Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 112: Lɛlɛ lɛ Yasha Shi yɛ Ŋshɔkpɔ ko Nɔ

Biblia Mli Sane 112: Lɛlɛ lɛ Yasha Shi yɛ Ŋshɔkpɔ ko Nɔ

KWƐMƆ! lɛlɛ lɛ kɛ oshara ekpe! Eejwara kwraa! Ani oona mɛi ni etumɔ kɛbote nu lɛ mli lɛ? Amɛteŋ mɛi komɛi enyɛ amɛbashɛ nu lɛ naa momo. Ani Paulo wɔnaa yɛ jɛmɛ lɛ? Ha wɔkwɛ nɔ ni eba enɔ nɛɛ.

Mɛi ni yi ná wala beni lɛlɛ lɛ yasha shi lɛ

Kaimɔ akɛ, awo Paulo tsuŋ afii enyɔ sɔŋŋ yɛ Kaisarea. Kɛkɛ ni akɛ lɛ kɛ gboklɛfoi krokomɛi ni fata ehe lɛ wo lɛlɛ mli, ni amɛyi gbɛ kɛmiiya Roma. Beni amɛho Kreta ŋshɔkpɔ lɛ he fioo lɛ, amɛkɛ ahum ko ni naa wa waa kpe. Kɔɔyɔɔ lɛ tswa waa aahu akɛ hii lɛ nyɛɛɛ amɛkudɔ lɛlɛ lɛ dɔŋŋ. Ni amɛnaaa hulu lɛ yɛ jetsɛremɔ mli, aloo ŋulamii lɛ hu yɛ jenamɔ mli. Yɛ naagbee, yɛ gbii babaoo sɛɛ lɛ, mɛi ni yɔɔ lɛlɛ lɛ mli lɛ fɛɛ anijiaŋ je wui kwraa akɛ abaanyɛ ahere amɛ yiwala.

Kɛkɛ ni Paulo te shi edamɔ shi ni ewie akɛ: ‘Nyɛteŋ mɔ kome folo po elaajeŋ ewala; lɛlɛ lɛ pɛ baalaaje. Ejaakɛ nyɔɔŋ nɛɛ mli lɛ, Nyɔŋmɔ bɔfo ko ba miŋɔɔ ni ebakɛɛ mi akɛ, “Kaashe gbeyei, Paulo! Esa akɛ oyadamɔ Roma nɔyelɔ Kaisare hiɛ kɛ̃. Ni Nyɔŋmɔ baahere mɛi fɛɛ ni kɛ bo fãa gbɛ lɛ ayiwala.”’

Aaafee nyɔɔŋteŋ yɛ gbi ni ji 14, kɛjɛ beni ahum lɛ bɔi tswaa lɛ nɔ lɛ, amlakui lɛ na akɛ nu lɛ mli ekwɔɔɔ dɔŋŋ! Akɛni amɛmiishe gbeyei akɛ ekolɛ lɛlɛ lɛ baayashi tɛ yɛ duŋ lɛ mli hewɔ lɛ, amɛŋmɛɛ amɛsɛkɛi lɛ ahe amɛwo nu lɛ mli. Enɔ jetsɛremɔ lɛ, amɛna shikpɔŋ. Amɛkpɛ amɛyiŋ akɛ amɛbaabɔ mɔdɛŋ ni amɛkudɔ lɛlɛ lɛ kɛya ŋshɔnaa shia lɛ nɔ tɔ̃ɔ yɛ jɛmɛ.

Ojogbaŋŋ, beni amɛbɛŋkɛ ŋshɔ lɛ naa saŋŋ lɛ, lɛlɛ lɛ yabote shia mli ni eka yɛ jɛmɛ. Kɛkɛ ni ŋshɔkei lɛ bɔi lɛ shiimɔ waa, kɛkɛ ni lɛlɛ lɛ bɔi jwaramɔ. Asraafonyo nukpa ni kwɛɔ amɛnɔ lɛ wie akɛ: ‘Nyɛ mɛi fɛɛ ni nyɛbaanyɛ nyɛsere lɛ, nyɛtua kɛbotea ŋshɔ lɛ mli klɛŋklɛŋ ni nyɛserea kɛyaa shikpɔŋ. Nyɛteŋ mɛi ni eshwɛ lɛ, nyɛbotea mli kɛnyiɛa amɛsɛɛ, ni nyɛmɔmɔa lɛlɛ lɛ fãi ni ekumɔ lɛ amli ni nyɛhiɛa mli waa.’ Ni nakai ji bɔ ni amɛfee. Nɛkɛ gbɛ nɔ amɛtsɔ ni gbɔmɛi 276 ni yɔɔ lɛlɛ lɛ mli lɛ yashɛ ŋshɔ lɛ naa shweshweeshwe, tamɔ bɔ ni ŋwɛibɔfo lɛ wo amɛ shi lɛ.

Atsɛɔ ŋshɔkpɔ lɛ akɛ Melita. Gbɔmɛi lɛ amli jɔ waa, ni amɛkwɛ gbɔmɛi ni jɛ lɛlɛ lɛ mli kɛba lɛ anɔ. Beni kɔɔyɔŋ tsakemɔ lɛ hi saŋŋ lɛ, akɛ Paulo wo lɛlɛ kroko mli ni akɛ lɛ tee Roma.

Bɔfoi lɛ Asaji 27:1-44; 28:1-14.



Sanebimɔi

  • Mɛni ba lɛlɛ ni Paulo ta mli lɛ nɔ be ni eho Kreta ŋshɔkpɔ lɛ he fioo lɛ?
  • Mɛni Paulo kɛɛ mɛi ni yɔɔ lɛlɛ lɛ mli lɛ?
  • Te fee tɛŋŋ ni lɛlɛ lɛ bɔi jwaramɔ lɛ?
  • Mɛɛ famɔi asraafonyo nukpa ni kwɛɔ amɛnɔ lɛ kɛha, ni mɛi enyiɛ yashɛ ŋshɔ lɛ naa shweshweeshwe?
  • Te atsɛ́ɔ ŋshɔkpɔ ni amɛyasha shi yɛ nɔ lɛ tɛŋŋ, ni mɛni ba Paulo nɔ be ni kɔɔyɔŋ tsakemɔ lɛ hi saŋŋ lɛ?

Sanebimɔi ni fata he

  • Kanemɔ Bɔfoi lɛ Asaji 27:1-44.

    Hekɛnɔfɔɔ ni wɔyɔɔ yɛ bɔ ni Biblia mli saji ni aŋmala lɛ ji anɔkwale ha lɛ mli waa be mli ni wɔkaneɔ Paulo nu hiɛ gbɛfãa kɛmiiya Roma lɛ he sane lɛ yɛ mɛɛ gbɛ nɔ? (Bɔf. 27:16-19, 27-32; Luka 1:3; 2 Tim. 3:16, 17)

  • Kanemɔ Bɔfoi lɛ Asaji 28:1-14.

    Kɛji nɔ ko etsirɛ wɔŋjalɔi ni yɔɔ Melita lɛ ni amɛfee bɔfo Paulo kɛ mɛi ni fata ehe ní amɛkɛ lɛlɛ lɛ yasha shi lɛ “ejurɔ pii” lɛ, mɛni esa akɛ etsirɛ Kristofoi ni amɛjie lɛ kpo, ni titri lɛ yɛ mɛɛ gbɛ nɔ? (Bɔf. 28:1, 2; Heb. 13:1, 2; 1 Pet. 4:9)

Ekrokromɛi Hu Nɛ

BIBLIA MLI MƐI AHE SAJI

Paulo He Sane

Mɛɛ nitsumɔ Paulo tsu kɛkwɛ ehe yɛ esɔɔmɔ nitsumɔ lɛ mli? Okɛ Biblia mli sane nɛɛ atsu kɛná hetoo lɛ.