Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 111: Gbekɛ Nuu ko ni Wɔ Ye Lɛ

Biblia Mli Sane 111: Gbekɛ Nuu ko ni Wɔ Ye Lɛ

OO! OO! Mɛni yaa nɔ yɛ biɛ lɛ? Ani gbekɛ nuu ni kã shikpɔŋ lɛ epila waa? Kwɛmɔ! hii ni jɛɔ shia lɛ mli kɛbaa lɛ ateŋ mɔ kome ji Paulo! Ani oona Timoteo hu yɛ jɛmɛ? Ani gbekɛ nuu lɛ jɛ samfɛlɛ lɛ mli ebagbee shi?

Paulo miiba ebatee Eutiko shi

Hɛɛ, nakai pɛpɛɛpɛ ji nɔ ni ba. Paulo kɛ kaselɔi ni yɔɔ biɛ yɛ Troia lɛ miiwie. Ele akɛ enaŋ amɛ dɔŋŋ aahu be kakadaŋŋ ejaakɛ esa akɛ ebote lɛlɛ mli kɛya enɔ jetsɛremɔ. No hewɔ lɛ etee nɔ ewie aahu kɛyashi nyɔɔŋteŋ tɔ̃ɔ.

Ojogbaŋŋ, gbekɛ nuu ni atsɛɔ lɛ Eutiko nɛɛ tá samfɛlɛ lɛ naa, kɛkɛ ni wɔ bɔi lɛ yeli. Ejɛ jɛmɛ etsɔ samfɛlɛ lɛ mli ebagbee shi, kɛjɛ nsɔɔdoi etɛ nɔ tɔ̃ɔ! No hewɔ lɛ obaanyɛ ona nɔ hewɔ ni gbɔmɛi lɛ ehao waa nakai lɛ. Beni hii lɛ bawó gbekɛ nuu lɛ nɔ lɛ, nɔ ni amɛsheɔ gbeyei yɛ he lɛ pɛpɛɛpɛ eba. Égbo!

Beni Paulo na akɛ gbekɛ nuu lɛ égbo lɛ, eho ebu enɔ ni eloo lɛ atuu. Kɛkɛ ni ewie akɛ: ‘Nyɛkahaoa. Ehiɛ kã!’ Ni ehiɛ kã lɛɛlɛŋ hu! Naakpɛɛ nii nɛ! Paulo kɛ lɛ eba wala mli ekoŋŋ! Mɛi babaoo ni yɔɔ jɛmɛ lɛ fɛɛ ná miishɛɛ waa.

Kɛkɛ ni amɛ fɛɛ amɛtee ŋwɛitsũ lɛ nɔ ekoŋŋ ni amɛyaye nii. Paulo tsa nɔ ewie aahu kɛyashi jetsɛremɔ. Shi bo diɛŋtsɛ obaana akɛ Eutiko wɔŋ dɔŋŋ! Kɛkɛ ni Paulo, kɛ Timoteo kɛ mɛi ni fata amɛhe kɛfãa gbɛ lɛ bote lɛlɛ lɛ mli. Ani ole he ni amɛyaa?

Paulo gbe eshiɛmɔ gbɛfãa ni ji etɛ lɛ naa etsɛko kwraa, ni enyiɛ gbɛ nɔ kɛmiiya shia. Paulo ehi Efeso maŋtiase lɛ pɛ mli afii etɛ sɔŋŋ yɛ egbɛfãa nɛɛ mli. No hewɔ lɛ gbɛfãa nɛɛ sɛɛ tsɛ kwraa fe nɔ ni ji enyɔ lɛ.

Beni lɛlɛ lɛ shi Troia lɛ, eyawa yɛ Mileeto be fioo. Akɛni Efeso kɛ jɛmɛ jɛkɛmɔ feɔ shitoi fioo ko pɛ hewɔ lɛ, Paulo tsu akɛ ayatsɛ́ onukpai ni yɔɔ asafo lɛ mli lɛ kɛba Mileeto koni ekɛ amɛ awie nɔ ni ji naagbee nɔ kwraa. Sɛɛ mli, beni be shɛ ni lɛlɛ lɛ baaya lɛ, amɛye awerɛho waa beni amɛna akɛ Paulo miiya lɛ!

Yɛ naagbee lɛ, lɛlɛ lɛ bashɛ Kaisarea. Beni Paulo yɔɔ biɛ yɛ kaselɔ Filipo shia lɛ, gbalɔ Agabo babɔ Paulo kɔkɔ. Ewie akɛ kɛ Paulo ba Yerusalem lɛ, abaawo lɛ tsuŋ. Ni lɛɛlɛŋ hu, nakai ji nɔ ni ba. Kɛkɛ ni beni ehi tsuŋwoo mli afii enyɔ yɛ Kaisarea sɛɛ lɛ, akɛ Paulo tee Roma koni ayakojo lɛ yɛ Roma nɔyelɔ Kaisare hiɛ. Nyɛhaa wɔkwɛa nɔ ni tee nɔ beni amɛfãa gbɛ kɛyaa Roma lɛ.

Bɔfoi lɛ Asaji yitsei 19 kɛyashi 26.



Sanebimɔi

  • Namɔ ji gbekɛ nuu ni kã shikpɔŋ yɛ mfoniri lɛ mli lɛ, ni mɛni ba enɔ?
  • Mɛni Paulo fee be ni ena akɛ gbekɛ nuu lɛ egbo lɛ?
  • Nɛgbɛ Paulo kɛ Timoteo kɛ mɛi ni fata amɛhe lɛ fãa gbɛ kɛyaa lɛ, ni mɛni ba be ni amɛyawá yɛ Mileeto lɛ?
  • Mɛɛ kɔkɔbɔɔ gbalɔ Agabo kɛha Paulo, ni yɛ mɛɛ gbɛ nɔ eba mli taakɛ gbalɔ lɛ kɛɛ lɛ?

Sanebimɔi ni fata he

  • Kanemɔ Bɔfoi lɛ Asaji 20:7-38.

    Taakɛ Paulo wiemɔi ni aŋma afɔ̃ shi yɛ Bɔfoi lɛ Asaji 20:26, 27 lɛ tsɔɔ lɛ, mɛɛ gbɛ nɔ wɔɔtsɔ wɔhi shi akɛ mɛi ni ‘yeee mɔ ko mɔ ko lá yi sɔ̃’? (Ezek. 33:8; Bɔf. 18:6, 7)

    Mɛni hewɔ esa akɛ onukpai afee mɛi ni “hiɛɔ tsɔɔmɔ lɛ naa anɔkwa wiemɔ lɛ mli” be mli ni amɛtsɔɔ nii lɛ? (Bɔf. 20:17, 29, 30; Tito 1:7-9; 2 Tim. 1:13)

  • Kanemɔ Bɔfoi lɛ Asaji 26:24-32.

    Te Paulo kɛ Romanyo ni eji lɛ tsu nii eha tɛŋŋ bɔni afee ni egbe shiɛmɔ nitsumɔ ni Yesu kɛha lɛ lɛ naa? (Bɔf. 9:15; 16:37, 38; 25:11, 12; 26:32; Luka 21:12, 13)