Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 114: Efɔŋfeemɔ Fɛɛ Naagbee

Biblia Mli Sane 114: Efɔŋfeemɔ Fɛɛ Naagbee

MƐNI onaa yɛ biɛ lɛ? Hɛɛ, tatsɛmɛi ni tara okpɔŋɔi yɛji anɔ. Shi kadimɔ he ni amɛjɛɔ kɛbaa lɛ. Okpɔŋɔi lɛ miitumɔ kɛmiijɛ ŋwɛi kɛmiikpeleke shi yɛ atatui lɛ anɔ! Ani okpɔŋɔi diɛŋtsɛ yɛ ŋwɛi?

Yesu miiye nɔ akɛ Maŋtsɛ yɛ ŋwɛi

Dabi, jeee okpɔŋɔi diɛŋtsɛ nɛ. Wɔle enɛ ejaakɛ okpɔŋɔi nyɛŋ ajo foi yɛ atatui anɔ, aloo amɛbaanyɛ? Shi Biblia lɛ wieɔ okpɔŋɔi ahe yɛ ŋwɛi. Ani ole nɔ hewɔ ni ewieɔ he lɛ?

Nɔ hewɔ ji akɛ, tsutsu ko lɛ akɛ okpɔŋɔi tsu nii waa ni akɛwu tai. No hewɔ lɛ Biblia lɛ wieɔ mɛi ni tara okpɔŋɔi anɔ kɛmiijɛ ŋwɛi kɛmiikpeleke shi lɛ ahe koni ekɛtsɔɔ akɛ Nyɔŋmɔ yɛ ta ni ekɛ gbɔmɛi ni yɔɔ shikpɔŋ nɛɛ nɔ lɛ baawu. Ani ole bɔ ni atsɛɔ he ni abaawu nɛkɛ ta nɛɛ yɛ lɛ? Harmagedon. Nakai ta lɛ baakpata efɔŋfeemɔ fɛɛ hiɛ yɛ shikpɔŋ lɛ nɔ.

Yesu ji Mɔ ni baanyiɛ ta ni abaawu yɛ Harmagedon nɛɛ hiɛ. Kaimɔ akɛ, Yesu ji mɔ ni Yehowa ehala lɛ akɛ eye maŋtsɛ yɛ E-nɔyeli lɛ nɔ. No hewɔ ni Yesu bú maŋtsɛ fai lɛ. Ni klante ni ehiɛ lɛ tsɔɔ akɛ ebaakpãta Nyɔŋmɔ henyɛlɔi fɛɛ ahiɛ. Ani esa akɛ efee wɔ naakpɛɛ akɛ Nyɔŋmɔ baakpata gbɔmɛi fɔji fɛɛ ahiɛ?

Kuu osɛɛ ni okwɛ Sane ni Ji 10 lɛ. Mɛni onaa yɛ jɛmɛ? Hɛɛ, Nu Afua kpeteŋkpele ni kpata gbɔmɛi fɔji ahiɛ lɛ. Namɔ ha Nu Afua lɛ ba? Yehowa Nyɔŋmɔ. Agbɛnɛ kwɛmɔ Sane ni Ji 15 lɛ. Mɛni afeɔ yɛ jɛmɛ lɛ? Akɛ la ni Yehowa tsu kɛba lɛ miikpata Sodom kɛ Gomora hiɛ.

Gbelemɔ kɛya Sane ni Ji 33 lɛ. Kwɛmɔ nɔ ni afeɔ Mizraimbii lɛ okpɔŋɔi kɛ ta shwiilii lɛ. Namɔ ha nu lɛ ku esɛɛ ni ebaloo amɛ lɛ? Yehowa. Efee nakai koni ekɛbu ewebii lɛ ahe. Kwɛmɔ Sane ni Ji 76 lɛ. Obaana yɛ jɛmɛ akɛ Yehowa ŋmɛ gbɛ ni akpata ewebii, ni ji Israelbii lɛ po ahiɛ, yɛ amɛ nɔ fɔŋ feemɔ lɛ hewɔ.

No hewɔ lɛ, belɛ, esaaa akɛ efeɔ wɔ naakpɛɛ akɛ Yehowa baatsu eŋwɛi tatsɛmɛi lɛ koni amɛkɛ efɔŋfeemɔ fɛɛ aba naagbee yɛ shikpɔŋ nɛɛ nɔ. Shi susumɔ nɔ ni ebaatsɔɔ lɛ he okwɛ! Gbelemɔ baafa ni nyiɛ sɛɛ lɛ ni wɔkwɛ.

Kpojiemɔ 16:16; 19:11-16.



Sanebimɔi

  • Mɛni hewɔ Biblia lɛ wieɔ okpɔŋɔi ni yɔɔ ŋwɛi ahe lɛ?
  • Te atsɛ́ɔ ta ni Nyɔŋmɔ kɛ gbɔmɛi fɔji baawu yɛ shikpɔŋ nɔ lɛ tɛŋŋ, ni mɛɛ yiŋtoo hewɔ abaawu ta nɛɛ?
  • Taakɛ wɔnaa yɛ mfoniri lɛ mli lɛ namɔ baanyiɛ ta ni abaawu lɛ hiɛ, mɛni hewɔ ebú maŋtsɛ fai lɛ, ni mɛni eklante ni ehiɛ lɛ tsɔɔ?
  • Kɛji wɔmiisusu Biblia Mli Sane 10, 1533 lɛ ahe lɛ, mɛni hewɔ esaaa akɛ efeɔ wɔ naakpɛɛ akɛ Nyɔŋmɔ baakpata gbɔmɛi fɔji ahiɛ lɛ?
  • Mɛɛ gbɛ nɔ Biblia Mli Sane 3676 lɛ tsɔɔ wɔ yɛ akɛ Nyɔŋmɔ baakpata gbɔmɛi fɔji ahiɛ kɛji amɛkɛɔ po akɛ amɛmiisɔmɔ lɛ?

Sanebimɔi ni fata he

  • Kanemɔ Kpojiemɔ 19:11-16.

    Mɛɛ gbɛ nɔ Ŋmalɛi lɛ feɔ lɛ faŋŋ yɛ akɛ Yesu Kristo ji mɔ ni ta okpɔŋɔ yɛŋ lɛ nɔ lɛ? (Kpoj. 1:5; 3:14; 19:11; Yes. 11:4)

    Yɛ mɛɛ gbɛ nɔ Yesu atade ni aŋɔtsɔ lá mli lɛ maa nɔ mi akɛ ekunimyeli lɛ baaba lɛ shikome nyɔŋlo ni ebaafee nɔ ni eye emuu hu lɛ? (Kpoj. 14:18-20; 19:13; Yes. 63:1-6)

    Namɛi eeenyɛ efee akɛ amɛfata tai ni tara okpɔŋɔi yɛji anɔ kɛnyiɛ Yesu sɛɛ lɛ ahe? (Kpoj. 12:7; 19:14; Mat. 25:31, 32)