Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mɛni Biblia lɛ Tsɔɔ Diɛŋtsɛ?

 YITSO NƐƐHU

Ani “Naagbee Gbii lɛ” Amli Wɔyɔɔ Lɛ?

Ani “Naagbee Gbii lɛ” Amli Wɔyɔɔ Lɛ?
  • Mɛɛ nibii ni yaa nɔ yɛ wɔgbii nɛɛ amli agba he sane afɔ̃ shi yɛ Biblia lɛ mli?

  • Mɛɛ subaŋ Nyɔŋmɔ Wiemɔ lɛ kɛɔ akɛ gbɔmɛi baajie lɛ kpo yɛ “naagbee gbii lɛ” amli?

  • Mɛɛ nibii kpakpai Biblia lɛ gba efɔ̃ shi yɛ “naagbee gbii lɛ” ahe?

1. Nɛgbɛ wɔbaanyɛ wɔkase nibii ni baaba wɔsɛɛ lɛ ahe saji yɛ?

ANI obo saji ni yaa nɔ yɛ je lɛŋ lɛ atoi yɛ tɛlivishiŋ loo redio nɔ, ni obi ohe akɛ, ‘Mɛni baa je lɛ nɔ nɛɛ?’ Yɛ osharai ni baa trukaa ni akpaaa gbɛ lɛ ahewɔ lɛ, adesa ko bɛ ni baanyɛ atsɔɔ nɔ ni baaba wɔsɛɛ. (Yakobo 4:14) Shi kɛlɛ, Yehowa le nɔ ni baaba wɔsɛɛ. (Yesaia 46:10) Jeee nibii fɔji ni yaa nɔ yɛ wɔgbii nɛɛ amli lɛ pɛ e-Wiemɔ ni ji Biblia lɛ jɛ jeeŋmɔ egba he sane efɔ̃ shi, shi moŋ egba nibii ni yɔɔ miishɛɛ ni etsɛŋ ni ebaaba lɛ hu he sane efɔ̃ shi.

2, 3. Mɛɛ sane Yesu kaselɔi lɛ bi lɛ, ni te eha hetoo eha tɛŋŋ?

2 Yesu Kristo wie Nyɔŋmɔ Maŋtsɛyeli ni kɛ efɔŋfeemɔ baaba naagbee, ni efee shikpɔŋ lɛ paradeiso lɛ he. (Luka 4:43) Gbɔmɛi miisumɔ ni amɛle be mli ni Maŋtsɛyeli nɛɛ baaba. Yɛ anɔkwale mli lɛ, Yesu kaselɔi lɛ bi lɛ akɛ: “Mɛni ji obaa lɛ kɛ je nɛŋ naagbee lɛ he okadi?” (Mateo 24:3) Yɛ hetoohamɔ mli lɛ, Yesu ha amɛle akɛ Yehowa Nyɔŋmɔ pɛ ji mɔ ni le be pɔtɛɛ ni je nɛɛ naagbee lɛ baaba. (Mateo 24:36) Shi, Yesu gba nibii ni baatsɔ hiɛ aba shikpɔŋ lɛ nɔ dani Maŋtsɛyeli lɛ kɛ anɔkwa toiŋjɔlɛ kɛ shweshweeshwe shihilɛ abaha adesai  lɛ ahe sane efɔ̃ shi. Nibii ni egba amɛhe saji efɔ̃ shi lɛ miiya nɔ amrɔ nɛɛ!

3 Dani wɔɔpɛi odaseyelii ni tsɔɔ akɛ “je nɛɛ naagbee lɛ” mli wɔyɔɔ lɛ mli lɛ, ha wɔsusu ta ko ni awu ni adesa enaaa lɛ he kuku. Awu ta nɛɛ yɛ ŋwɛi mumɔi ashihilɛhe ni anaaa jɛmɛ nii lɛ, ni nɔ ni jɛ mli ba lɛ saa wɔhe.

TA KO NI AWU YƐ ŊWƐI

4, 5. (a) Beni awó Yesu akɛ Maŋtsɛ yɛ ŋwɛi etsɛɛɛ nɔŋŋ lɛ mɛni ba? (b) Taakɛ Kpojiemɔ 12:12 lɛ tsɔɔ lɛ, mɛni baajɛ ta ni te shi yɛ ŋwɛi lɛ mli aba?

4 Yitso ni tsɔ enɛ hiɛ lɛ ha wɔle akɛ Yesu Kristo batsɔ Maŋtsɛ yɛ ŋwɛi yɛ afi 1914 mli. (Daniel 7:13, 14) Beni Yesu nine shɛ Maŋtsɛyeli hewalɛ nɔ sɛɛ etsɛɛɛ kɛkɛ ni ekɛ ehe wo nifeemɔ ko mli. Biblia lɛ kɛɔ akɛ: “Ta te shi yɛ ŋwɛi. Mikael [gbɛi kroko ni akɛtsɛɔ Yesu] kɛ ebɔfoi lɛ fã drako lɛ [Satan Abonsam] nɔ ta. Ni drako lɛ bɔfoi lɛ fata ehe kɛwu.” * Aye Satan kɛ ebɔfoi fɔji ni ji daimonioi lɛ anɔ kunim yɛ nakai ta lɛ mli, ni ashɛrɛ amɛ ashwie kɛjɛ ŋwɛi kɛba shikpɔŋ lɛ nɔ. Nyɔŋmɔ mumɔŋ bɔɔ nii loo bɔfoi anɔkwafoi lɛ amli fili amɛ akɛ ashɛrɛ Satan kɛ edaimonioi lɛ ashwie. Shi kɛlɛ, adesai naŋ miishɛɛ ni tamɔ nakai. Yɛ no najiaŋ lɛ, Biblia lɛ gba efɔ̃ shi akɛ: “Kpóo ha mɛi ni yɔɔ shikpɔŋ lɛ nɔ . . . lɛ! ejaakɛ abonsam lɛ ekpeleke shi kɛba nyɛŋɔɔ, egiri naakpa, ni ele akɛ be fioo kɛkɛ eyɔɔ.”Kpojiemɔ 12:7, 9, 12.

5 Ofainɛ kadimɔ nɔ ni baajɛ ŋwɛi ta lɛ mli aba lɛ. Satan mli baafũ, ni ekɛ haomɔi loo naagbai baaba mɛi ni yɔɔ shikpɔŋ lɛ nɔ lɛ anɔ. Taakɛ obaana lɛ, nakai haomɔ be lɛ mli wɔyɔɔ amrɔ nɛɛ. Shi, esɛɛ etsɛŋ kwraa—eji “be fioo kɛkɛ.” Satan diɛŋtsɛ po le nakai. Biblia lɛ tsɛɔ nɛkɛ be nɛɛ akɛ “naagbee gbii.” (2 Timoteo 3:1) Kwɛ bɔ ni wɔmii baanyɛ ashɛ  wɔhe aha akɛ etsɛŋ ni Nyɔŋmɔ baafo hewalɛ fɔŋ ni Abonsam náa yɛ shikpɔŋ lɛ nɔ lɛ sɛɛ! Ha wɔsusu nibii ni agba he sane afɔ̃ shi yɛ Biblia lɛ mli ni miiya nɔ amrɔ nɛɛ ekomɛi ahe wɔkwɛ. Nibii nɛɛ yeɔ he odase akɛ wɔyɛ naagbee gbii lɛ amli, ni ákɛ etsɛŋ ni Nyɔŋmɔ Maŋtsɛyeli lɛ kɛ naanɔ jɔɔmɔi baaduro mɛi ni sumɔɔ Yehowa lɛ. Klɛŋklɛŋ lɛ, ha wɔpɛi okadi ni Yesu kɛɛ no baakadi be ni wɔyɔɔ mli nɛɛ lɛ ahe nibii ejwɛ komɛi amli wɔkwɛ.

NIBII TITRII NI BAAYA NƆ YƐ NAAGBEE GBII LƐ AMLI

6, 7. Yesu wiemɔi ni kɔɔ tai kɛ hɔmɔ he lɛ miiba mli ŋmɛnɛ yɛ mɛɛ gbɛ nɔ?

6 “Maŋ aaate shi awo maŋ, ni maŋtsɛyeli aaate shi awo maŋtsɛyeli.” (Mateo 24:7) Yɛ afii 100 ni eho lɛ mli lɛ, agbe gbɔmɛi akpekpei abɔ yɛ tai amli. Britania yinɔsaneŋmalɔ ko ŋma akɛ: “Yinɔsaji ni aŋmala ashwie shi lɛ tsɔɔ akɛ, afi 1900 afii lɛ ji afii ni agbe gbɔmɛi yɛ mli fe fɛɛ. . . . Eji afii 100 ko ní atee nɔ awu ta yɛ mli fɛɛ, ni bei fioo ko pɛ ho ni awuuu ta.” Amaniɛbɔɔ ko ni jɛ Worldwatch Institute lɛ tsɔɔ mli akɛ: “Gbɔmɛi ni gboi yɛ tai amli yɛ [afii ohai 20] lɛ mli lɛ ayifalɛ shɛɔ gbɔmɛi ni gboi yɛ tai fɛɛ ni awu kɛjɛ klɛŋklɛŋ afii 100 Ŋ.B. kɛyashi afi 1899 lɛ mli lɛ toi etɛ.” Kɛjɛ afi 1914 kɛbaa nɛɛ, gbɔmɛi ni fa fe akpekpei 100  egboi yɛ tai amli. Kɛji akɛ wɔsuɔlɔ ko po egbo yɛ ta mli dã lɛ, amanehulu kɛ nɔnaa ni ba gbɔmɛi akpekpei abɔ ni amɛsuɔlɔi gboi yɛ ta mli lɛ anɔ lɛ naa wa waa bɔ ni wɔjwɛŋmɔ nyɛŋ ashɛ he.

7 ‘Hɔ̃ji baaba.’ (Mateo 24:7) Niiamlitaolɔi kɛɔ akɛ niyenii ni anaa lɛ etee hiɛ babaoo yɛ afii 30 ni eho lɛ mli. Kɛlɛ hɔmɔ yɛ lolo, ejaakɛ mɛi babaoo bɛ shika ni amɛkɛaahé niyenii loo amɛbɛ shikpɔŋ ni amɛaadu nii yɛ nɔ. Yɛ maji ni kpaako amɛnáa hiɛyaa lɛ amli lɛ, shika ni aŋkroaŋkroi ni fa fe akpekpei akpe kome náa kɛheɔ nii daa gbi ji dɔla kome loo nɔ ni shɛɛɛ nakai. Hɔmɔ yeɔ gbɔmɛi nɛɛ ateŋ mɛi babaoo daa. World Health Organization (Jeŋ Hewalɛnamɔ Gbɛjianɔtoo) lɛ bu akɔntaa akɛ, niyenii kpakpa ni fa ní gbekɛbii náaa aye lɛ ji nɔ titri ni gbeɔ amɛteŋ mɛi ni fa fe akpekpei enumɔ daa afi.

8, 9. Mɛni tsɔɔ akɛ Yesu gbalɛ ni kɔɔ shikpɔŋhosomɔi kɛ gbele helai ahe lɛ eba mli anɔkwale?

8 “Shikpɔŋhosomɔi ni naa wa aaaba.” (Luka 21:11) Taakɛ U.S. Geological Survey (U.S. Nitsumɔhe ni Kaseɔ Tɛi Ahe Nii) lɛ tsɔɔ lɛ, kɛji aja shikpɔŋhosomɔi ni eba kɛjɛ afi 1990 kɛbaa lɛ pɛ amli lɛ, daa afi lɛ, shikpɔŋhosomɔi 17 ni naa wawai ní fiteɔ tsũi ní agbɛnɛ hu ehaa shikpɔŋ gbálaa lɛ baa. Ni kɛ́ aja mli lɛ, daa afi lɛ, shikpɔŋhosomɔi  ni naa wawai ní nyɛɔ ekumɔɔ tsũi eshwieɔ shi baa. Nitsumɔhe kroko hu tsɔɔ mli akɛ: “Shikpɔŋhosomɔi egbe gbɔmɛi akpei ohai abɔ yɛ nyɛsɛɛ afii 100 lɛ mli, ni hiɛyaai ni aná yɛ tsɔnei ahe nilee mli lɛ eha gbɔmɛi ni gboiɔ lɛ ayibɔ lɛ nɔ egbɔ fioo pɛ.”

9 ‘Gbele helai baaba.’ (Luka 21:11) Yɛ hiɛ ni atee yɛ tsofafeemɔ mli lɛ fɛɛ sɛɛ lɛ, helai heei kɛ helai memeji fɛɛ haoɔ adesai. Amaniɛbɔɔ ko tsɔɔ akɛ helai 20 komɛi ni ale jogbaŋŋ tamɔ wɔlɔmɔ fɔŋ, atridii, kɛ musuŋtsɔmɔ hela ni gbeɔ mɔ lɛ egbɛ eshwã he fɛɛ he yɛ nyɛsɛɛ afii nɛɛ amli—ni ewa waa ákɛ akɛ tsofai aaatsá helai nɛɛ ateŋ ekomɛi. Yɛ anɔkwale mli lɛ, kɛ́ hooo kwraa lɛ helai heei 30 eba shihilɛ mli. Ekomɛi gbeɔ mɔ, ni abɛ amɛnaa tsabaa.

GBƆMƐI NI YƆƆ NAAGBEE GBII NƐƐ AMLI

10. Mɛɛ sui ní agba he sane afɔ̃ shi yɛ 2 Timoteo 3:1-5 lɛ onaa yɛ gbɔmɛi ahe ŋmɛnɛ?

10 Kɛfata nibii komɛi ni baaya nɔ yɛ je lɛ mli ni Biblia lɛ wie he lɛ ahe lɛ, egba adesai asu ní baatsake yɛ naagbee gbii lɛ amli lɛ hu he sane efɔ̃ shi. Bɔfo Paulo tsɔɔ bɔ ni gbɔmɛi asubaŋ baaji aha lɛ mli. Wɔkaneɔ yɛ 2 Timoteo 3:1-5 lɛ akɛ: “Naagbee gbii lɛ anɔ lɛ jaramɔ bei baaba.” Yɛ gbɛ ko nɔ lɛ, Paulo kɛɛ gbɔmɛi baatsɔmɔ

  •   hesuɔlɔi

  • shika suɔlɔi

  • fɔlɔi anɔ toigbolɔi

  • mɛi ni yeee anɔkwa

  • mɛi ni edɔɔɔ mɔ he

  • mɛi ni nyɛɛɛ amɛkɔnɔ nɔ amɛye

  • mɛi ni hiɛ yɔɔ la

  • mɛi ni sumɔɔ shwɛmɔ kɛ ŋɔɔmɔ fe Nyɔŋmɔ

  • mɛi ni hiɛ Nyɔŋmɔ jamɔ su, shi amɛkwa emli hewalɛ lɛ

11. Te Lala 92:8 lɛ tsɔɔ nɔ ni baaba mɛi fɔji lɛ anɔ lɛ mli ehaa tɛŋŋ?

11 Ani okutsoŋbii lɛ asubaŋ tamɔ nakai? Ŋwanejee ko bɛ he akɛ nakai eji. Gbɔmɛi ni yɔɔ sui gbohii yɛ he fɛɛ he. Enɛ tsɔɔ akɛ etsɛŋ ni Nyɔŋmɔ baafee he nɔ ko, ejaakɛ Biblia lɛ kɛɔ akɛ: “Kɛ́ mɛi fɔji miifũ gblɔ̃gblɔ̃ tamɔ jwɛi, ni mɛi ni tsuɔ nishaianii lɛ miifrɔke lɛ, afee koni akpata amɛhiɛ kwrakwra.”Lala 92:8.

NIBII KPAKPAI NÍ BAABA!

12, 13. Mɛɛ gbɛ nɔ ‘anɔkwa nilee’ efa yɛ nɛkɛ “naagbee be” nɛɛ mli?

12 Eji anɔkwale akɛ naagbee gbii lɛ amli eyi obɔ kɛ haomɔi, taakɛ Biblia lɛ gba fɔ̃ shi lɛ pɛpɛɛpɛ. Shi kɛlɛ, nibii kpakpai miiya nɔ yɛ Yehowa jálɔi ateŋ yɛ nɛkɛ jeŋ ni haomɔ yɔɔ mli nɛɛ mli.

 13 Biblia mli wolo ni ji Daniel lɛ gba akɛ: ‘Anɔkwa nilee aaafá.’ Mɛɛ be enɛ baaba mli? Yɛ “naagbee be lɛ” mli. (Daniel 12:4) Titri lɛ, kɛjɛ afi 1914 kɛbaa nɛɛ lɛ, Yehowa eye ebua mɛi ni sumɔɔ koni amɛsɔmɔ lɛ yɛ anɔkwayeli mli lɛ koni shishinumɔ ni amɛyɔɔ yɛ Biblia lɛ mli lɛ aya hiɛ. Amɛná anɔkwalei ni nɔ bɛ ni tsɔɔ Nyɔŋmɔ gbɛi kɛ eyiŋtoi, Yesu Kristo kpɔmɔ afɔleshãa lɛ, shihilɛ mli ni gbohii lɛ yɔɔ, kɛ gbohiiashitee lɛ ahe shishinumɔ ni mli kwɔ. Kɛfata he lɛ, Yehowa jálɔi ekase bɔ ni amɛaafee amɛhi shi koni amɛshihilɛ he aba sɛɛnamɔ kɛha amɛ ni ekɛ yijiemɔ hu abaha Nyɔŋmɔ. Kɛfata he lɛ, amɛná nɔ ni Nyɔŋmɔ Maŋtsɛyeli lɛ baatsu kɛ bɔ ni ebaatsu shihilɛ ni yɔɔ shikpɔŋ nɔ lɛ he nii eha lɛ ahe shishinumɔ ni yɔɔ faŋŋ. Mɛni ji nɔ ni amɛkɛ nilee nɛɛ tsuɔ? Sanebimɔ nɛɛ gbalaa wɔjwɛŋmɔ kɛbaa gbalɛ kroko ni miiná emlibaa yɛ nɛkɛ naagbee gbii nɛɛ amli lɛ nɔ.

“Aaashiɛ maŋtsɛyeli lɛ he sane kpakpa nɛɛ atsɔɔ je nɛŋ fɛɛ.”Mateo 24:14

14. Nɛgbɛ Maŋtsɛyeli lɛ he sanekpakpa ni ashiɛɔ lɛ eyashɛ ŋmɛnɛ, ni namɛi ji shiɛlɔi lɛ?

14 Yesu Kristo wie yɛ egbalɛ ni kɔɔ “je nɛŋ naagbee lɛ” he lɛ mli akɛ: ‘Abaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ.’ (Mateo 24:3, 14) Aashiɛ Maŋtsɛyeli lɛ he sanekpakpa lɛ—nɔ ni Maŋtsɛyeli lɛ ji, nɔ ni ebaafee, kɛ bɔ ni wɔɔfee ni wɔnine ashɛ emli jɔɔmɔi lɛ eko nɔ—yɛ je lɛŋ fɛɛ yɛ shikpɔji ni fa fe 230 nɔ, kɛ yɛ wiemɔi srɔtoi fe 400 mli. Yehowa Odasefoi akpekpei abɔ kɛ ekãa shiɛɔ Maŋtsɛyeli lɛ he sanekpakpa lɛ. Amɛjɛ “jeŋmaŋ fɛɛ jeŋmaŋ kɛ akutsei kɛ maji kɛ majianɔ wiemɔi amli.” (Kpojiemɔ 7:9) Odasefoi lɛ kɛ mɛi akpekpei abɔ ni miisumɔ koni amɛle nɔ ni Biblia lɛ tsɔɔ diɛŋtsɛ lɛ feɔ shia Biblia mli nikasemɔ ni amɛheee nɔ ko. Kwɛ bɔ ni gbalɛ nɛɛ mlibaa yɔɔ naakpɛɛ ha, titri lɛ akɛni Yesu gba akɛ anɔkwa Kristofoi baafee “mɛi ni gbɔmɛi fɛɛ nyɛ̃ɔ amɛ” lɛ hewɔ!Luka 21:17.

 MƐNI OBAAFEE?

15. (a) Ani oheɔ oyeɔ akɛ wɔyɛ naagbee gbii lɛ amli, ni mɛni hewɔ? (b) Mɛni “naagbee” lɛ baatsɔɔ kɛha mɛi ni teɔ shi amɛwoɔ Yehowa kɛ mɛi hu ni baa amɛhe shi amɛhaa Nyɔŋmɔ Maŋtsɛyeli nɔyeli lɛ?

15 Akɛni Biblia mli gbalɛi babaoo miiná amɛmlibaa ŋmɛnɛ hewɔ lɛ, ani okpɛlɛɛɛ nɔ akɛ naagbee gbii lɛ amli wɔyɔɔ lɛ? Kɛ́ áshiɛ sanekpakpa lɛ kɛyashɛ he ni sa Yehowa hiɛ lɛ, “naagbee” lɛ baaba. (Mateo 24:14) “Naagbee” lɛ tsɔɔ be mli ni Nyɔŋmɔ baajie efɔŋfeemɔ kɛjɛ shikpɔŋ lɛ nɔ. Yehowa kɛ Yesu kɛ bɔfoi ni he wa lɛ baatsu nii kɛkpata mɛi fɛɛ ni jɛɔ amɛsuɔmɔ mli amɛteɔ shi amɛwoɔ Lɛ lɛ ahiɛ. (2 Tesalonikabii 1:6-9) Satan kɛ edaimonioi lɛ eshishiuŋ jeŋmaji lɛ dɔŋŋ. No sɛɛ lɛ, Nyɔŋmɔ Maŋtsɛyeli lɛ baafɔse jɔɔmɔi ashwie mɛi fɛɛ ni baa amɛhe shi amɛhaa ejalɛ nɔyeli lɛ anɔ.Kpojiemɔ 20:1-3; 21:3-5.

16. Mɛni ji nɔ ni nilee yɔɔ mli akɛ ooofee?

16 Akɛni Satan gbɛjianɔtoo lɛ ebɛŋkɛ enaagbee hewɔ lɛ, ehe miihia ni wɔbi wɔhe akɛ, ‘Mɛni esa akɛ mafee?’ Nilee yɛ mli akɛ wɔɔya nɔ wɔkase Yehowa kɛ nibii ni etaoɔ kɛjɛɔ wɔdɛŋ lɛ ahe nii babaoo. (Yohane 17:3) Okɛ hiɛdɔɔ akase Biblia lɛ. Ha efee osu akɛ okɛ mɛi krokomɛi ni sumɔɔ akɛ amɛfee Yehowa suɔmɔnaa nii lɛ baabɔ daa. (Hebribii 10:24, 25) Bɔɔ mɔdɛŋ ni oná nilee babaoo ní Yehowa Nyɔŋmɔ kɛhaa gbɔmɛi yɛ jeŋ fɛɛ lɛ eko, ni ofee tsakemɔi ni esa akɛ ofee yɛ oshihilɛ mli lɛ, koni oná Nyɔŋmɔ hiɛ duromɔ.Yakobo 4:8.

17. Mɛni hewɔ mɛi fɔji lɛ ahiɛkpatamɔ baati mɛi babaoo ashi trukaa lɛ?

17 Yesu gba akɛ mɛi babaoo baakpoo odaseyeli ni tsɔɔ akɛ naagbee gbii lɛ amli wɔyɔɔ lɛ. Mɛi fɔji ahiɛkpatamɔ lɛ baaba trukaa yɛ be ni amɛkpaaa gbɛ mli. Ebaati mɛi babaoo ashi trukaa taakɛ julɔ baa nyɔɔŋ lɛ. (1 Tesalonikabii 5:2) Yesu bɔ kɔkɔ akɛ: “Bɔ ni Noa gbii lɛ fee lɛ, nakai gbɔmɔ bi lɛ baa lɛ hu baatamɔ. Ejaakɛ bɔ ni yɔɔ yɛ gbii ni nyiɛ nu afua lɛ hiɛ  lɛ amli, ni mɛi lɛ hiɛ niyeli kɛ ninumɔ kɛ yoowɛɛ kɛ gbalahamɔ mli aahu kɛyashi gbi ni Noa yabote adeka lɛ mli, ni amɛhiɛ bɛ amɛhe nɔ kɛyashi nu afua lɛ baloo amɛ fɛɛ kɛtee lɛ, nakai nɔŋŋ gbɔmɔ bi lɛ baa lɛ aaatamɔ.”Mateo 24:37-39.

18. Mɛɛ Yesu kɔkɔbɔɔ esa akɛ wɔbo toi?

18 No hewɔ lɛ, Yesu kɛɛ etoibolɔi lɛ akɛ: “Nyɛhiɛ ahia nyɛhe nɔ, koni fufeemɔ kɛ dãatɔɔ kɛ daaŋ-ŋmaa he haomɔi akahe nyɛtsuii, ni nakai gbi lɛ miibati nyɛ shi trukaa; ejaakɛ ebaaba mɛi fɛɛ ni hiɔ shikpɔŋ muu lɛ fɛɛ nɔ lɛ anɔ tamɔ tsɔne. No hewɔ lɛ nyɛsaraa be fɛɛ be ní nyɛsɔlea, koni nyɛnyɛ nii ni baaba nɛɛ fɛɛ mli nyɛje, ní nyɛnyɛ gbɔmɔ bi lɛ hiɛ nyɛdamɔ.” (Luka 21:34-36) Nilee yɛ mli akɛ wɔɔbo Yesu wiemɔi lɛ atoi. Mɛni hewɔ? Ejaakɛ mɛi ni Yehowa Nyɔŋmɔ kɛ Yesu Kristo ni ji “gbɔmɔ bi” lɛ kpɛlɛɔ amɛnɔ lɛ yɛ hiɛnɔkamɔ akɛ amɛbaaje hiɛkpatamɔ ni baa Satan nibii agbɛjianɔtoo lɛ nɔ lɛ mli shweshweeshwe, ni amɛbaahi shi kɛya naanɔ yɛ jeŋ hee ni yɔɔ miishɛɛ ni ebɛŋkɛ kpaakpa lɛ mli!Yohane 3:16; 2 Petro 3:13.

^ kk. 4 Kɛ́ ootao saji ni tsɔɔ akɛ Mikael ji gbɛi kroko ni akɛtsɛɔ Yesu Kristo lɛ, no lɛ kwɛmɔ Saji Krokomɛi ni Fata He lɛ ni yɔɔ baafa 218-219 lɛ mli.

Ekrokromɛi Hu Nɛ

Mɛni Hewɔ Esa akɛ Okase Biblia Lɛ?

Biblia lɛ miiye miibua mɛi akpekpei komɛi ni yɔɔ jeŋ fɛɛ lɛ kɛmiiná shihilɛ mli sanebimɔi titrii lɛ ahetoo. Ani obaasumɔ ni ofata mɛi nɛɛ ahe?