɔfiɔ nɔ ni ewie lɛ sɛɛ.1 Kronika 16:36; 1 Korintobii 14:16.

GBƐI NI NYƆŊMƆ TSƆƆ NƆ EHÃA WƆSƆLEMƆI AHETOO

16. Ani Yehowa hãa wɔsɔlemɔi ahetoo lɛɛlɛŋ? Tsɔɔmɔ mli.

16 Ani Yehowa hãa wɔsɔlemɔi ahetoo lɛɛlɛŋ? Hɛɛ, ehãa hetoo. Biblia lɛ tsɛɔ lɛ ‘sɔlemɔ Toibolɔ.’ (Lala 65:2) Yehowa boɔ sɔlemɔi ni adesai akpekpei abɔ sɔleɔ lɛ toi, ni ehãa hetoo, ni etsɔɔ gbɛi srɔtoisrɔtoi anɔ efeɔ nakai.

17. Mɛɛ gbɛ nɔ Yehowa tsɔɔ ŋwɛibɔfoi kɛ etsuji ni yɔɔ shikpɔŋ lɛ nɔ lɛ anɔ ehãa wɔsɔlemɔi ahetoo?

17 Yehowa tsɔɔ ŋwɛibɔfoi kɛ etsuji ni yɔɔ shikpɔŋ lɛ nɔ lɛ anɔ ehãa wɔsɔlemɔi ahetoo. (Hebribii 1:13, 14) Nɔkwɛmɔnii pii yɛ ni tsɔɔ akɛ, mɛi komɛi sɔle bɔ ni afee ni amɛnu Biblia lɛ shishi, ni no sɛɛ etsɛɛɛ lɛ Yehowa Odasefonyo ko yasara amɛ. Biblia lɛ tsɔɔ akɛ, ŋwɛibɔfoi lɛ miiwa ni aashiɛ “sane kpakpa” yɛ shikpɔŋ lɛ nɔ fɛɛ. (Kanemɔ Kpojiemɔ 14:6.) Kɛfata he lɛ, wɔteŋ mɛi babaoo esɔle ehã Yehowa yɛ naagba loo hiamɔ nii pɔtɛɛ ko he,  ni nyɛmi nuu loo nyɛmi yoo Kristofonyo ko ebaye ebua wɔ taakɛ wɔtaoɔ lɛ pɛpɛɛpɛ.Abɛi 12:25; Yakobo 2:16.

Yehowa baanyɛ atsɔ yelikɛbuamɔ ni Kristofoi krokomɛi kɛhãa wɔ lɛ nɔ ehã wɔsɔlemɔi lɛ ahetoo

18. Mɛɛ gbɛ nɔ Yehowa tsɔɔ emumɔ krɔŋkrɔŋ lɛ kɛ Biblia lɛ nɔ ehãa sɔlemɔi ahetoo?

18 Yehowa tsɔɔ emumɔ krɔŋkrɔŋ lɛ nɔ ehãa wɔsɔlemɔi ahetoo. Kɛ́ wɔbi ni ewa wɔ kɛkpee naagba ko naa lɛ, ebaanyɛ etsɔ emumɔ krɔŋkrɔŋ lɛ nɔ etsɔɔ wɔ gbɛ, ni ehã wɔ hewalɛ. (2 Korintobii 4:7) Yehowa tsɔɔ Biblia lɛ hu nɔ ehãa wɔsɔlemɔi ahetoo, ni ekɛyeɔ ebuaa wɔ koni wɔkpɛ yiŋ ni ja hu. Kɛ́ wɔkane Biblia lɛ, wɔbaanyɛ wɔna ŋmalɛi ni baawa wɔ. Agbɛnɛ hu, Yehowa baanyɛ akanya mɔ ko ni miihã sane hetoo yɛ asafoŋ kpee shishi ní ewie nɔ ko ni baaye abua wɔ, aloo ebaanyɛ ekanya asafoŋ onukpa ko ní ekɛ wɔ asusu nɔ ko he kɛjɛ Biblia lɛ mli.Galatiabii 6:1.

19. Mɛni hewɔ ekolɛ wɔbaasusu akɛ Yehowa hãko wɔsɔlemɔi ahetoo lɛ?

19 Shi bei komɛi lɛ, ekolɛ wɔbaabi akɛ, ‘Mɛni hewɔ Yehowa hãko misɔlemɔi lɛ ahetoo lolo lɛ?’ Kaimɔ akɛ, ele be kɛ gbɛ ni ebaatsɔ nɔ ehã wɔsɔlemɔi lɛ ahetoo. Ele nɔ ni he hiaa wɔ. Ekolɛ, ehe baahia ni wɔya nɔ wɔsɔle be saŋŋ kɛtsɔɔ akɛ nɔ ni wɔbiɔ lɛ lɛ he miihia wɔ lɛɛlɛŋ, ni akɛ, wɔheɔ lɛ wɔyeɔ lɛɛlɛŋ. (Luka 11:5-10) Bei komɛi lɛ, Yehowa hãa wɔsɔlemɔi ahetoo yɛ gbɛ ni wɔkpaaa gbɛ nɔ. Akɛ nɔkwɛmɔnɔ lɛ, ekolɛ wɔbaasɔle yɛ shihilɛ ko ni jaraa he, shi yɛ nɔ najiaŋ ni Yehowa baajie naagba lɛ kɛya lɛ, ekolɛ ebaahã wɔ hewalɛ ni wɔkɛkpee naa.Kanemɔ Filipibii 4:13.

20. Mɛni hewɔ esa akɛ wɔsɔle wɔhã Yehowa daa lɛ?

20 Eji hegbɛ kpele ni wɔná akɛ wɔbaasɔle wɔhã Yehowa! Wɔbaanyɛ wɔná nɔmimaa akɛ ebaabo wɔ toi. (Lala 145:18) Ni babaoo ni wɔjɛɔ wɔtsuiŋ wɔsɔleɔ wɔhãa Yehowa lɛ, babaoo ni naanyobɔɔ ni yɔɔ wɔ kɛ lɛ teŋ lɛ mli waa.