Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mɛni Biblia lɛ Tsɔɔ Diɛŋtsɛ?

 YITSO NYƆŊMA KƐ KPAANYƆ

Baptisimɔ kɛ Wekukpãa ni Kã Okɛ Nyɔŋmɔ Teŋ

Baptisimɔ kɛ Wekukpãa ni Kã Okɛ Nyɔŋmɔ Teŋ
  • Mɛɛ gbɛ nɔ atsɔɔ abaptisiɔ mɔ koni ebatsɔ Kristofonyo?

  • Mɛɛ nibii ehe hiaa ni ofee koni ohe asa kɛha baptisimɔ?

  • Mɛɛ gbɛ nɔ mɔ tsɔɔ ejɔɔ ehe nɔ ehaa Nyɔŋmɔ?

  • Mɛni ji yiŋtoo krɛdɛɛ hewɔ ni mɔ haa abaptisiɔ lɛ?

1. Mɛni hewɔ Etiopia piafonyo ko bi koni abaptisi lɛ lɛ?

“NAA nu; mɛni tsĩɔ mibaptisimɔ gbɛ?” Etiopia piafonyo ko bi sane nɛɛ yɛ klɛŋklɛŋ afii 100 lɛ mli. No mli lɛ, Kristofonyo ko ni atsɛɔ lɛ Filipo lɛ egbála mli faŋŋ etsɔɔ lɛ akɛ Yesu  ji Mesia ni agba ehe sane afɔ̃ shi lɛ. Akɛni nɔ ni Etiopianyo lɛ kase kɛjɛ Ŋmalɛi lɛ amli lɛ ná enɔ hewalɛ waa hewɔ lɛ, etsu nɔ ni ekase lɛ he nii. Ekɛɛ akɛ eesumɔ ni abaptisi lɛ.Bɔfoi lɛ Asaji 8:26-36.

2. Mɛni hewɔ esa akɛ okɛ hiɛdɔɔ asusu baptisimɔ he lɛ?

2 Kɛ́ Yehowa Odasefoi lɛ ateŋ mɔ ko kɛ bo ekase wolo nɛɛ yitsei ni tsɔ hiɛ lɛ jogbaŋŋ lɛ, ekolɛ obaabi akɛ, ‘Mɛni tsĩɔ mibaptisimɔ gbɛ?’ Kɛbashi amrɔ nɛɛ, okase Biblia mli shiwoo ni kɔɔ naanɔ wala yɛ Paradeiso mli lɛ he nii. (Luka 23:43; Kpojiemɔ 21:3, 4) Okase shihilɛ mli diɛŋtsɛ ni gbohii lɛ yɔɔ, kɛ gbohiiashitee he hiɛnɔkamɔ lɛ hu he nii. (Jajelɔ 9:5; Yohane 5:28, 29) Ekolɛ okɛ Yehowa Odasefoi miibɔ yɛ amɛsafoŋ kpeei ashishi, ni bo diɛŋtsɛ ona bɔ ni amɛtsuɔ anɔkwa jamɔ he nii amɛhaa. (Yohane 13:35) Nɔ ni he hiaa fe fɛɛ lɛ, ekolɛ oje shishi ooná okɛ Yehowa Nyɔŋmɔ teŋ wekukpãa.

3. (a) Mɛɛ famɔ Yesu kɛha esɛɛnyiɛlɔi lɛ? (b) Te abaptisiɔ mɔ ahaa tɛŋŋ?

3 Mɛɛ gbɛ nɔ obaanyɛ otsɔ otsɔɔ akɛ oosumɔ ni osɔmɔ Nyɔŋmɔ? Yesu kɛɛ esɛɛnyiɛlɔi lɛ akɛ: ‘Nyɛyaa ni nyɛyafea jeŋmaji fɛɛ mikaselɔi, nyɛbaptisia amɛ.’ (Mateo 28:19) Yesu diɛŋtsɛ ha abaptisi lɛ, ni ekɛfee nɔkwɛmɔnɔ efɔ shi. Akɛ nu shwãaa enɔ, ni ehaaa akɛ nu ko kɛkɛ ashwie eyiteŋ. (Mateo 3:16) Wiemɔ ni ji “baptisimɔ” lɛ jɛ Hela wiemɔ ni shishi ji “amu mele” lɛ mli. No hewɔ lɛ, Kristofoi abaptisimɔ tsɔɔ ní akɛ mɔ aaawo nu shishi kwraa.

4. Mɛni nu mli baptisimɔ tsɔɔ?

4 Nu mli baptisimɔ ji taomɔ nii ko ni esa akɛ mɛi fɛɛ ni taoɔ akɛ amɛná amɛkɛ Yehowa Nyɔŋmɔ teŋ wekukpãa lɛ ashɛ he. Baptisimɔ haa mɛi yɔseɔ akɛ oosumɔ koni osɔmɔ Nyɔŋmɔ. Etsɔɔ akɛ oyɛ he miishɛɛ akɛ ooofee Yehowa suɔmɔnaa nii. (Lala 40:8 9) Shi dani ohe aaasa kɛha baptisimɔ lɛ, esa akɛ otsu nifeemɔi pɔtɛɛi komɛi ahe nii.

 NILEE KƐ HEMƆKƐYELI HE MIIHIA

5. (a) Mɛni ji klɛŋklɛŋ nifeemɔ ni baaha ohe asa kɛha baptisimɔ? (b) Mɛni hewɔ Kristofoi akpeei ahe hiaa lɛ?

5 Oje shishi ootsu klɛŋklɛŋ nifeemɔ lɛ he nii momo. Yɛ mɛɛ gbɛ nɔ? Ekolɛ kɛtsɔ Yehowa kɛ Yesu Kristo he nilee ni onáa yɛ Biblia lɛ ni okaseɔ daa lɛ mli lɛ nɔ. (Yohane 17:3) Shi babaoo yɛ ni obaakase. Kristofoi miisumɔ ni ‘amɛyimɔ obɔ̃bɔ̃ kɛ Nyɔŋmɔ suɔmɔnaa nii lɛ alee.’ (Kolosebii 1:9) Yehowa Odasefoi asafoŋ kpeei ni oooya lɛ baaye abua bo yɛ enɛ gbɛfaŋ. Ehe miihia ni oya kpeei nɛɛ. (Hebribii 10:24, 25) Kpeei ni obaaya daa lɛ baaye abua bo koni Nyɔŋmɔ he nilee ni oyɔɔ lɛ aya hiɛ.

Nyɔŋmɔ Wiemɔ lɛ he anɔkwa nilee ni aaaná lɛ ji gbɛ ko ni he hiaa ni hãa mɔ he saa kɛhã baptisimɔ

6. Biblia mli nilee falɛ enyiɛ esa akɛ oná dani ohe asa kɛha baptisimɔ?

6 Eji anɔkwale akɛ ebiii ni ole nɔ fɛɛ nɔ ni yɔɔ Biblia lɛ mli dani ohe asa kɛha baptisimɔ. Etiopia piafonyo lɛ yɛ nilee fioo ko, shi yelikɛbuamɔ he miihia lɛ koni enyɛ enu Ŋmalɛi lɛ fãi komɛi ashishi. (Bɔfoi lɛ Asaji 8:30, 31) Nakai nɔŋŋ hu babaoo yɛ ni obaakase lolo. Yɛ anɔkwale mli lɛ, Nyɔŋmɔ he nii ni oookase lɛ baŋ naagbee. (Jajelɔ 3:11) Shi dani abaanyɛ abaptisi bo lɛ, ehe miihia ni kɛ hooo kwraa lɛ ole Biblia mli shishijee tsɔɔmɔi lɛ ni okpɛlɛ nɔ. (Hebribii 5:12) Tsɔɔmɔi nɛɛ ekomɛi ji anɔkwalei ni kɔɔ shihilɛ mli ni gbohii lɛ yɔɔ kɛ bɔ ni Nyɔŋmɔ gbɛi lɛ kɛ e-Maŋtsɛyeli lɛ he hiaa ha lɛ ahe.

7. Mɛɛ hewalɛ esa akɛ Biblia lɛ kasemɔ aná yɛ onɔ?

7 Shi kɛlɛ, nilee kɛkɛ ni oooná lɛ faaa, ejaakɛ “kɛ́ hemɔkɛyeli bɛ lɛ, anyɛŋ Nyɔŋmɔ hiɛ asa.” (Hebribii 11:6) Biblia lɛ kɛɔ wɔ akɛ, beni mɛi komɛi ni hi shi yɛ blema Korinto lɛ nu Kristofoi ashɛɛ sane lɛ, “amɛhé amɛye, ni abaptisi amɛ.” (Bɔfoi lɛ Asaji 18:8) Nakai nɔŋŋ hu esa akɛ Biblia lɛ kasemɔ aha oná hemɔkɛyeli babaoo akɛ eji Nyɔŋmɔ Wiemɔ ni ajɛ mumɔŋ aŋma. Esa akɛ Biblia lɛ kasemɔ aye abua bo koni oná hemɔkɛyeli yɛ Nyɔŋmɔ shiwoi lɛ kɛ hewalɛ ni Yesu afɔleshaa lɛ yɔɔ ni ekɛaahere mɛi ayiwala lɛ hu mli.Yoshua 23:14; Bɔfoi lɛ Asaji 4:12; 2 Timoteo 3:16, 17.

 BIBLIA MLI ANƆKWALE LƐ NÍ OKƐ MƐI KROKOMƐI AAAGBA HE SANE

8. Mɛni baatsirɛ bo koni okɛ mɛi krokomɛi awie nibii ni okase lɛ ahe?

8 Be mli ni ohemɔkɛyeli lɛ daa yɛ otsui mli lɛ, ebaawa kɛha bo akɛ owieŋ nɔ ni okase lɛ he otsɔŋ mɛi krokomɛi. (Yeremia 20:9) Ebaakanya bo waa koni okɛ mɛi krokomɛi awie Nyɔŋmɔ kɛ eyiŋtoi lɛ ahe.2 Korintobii 4:13.

Esa akɛ hemɔkɛyeli atsirɛ bo koni okɛ mɛi krokomɛi agba nibii ni oheɔ oyeɔ lɛ ahe sane

9, 10. (a) Namɛi obaanyɛ oje shishi ogba amɛ Biblia mli anɔkwalei lɛ? (b) Mɛni esa akɛ ofee kɛji oosumɔ ni okɛ ohe awo Yehowa Odasefoi ashiɛmɔ nitsumɔ ni ato he gbɛjianɔ lɛ mli?

9 Obaanyɛ oje shishi okɛ mɛi krokomɛi agba Biblia mli anɔkwalei lɛ ahe sane kɛtsɔ ŋaa ni okɛaatsu nii kɛwie he otsɔɔ wekumɛi, nanemɛi, kɛ nanemɛi nitsulɔi lɛ nɔ. Yɛ be ni sa mli lɛ, ekolɛ obaasumɔ ni okɛ ohe awo Yehowa Odasefoi ashiɛmɔ nitsumɔ ni ato he gbɛjianɔ lɛ mli. Kɛ́ nakai be lɛ shɛ lɛ, kaashashao shi akɛ okɛ Odasefonyo ni tsɔɔ bo Biblia lɛ mli lɛ baagba enɛ he sane. Kɛji ana akɛ ohe esa bɔ ni sa kɛha shiɛmɔ nitsumɔ lɛ, abaato gbɛjianɔ koni okɛ otsɔɔlɔ lɛ kɛ asafoŋ onukpai enyɔ akpe.

10 Enɛ baaha ole asafoŋ onukpai ni kwɛɔ Nyɔŋmɔ tooi lɛ anɔ jogbaŋŋ lɛ ateŋ mɛi komɛi. (Bɔfoi lɛ Asaji 20:28; 1 Petro 5:2, 3) Kɛji onukpai nɛɛ na akɛ onuɔ Biblia mli shishijee tsɔɔmɔi lɛ ashishi jogbaŋŋ ni oheɔ enɛɛmɛi oyeɔ, ni oohi shi yɛ Nyɔŋmɔ shishitoo mlai lɛ kɛ gbeekpãmɔ naa, ni oosumɔ lɛɛlɛŋ akɛ otsɔ Yehowa Odasefoi lɛ ateŋ mɔ kome lɛ, amɛbaaha ole akɛ akpɛlɛ onɔ akɛ okɛ ohe awo shiɛmɔ nitsumɔ lɛ mli akɛ sanekpakpa lɛ shiɛlɔ ni abaptisiko lɛ.

11. Mɛɛ tsakemɔi komɛi ebaabi ni mɛi komɛi afee dani amɛhe asa kɛha shiɛmɔ nitsumɔ lɛ?

11 Yɛ gbɛ kroko nɔ lɛ, ekolɛ onukpai nɛɛ baana akɛ ehe miihia ni ofee tsakemɔi komɛi yɛ oshihilɛ kɛ osui komɛi ahe, koni no aha ohe asa kɛha shiɛmɔ nitsumɔ lɛ. Tsakemɔi nɛɛ ekomɛi baabi ni okpa nifeemɔi komɛi ni ofeɔ kɛteeɔ mɛi krokomɛi lɛ. No hewɔ lɛ, ehe miihia ni okpa eshai ni yɔɔ hiɛdɔɔ,  tamɔ bɔlɛnamɔ mli jeŋba shara, dãatɔɔ, kɛ tsofai ni akɛtsuɔ nii yɛ gbɛ fɔŋ nɔ lɛ dani obi ni aha obatsɔ shiɛlɔ ni abaptisiko lɛ.1 Korintobii 6:9, 10; Galatabii 5:19-21.

TSUITSAKEMƆ KƐ SƐƐKUU KƐMIIJƐ OTSUTSU SHIHILƐ GBƐ LƐ MLI

12. Mɛni hewɔ tsuitsakemɔ he hiaa lɛ?

12 Esa akɛ otsu nifeemɔi krokomɛi ahe nii dani ohe asa kɛha baptisimɔ. Bɔfo Petro kɛɛ akɛ: “Nyɛtsakea nyɛtsuiiaŋ, ni nyɛkua nyɛsɛɛ, koni agbe nyɛhe eshai lɛ.” (Bɔfoi lɛ Asaji 3:19) Tsuitsakemɔ tsɔɔ ohe ni oshwa diɛŋtsɛ yɛ nɔ ko ni ofee he. Ehi jogbaŋŋ akɛ mɔ ko ni be ko ni eho lɛ ekɛ ehe ewo jeŋba shara mli lɛ aaatsake etsui, shi ehe miihia hu ni mɔ ni ehi shi yɛ jeŋba hetsemɔ shihilɛ mli lɛ hu atsake etsui. Mɛni hewɔ? Ejaakɛ eshafeelɔi ji adesai fɛɛ, ni Nyɔŋmɔ dɛŋ eshaifaa he miihia amɛ. (Romabii 3:23; 5:12) Dani obaabɔi Biblia lɛ kasemɔ lɛ, no mli lɛ oleee nɔ ni Nyɔŋmɔ suɔmɔnaa nii ji. No hewɔ lɛ, kulɛ ani obaanyɛ ohi shi yɛ esuɔmɔnaa nifeemɔ kɛ gbeekpãmɔ naa kɛmɔ shi? Enɛ hewɔ ni tsuitsakemɔ he hiaa lɛ.

13. Mɛni sɛɛ ni akuɔ kɛjɛɔ tsutsu shihilɛ gbɛ nɔ lɛ tsɔɔ?

13 Esa akɛ ‘sɛɛ ni akuɔ’ anyiɛ tsuitsakemɔ sɛɛ. Esa akɛ ofee babaoo fe ohe kɛkɛ ni oooshwa. Ehe miihia ni okwa otsutsu shihilɛ gbɛ lɛ, koni okɛ shiŋŋfeemɔ atswa ofai shi akɛ kɛjɛ amrɔ nɛɛ kɛyaa lɛ, obaaya nɔ ofee nɔ ni ja. Tsuitsakemɔ kɛ sɛɛ ni akuɔ lɛ ji nibii komɛi ni esa akɛ ofee dani abaptisi bo.

OHE NƆ NI OOOJƆƆ

14. Mɛɛ nifeemɔ ko ni he hiaa esa akɛ otsu he nii dani abaptisi bo?

14 Nifeemɔ kroko ko ni he hiaa hu yɛ ni esa akɛ otsu he nii dani abaptisi bo. Esa akɛ ojɔɔ ohe nɔ oha Yehowa Nyɔŋmɔ.

Ani bo diɛŋtsɛ otsɔ sɔlemɔ nɔ ojɔɔ ohe nɔ oha Nyɔŋmɔ?

15, 16. Ákɛ mɔ ko aaajɔɔ ehe nɔ aha Nyɔŋmɔ lɛ tsɔɔ mɛni, ni mɛni tsirɛɔ mɔ ko koni efee enɛ?

15 Kɛji akɛ ojɛ otsuiŋ okɛ anɔkwayeli jɔɔ ohe nɔ oha Yehowa Nyɔŋmɔ kɛtsɔ sɔlemɔ nɔ lɛ, no tsɔɔ akɛ oowo shi akɛ  obaatu ohe oha ekome too yɛ jamɔ mli kɛya naanɔ. (5 Mose 6:15) Shi mɛni hewɔ mɔ ko baasumɔ ni efee nakai? Ojogbaŋŋ, ŋɔɔ lɛ akɛ nuu ko kɛ oblayoo ko ebɔi nyiɛmɔ koni ekɛle lɛ jogbaŋŋ. Be mli ni eyaa nɔ ekaseɔ oblayoo lɛ ni enaa esui kpakpai lɛ, ehaa etsiɔ ebɛŋkɛɔ oblayoo lɛ kpaakpa. Yɛ be ni sa mli lɛ, efɔɔ kaa akɛ oblanyo lɛ baakɛɛ oblayoo lɛ akɛ eesumɔ ni ekɛ lɛ abote gbalashihilɛ mli. Eji anɔkwale akɛ gbalashihilɛ mlibotemɔ tsɔɔ sɔ̃i krokomɛi ahe nii ni aaatsu. Shi suɔmɔ baatsirɛ oblanyo lɛ koni ekɔ nakai gbɛ ni he hiaa lɛ.

16 Kɛji akɛ obale Yehowa ni oná suɔmɔ oha lɛ lɛ, no tsirɛɔ bo koni osɔmɔ lɛ jogbaŋŋ kɛmɔ shi, shi jeee jabejabe. Esa akɛ mɔ fɛɛ mɔ ni sumɔɔ akɛ enyiɛ Nyɔŋmɔ Bi ni ji Yesu Kristo sɛɛ lɛ ‘akwa ehe.’ (Marko 8:34) Wɔkwáa wɔhe kɛtsɔ kwɛ ní wɔkwɛɔ koni wɔsuɔmɔnaa nifeemɔi kɛ otii ni wɔkɛmamɔɔ wɔhiɛ lɛ akatsĩ wɔnaa kɛmiijɛ toiboo kwraa ni wɔɔfee wɔha Nyɔŋmɔ lɛ he lɛ nɔ. Belɛ, dani abaanyɛ abaptisi bo lɛ, esa akɛ Yehowa Nyɔŋmɔ suɔmɔnaa nifeemɔ afee oti yɛ oshihilɛ mli.1 Petro 4:2.

GBEYEI NI ASHEƆ AKƐ AYEŊ OMANYE LƐ NƆ KUNIM NI AAAYE

17. Mɛni hewɔ ekolɛ mɛi komɛi baashashao shi akɛ amɛaajɔɔ amɛhe nɔ amɛha Nyɔŋmɔ lɛ?

17 Mɛi komɛi shashaoɔ shi akɛ amɛaajɔɔ amɛhe nɔ amɛha Yehowa, ejaakɛ amɛmiishe gbeyei akɛ kɛ́ amɛkɔ gbɛ ko ni yɔɔ hiɛdɔɔ tamɔ nakai lɛ, nɔ ko baaba. Ekolɛ amɛbaashe akɔntaa ni amɛaabu amɛha Nyɔŋmɔ ákɛ Kristofoi ni ejɔɔ amɛhe nɔ amɛha lɛ lɛ he gbeyei. Akɛni amɛmiishe gbeyei akɛ ekolɛ amɛyeŋ omanye, ni ákɛ amɛbaaha Yehowa nine anyɛ shi hewɔ lɛ, amɛsusuɔ akɛ ebaahi moŋ akɛ amɛjɔŋ amɛhe nɔ amɛhaŋ lɛ.

18. Mɛni baanyɛ atsirɛ bo koni ojɔɔ ohe nɔ oha Yehowa?

18 Be mli ni onáa suɔmɔ ohaa Yehowa lɛ, no baakanya bo  koni ojɔɔ ohe nɔ oha lɛ, ni ofee bɔ fɛɛ bɔ ni ooonyɛ koni ohi shi yɛ ohenɔjɔɔmɔ lɛ naa. (Jajelɔ 5:3) Eka shi faŋŋ akɛ beni ójɔɔ ohe nɔ sɛɛ lɛ, obaasumɔ ni ‘onyiɛ bɔ ni sa Yehowa, ni osa ehiɛ kwraa.’ (Kolosebii 1:10) Yɛ suɔmɔ ni oyɔɔ kɛha Nyɔŋmɔ hewɔ lɛ, onuŋ he akɛ esuɔmɔnaa nifeemɔ wa. Ŋwanejee ko bɛ he akɛ okɛ bɔfo Yohane baakpã gbee, mɔ ni ŋma akɛ: “Enɛ ji Nyɔŋmɔ suɔmɔ lɛ, akɛ wɔye ekitai lɛ anɔ; ni ekitai lɛ waaa.”1 Yohane 5:3.

19. Mɛni hewɔ esaaa akɛ osheɔ gbeyei akɛ ooojɔɔ ohe nɔ oha Nyɔŋmɔ lɛ?

19 Ebiii ni ofee mɔ ni yeɔ emuu dani onyɛ ojɔɔ ohe nɔ oha Nyɔŋmɔ. Yehowa le ofãtɔɔi lɛ ni ekpaaa babaoo fe nɔ ni  obaanyɛ ofee lɛ gbɛ kɛjɛɛɛ odɛŋ. (Lala 103:14) Eesumɔ ni oye omanye, ni ebaafi osɛɛ, ni ebaaye ebua bo hu. (Yesaia 41:10) Obaanyɛ oná nɔmimaa akɛ kɛ́ okɛ ohe fɔ̃ Yehowa nɔ kɛ otsui fɛɛ lɛ, “eeejaje otempɔŋi lɛ.”Abɛi 3:5, 6.

OKƐ BAPTISIMƆ AFEE OHENƆJƆƆMƆ LƐ HE OKADI

20. Mɛni hewɔ he nɔ ni aaajɔɔ aha Yehowa lɛ nyɛŋ akã he afee teemɔŋ sane lɛ?

20 Nibii ni wɔsusu he bianɛ lɛ anɔ ni ooojwɛŋ lɛ baaye abua bo koni bo diɛŋtsɛ otsɔ sɔlemɔ nɔ ojɔɔ ohe nɔ oha  Yehowa. Esa akɛ mɔ fɛɛ mɔ ni sumɔɔ Nyɔŋmɔ lɛɛlɛŋ lɛ ‘ajaje yɛ mɛi fɛɛ ahiɛ kɛshɛ yiwalaheremɔ he’ hu. (Romabii 10:10) Te ooofee tɛŋŋ otsu enɛ he nii?

Baptisimɔ tsɔɔ wɔtsutsu shihilɛ gbɛ lɛ ni wɔgbo wɔhã kɛ wala mli ni wɔba koni wɔbafee Nyɔŋmɔ suɔmɔnaa nii

21, 22. Te ooofee tɛŋŋ ‘ojaje’ ohemɔkɛyeli lɛ otsɔɔ ‘mɛi fɛɛ’?

21 Ha onukpai asɛinɔtalɔ ni yɔɔ osafo lɛ mli lɛ ale akɛ oosumɔ ni abaptisi bo. Ebaato gbɛjianɔ koni onukpai lɛ ateŋ mɛi komɛi kɛ bo atĩ sanebimɔi saŋŋ ni wieɔ Biblia mli shishijee tsɔɔmɔi lɛ ahe lɛ mli. Kɛji onukpai nɛɛ kpɛlɛ nɔ akɛ osa lɛ, amɛbaaha ole akɛ abaanyɛ abaptisi bo yɛ kpee ni abaafee lɛ shishi. * Bei pii lɛ ahaa wiemɔ ni tsɔɔ nɔ ni baptisimɔ ji lɛ yɛ kpee ni tamɔ nɛkɛ shishi. No sɛɛ lɛ wielɔ lɛ biɔ koni mɛi fɛɛ ni abaabaptisi amɛ lɛ aha sanebimɔi enyɔ ni waaa lɛ ahetoo koni amɛkɛtsɔɔ amɛhemɔkɛyeli lɛ ‘jajemɔ yɛ mɛi fɛɛ ahiɛ.’

22 Baptisimɔ ji nɔ ni haa mɛi fɛɛ yɔseɔ bo akɛ oji mɔ ko ni ejɔɔ ehe nɔ eha Nyɔŋmɔ ni amrɔ nɛɛ oji Yehowa Odasefoi lɛ ateŋ mɔ kome. Akɛ mɛi ni abaabaptisi amɛ lɛ woɔ nu mli kwraa, koni akɛtsɔɔ mɛi fɛɛ akɛ amɛjɔɔ amɛhe nɔ amɛha Yehowa.

NƆ NI OBAPTISIMƆ LƐ TSƆƆ

23. Mɛni baptisimɔ ‘yɛ Tsɛ lɛ kɛ Bi lɛ kɛ mumɔ krɔŋkrɔŋ lɛ gbɛi amli’ lɛ tsɔɔ?

23 Yesu kɛɛ akɛ abaabaptisi ekaselɔi lɛ ‘awo Tsɛ lɛ kɛ Bi lɛ kɛ mumɔ krɔŋkrɔŋ lɛ gbɛi amli.’ (Mateo 28:19) Enɛ tsɔɔ akɛ mɔ ni abaabaptisi lɛ lɛ kpɛlɛɔ hegbɛ ni Yehowa Nyɔŋmɔ kɛ Yesu Kristo yɔɔ lɛ nɔ. (Lala 83:19; Mateo 28:18) Agbɛnɛ hu ekpɛlɛɔ nɔ ni Nyɔŋmɔ mumɔ krɔŋkrɔŋ loo enitsumɔ hewalɛ lɛ tsuɔ, kɛ nɔ ni efeɔ lɛ nɔ.Galatabii 5:22, 23; 2 Petro 1:21.

24, 25. (a) Mɛni he okadi baptisimɔ feɔ? (b) Mɛɛ sanebimɔ ebiɔ ni aha hetoo?

24 Shi kɛlɛ, baptisimɔ jeee nu folo ko kɛkɛ ni awuɔ. Eji nifeemɔ  ko ni he hiaa waa lɛ he okadi. Nu lɛ shishi ni akɛ bo woɔ lɛ feɔ otsutsu shihilɛ gbɛ lɛ ni ogbo oha lɛ lɛ he okadi. Onɔ ni awoɔ kɛjɛɔ nu lɛ mli lɛ tsɔɔ akɛ oba wala mli koni obafee Nyɔŋmɔ suɔmɔnaa nii. Agbɛnɛ, kaimɔ hu akɛ ojɔɔ ohe nɔ oha Yehowa Nyɔŋmɔ, shi jeee kɛha nitsumɔ ko, shihilɛ gbɛ ko, adesai krokomɛi, loo gbɛjianɔtoo ko. Ohenɔjɔɔmɔ kɛ baptisimɔ lɛ ji okɛ Nyɔŋmɔ teŋ naanyobɔɔ loo wekukpãa ni mli wa waa ní oooná lɛ shishijee.Lala 25:14.

25 Baptisimɔ kɛ yiwalaheremɔ he nɔmimaa haaa. Bɔfo Paulo ŋma akɛ: “Nyɛkɛ gbeyeishemɔ kɛ hekpokpomɔ atsua nyɛ diɛŋtsɛ nyɛyiwalaheremɔ lɛ he nii.” (Filipibii 2:12) Baptisimɔ ji eshishijee kɛkɛ. Sanebimɔ lɛ ji akɛ, Te ooofee tɛŋŋ oya nɔ ohi Nyɔŋmɔ suɔmɔ lɛ mli? Wɔnaagbee saneyitso lɛ baaha hetoo.