Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 110: Timoteo—Paulo Yelikɛbualɔ Hee

Biblia Mli Sane 110: Timoteo—Paulo Yelikɛbualɔ Hee

OBLANYO ni onaa lɛ yɛ biɛ ni efata bɔfo Paulo he lɛ ji Timoteo. Timoteo kɛ eweku lɛ yɛ Listra. Atsɛɔ enyɛ gbɛi akɛ Eunike kɛ enaa hu akɛ Loise.

Shii etɛ nɔ ni Paulo yasaraa Listra nɛ. Aaafee afi nɛ loo shwɛ fioo ni ashɛ nakai, ni Paulo kɛ Barnaba ba biɛ klɛŋklɛŋ kwraa yɛ shiɛmɔ gbɛfãa nɔ. Ni amrɔ nɛɛ Paulo kɛ enaanyo Sila eku amɛsɛɛ amɛba ekoŋŋ.

Timoteo kɛ Paulo

Ani ole nɔ ni Paulo kɛɔ Timoteo lɛ? Eebi lɛ akɛ: ‘Ani obaasumɔ ni ofata mi kɛ Sila he? Wɔbaanyɛ wɔkɛ oyelikɛbuamɔ atsu nii ni wɔkɛshiɛ wɔtsɔɔ gbɔmɛi ni yɔɔ shɔŋŋ lɛ hu.’

Timoteo ha hetoo akɛ: ‘Hɛɛ, masumɔ ni maya.’ No hewɔ lɛ, beni Timoteo shi eweku lɛ, etsɛɛɛ ni ekɛ Paulo kɛ Sila tee. Shi dani wɔɔkase amɛ gbɛfãa lɛ he nii lɛ, nyɛhaa wɔtaoa nɔ ni ba Paulo nɔ. Aaafee afii 17 nɛ kɛjɛ be mli ni Yesu jie ehe kpo etsɔɔ lɛ yɛ Damasko gbɛ lɛ nɔ.

Kaimɔ akɛ, Paulo ba Damasko koni ebaye Yesu kaselɔi lɛ awui, shi amrɔ nɛɛ, lɛ diɛŋtsɛ hu ebatsɔ̃ kaselɔ! Sɛɛ mli lɛ henyɛlɔi komɛi kpaŋ akɛ amɛbaagbe Paulo ejaakɛ amɛsumɔɔɔ Yesu he saji ni etsɔɔ lɛ. Shi kaselɔi lɛ ye bua Paulo ní ejo foi. Amɛkɛ lɛ wo kɛntɛŋ mli ni amɛshiu lɛ kɛyaje maŋ lɛ gbogbo lɛ sɛɛ.

Yɛ no sɛɛ lɛ, Paulo tee Antiokia koni eyashiɛ yɛ jɛmɛ. Biɛ ji he ni atsɛ Yesu sɛɛnyiɛlɔi lɛ yɛ klɛŋklɛŋ akɛ Kristofoi. Kɛkɛ ni atsu Paulo kɛ Barnaba kɛjɛ Antiokia kɛtee maji ni yɔɔ shɔŋŋ lɛ anɔ kɛha shiɛmɔ he gbɛfãa. Maji ni amɛyasara lɛ ateŋ ekome ji Listra, Timoteo maŋ lɛ.

Agbɛnɛ, aaafee no sɛɛ afi lɛ, Paulo ku sɛɛ eba Listra ekoŋŋ yɛ egbɛfãa ni ji enyɔ lɛ nɔ. Beni Timoteo kɛ Paulo kɛ Sila shi lɛ, ani ole he ni amɛtee? Kwɛmɔ shikpɔŋ he mfoniri lɛ, ni ohã wɔkase nɛkɛ maji nɛɛ ekomɛi ahe sane.

Klɛŋklɛŋ lɛ, amɛtee Ikoniom ni bɛŋkɛ jɛmɛ lɛ, kɛkɛ ni amɛtee maŋ ni ji enyɔ ni atsɛɔ lɛ Antiokia lɛ mli. No sɛɛ lɛ amɛfã gbɛ kɛtee Troia, ni amɛbaho Filipi, Tesalonika kɛ Beroia. Ani oona Ateene yɛ shikpɔŋ he mfoniri lɛ nɔ? Paulo shiɛ yɛ jɛmɛ. No sɛɛ lɛ, amɛye afi kɛ fã ni amɛkɛshiɛ yɛ Korinto. Yɛ naagbee lɛ, amɛyahi shi fioo yɛ Efeso. Kɛkɛ ni amɛkɛ lɛlɛ ku amɛsɛɛ kɛba Kaisarea, ni amɛfã gbɛ kɛtee Antiokia yɛ yiteŋgbɛ, ni Paulo hi jɛmɛ.

No hewɔ lɛ, Timoteo fã gbɛ shitoi ohai abɔ ni eye ebua Paulo ni ekɛshiɛ “sanekpakpa” lɛ ni amɛkɛje Kristofoi asafoi pii ashishi. Kɛji oda lɛ, ani obaafee Nyɔŋmɔ sɔɔlɔ anɔkwafo tamɔ Timoteo?

Bɔfoi lɛ Asaji 9:19-30; 11:19-26; yitsei 13 kɛyashi 17; 18:1-22.

Shikpɔŋ lɛ he mfoniri

1. Roma; 2. Melita; 3. Beroia; 4. Tesalonika; 5. Korinto; 6. Filipi; 7. Ateene; 8. Kreta; 9. Troia; 10. Efeso; 11. Mileeto; 12. Kolose; 13. Antiokia; 14. Ikoniom; 15. Listra; 16. Kipro; 17. Antiokia; 18. Kaisarea; 19. Yopa; 20. Damasko; 21. Yerusalem; 22. Ŋshɔ Kpeteŋkpele Lɛ  (Mediteranea)



Sanebimɔi

  • Namɔ ji oblanyo ni yɔɔ mfoniri lɛ mli lɛ, nɛgbɛ eyɔɔ, ni te atsɛ́ɔ enyɛ kɛ enaa tɛŋŋ?
  • Mɛni Timoteo kɛɛ be ni Paulo bi lɛ kɛji ebaasumɔ ni efata lɛ kɛ Sila he koni amɛyashiɛ amɛtsɔɔ gbɔmɛi ni yɔɔ shɔŋŋ lɛ?
  • Nɛgbɛ ji he klɛŋklɛŋ kwraa ni atsɛ́ Yesu sɛɛnyiɛlɔi lɛ akɛ Kristofoi yɛ?
  • Be ni Paulo, Sila kɛ Timoteo shi Antiokia lɛ, mɛɛ maji komɛi amɛyasara?
  • Timoteo ye ebua Paulo yɛ mɛɛ gbɛ nɔ, ni mɛɛ sane esa akɛ oblahii kɛ oblayei bibii ni yɔɔ ŋmɛnɛ lɛ abibii amɛhe?

Sanebimɔi ni fata he

  • Kanemɔ Bɔfoi lɛ Asaji 9:19-30.

    Mɛɛ gbɛ nɔ bɔfo Paulo tsɔ ekɛ hiɛtɛ̃ɛ tsu nii be mli ni ekɛ sanekpakpa lɛ he shitee-kɛ-woo kpe lɛ? (Bɔf. 9:22-25, 29, 30; Mat. 10:16)

  • Kanemɔ Bɔfoi lɛ Asaji 11:19-26.

    Mɛɛ gbɛ nɔ amaniɛbɔɔ ni jeɔ kpo yɛ Bɔfoi lɛ Asaji 11:19-21, 26 lɛ tsɔɔ yɛ akɛ Yehowa mumɔ lɛ miikudɔ shiɛmɔ nitsumɔ lɛ ni eeto he gbɛjianɔ hu?

  • Kanemɔ Bɔfoi lɛ Asaji 13:13-16, 42-52.

    Yɛ mɛɛ gbɛ nɔ Bɔfoi lɛ Asaji 13:51, 52 lɛ tsɔɔ akɛ kaselɔi lɛ eŋmɛɛɛ gbɛ ni shitee-kɛ-woo aje amɛnijiaŋ wui lɛ? (Mat. 10:14; Bɔf. 18:6; 1 Pet. 4:14)

  • Kanemɔ Bɔfoi lɛ Asaji 14:1-6, 19-28.

    Yɛ mɛɛ gbɛ nɔ wiemɔ ni ji ‘amɛtu amɛ amɛwo Yehowa dɛŋ’ lɛ yeɔ ebuaa koni wɔkafee yeyeeye fe nine be mli ni wɔyeɔ wɔbuaa mɛi heei lɛ? (Bɔf. 14:21-23; 20:32; Yoh. 6:44)

  • Kanemɔ Bɔfoi lɛ Asaji 16:1-5.

    Suɔmɔ mli ni Timoteo jɛ eŋmɛ gbɛ ni afo lɛ ketia lɛ maa bɔ ni ehe hiaa ni wɔfee ‘nii fɛɛ yɛ sanekpakpa lɛ hewɔ’ lɛ nɔ mi yɛ mɛɛ gbɛ nɔ? (Bɔf. 16:3; 1 Kor. 9:23; 1 Tes. 2:8)

  • Kanemɔ Bɔfoi lɛ Asaji 18:1-11, 18-22.

    Mɛni Bɔfoi lɛ Asaji 18:9, 10 lɛ tsɔɔ yɛ Yesu diɛŋtsɛ he ni ekɛwoɔ shiɛmɔ nitsumɔ lɛ mli koni ekudɔ nitsumɔ lɛ he, ni mɛɛ nɔmimaa enɛ kɛhaa wɔ ŋmɛnɛ? (Mat. 28:20)

Ekrokromɛi Hu Nɛ

Timoteo He Sane

Timoteo hala akɛ ebaasɔmɔ Nyɔŋmɔ be ni eji oblanyo fioo. Mɛɛ gbɛi anɔ obaanyɛ otsɔ okase lɛ?

Timoteo Miisumɔ ni Eye Ebua Mɛi

Mɛni baaha oná miishɛɛ waa, ni otsu nibii babaoo yɛ oshihilɛ mli tamɔ bɔ ni Timoteo fee lɛ?