Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mɛni Biblia lɛ Tsɔɔ Diɛŋtsɛ?

Ani Nɛkɛ Ji Bɔ ni Nyɔŋmɔ To Eyiŋ?

Ani Nɛkɛ Ji Bɔ ni Nyɔŋmɔ To Eyiŋ?

KƆ ADAFITSWAA woji lɛ ateŋ eko ni okane. Kwɛmɔ tɛlivishiŋ, loo bó redio toi. Obaana akɛ saji ni amɛwieɔ he lɛ pii kɔɔ efɔŋfeemɔ, ta, kɛ awuiyeli ni akɛtutuaa mɔ ahe! Agbɛnɛ susumɔ onaagbai lɛ ahe okwɛ. Ekolɛ hela loo suɔlɔ ko gbele eha okɛ haomɔi pii miikpe. Ekolɛ obaanu he taakɛ gbɔmɔ kpakpa Hiob, mɔ ni kɛɛ akɛ “ena amanehulu ni naa wa” lɛ nu he lɛ pɛpɛɛpɛ.Hiob 10:15, The Holy Bible in the Language of Today.

Bi ohe akɛ:

  • Ani nɛkɛ ji bɔ ni Nyɔŋmɔ to eyiŋ kɛha mi kɛ adesa weku muu lɛ fɛɛ?

  • Nɛgbɛ maná yelikɛbuamɔ ni mikɛaadamɔ minaagbai lɛ anaa yɛ?

  • Ani hiɛnɔkamɔ ko yɛ akɛ be ko baashɛ ni wɔbaaná toiŋjɔlɛ yɛ shikpɔŋ nɔ?

Biblia lɛ kɛ sanebimɔi nɛɛ ahetooi ni haa mɔ tsui nyɔɔ emli haa.

 BIBLIA LƐ TSƆƆ AKƐ NYƆŊMƆ KƐ TSAKEMƆI NƐƐ BAABA SHIKPƆŊ LƐ NƆ.

“Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ.”Kpojiemɔ 21:4

“Obubuafoi aaatumɔ akɛ ofrote.”Yesaia 35:6

“Aaagbele shwilafoi ahiŋmɛii.”Yesaia 35:5

 “Mɛi fɛɛ ni yɔɔ gbohiiabui amli lɛ aaaje kpo.”Yohane 5:28, 29

“Maŋbii lɛ ateŋ mɔ ko ekɛɛŋ akɛ: Migbɔjɔ [“mihe miiye,” NW]!”Yesaia 33:24

“Shikpɔŋ lɛ nɔ aaaba abele babaoo kɛyashwie gɔji lɛ ayiteaŋ.”Lala 72:16

 NÁ BIBLIA MLI TSƆƆMƆI LƐ AHE SƐƐ

Okɛ oyaiyeli akakpoo nibii ni awie he yɛ baafai ni tsɔ hiɛ lɛ amli lɛ akɛ amɛji nibii ni ashweɔ ni nyɛŋ aba mli. Nyɔŋmɔ ewo shi akɛ ebaatsu nibii nɛɛ ahe nii, ni Biblia lɛ tsɔɔ gbɛ ni ebaatsɔ nɔ efee nakai lɛ mli.

Shi Biblia lɛ feɔ babaoo fe nakai. Obaanyɛ otsɔ Biblia lɛ nɔ oná shihilɛ diɛŋtsɛ ni haa mɔ tsui nyɔɔ emli amrɔ nɛɛ po. Ŋɔɔ be fioo ni okɛsusu bo diɛŋtsɛ oyeyeeyefeemɔi kɛ naagbai lɛ ahe okwɛ. Ekolɛ shika ni obɛ, weku mli naagbai, gbɔmɔtsoŋ hewalɛ ni onáaa, loo suɔlɔ ko gbele fata onaagbai lɛ ahe. Biblia lɛ baanyɛ aye abua bo koni otsu naagbai ni okɛkpeɔ ŋmɛnɛ lɛ ahe nii, ni ebaanyɛ eha ohe ajɔ bo kɛtsɔ sanebimɔi ni nyiɛ sɛɛ nɛɛ ahetooi ni ekɛhaa lɛ nɔ:

  • Mɛni hewɔ wɔnaa amanehulu?

  • Mɛɛ gbɛ nɔ wɔɔtsɔ wɔdamɔ shihilɛ mli yeyeeyefeemɔi anaa?

  • Mɛɛ gbɛ nɔ wɔɔtsɔ wɔha miishɛɛ ahi wɔweku shihilɛ mli?

  • Mɛni baa wɔnɔ kɛ́ wɔgboi?

  • Ani be ko baashɛ ni wɔbaana wɔsuɔlɔi ni egboi lɛ ekoŋŋ?

  • Te wɔɔfee tɛŋŋ wɔná nɔmimaa akɛ Nyɔŋmɔ baatsu eshiwoi kɛha wɔsɛɛ lɛ ahe nii?

 Anɔkwale ni eji akɛ ookane wolo nɛɛ tsɔɔ akɛ obaasumɔ ni ole nɔ ni Biblia lɛ tsɔɔ. Wolo nɛɛ baaye abua bo. Kadimɔ akɛ kukuji ni yɔɔ baafa ko mli lɛ ahe sanebimɔi yɛ nakai baafa lɛ shishi. Mɛi akpekpei abɔ enya Biblia lɛ ni Yehowa Odasefoi kɛ amɛ susuɔ he kɛtsɔ sanebimɔ kɛ hetooi anɔ lɛ he. Wɔheɔ wɔyeɔ akɛ bo hu obaanya he. Eba akɛ Nyɔŋmɔ aaajɔɔ bo amrɔ nɛɛ be mli ni okaseɔ nɔ diɛŋtsɛ ni Biblia lɛ tsɔɔ ni baaha oná miishɛɛ ní otsui anyɔ omli hu lɛ!