Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Petro Yasara Kornelio: Petro Yasara Kornelio

Petro Yasara Kornelio: Petro Yasara Kornelio

BƆFO Petro ji mɔ ni damɔ shi yɛ jɛmɛ lɛ, ni enanemɛi lɛ ateŋ mɛi komɛi damɔ shi yɛ esɛɛ lɛ. Shi mɛni hewɔ nuu lɛ ekula shi yɛ Petro hiɛ lɛ? Ani esa akɛ efee nakai? Ani ole mɔ ni eji?

Petro eba Kornelio ŋɔɔ

Nuu lɛ ji Kornelio. Roma asraafonyo onukpa ni. Kornelio leee Petro, shi akɛɛ lɛ ni efɔ̃ lɛ nine kɛba eshia lɛ mli. Nyɛhaa wɔtaoa bɔ ni fee ni enɛ ba lɛ nakai.

Yesu klɛŋklɛŋ sɛɛnyiɛlɔi lɛ ji Yudafoi, shi Kornelio jeee Yudanyo. Shi kɛlɛ esumɔɔ Nyɔŋmɔ, esɔleɔ ehaa lɛ, ni efeɔ nibii kpakpai babaoo ehaa mɛi. Ojogbaŋŋ, gbi ko shwane lɛ, bɔfo ko bajie ehe kpo etsɔɔ lɛ ni ekɛɛ lɛ akɛ: ‘Nyɔŋmɔ ená ohe miishɛɛ, ni ebaaha osɔlemɔi lɛ ahetoo. Tsu hii komɛi kɛya ni amɛyatsɛ́ nuu ko ni atsɛɔ lɛ Petro lɛ kɛba. Eyɛ Yopa, yɛ Simon, mɔ ni yɔɔ ŋshɔ lɛ naa lɛ shia lɛ.’

Ojogbaŋŋ, amrɔ nɔŋŋ kɛkɛ ni Kornelio tsu mɛi akɛ amɛyatao Petro kɛba. Enɔ jetsɛremɔ, beni hii lɛ bɛŋkɛɔ Yopa lɛ, no mli lɛ Petro yɛ Simon tsũ yiteŋ tɛtrɛɛ lɛ nɔ. Jɛmɛ ni Nyɔŋmɔ ha Petro susu akɛ etamɔ nɔ ni eena mama agbo ko miikpeleke shi kɛmiijɛ ŋwɛi. Kooloi srɔtoi fɛɛ yɛ mama lɛ mli. Yɛ Nyɔŋmɔ mla lɛ mli lɛ, kooloi nɛɛ ahe tseee kɛha yeli, shi kɛlɛ gbee ko kɛɛ: ‘Tee shi, Petro. Gbee ni oye.’

Petro ha hetoo akɛ: ‘Dabi! Miyeko nɔ ko ni he tseee dã.’ Shi gbee lɛ kɛɛ Petro akɛ: ‘Kpa nɔ ni Nyɔŋmɔ eha ehe etse lɛ tsɛmɔ akɛ nɔ ni he tseee.’ Enɛ ba mli shii etɛ. Beni Petro susuɔ nɔ ni enɛ fɛɛ tsɔɔ lɛ he lɛ, hii ni Kornelio tsu amɛ lɛ bashɛ shia lɛ ni amɛbi akɛ amɛmiitao Petro.

Petro kpeleke shi kɛba ni ekɛɛ: ‘Mi ji mɔ ni nyɛtaoɔ lɛ. Mɛni hewɔ nyɛba?’ Beni hii lɛ tsɔɔ mli akɛ ŋwɛibɔfo ko kɛɛ Kornelio ní efɔ̃ Petro nine kɛba eshia lɛ, Petro kpɛlɛ nɔ akɛ ekɛ amɛ baaya. Enɔ jetsɛremɔ lɛ, Petro kɛ enanemɛi lɛ shi koni amɛyasara Kornelio yɛ Kaisarea.

Kornelio ebua ewekumɛi kɛ enanemɛi ni bɛŋkɛ lɛ kpaakpa lɛ fɛɛ naa. Beni Petro ba lɛ, Kornelio kɛ lɛ yakpe. Eho egbee shi ni ekula shi yɛ Petro naji anaa, taakɛ onaa yɛ biɛ lɛ. Shi Petro kɛɛ: ‘Tee shi; mi hu gbɔmɔ kɛkɛ ji mi.’ Hɛɛ, Biblia lɛ tsɔɔ akɛ ejaaa gbɛ akɛ aaakula shi ni aja gbɔmɔ. Esa akɛ wɔja Yehowa pɛ.

Agbɛnɛ Petro shiɛ etsɔɔ mɛi ni ebua amɛhe naa lɛ. Petro kɛɛ: ‘Mina akɛ Nyɔŋmɔ kpɛlɛɔ gbɔmɛi fɛɛ ni sumɔɔ akɛ amɛsɔmɔ lɛ lɛ anɔ.’ Ni beni ewieɔ lolo lɛ, Nyɔŋmɔ tsu emumɔ krɔŋkrɔŋ lɛ, ni gbɔmɛi lɛ bɔi wiemɔi srɔtoi awiemɔ. Enɛ ha kaselɔi Yudafoi ni kɛ Petro ba lɛ anaa kpɛ amɛhe, ejaakɛ amɛsusuɔ akɛ Nyɔŋmɔ sumɔɔ Yudafoi pɛ sane. No hewɔ lɛ enɛ ha amɛle akɛ Nyɔŋmɔ ebuuu hewolo nɔ su ko akɛ amɛhi loo amɛhe hiaa yɛ Nyɔŋmɔ hiɛ fe hewolo nɔ su kroko. Ani enɛ jeee nɔ ko kpakpa kɛha wɔ fɛɛ ni esa akɛ wɔkai?

Bɔfoi lɛ Asaji 10:1-48; 11:1-18; Kpojiemɔ 19:10.



Sanebimɔi

  • Namɔ ji nuu ni kula shi yɛ mfoniri lɛ mli lɛ?
  • Mɛni bɔfo ko kɛɛ Kornelio?
  • Mɛni Nyɔŋmɔ ha Petro na be mli ni eyɔɔ Simon tsũ lɛ yiteŋ yɛ Yopa lɛ?
  • Mɛni hewɔ Petro kɛɛ Kornelio akɛ ekakula shi ni eja lɛ lɛ?
  • Mɛni hewɔ kaselɔi Yudafoi ni kɛ Petro nyiɛ lɛ anaa ekpɛ amɛhe lɛ?
  • Mɛni ehe hiaa ni wɔkase kɛjɛ saramɔ ni Petro yasara Kornelio lɛ mli?

Sanebimɔi ni fata he

  • Kanemɔ Bɔfoi lɛ Asaji 10:1-48.

    Mɛni Petro wiemɔi ni anaa yɛ Bɔfoi lɛ Asaji 10:42 lɛ tsɔɔ yɛ Maŋtsɛyeli lɛ he sanekpakpa lɛ shiɛmɔ nitsumɔ lɛ he? (Mat. 28:19; Mar. 13:10; Bɔf. 1:8)

  • Kanemɔ Bɔfoi lɛ Asaji 11:1-18.

    Mɛɛ su Petro jie lɛ kpo be ni gbɛtsɔɔmɔ ni Yehowa kɛha yɛ Jeŋmajiaŋbii lɛ ahe lɛ bafee faŋŋ lɛ, ni te wɔɔfee tɛŋŋ wɔkase enɔkwɛmɔnɔ lɛ? (Bɔf. 11:17, 18; 2 Kor. 10:5; Efe. 5:17)