Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mɛni Biblia lɛ Tsɔɔ Diɛŋtsɛ?

 YITSO ETƐ

Mɛni Ji Nyɔŋmɔ Yiŋtoo Kɛhã Shikpɔŋ Lɛ?

Mɛni Ji Nyɔŋmɔ Yiŋtoo Kɛhã Shikpɔŋ Lɛ?
  • Mɛni ji Nyɔŋmɔ yiŋtoo kɛha adesai?

  • Mɛɛ gbɛ nɔ atsɔ atswa Nyɔŋmɔ mpoa?

  • Te shikpɔŋ lɛ nɔ shihilɛ baafee aha tɛŋŋ yɛ wɔsɛɛ be mli?

1. Mɛni ji Nyɔŋmɔ yiŋtoo kɛha shikpɔŋ lɛ?

NYƆŊMƆ yiŋtoo kɛha shikpɔŋ lɛ yɛ miishɛɛ waa diɛŋtsɛ. Yehowa miisumɔ ni shikpɔŋ lɛ nɔ ayi obɔ kɛ gbɔmɛi ni yɔɔ miishɛɛ kɛ gbɔmɔtsoŋ hewalɛ kpakpa. Biblia lɛ kɛɔ akɛ, “Nyɔŋmɔ fee trom yɛ Eden,” ni ‘eha tsei fɛɛ ni kɛ́ akwɛ ni aaaba mɔ tsine ni amɛhi ha yeli hu kwɛ̃.’ Beni Nyɔŋmɔ ebɔ klɛŋklɛŋ nuu kɛ yoo ni ji Adam kɛ Hawa sɛɛ lɛ, E-kɛ amɛ wo nakai shihilɛhe fɛfɛo lɛ mli ni ekɛɛ amɛ akɛ: “Nyɛfɔa ni nyɛyi afáa ni nyɛyia shikpɔŋ lɛ nɔ obɔ, ni nyɛnaanaa nɔ.” (1 Mose 1:28; 2:8, 9, 15) No hewɔ lɛ, eji Nyɔŋmɔ yiŋtoo akɛ adesai afɔ́, ni amɛlɛɛ amɛshihilɛhe ni ji abɔɔ lɛ husui amli kɛkpele shikpɔŋ muu lɛ fɛɛ nɔ, koni amɛkwɛ kooloi lɛ anɔ.

2. (a) Te wɔfeɔ tɛŋŋ wɔleɔ akɛ Nyɔŋmɔ yiŋtoo kɛha shikpɔŋ lɛ baaba mli? (b) Mɛni ji nɔ ni Biblia lɛ kɛɔ yɛ adesai ni baahi shi kɛya naanɔ lɛ ahe?

2 Ani osusuɔ akɛ Yehowa Nyɔŋmɔ yiŋtoo akɛ gbɔmɛi ahi paradeiso mli yɛ shikpɔŋ nɔ lɛ baaba mli be ko? Nyɔŋmɔ jaje akɛ: “Mi miwie, ni mi nɔŋŋ maha aba mli.” (Yesaia 46:9-11; 55:11) Hɛɛ, Nyɔŋmɔ baatsu nɔ ni eto eyiŋ yɛ he lɛ he nii kɛ̃! Ekɛɛ “ebɔɔɔ [shikpɔŋ] lɛ efolo, shi eshɔ̃ lɛ ni ahi nɔ.” (Yesaia 45:18) Mɛɛ gbɔmɛi nɛkɛ Nyɔŋmɔ sumɔɔ ni amɛhi  shikpɔŋ lɛ nɔ? Ni afii enyiɛ esumɔɔ ni amɛkɛhi shi yɛ biɛ kɛyashi? Biblia lɛ haa hetoo akɛ: ‘Jalɔi lɛ, shikpɔŋ lɛ aaatsɔ amɛnɔ̃ ni amɛaahi nɔ daa.’Lala 37:29; Kpojiemɔ 21:3, 4.

3. Mɛɛ shihilɛi ni yɔɔ mɔbɔ yɔɔ shikpɔŋ lɛ nɔ amrɔ nɛɛ, ni mɛɛ sanebimɔi enɛ teeɔ lɛ shi?

3 Eyɛ faŋŋ akɛ enɛ bako mli. Amrɔ nɛɛ gbɔmɛi ahe yeɔ ni amɛgboiɔ; amɛkɛ amɛhe nɔɔ, ni amɛgbeɔ amɛhe tete po. Nɔ ko etɔ̃tɔ. Ni kɛlɛ, eka shi faŋŋ akɛ ejeee Nyɔŋmɔ yiŋtoo akɛ shikpɔŋ lɛ atsɔ tamɔ bɔ ni wɔnaa lɛ ŋmɛnɛ lɛ! Mɛni ba? Mɛni hewɔ Nyɔŋmɔ yiŋtoo lɛ bako mli? Akɛni naagba lɛ je shishi kɛjɛ ŋwɛi hewɔ lɛ, yinɔsane wolo ni adesa ŋma ko kwraa bɛ ni baanyɛ aha wɔ hetoo.

BƆ NI FEE NI HENYƐLƆ KO BA SHIHILƐ MLI

4, 5. (a) Namɔ ji mɔ diɛŋtsɛ ni kɛ Hawa wie kɛtsɔ onufu nɔ lɛ? (b) Mɛɛ gbɛ nɔ mɔ ko ni tsutsu ko lɛ eyɔɔ jeŋba kpakpa ni eyeɔ anɔkwa hu lɛ baanyɛ abatsɔ julɔ?

4 Biblia mli klɛŋklɛŋ wolo lɛ gbaa wɔ mɔ ko ni teɔ shi ewoɔ Nyɔŋmɔ ni bajie ehe shi etsɔɔ yɛ Eden abɔɔ lɛ mli lɛ he sane. Awie ehe akɛ “onufu,” shi ejeee kooloo folo ko kɛkɛ. Naagbee wolo ni yɔɔ Biblia lɛ mli lɛ tsɔɔ akɛ lɛ ‘atsɛɔ lɛ Abonsam kɛ Satan ní shishiuɔ jeŋ muu lɛ fɛɛ lɛ.’ Atsɛɔ lɛ hu akɛ ‘blema onufu.’ (1 Mose 3:1; Kpojiemɔ 12:9) Nɛkɛ ŋwɛibɔfo loo mumɔŋ bɔɔ nɔ ni anaaa ni yɔɔ hewalɛ nɛɛ kɛ onufu ko tsu nii ni ekɛ Hawa wie taakɛ bɔ ni mɔ ko ni le ŋaa nyɛɔ ewieɔ ni ehaa efeɔ tamɔ nɔ ni gbee lɛ miijɛ tsobi ko ni bɛŋkɛ lɛ naa lɛ. Ŋwanejee ko bɛ he akɛ beni Nyɔŋmɔ saa shikpɔŋ lɛ nɔ eha adesai lɛ, no mli lɛ nakai mumɔŋ gbɔmɔ lɛ yɛ jɛi.Hiob 38:4, 7.

5 Shi kɛlɛ, akɛni Yehowa nibɔɔ nii lɛ fɛɛ yeɔ emuu hewɔ lɛ, namɔ bɔ “Abonsam” kɛ “Satan” nɛɛ? Yɛ ekukufoo mli lɛ, Nyɔŋmɔ mumɔŋ bii ni yɔɔ hewalɛ lɛ ateŋ mɔ kome ni fee ehe Abonsam. Te fee tɛŋŋ eba lɛ nakai? Esa akɛ wɔyɔse akɛ mɔ ko ni tsutsu ko lɛ eyɔɔ jeŋba kpakpa ní eyeɔ anɔkwa hu lɛ  baanyɛ abatsɔ julɔ. Te feɔ tɛŋŋ ebaa lɛ nakai? Ekolɛ mɔ lɛ baaŋmɛ gbɛ koni akɔnɔ fɔŋ ahé shi yɛ etsui mli. Kɛji akɛ etee nɔ esusu he lɛ, ekolɛ nakai akɔnɔ fɔŋ lɛ mli baawa waa. Kɛkɛ lɛ, ebaatsu akɔnɔ fɔŋ nɛɛ he nii kɛji hegbɛ lɛ ba.Yakobo 1:13-15.

6. Te fee tɛŋŋ ni Nyɔŋmɔ mumɔŋ bi ko ni yɔɔ hewalɛ batsɔ Satan Abonsam lɛ?

6 Nakai ji bɔ ni eba lɛ yɛ Satan Abonsam gbɛfaŋ. Eka shi faŋŋ akɛ enu ni Nyɔŋmɔ miikɛɛ Adam kɛ Hawa akɛ amɛfɔ́ ni amɛyi shikpɔŋ lɛ nɔ obɔ kɛ amɛshwiei. (1 Mose 1:27, 28) Eyɛ faŋŋ akɛ Satan susu sane he akɛ, ‘Adesai nɛɛ fɛɛ baanyɛ amɛkɛ jamɔ aha mi moŋ fe nɔ ni amɛkɛaaha Nyɔŋmɔ!’ No hewɔ lɛ, ená akɔnɔ fɔŋ yɛ etsui mli. Yɛ naagbee mli lɛ, etsu nakai akɔnɔ lɛ he nii ni elaka Hawa kɛtsɔ Nyɔŋmɔ he ni emale eha lɛ lɛ nɔ. (1 Mose 3:1-5) No hewɔ lɛ, ebatsɔ “Abonsam,” ni eshishi ji “Heguɔgbelɔ.” Yɛ nakai beaŋ nɔŋŋ lɛ, ebatsɔ “Satan” ni eshishi ji “Shitee-kɛwolɔ.”

7. (a) Mɛni hewɔ Adam kɛ Hawa gboi lɛ? (b) Mɛni hewɔ Adam shwiei fɛɛ gbɔlɔɔ ni amɛgboiɔ lɛ?

7 Satan Abonsam tsɔ amale wiemɔi kɛ lakamɔi anɔ eha Adam kɛ Hawa gbo Nyɔŋmɔ nɔ toi. (1 Mose 2:17; 3:6) Enɛ hewɔ lɛ, yɛ naagbee mli lɛ amɛgboi taakɛ Nyɔŋmɔ kɛɛ ebaaba amɛnɔ kɛji amɛgbo enɔ toi lɛ pɛpɛɛpɛ. (1 Mose 3:17-19) Akɛni beni Adam tɔ̃ lɛ ebatsɔ mɔ ni yeee emuu hewɔ lɛ, eshwiei fɛɛ ná esha akɛ gboshinii kɛjɛ eŋɔɔ. (Romabii 5:12) Abaanyɛ akɛ tsɛŋsi ni akɛshãa bodobodo afee shihilɛ nɛɛ he mfoniri. Kɛji akɛ tsɛŋsi lɛ he eboda lɛ, te bodobodoi fɛɛ ni ashãa yɛ mli lɛ ahe feɔ tɛŋŋ? Eko fɛɛ eko he bodaa loo etɔɔ fã. Nakai nɔŋŋ adesa fɛɛ adesa ná “kadimɔ nɔ” ni ji emuu ni ayeee kɛjɛ Adam ŋɔɔ akɛ gboshinii. No hewɔ ni adesai fɛɛ gbɔlɔɔ ni amɛgboiɔ lɛ.Romabii 3:23.

8, 9. (a) Mɛɛ mpoa ekã shi faŋŋ akɛ Satan tswa? (b) Mɛni hewɔ Nyɔŋmɔ kpataaa atuatselɔi lɛ ahiɛ amrɔ nɔŋŋ lɛ?

8 Beni Satan ha Adam kɛ Hawa fee esha amɛshi Nyɔŋmɔ  lɛ, no mli lɛ eenyiɛ amɛhiɛ kɛmiitse atũa diɛŋtsɛ. Eete shi eewo gbɛ ni Yehowa tsɔɔ nɔ eyeɔ nɔ lɛ. Yɛ gbɛ ko nɔ lɛ, nɔ ni Satan tsɔɔ ji akɛ: ‘Nyɔŋmɔ ji nɔyelɔ fɔŋ. Emaleɔ ni ekɛ nibii kpakpai teeɔ eshishibii lɛ. Nyɔŋmɔ nɔyeli he ehiaaa adesai. Amɛbaanyɛ amɛkpɛ amɛyiŋ yɛ nɔ ni hi kɛ nɔ ni ehiii he.  Ni amɛbaaná shihilɛ kpakpa mli ŋɔɔmɔ yɛ minɔyeli shishi.’ Te Nyɔŋmɔ baatsu mpoatswaa kɛ jɛmɔ nɛɛ he nii eha tɛŋŋ? Mɛi komɛi susuɔ akɛ kulɛ esa akɛ Nyɔŋmɔ akpata atuatselɔi lɛ ahiɛ. Shi kulɛ, ani no baaha Satan mpoatswaa lɛ hetoo? Kulɛ, ani no baaye he odase akɛ gbɛ ni Nyɔŋmɔ tsɔɔ nɔ eyeɔ nɔ lɛ ja?

9 Jalɛ sane ni Yehowa yeɔ yɛ gbɛ ni yeɔ emuu nɔ lɛ eŋmɛɛɛ lɛ gbɛ koni ekpata atuatselɔi lɛ ahiɛ amrɔ nɔŋŋ. Ekpɛ eyiŋ akɛ ebaabi ni aná be koni akɛha Satan mpoatswaa lɛ hetoo yɛ gbɛ ni haa mɔ tsui nyɔɔ emli nɔ, koni akɛma nɔ mi akɛ Abonsam ji amalelɔ. No hewɔ lɛ, Nyɔŋmɔ kpɛ eyiŋ akɛ ebaaŋmɛ adesai agbɛ koni amɛye amɛ diɛŋtsɛ amɛhe nɔ yɛ Satan hewalɛ shishi kɛyashi be ko. Abaasusu nɔ hewɔ ni Yehowa fee nakai, kɛ nɔ hewɔ ni eŋmɛ gbɛ koni be babaoo aho dani etsu saji nɛɛ ahe nii lɛ he yɛ wolo nɛɛ Yitso 11 lɛ mli. Shi kɛlɛ, amrɔ nɛɛ ehi akɛ obaasusu sane nɛɛ he: Ani eja gbɛ akɛ Adam kɛ Hawa abo Satan, mɔ ni efeko nɔ ko kpakpa ko kɛhako amɛ dã lɛ toi? Ani eja yɛ amɛgbɛfaŋ akɛ amɛaahe amɛye akɛ Yehowa ni ji mɔ ni ha amɛ nibii fɛɛ ni amɛyɔɔ lɛ ji yiwalɔ kɛ amalelɔ? Mɛni ji nɔ ni kulɛ obaafee?

10. Mɛɛ gbɛ nɔ oootsɔ ofi Yehowa sɛɛ koni okɛha Satan mpoatswaa lɛ hetoo?

10 Ehi jogbaŋŋ akɛ wɔɔsusu sanebimɔi nɛɛ ahe, ejaakɛ wɔteŋ mɔ fɛɛ mɔ kɛ saji ni tamɔ nakai nɔŋŋ miikpe ŋmɛnɛ. Hɛɛ, oyɛ hegbɛ ni okɛaafi Yehowa sɛɛ koni okɛha Satan mpoatswaa lɛ hetoo. Obaanyɛ okpɛlɛ Yehowa nɔ akɛ o-Nɔyelɔ koni okɛye obua ni ana akɛ Satan ji amalelɔ. (Lala 73:28; Abɛi 27:11) Dɔlɛ sane ji akɛ, yɛ gbɔmɛi akpekpei abɔ ni yɔɔ je nɛŋ fɛɛ lɛ ateŋ lɛ, mɛi fioo ko pɛ kɔɔ shidaamɔ ni tamɔ nakai. Enɛ teeɔ sanebimɔ ko ni he hiaa shi akɛ, Ani Biblia lɛ tsɔɔ diɛŋtsɛ akɛ Satan ji mɔ ni yeɔ je nɛɛ nɔ?

 NAMƆ YEƆ JE NƐƐ NƆ?

Eji maŋtsɛyelii fɛɛ ni yɔɔ je lɛŋ lɛ jeee Satan nɔ kulɛ, ani ebaanyɛ ekɛhã Yesu?

11, 12. (a) Mɛɛ gbɛ nɔ kaa ko ni Yesu kɛkpe lɛ jieɔ lɛ kpo akɛ Satan ji je nɛŋ nɔyelɔ? (b) Mɛni hu maa nɔ mi akɛ Satan ji je nɛŋ nɔyelɔ?

11 Yesu ejeee he ŋwane kɔkɔɔkɔ akɛ Satan ji mɔ ni yeɔ je nɛɛ nɔ. Be ko lɛ, Satan tsɔ naakpɛɛ gbɛ nɔ “eŋɔ jeŋ maŋtsɛyelihei fɛɛ kɛ amɛnunyam lɛ etsɔɔ” Yesu. Kɛkɛ ni Satan wo Yesu shi akɛ: “Maŋɔ enɛɛmɛi fɛɛ mahao, kɛji okula shi oja mi lɛ.” (Mateo 4:8, 9; Luka 4:5, 6) Susumɔ enɛ he okwɛ. Kulɛ ani nii ni Satan ŋɔɔ ehaa Yesu lɛ baafee kaa kɛha Yesu kɛji akɛ Satan jeee nɛkɛ maŋtsɛyelii nɛɛ anɔyelɔ? Yesu ekɛɛɛ akɛ je lɛŋ maŋtsɛyelii lɛ jeee Satan nɔ̃. Ekã shi faŋŋ akɛ, eji Satan jeee hewalɛ ni hɔ je lɛŋ maŋtsɛyelii lɛ asɛɛ kulɛ, Yesu baaha ale enɛ.

12 Eji anɔkwale akɛ Yehowa ji Nyɔŋmɔ Ofe, ni lɛ ji je lɛ kɛ emli naakpɛɛ nibii nɛɛ fɛɛ a-Bɔlɔ. (Kpojiemɔ 4:11) Kɛlɛ, awieee he yɛ Biblia lɛ mli he ko he ko akɛ Yehowa Nyɔŋmɔ loo Yesu Kristo ji je nɛɛ nɔyelɔ. Yɛ anɔkwale mli lɛ, Yesu tsɛ́ Satan diɛŋtsɛ akɛ “je nɛŋ lumɔ.” (Yohane 12:31; 14:30; 16:11) Biblia lɛ po tsɛɔ Satan Abonsam akɛ “je nɛŋ nyɔŋmɔ.” (2 Korintobii 4:3, 4) Kristofonyo bɔfo Yohane ŋma yɛ Satan loo shitee-kɛwolɔ nɛɛ he akɛ: “Jeŋ muu lɛ fɛɛ kã mɔ fɔŋ lɛ mli.”1 Yohane 5:19.

GBƐ NI ABAATSƆ NƆ AJIE SATAN JE LƐ KƐYA

13. Mɛni hewɔ ehe hiaa ni aná jeŋ hee lɛ?

13 Beni afii lɛ hoɔ kɛyaa lɛ, belɛ je lɛŋ shihilɛ miiya nɔ eefee oshara. Emli eyi obɔ kɛ asraafoi ni miiwu ta, maŋkwralɔi ni yeee anɔkwa, jamɔŋ hiɛnyiɛlɔi osatofoi, kɛ efɔŋfeelɔi. Anyɛŋ atsake jeŋ muu lɛ fɛɛ. Biblia lɛ tsɔɔ akɛ be eshɛ ni Nyɔŋmɔ baatsɔ eta ni ji Harmagedon lɛ nɔ ejie jeŋ fɔŋ nɛɛ kɛya. Akɛ jalɛ jeŋ hee baato najiaŋ.Kpojiemɔ 16:14-16.

14. Namɔ Nyɔŋmɔ ehala koni efee E-Maŋtsɛyeli lɛ nɔ Maŋtsɛ, ni te agba enɛ he sane afɔ̃ shi aha tɛŋŋ?

 14 Yehowa Nyɔŋmɔ ehala Yesu Kristo koni efee E-ŋwɛi Maŋtsɛyeli loo nɔyeli lɛ nɔ Maŋtsɛ. Biblia lɛ gba efɔ̃ shi yɛ blema tɔ̃ɔ akɛ: “Afɔ́ bi fufɔoo aha wɔ, aha wɔ binuu hu; ni elumɔyeli lɛ aaakã ekɔŋ nɔ, ni aaatsɛ́ egbɛi akɛ . . . Hejɔlɛ lumɔ. Elumɔyeli lɛ shweremɔ kɛ hejɔlɛ lɛ sɛɛ efoŋ.” (Yesaia 9:5, 6) Yesu tsɔɔ esɛɛnyiɛlɔi lɛ koni amɛsɔle yɛ maŋtsɛyeli nɛɛ he akɛ: “Omaŋtsɛyeli lɛ aba; afee nɔ ni osumɔɔ yɛ shikpɔŋ lɛ nɔ, taakɛ afeɔ yɛ ŋwɛi lɛ.” (Mateo 6:10) Taakɛ wɔbaana yɛ wolo nɛɛ mli yɛ sɛɛ mli lɛ, etsɛŋ ni Nyɔŋmɔ Maŋtsɛyeli lɛ baajie je nɛŋ nɔyelii lɛ fɛɛ kɛya, ni ebaye amɛnajiaŋ. (Daniel 2:44) Kɛkɛ lɛ, Nyɔŋmɔ Maŋtsɛyeli lɛ baafee shikpɔŋ lɛ paradeiso.

JEŊ HEE KO EBƐŊKƐ!

15. Mɛni ji “shikpɔŋ hee” lɛ?

15 Biblia lɛ maa nɔ mi kɛhaa wɔ akɛ: “Yɛ [Nyɔŋmɔ] eshiwoo lɛ naa lɛ wɔmiikwɛ ŋwɛi hee kɛ shikpɔŋ hee ni jalɛ hiɔ mli lɛ gbɛ.” (2 Petro 3:13; Yesaia 65:17) Bei komɛi kɛji akɛ Biblia lɛ miiwie “shikpɔŋ” lɛ he lɛ, ekɔɔ gbɔmɛi ni yɔɔ shikpɔŋ lɛ nɔ lɛ ahe. (1 Mose 11:1) No hewɔ lɛ, jalɛ “shikpɔŋ hee” lɛ ji gbɔmɛi ni Nyɔŋmɔ kpɛlɛɔ amɛnɔ.

16. Mɛɛ nikeenii ko ni eko kɛ lɛ yeee egbɔ Nyɔŋmɔ kɛbaaha mɛi ni ekpɛlɛɔ amɛnɔ lɛ, ni mɛni esa akɛ wɔfee koni wɔnine ashɛ nɔ?

16 Yesu wo shi akɛ yɛ jeŋ hee ni baa lɛ mli lɛ, mɛi ni Nyɔŋmɔ ekpɛlɛ amɛnɔ lɛ anine baashɛ “naanɔ wala” nɔ akɛ nikeenii. (Marko 10:30) Ofainɛ ni ogbele o-Biblia lɛ kɛya Yohane 3:16Yohane 17:3 lɛ ni okane nɔ ni Yesu kɛɛ esa akɛ wɔfee koni wɔnine ashɛ naanɔ wala nɔ lɛ he sane yɛ jɛmɛ. Agbɛnɛ, susumɔ jɔɔmɔi ni Biblia lɛ tsɔɔ akɛ mɛi ni abaabu amɛ akɛ amɛsa kɛha nakai nikeenii ni yɔɔ naakpɛɛ ni jɛ Nyɔŋmɔ ŋɔɔ lɛ anine baashɛ nɔ yɛ shikpɔŋ nɔ Paradeiso ni baa lɛ mli lɛ he okwɛ.

17, 18. Te wɔɔfee tɛŋŋ wɔná nɔmimaa akɛ toiŋjɔlɛ kɛ shweshweeshwe shihilɛ baahi shikpɔŋ lɛ nɔ he fɛɛ he lɛ?

 17 Efɔŋfeemɔ, tawuu, awuiyeli, kɛ basabasafeemɔ sɛɛ baafo. “Mɔ fɔŋ lɛ bɛ dɔŋŋ . . . Shi mɛi ni he jɔ lɛ, shikpɔŋ lɛ aaatsɔ̃ amɛnɔ̃.” (Lala 37:10, 11) Toiŋjɔlɛ baahi shi ejaakɛ ‘Nyɔŋmɔ baaha tai asɛɛ afo kɛyashi shikpɔŋ lɛ naagbeehei lɛ.’ (Lala 46:10; Yesaia 2:4) Kɛkɛ lɛ, “jalɔ aaafrɔke, ni hejɔlɛ aaafa kɛyashi beyinɔ ni nyɔɔŋtsere bɛ dɔŋŋ”—ni enɛ tsɔɔ naanɔ toiŋjɔlɛ!Lala 72:7.

18 Yehowa jálɔi baahi shi yɛ shweshweeshwe shihilɛ mli. Be fɛɛ be ni Israelbii ni hi shi yɛ Biblia beaŋ lɛ feɔ toiboo amɛhaa Nyɔŋmɔ lɛ, amɛhiɔ shi shweshweeshwe. (3 Mose 25:18, 19) Kwɛ miishɛɛ ni eeeji akɛ wɔbaaná shweshweeshwe shihilɛ ni tamɔ nakai nɔŋŋ mli ŋɔɔmɔ yɛ Paradeiso lɛ mli!Yesaia 32:18; Mika 4:4.

19. Te wɔfeɔ tɛŋŋ wɔleɔ akɛ niyenii baafa babaoo yɛ Nyɔŋmɔ jeŋ hee lɛ mli lɛ?

19 Hɔmɔ yeŋ mɔ ko dɔŋŋ. Lalatsɛ lɛ lá akɛ: “Shikpɔŋ lɛ nɔ aaaba abele babaoo kɛyashwie gɔji lɛ ayiteaŋ.” (Lala 72:16) Yehowa Nyɔŋmɔ baajɔɔ enɔkwafoi lɛ, ni ‘shikpɔŋ lɛ diɛŋtsɛ aaaba enii.’Lala 67:7.

20. Mɛni hewɔ wɔbaanyɛ wɔná nɔmimaa akɛ shikpɔŋ muu lɛ fɛɛ baatsɔ paradeiso lɛ?

20 Shikpɔŋ muu lɛ fɛɛ baatsɔ paradeiso. Abaamamɔ tsũi heei fɛfɛji, ni abaafee abɔɔi fɛfɛji yɛ shikpɔŋ lɛ nɔ hei ni adesai eshafeelɔi efite jɛmɛ yɛ bei ni eho lɛ amli lɛ. (Yesaia 65:21-24; Kpojiemɔ 11:18) Beni be shwieɔ mli lɛ, abaalɛɛ shikpɔŋ lɛ fãi srɔtoi ni asaa nɔ lɛ amli kɛyashi be mli ni shikpɔŋ muu lɛ fɛɛ nɔ baafee fɛo ni eba nii taakɛ Eden abɔɔ lɛ ji lɛ. Ni Nyɔŋmɔ baaya nɔ ‘agbɛ edɛŋ ni eha nɔ fɛɛ nɔ ní hiɛ kã lɛ atɔ kɛ nii ní etaoɔ.’Lala 145:16.

21. Mɛni tsɔɔ akɛ toiŋjɔlɛ baahi adesai kɛ kooloi ateŋ?

21 Toiŋjɔlɛ baahi adesai kɛ kooloi ateŋ. Kooloi ni hiɛ yɔɔ la kɛ shia kooloi baaye nii yɛ he kome. Gbekɛ bibioo po sheŋ  kooloi ni amrɔ nɛɛ amɛhe yɔɔ oshara lɛ agbeyei.Yesaia 11:6-9; 65:25.

22. Mɛni abaafee yɛ hela he?

22 Hela sɛɛ baafo. Ákɛ Nyɔŋmɔ ŋwɛi Maŋtsɛyeli lɛ nɔ Maŋtsɛ lɛ, Yesu baatsá mɛi yɛ gbɛ ni da kwraa nɔ fe nɔ ni efee beni eyɔɔ shikpɔŋ lɛ nɔ lɛ. (Mateo 9:35; Marko 1:40-42; Yohane 5:5-9) Kɛkɛ lɛ, “maŋbii lɛ ateŋ mɔ ko ekɛɛŋ akɛ: Migbɔjɔ [“mihe miiye,” NW]!”Yesaia 33:24; 35:5, 6.

23. Mɛni hewɔ gbohiiashitee lɛ baaha wɔtsui anya kɛ miishɛɛ lɛ?

23 Abaatee wɔsuɔlɔi ni egboi lɛ ashi kɛba wala mli kɛ gbɛkpamɔ akɛ amɛgboiŋ dɔŋŋ. Abaatee mɛi fɛɛ ni egboi ni amɛyɔɔ Nyɔŋmɔ kaimɔ mli lɛ ashi kɛba wala mli ekoŋŋ. Yɛ anɔkwale mli lɛ, “gbohiiashitee baaba, ni jalɔi kɛ mɛi ni ejaaa fɛɛ baate shi.”Bɔfoi lɛ Asaji 24:15; Yohane 5:28, 29.

24. Te Paradeiso mli ni abaahi yɛ shikpɔŋ nɔ lɛ haa onuɔ he ohaa tɛŋŋ?

24 Mɛɛ wɔsɛɛ be ni yɔɔ miishɛɛ mɛɔ mɛi ni halaa akɛ amɛaakase wɔ-Bɔlɔ Kpeteŋkpele ni ji Yehowa Nyɔŋmɔ he nii, ní amɛsɔmɔ lɛ lɛ nɛkɛ! Beni Yesu wo efɔŋfeelɔ ni asɛŋ lɛ yɛ emasɛi lɛ shi akɛ “okɛ mi aaahi Paradeiso” lɛ, no mli lɛ eewie shikpɔŋ nɔ Paradeiso ni baa lɛ he. (Luka 23:43) Ehe miihia ni wɔkase Yesu Kristo ni ji mɔ ni abaatsɔ enɔ akɛ jɔɔmɔi nɛɛ fɛɛ aba lɛ he nii babaoo.