Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mɛni Biblia lɛ Tsɔɔ Diɛŋtsɛ?

 SAJI KROKOMƐI NI FATA HE

“Babilon Kpeteŋkpele lɛ” Yɔsemɔ

“Babilon Kpeteŋkpele lɛ” Yɔsemɔ

WIEMƆI komɛi yɛ Kpojiemɔ wolo lɛ mli ni esaaa akɛ anuɔ shishi yɛ bɔ ni aŋma lɛ aha lɛ naa. (Kpojiemɔ 1:1) Ákɛ nɔkwɛmɔnɔ lɛ, etsĩ yoo ko ni aŋma gbɛi ni ji “Babilon kpeteŋkpele lɛ” yɛ ehiɛnaa lɛ tã. Awie yoo nɛɛ he akɛ etá “asafoi kɛ jeŋmaji” anɔ. (Kpojiemɔ 17:1, 5, 15) Akɛni yoo ni ji adesa ko nyɛŋ afee nakai hewɔ lɛ, Babilon Kpeteŋkpele lɛ baafee mfonirifeemɔŋ wiemɔ. No hewɔ lɛ, mɛni okadifeemɔŋ ajwamaŋ nɛɛ damɔ shi kɛha?

Awie mfonirifeemɔŋ yoo nɛɛ nɔŋŋ he yɛ Kpojiemɔ 17:18 lɛ akɛ eji “maŋ kpeteŋkpele ni yeɔ shikpɔŋ lɛ nɔ maŋtsɛmɛi lɛ anɔ.” Wiemɔ ni ji “maŋ” lɛ tsɔɔ gbɔmɛi akuu ko ni ato amɛhe  gbɛjianɔ. Akɛni “maŋ kpeteŋkpele” nɛɛ kudɔɔ “shikpɔŋ lɛ nɔ maŋtsɛmɛi lɛ” hewɔ lɛ, yoo ni gbɛi ji Babilon Kpeteŋkpele lɛ baafee gbɛjianɔtoo ko ni náa mɛi anɔ hewalɛ yɛ jeŋ fɛɛ. Abaanyɛ atsɛ lɛ yɛ gbɛ ni ja nɔ akɛ jeŋ maŋtsɛyeli. Mɛɛ maŋtsɛyeli nɛkɛ eji? Eji jamɔŋ nɔ̃. Kadimɔ bɔ ni ŋmalɛi kukuji komɛi ni kɔɔ ehe ni jeɔ kpo yɛ Kpojiemɔ wolo lɛ mli lɛ haa wɔmuɔ sane lɛ naa nakai lɛ.

Maŋtsɛyeli ko baanyɛ afee maŋkwramɔŋ nɔ̃, jarayeli nɔ̃, loo jamɔŋ nɔ̃. Yoo ni atsɛɔ lɛ Babilon Kpeteŋkpele lɛ jeee maŋkwramɔŋ maŋtsɛyeli, ejaakɛ Nyɔŋmɔ Wiemɔ lɛ kɛɛ akɛ “shikpɔŋ lɛ nɔ maŋtsɛmɛi lɛ,” loo je nɛŋ maŋkwramɔŋ hemɛi lɛ kɛ lɛ ‘bɔ ajwamaŋ.’ Ejwamaŋbɔɔ lɛ kɔɔ kpaŋmɔ ni ekɛ je nɛŋ nɔyelɔi lɛ fee lɛ he, ni no tsɔɔ nɔ hewɔ ni atsɛɔ lɛ “ajwamaŋ kpeteŋkpele lɛ.”Kpojiemɔ 17:1, 2; Yakobo 4:4.

Babilon Kpeteŋkpele lɛ nyɛŋ afee jarayeli maŋtsɛyeli, ejaakɛ “shikpɔŋ lɛ nɔ jarayelɔi” ni damɔ shi kɛha jarayeli gbɛjianɔtoi lɛ baaye ehe ŋkɔmɔ kɛji akɛ akpata ehiɛ. Anɔkwa sane ji akɛ, awie maŋtsɛmɛi lɛ kɛ jarayelɔi lɛ fɛɛ ahe akɛ amɛdamɔ “sɛɛ fɛlɛŋŋ” amɛmiikwɛ Babilon Kpeteŋkpele lɛ. (Kpojiemɔ 18:3, 9, 10, 15-17) No hewɔ lɛ, nilee yɛ mli akɛ wɔɔmu sane naa akɛ Babilon Kpeteŋkpele lɛ jeee maŋkwramɔŋ loo jarayeli maŋtsɛyeli, shi moŋ eji jamɔŋ maŋtsɛyeli.

Wiemɔ ni tsɔɔ akɛ elakaa maji lɛ fɛɛ kɛtsɔ ‘ekunyaayeli’ lɛ nɔ lɛ hu maa nɔ mi akɛ Babilon Kpeteŋkpele lɛ ji jamɔŋ maŋtsɛyeli. (Kpojiemɔ 18:23) Akɛni ŋkunyaayeli henɔi fɛɛ jɛ jamɔ kɛ daimonioi ahewalɛ mli hewɔ lɛ, ebɛ naakpɛɛ mɔ ákɛ Biblia lɛ tsɛ́ Babilon Kpeteŋkpele lɛ akɛ “daimonioi ashihilɛhe.” (Kpojiemɔ 18:2; 5 Mose 18:10-12) Awie maŋtsɛyeli nɛɛ hu he akɛ ekɛ ekãa teɔ shi ewoɔ anɔkwa jamɔ, ni ewaa “gbalɔi” kɛ “krɔŋkrɔŋbii” lɛ ayi. (Kpojiemɔ 18:24) Yɛ anɔkwale mli lɛ, Babilon Kpeteŋkpele lɛ yɛ hetsɛ̃ kpele kɛha anɔkwa jamɔ aahu akɛ ekɛ yiwalɛ waa “Yesu he odasefoi lɛ” ayi ni egbeɔ amɛ po. (Kpojiemɔ 17:6) No hewɔ lɛ, eyɛ faŋŋ akɛ yoo ni atsɛɔ lɛ Babilon Kpeteŋkpele lɛ damɔ shi kɛha jeŋ apasa jamɔ maŋtsɛyeli, ni jamɔi fɛɛ ni teɔ shi amɛwoɔ Yehowa Nyɔŋmɔ lɛ hu fata he.