Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mɛni Biblia lɛ Tsɔɔ Diɛŋtsɛ?

 SAJI KROKOMƐI NI FATA HE

Ani Esa akɛ Wɔkɛ Wɔhe Awo Gbijurɔyelii Amli?

Ani Esa akɛ Wɔkɛ Wɔhe Awo Gbijurɔyelii Amli?

JAMƆŊ kɛ je lɛŋ gbii juji ni ehe gbɛi ni ayeɔ yɛ je lɛ mli hei babaoo ŋmɛnɛ lɛ jɛɛɛ Biblia lɛ mli. Belɛ, nɛgbɛ gbijurɔyelii nɛɛ jɛ kɛba? Kɛji akɛ obaanyɛ oyatao nibii amli yɛ wojiatoohe lɛ, obaaná nɔ ni niiamlitaomɔ woji kɛɔ yɛ gbii juji ni ayeɔ yɛ he ni  oyɔɔ lɛ he lɛ he miishɛɛ. Susumɔ nɔkwɛmɔnii fioo komɛi ahe okwɛ.

Easter. The Encyclopædia Britannica lɛ kɛɔ akɛ: “Nɔ ko bɛ ni tsɔɔ akɛ aye Easter gbi jurɔ yɛ Kpaŋmɔ Hee lɛ mli.” Te fee tɛŋŋ ni Easter je shishi? Ejɛ wɔŋjamɔ mli. Eyɛ mli akɛ akɛɔ ákɛ akɛ gbi jurɔ nɛɛ yeli miikai Yesu shitee lɛ moŋ, shi kusumii ni afeɔ yɛ Easter be lɛ mli lɛ jeee Kristofoi anifeemɔ. Ákɛ nɔkwɛmɔnɔ lɛ, The Catholic Encyclopedia lɛ wie “Easter kpɛŋkpɛlɛ” ni ehe gbɛi waa lɛ he akɛ: “Kpɛŋkpɛlɛ ji wɔŋjamɔ he okadi, ni be fɛɛ be lɛ akɛtsuɔ nii akɛ bii afɔmɔ he okadi.”

Afi Hee Gbijurɔyelii. Gbi kɛ kusumii ni kɔɔ Afi Hee Gbijurɔyelii ahe lɛ yɛ srɔto yɛ maŋ fɛɛ maŋ nɔ. The World Book Encyclopedia lɛ wie he ni gbijurɔyeli nɛɛ jɛ kɛba lɛ he akɛ: “Roma nɔyelɔ Julius Caesar ji mɔ ni to January 1 lɛ akɛ Afi Hee Gbi yɛ afi 46 Ŋ.B. Romabii lɛ jɔɔ gbi nɛɛ nɔ amɛha Janus ni ji agbói, shinaai, kɛ nibii ashishijee anyɔŋmɔ lɛ. Akɛ Janus, ni yɔɔ hiɛi enyɔ—ni ekome miikwɛ hiɛgbɛ ni ekroko lɛ hu miikwɛ esɛɛgbɛ lɛgbɛi wo nyɔŋ ni ji January lɛ.” No hewɔ lɛ, aná Afi Hee Gbijurɔyelii lɛ kɛjɛ wɔŋjalɔi akusum nifeemɔi amli.

Halloween (Gbohii lɛ Agbi Jurɔ). The Encyclopedia Americana lɛ kɛɔ akɛ: “Kusumii ni afeɔ yɛ Gbohii lɛ Agbijurɔyeli mli lɛ ná eshishifã kɛjɛ Druid [ni ji blema Celtbii asɔfoyeli lɛ] kusum ni afeɔ yɛ be ni tsɔ Kristofoi abe lɛ hiɛ lɛ mli. Celtbii lɛ yɛ gbii juji enyɔ ni amɛyeɔ amɛhaa amɛnyɔŋmɔi titrii enyɔ, ni ji hulu nyɔŋmɔ kɛ gbohii anyɔŋmɔ . . . , mɔ ni ayeɔ egbi jurɔ lɛ yɛ November 1 ni ji gbi ni jeɔ Celtbii lɛ Afi Hee lɛ shishi lɛ. Fiofio lɛ akɛ gbohii ahe gbi jurɔ ni ayeɔ lɛ bafata Kristofoi akusumii ahe.”

Gbii Juji Krokomɛi. Wɔnyɛŋ wɔwie gbii juji ni ayeɔ yɛ je lɛŋ fɛɛ lɛ ahe. Shi kɛlɛ, Yehowa ekpɛlɛɛɛ gbii juji ni woɔ adesai loo adesai agbɛjianɔtoi ahiɛ nyam lɛ anɔ. (Yeremia 17:5-7; Bɔfoi lɛ Asaji 10:25, 26) Ha ehi ojwɛŋmɔ mli hu akɛ, hei ni aná jamɔŋ gbii juji lɛ kɛjɛ lɛ hu baatsɔɔ kɛji amɛsaa Nyɔŋmɔ hiɛ loo amɛsaaa ehiɛ. (Yesaia 52:11; Kpojiemɔ 18:4) Biblia mli shishitoo mlai ni atsĩ tã yɛ wolo nɛɛ Yitso 16 lɛ baanyɛ aye abua bo koni ona bɔ ni Nyɔŋmɔ buɔ he ni akɛwoɔ je lɛŋ gbii juji ayeli mli lɛ ehaa.