Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mɛni Biblia lɛ Tsɔɔ Diɛŋtsɛ?

 YITSO KPAWO

Hiɛnɔkamɔ Diɛŋtsɛ ni Yɔɔ Kɛhã Osuɔlɔi ni Egboi Lɛ

Hiɛnɔkamɔ Diɛŋtsɛ ni Yɔɔ Kɛhã Osuɔlɔi ni Egboi Lɛ
  • Te wɔfeɔ tɛŋŋ wɔleɔ akɛ gbohiiashitee baaba diɛŋtsɛ lɛ?

  • Te Yehowa nuɔ gbohii ashi ni ebaatée lɛ he ehaa tɛŋŋ?

  • Namɛi ashi abaatée?

1-3. Mɛɛ henyɛlɔ nyiɛ wɔ fɛɛ wɔsɛɛ, ni mɛni hewɔ nibii ni Biblia lɛ tsɔɔ lɛ ahe ni wɔɔsusu lɛ baashɛje wɔmii yɛ gbɛ ko nɔ lɛ?

ŊƆƆ lɛ akɛ oojo henyɛlɔ ko ni yi wa naa foi. Ehe wa ni ehe yɛ oya fe bo. Ole akɛ eji mɔ ko ni enaaa mɔbɔ, ejaakɛ óna ni egbe onanemɛi lɛ ateŋ mɛi komɛi. Yɛ mɔdɛŋ fɛɛ ni obɔɔ koni okɛjo enaa foi lɛ fɛɛ sɛɛ lɛ, eeya nɔ eebɛŋkɛ bo. Etamɔ nɔ ni ohiɛnɔkamɔ etã. Kɛkɛ ni trukaa lɛ, yelikɛbualɔ ko badamɔ omasɛi. Eyɛ hewalɛ kwraa fe ohenyɛlɔ lɛ, ni ewo bo shi akɛ ebaaye ebua bo. Kwɛ bɔ ni enɛ baaha otsui anyɔ omli aha!

2 Yɛ shishinumɔ ko naa lɛ, henyɛlɔ ko ni tamɔ nakai nyiɛ osɛɛ. Enyiɛ wɔ fɛɛ wɔsɛɛ. Taakɛ wɔkase yɛ yitso ni tsɔ hiɛ lɛ mli lɛ, Biblia lɛ tsɛɔ gbele akɛ henyɛlɔ. Wɔteŋ mɔ ko mɔ ko nyɛŋ ajo enaa foi loo etsĩ enaa. Wɔteŋ mɛi pii ena ní henyɛlɔ nɛɛ ekpata wɔsuɔlɔi awala hiɛ. Shi Yehowa yɛ hewalɛ kwraa fe gbele. Lɛ ji Jielɔ ni yɔɔ suɔmɔ ni ejɛ jeeŋmɔ beebe etsɔɔ akɛ ebaanyɛ eye henyɛlɔ nɛɛ nɔ kunim lɛ. Ni ewo shi akɛ ebaakpata gbele ni ji henyɛlɔ nɛɛ hiɛ kwraa shikome nyɔŋlo. Biblia lɛ tsɔɔ akɛ: “Naagbee henyɛlɔ ni abaafo esɛɛ ji gbele.” (1 Korintobii 15:26) Eji sanekpakpa!

 3 Ha wɔsusu bɔ ni wɔnuɔ he wɔhaa kɛji henyɛlɔ ni ji gbele baŋɔ wɔsuɔlɔ ko kɛtee lɛ he kuku wɔkwɛ. Enɛ feemɔ baaye abua wɔ koni wɔnu sane ko ni baashɛje wɔmii lɛ shishi. Sane lɛ ji akɛ, Yehowa ewo shi akɛ ebaatsĩɛ mɛi ni egboi lɛ ahiɛ. (Yesaia 26:19) Abaaku sɛɛ akɛ amɛ aba wala mli ekoŋŋ. Enɛ ji gbohiiashitee he hiɛnɔkamɔ lɛ.

KƐ́ SUƆLƆ KO GBO

4. (a) Bɔ ni Yesu fee enii eha yɛ esuɔlɔ ko gbele he lɛ haa wɔleɔ bɔ ni Yehowa nuɔ gbele he ehaa yɛ mɛɛ gbɛ nɔ? (b) Mɛɛ nanemɛi kpakpai Yesu ná?

4 Ani gbele eŋɔ osuɔlɔ ko kɛtee? Dɔlɛ, awerɛhoyeli, kɛ nijiaŋwujee henumɔi ni ekɛbaa lɛ anaa daamɔ baanyɛ afee nɔ ni wa waa. Kɛ́ wɔyaje shihilɛ ni tamɔ nɛkɛ mli lɛ, ebaabi ni wɔtao miishɛjemɔ kɛjɛ Nyɔŋmɔ Wiemɔ lɛ mli. (2 Korintobii 1:3, 4) Biblia lɛ yeɔ ebuaa wɔ ni wɔnuɔ bɔ ni Yehowa kɛ Yesu nuɔ gbele he amɛhaa lɛ shishi. Yesu ni feɔ enii tamɔ etsɛ pɛpɛɛpɛ lɛ nu dɔlɛ he beni esuɔlɔ ko gbo lɛ. (Yohane 14:9) Kɛji akɛ Yesu fã gbɛ kɛtee Yerusalem lɛ, efɔɔ Lazaro kɛ enyɛmimɛi yei Maria kɛ Marta ni yɔɔ Betania ni ji maŋ ko ni bɛŋkɛ jɛmɛ lɛ saramɔ. Amɛbatsɔmɔ nanemɛi ni sumɔɔ amɛhe waa. Biblia lɛ kɛɔ akɛ: “Yesu sumɔɔ Marta kɛ enyɛmi yoo lɛ kɛ Lazaro fɛɛ.” (Yohane 11:5) Shi kɛlɛ, taakɛ wɔkase yɛ yitso ni tsɔ hiɛ lɛ mli lɛ, Lazaro bagbo.

5, 6. (a) Te Yesu fee enii eha tɛŋŋ beni ekɛ Lazaro wekumɛi kɛ nanemɛi ni yeɔ awerɛho lɛ yɔɔ lɛ? (b) Mɛni hewɔ awerɛho ni Yesu ye lɛ woɔ wɔ hewalɛ lɛ?

5 Te Yesu nu he eha tɛŋŋ beni enaanyo lɛ gbo lɛ? Amaniɛbɔɔ lɛ kɛɔ wɔ akɛ, Yesu yafata Lazaro wekumɛi kɛ nanemɛi lɛ ahe kɛye gbele nɛɛ he awerɛho. Beni Yesu na wekumɛi kɛ nanemɛi ní miiye awerɛho lɛ, shihilɛ lɛ ná ehenumɔi anɔ hewalɛ waa. “Ehuŋ yɛ emumɔ mli ni ekpokpo.” No sɛɛ lɛ, amaniɛbɔɔ lɛ kɛɔ akɛ, “ni Yesu fó.” (Yohane 11:33, 35) Ani awerɛho ni Yesu ye lɛ tsɔɔ akɛ ebɛ hiɛnɔkamɔ? Dabi kwraa.  Yɛ anɔkwale mli lɛ, Yesu le akɛ naakpɛɛ nɔ ko miihe aba. (Yohane 11:3, 4) Yɛ fɛɛ sɛɛ lɛ, enu dɔlɛ kɛ awerɛhoyeli ni gbele kɛbaa lɛ he.

6 Awerɛho ni Yesu ye lɛ woɔ wɔ hewalɛ yɛ gbɛ ko nɔ. Etsɔɔ wɔ akɛ Yesu kɛ e-Tsɛ Yehowa nyɛ̃ɔ gbele. Shi Yehowa Nyɔŋmɔ nyɛɔ ewuɔ eshiɔ nakai henyɛlɔ lɛ ni eyeɔ enɔ kunim! Ha wɔsusu nɔ ni Nyɔŋmɔ ye ebua Yesu ni efee lɛ he wɔkwɛ.

“LAZARO EE, JEE KPO!”

7, 8. Mɛni hewɔ ekolɛ mɛi ni na shihilɛ mli ni Lazaro yɔɔ lɛ susu akɛ hiɛnɔkamɔ ko bɛ kɛha lɛ lɛ, shi mɛni Yesu fee?

7 Yesu bi koni ajie tɛ ni akɛtsĩ tɛkplo ni afũ Lazaro yɛ mli lɛ naa lɛ. Akɛni gbii ejwɛ nɛ ni Lazaro gbo, ni ekolɛ ebɔi fitemɔ hewɔ lɛ, Marta te shi wo nibimɔ nɛɛ. (Yohane 11:39) Yɛ adesai asusumɔ naa lɛ, ani nɔ ko yɛ ni abaanyɛ afee?

Lazaro shitee lɛ hã aná miishɛɛ kpele.Yohane 11:38-44

8 Ajie tɛ lɛ kɛje bu lɛ naa, ni Yesu kɛ gbee ni wa bo akɛ: “Lazaro ee, jee kpo!” Mɛni ba? “Gbonyo lɛ je kpo.” (Yohane 11:43, 44) Ani obaanyɛ ofee miishɛɛ ni gbɔmɛi lɛ ná lɛ he mfoniri yɛ ojwɛŋmɔ mli? Kɛji akɛ Lazaro ji amɛnyɛmi nuu, wekunyo, naanyo, aloo akutsoŋnyo jio lɛ, nɔ ni amɛle ji egbo. Shi agbɛnɛ, naa nuu nɛɛ ni amɛsumɔɔ esane waa lɛ yɛ amɛteŋ—eba wala mli ekoŋŋ. Ekolɛ efee amɛ akɛ amɛmiila. Ŋwanejee ko kwraa bɛ he akɛ mɛi pii kɛ miishɛɛ yafua Lazaro atuu. Mɛɛ gbele nɔ kunimyeli po nɛ!

Elia tée yoo okulafo ko binuu shi.1 Maŋtsɛmɛi 17:17-24

9, 10. (a) Mɛɛ gbɛ nɔ Yesu tsɔ eha ale Mɔ ni kɛ hewalɛ ni ekɛtée Lazaro shi lɛ ha lɛ? (b) Mɛni ji sɛɛnamɔi komɛi ni anáa kɛjɛɔ Biblia mli saji ni kɔɔ gbohiiashitee he lɛ akanemɔ mli?

9 Yesu ekɛɛɛ akɛ lɛ diɛŋtsɛ ehewalɛ ekɛfee naakpɛɛ nii nɛɛ. Efee lɛ faŋŋ yɛ sɔlemɔ ni esɔle dani ebo etsɛ́ Lazaro lɛ mli akɛ, Yehowa ji Mɔ ni tée gbonyo lɛ shi. (Yohane 11:41, 42) Jeee be nɛɛ pɛ ji be ni Yehowa kɛ ehewalɛ ni eyɔɔ lɛ tsu nii kɛtée mɔ ko shi. Lazaro shitee lɛ ji naakpɛɛ nibii nɛɛhu ni kɔɔ gbohiiashitee he ní aŋmala he saji yɛ Nyɔŋmɔ Wiemɔ lɛ  mli lɛ ateŋ ekome kɛkɛ. * Saji nɛɛ akanemɔ kɛ kasemɔ yɛ miishɛɛ. Saji nɛɛ haa wɔleɔ akɛ Nyɔŋmɔ jeee mɛi ahiɛaŋkwɛlɔ, ejaakɛ gbekɛbii kɛ onukpai, hii kɛ yei, Israelbii kɛ mɛi ni jeee Israelbii fɛɛ fata mɛi ni atée amɛ shi lɛ ahe. Ni kwɛ miishɛɛ ni saji nɛɛ tsɔɔ akɛ mɛi ná! Ákɛ nɔkwɛmɔnɔ lɛ, beni Yesu tée oblayoo fioo ko shi lɛ, oblayoo nɛɛ fɔlɔi “amli fili amɛ babaoo.” (Marko 5:42, NW) Hɛɛ, Yehowa eha amɛ nɔ ko ni baaha amɛmii ashɛ amɛhe, ni amɛhiɛ kpaŋ nɔ kɔkɔɔkɔ.

Bɔfo Petro tée Kristofonyo yoo Dorka shi.Bɔfoi lɛ Asaji 9:36-42

10 Eji anɔkwale akɛ yɛ naagbee lɛ mɛi ni Yesu tée amɛ shi lɛ gboi ekoŋŋ. Ani enɛ tsɔɔ akɛ sɛɛnamɔ ko bɛ amɛshitee lɛ he? Dabi kwraa. Biblia mli saji nɛɛ maa anɔkwa saji komɛi ni he hiaa anɔ mi, ni ehaa wɔnáa hiɛnɔkamɔ.

NII NÍ WƆƆKASE KƐJƐ GBOHIIASHITEE HE SAJI LƐ AMLI

11. Mɛɛ gbɛ nɔ sane ni kɔɔ Lazaro shitee lɛ he lɛ yeɔ ebuaa kɛmaa anɔkwa sane ni yɔɔ Jajelɔ 9:5 lɛ nɔ mi?

11 Biblia lɛ tsɔɔ akɛ gbohii lɛ ‘leee nɔ ko nɔ ko.’ Amɛbɛ wala mli ni amɛbɛ shihilɛ mli yɛ he ko hu. Sane ni kɔɔ Lazaro he lɛ maa enɛ nɔ mi. Beni Lazaro ba wala mli ekoŋŋ lɛ, ani egba mɛi nibii ni eyana yɛ ŋwɛi ni ekɛha amɛná miishɛɛ? Aloo egba amɛ hɛl he saji ni yɔɔ gbeyei ni ekɛha ŋmiŋmi mɔ amɛ? Dabi. Nɔ ko bɛ Biblia lɛ mli ni tsɔɔ akɛ saji ni tamɔ nakai jɛ Lazaro naa. ‘Eleee nɔ ko nɔ ko’ yɛ gbii ejwɛ ni eyaye yɛ gbohiiaje lɛ mli. (Jajelɔ 9:5) No mli lɛ Lazaro miijɔɔ ehe yɛ gbohiiaje.Yohane 11:11.

12. Mɛni hewɔ wɔbaanyɛ wɔná nɔmimaa akɛ atée Lazaro shi lɛɛlɛŋ lɛ?

12 Sane ni kɔɔ Lazaro he lɛ hu haa wɔleɔ akɛ gbohiiashitee lɛ jeee adesã, shi moŋ eji nɔ ko ni baaba diɛŋtsɛ. Yesu tée Lazaro shi yɛ mɛi babaoo ahiɛ. Jamɔŋ hiɛnyiɛlɔi ni he tsɛ̃ɔ Yesu lɛ po ejeee naakpɛɛ nii nɛɛ he ŋwane. Yɛ no najiaŋ lɛ, amɛkɛɛ akɛ: “Te wɔfeɔ tɛŋŋ? shi nuu [Yesu] nɛɛ miifee okadii srɔtoi  pii.” (Yohane 11:47) Mɛi pii tee amɛyakwɛ nuu ni atée lɛ shi lɛ. Enɛ ha amɛteŋ mɛi babaoo ná hemɔkɛyeli yɛ Yesu mli. Amɛna akɛ Lazaro ji odaseyeli diɛŋtsɛ ni tsɔɔ akɛ Nyɔŋmɔ ji mɔ ni tsu Yesu. Odaseyeli nɛɛ tsɔɔ mɔ yiŋ waa aahu akɛ Yudafoi ajamɔŋ hiɛnyiɛlɔi ni tsui esa lɛ ateŋ mɛi komɛi kpaŋ akɛ amɛbaagbe Yesu kɛ Lazaro fɛɛ.Yohane 11:53; 12:9-11.

13. Mɛɛ yiŋtoo hewɔ wɔheɔ wɔyeɔ akɛ Yehowa baanyɛ atée mɛi ni egboi lɛ ashi lɛɛlɛŋ lɛ?

13 Ani nilee yɛ mli akɛ aaakpɛlɛ gbohiiashitee lɛ nɔ akɛ eji anɔkwa sane? Hɛɛ, ejaakɛ Yesu tsɔɔ akɛ gbi ko baaba ni abaatée “mɛi fɛɛ ni yɔɔ gbohiiabui amli” lɛ ashi. (Yohane 5:28) Yehowa ji Mɔ ni bɔ nibii fɛɛ ni wala yɔɔ amɛmli lɛ. Ani esa akɛ ewa kɛha wɔ akɛ wɔɔhe wɔye akɛ ebaanyɛ eku sɛɛ ekɛ mɔ ko aba wala mli ekoŋŋ? Yɛ anɔkwale mli lɛ, babaoo baadamɔ bɔ ni Yehowa nyɛɔ ekaiɔ nii ehaa lɛ nɔ. Ani ebaanyɛ ekai wɔsuɔlɔi ni egboi lɛ? Ŋulamii akpekpei toi akpei abɔ ni anyɛɛɛ akane eyi ŋwɛiniiaŋ yɛ jeŋ fɛɛ, shi kɛlɛ Nyɔŋmɔ tsɛ́ɔ eko fɛɛ eko kɛ egbɛi! (Yesaia 40:26) No hewɔ lɛ, Yehowa Nyɔŋmɔ baanyɛ ekai wɔsuɔlɔi ni egboi lɛ ahe saji fɛɛ fitsofitso, ni efee klalo akɛ ekɛ amɛ baaba wala mli ekoŋŋ.

14, 15. Taakɛ Hiob wiemɔ lɛ tsɔɔ lɛ, te Yehowa nuɔ gbohii ni ekɛ amɛ baaba wala mli ekoŋŋ lɛ he ehaa tɛŋŋ?

14 Shi kɛlɛ, te Yehowa nuɔ gbohii ni ebaatée amɛ shi lɛ he ehaa tɛŋŋ? Biblia lɛ tsɔɔ akɛ eyɛ he miishɛɛ akɛ ebaatée gbohii lɛ ashi. Nuu anɔkwafo Hiob bi akɛ: “Kɛji gbɔmɔ gbo lɛ, ani ehiɛ aaakã ekoŋŋ?” Nɔ ni Hiob wie nɛɛ kɔɔ egbonyobu mli ní ebaamɛ yɛ kɛyashi be mli ni Nyɔŋmɔ baakai lɛ lɛ he. Ekɛɛ Yehowa akɛ: “Kulɛ oootsɛ́, ni mahereo nɔ; ni oootao onine naa nitsumɔ lɛ sɛɛ gbɛ.”Hiob 14:13-15.

15 Bo lɛ susumɔ he okwɛ! Yehowa miitao loo eesumɔ diɛŋtsɛ akɛ ekɛ gbohii lɛ aba wala mli ekoŋŋ. Ani ejeee miishɛɛ sane akɛ wɔɔle akɛ Yehowa nuɔ he yɛ nɛkɛ gbɛ nɔ? Shi te gbohiiashitee ni baaba wɔsɛɛ lɛ baaji aha tɛŋŋ? Namɛi ashi abaatée, ni kɛmiiya nɛgbɛ?

 ‘MƐI FƐƐ NI YƆƆ KAIMƆ GBOHIIABUI AMLI’

16. Mɛɛ shihilɛi amli abaatée gbohii lɛ ashi kɛba?

16 Gbohiiashitee he saji ni yɔɔ Biblia lɛ mli lɛ tsɔɔ wɔ nibii babaoo yɛ gbohiiashitee ni baaba lɛ he. Mɛi ni atée amɛ shi kɛba wala mli yɛ shikpɔŋ nɛɛ nɔ lɛ ku sɛɛ amɛkɛ amɛsuɔlɔi yahi shi ekoŋŋ. Nakai nɔŋŋ ebaaba lɛ yɛ gbohiiashitee ni baa lɛ mli—shi ebaafee miishɛɛ kwraa fe tsutsu nɔ lɛ. Taakɛ wɔkase yɛ Yitso 3 lɛ mli lɛ, Nyɔŋmɔ yiŋtoo ji akɛ shikpɔŋ lɛ fɛɛ atsɔ paradeiso. No hewɔ lɛ, áteŋ gbohii lɛ ashi kɛbaŋ wala mli yɛ jeŋ ni tai, efɔŋfeemɔ, kɛ helai eyi mli obɔ mli. Amɛbaaná hegbɛ akɛ amɛaahi shi kɛya naanɔ yɛ shikpɔŋ nɛɛ nɔ yɛ toiŋjɔlɛ kɛ shihilɛ ni yɔɔ miishɛɛ mli.

17. Mɛi enyiɛ shi abaatée?

17 Namɛi ashi abaatée? Yesu kɛɛ akɛ, ‘mɛi fɛɛ ni yɔɔ kaimɔ gbohiiabui amli lɛ baanu egbee, ni amɛaaje kpo.’ (Yohane 5:28, 29) Nakai nɔŋŋ Kpojiemɔ 20:13 lɛ kɛɔ akɛ: “Ŋshɔ jie gbohii ni yɔɔ emli lɛ eha, ni gbele kɛ gbohiiaje jie gbohii ni yɔɔ amɛmli lɛ amɛha.” “Gbohiiaje” damɔ shi kɛha adesai akwamaŋ gbonyobu. (Kwɛmɔ Saji Krokomɛi ni Fata He lɛ ni yɔɔ baafa 212-213 lɛ mli.) Nɛkɛ gbohiiabui nɛɛ fɛɛ baakamɔ shi efoji. Mɛi akpekpei toi akpei abɔ ni jɔ́ɔ amɛhe yɛ jɛmɛ lɛ baaba wala mli ekoŋŋ. Bɔfo Paulo kɛɛ akɛ: “Gbohiiashitee baaba, ni jalɔi kɛ mɛi ni ejaaa fɛɛ baate shi.” (Bɔfoi lɛ Asaji 24:15) Mɛni enɛ tsɔɔ?

Yɛ Paradeiso lɛ mli lɛ, abaatée gbohii lɛ ashi, ni amɛbaaku sɛɛ amɛkɛ amɛsuɔlɔi ayahi shi ekoŋŋ

18. Namɛi fata “jalɔi” ni abaatée amɛ shi lɛ ahe, ni gbohiiashitee he hiɛnɔkamɔ lɛ baanyɛ aná onɔ hewalɛ yɛ mɛɛ gbɛ nɔ?

18 Mɛi ni fata “jalɔi” nɛɛ ahe ji mɛi babaoo ni wɔkaneɔ amɛhe saji yɛ Biblia lɛ mli ni hi shi dani Yesu ba shikpɔŋ lɛ nɔ lɛ. Ekolɛ mɛi tamɔ Noa, Abraham, Sara, Mose, Rut, Ester, kɛ mɛi krokomɛi babaoo ni fata he lɛ agbɛi baaba ojwɛŋmɔ mli. Awie hii kɛ yei anɔkwafoi nɛɛ ateŋ mɛi komɛi ahe yɛ Hebribii yitso 11 lɛ mli. Shi Yehowa tsuji ni gboi yɛ wɔgbii nɛɛ amli lɛ hu fata “jalɔi” nɛɛ ahe. Yɛ gbohiiashitee he  hiɛnɔkamɔ ni wɔyɔɔ lɛ hewɔ lɛ, ekolɛ wɔsheŋ gbele gbeyei.Hebribii 2:15.

19. Namɛi ji “mɛi ni ejaaa” lɛ, ni mɛɛ hegbɛ Yehowa jɛɔ mlihilɛ mli ekɛhaa amɛ?

19 Ni mɛi fɛɛ ni sɔmɔɔɔ Yehowa loo amɛbooo lɛ toi akɛni amɛleee ehe nɔ ko lɛ hu? Hiɛ kpaŋ nɛkɛ “mɛi ni ejaaa” ni ji mɛi akpekpei toi akpei abɔ nɛɛ anɔ. Amɛ hu abaatée amɛ shi, ni abaaha amɛ be koni amɛkɛkase anɔkwa Nyɔŋmɔ lɛ he nii ni amɛsɔmɔ lɛ. Abaatée gbohii lɛ ashi yɛ afii akpe lɛ mli, ni abaaha amɛ hegbɛ koni amɛfata adesai anɔkwafoi ni yɔɔ shikpɔŋ nɔ lɛ ahe kɛsɔmɔ Yehowa. Ebaafee be ni yɔɔ miishɛɛ diɛŋtsɛ. Enɛ ji be ni Biblia lɛ wieɔ he akɛ Kojomɔ Gbi lɛ. *

20. Mɛni ji Gehena, ni namɛi yaa jɛmɛ?

20 Ani enɛ tsɔɔ akɛ abaatée adesai fɛɛ ni amɛhi shi pɛŋ lɛ ashi? Dabi. Biblia lɛ kɛɔ akɛ gbohii lɛ ateŋ mɛi komɛi yɛ “gehena.” (Luka 12:5) Gehena ji gbɛi ni akɛtsɛɔ he ko ni atsiɔ jwɛi ashwieɔ yɛ blema Yerusalem maŋ lɛ sɛɛ. Ashãa gbohii kɛ jwɛi yɛ jɛmɛ. Yudafoi lɛ buɔ gbohii ni ashɛrɛɔ ashwieɔ jɛmɛ lɛ akɛ amɛsaaa fũu kɛ gbohiiashitee. No hewɔ lɛ, Gehena feɔ naanɔ hiɛkpatamɔ he okadi ni sa. Eyɛ mli akɛ Yesu baaná gbɛfaŋnɔ kɛkojo hiɛkalɔi kɛ gbohii lɛ moŋ, shi Yehowa ji Kojolɔ ni fe fɛɛ. (Bɔfoi lɛ Asaji 10:42) Éteŋ mɛi ni ebuɔ amɛ akɛ amɛji mɛi fɔji ni sumɔɔɔ akɛ amɛtsakeɔ amɛtsui lɛ ashi.

SHITEE KƐMIIIYA ŊWƐI

21, 22. (a) Mɛɛ gbohiiashitee kroko hu yɔɔ? (b) Namɔ ji mɔ klɛŋklɛŋ ni atée lɛ shi kɛtee mumɔŋ shihilɛ mli?

21 Biblia lɛ wieɔ gbohiiashitee kroko hu ni haa ahiɔ wala mli yɛ ŋwɛi akɛ mumɔŋ bɔɔ nɔ lɛ he. Yesu Kristo shitee lɛ ji gbohiiashitee nɛɛ he nɔkwɛmɔnɔ pɛ ni aŋma he sane yɛ Biblia lɛ mli.

 22 Beni agbe Yesu akɛ adesa lɛ, Yehowa haaa E-Bi anɔkwafo lɛ aka gbonyobu lɛ mli. (Lala 16:10; Bɔfoi lɛ Asaji 13:34, 35) Nyɔŋmɔ tée Yesu shi, shi etéee lɛ shi akɛ adesa. Bɔfo Petro tsɔɔ mli akɛ, eyɛ mli akɛ ‘agbe Kristo yɛ heloo gbɛfaŋ moŋ, shi aha lɛ wala yɛ mumɔ gbɛfaŋ.’ (1 Petro 3:18) Eji naakpɛɛ nifeemɔ kpele diɛŋtsɛ. Yesu ku sɛɛ eba wala mli akɛ mumɔŋ gbɔmɔ ni he wa! (1 Korintobii 15:3-6) Yesu ji klɛŋklɛŋ mɔ ni ná shitee ni yɔɔ nyam tamɔ nɛkɛ. (Yohane 3:13) Shi, mɛi krokomɛi hu baaná shitee ni tamɔ nakai nɔŋŋ.

23, 24. Namɛi feɔ Yesu “asafoku bibioo” lɛ, ni té amɛyifalɛ hu?

23 Akɛni Yesu le akɛ etsɛŋ ni ebaaku esɛɛ kɛya ŋwɛi hewɔ lɛ, ekɛɛ esɛɛnyiɛlɔi anɔkwafoi lɛ akɛ ‘eyaasaa he ko’ eto amɛ yɛ jɛmɛ. (Yohane 14:2) Yesu tsɛ́ mɛi ni yaa ŋwɛi lɛ akɛ ‘esafoku bibioo.’ (Luka 12:32) Mɛi enyiɛ feɔ nɛkɛ anɔkwa Kristofoi akuu fioo nɛɛ? Taakɛ Kpojiemɔ 14:1 lɛ tsɔɔ lɛ, bɔfo Yohane kɛɛ akɛ: “Mikwɛ, ni naa, toobi lɛ [Yesu Kristo] damɔ Zion gɔŋ lɛ nɔ, ni mɛi akpei oha-kɛ-nyɔŋmai-ejwɛ-kɛ-ejwɛ ni aŋma egbɛi kɛ etsɛ gbɛi yɛ amɛhiɛŋtsei anɔ fata ehe.”

24 Atéeɔ Kristofoi 144,000 nɛɛ ni Yesu bɔfoi anɔkwafoi lɛ hu fata he lɛ ashi kɛyaa ŋwɛi. Mɛɛ be atéeɔ amɛ shi? Bɔfo Paulo ŋma akɛ, enɛ baaba mli beni Kristo eba lɛ. (1 Korintobii 15:23) Taakɛ obaakase yɛ Yitso 9 lɛ mli lɛ, nakai be lɛ mli wɔyɔɔ amrɔ nɛɛ. No hewɔ lɛ, kɛ́ mɛi 144,000 lɛ amli bii fioo ni eshwɛ lɛ ateŋ mɔ ko gbo yɛ wɔbe nɛɛ mli lɛ, atéeɔ lɛ shi kɛyaa ŋwɛi amrɔ nɔŋŋ. (1 Korintobii 15:51-55) Shi kɛlɛ, adesai ateŋ mɛi babaoo yɛ hiɛnɔkamɔ akɛ abaatée amɛ shi wɔsɛɛ kɛba wala mli yɛ Paradeiso mli yɛ shikpɔŋ nɔ.

25. Mɛni abaasusu he yɛ yitso ni nyiɛ sɛɛ lɛ mli?

25 Hɛɛ, Yehowa baaye wɔhenyɛlɔ ni ji gbele lɛ nɔ kunim kwraa, ni agboŋ dɔŋŋ! (Yesaia 25:8) Shi kɛlɛ, ekolɛ obaabi akɛ, ‘Mɛni mɛi ni abaatée amɛ shi kɛya ŋwɛi lɛ yaafee yɛ jɛmɛ?’ Amɛbaatsɔmɔ ŋwɛi Maŋtsɛyeli nɔyeli ko ni nɔ bɛ lɛ mli bii. Wɔbaakase nakai nɔyeli lɛ he nibii babaoo yɛ yitso ni nyiɛ sɛɛ lɛ mli.

^ kk. 9 Saji krokomɛi ni kɔɔ gbohiiashitee he lɛ jeɔ kpo yɛ 1 Maŋtsɛmɛi 17:17-24; 2 Maŋtsɛmɛi 4:32-37; 13:20, 21; Mateo 28:5-7; Luka 7:11-17; 8:40-56; Bɔfoi lɛ Asaji 9:36-42; Bɔfoi lɛ Asaji 20:7-12.

^ kk. 19 Kɛ́ ootao Kojomɔ Gbi lɛ kɛ nɔ ni abaadamɔ nɔ kɛkojo lɛ ahe saji babaoo lɛ, no lɛ ofainɛ kwɛmɔ Saji Krokomɛi ni Fata He lɛ ni yɔɔ baafa 213-215 lɛ mli.