Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 108: Yɛ Damasko Gbɛ lɛ Nɔ

Biblia Mli Sane 108: Yɛ Damasko Gbɛ lɛ Nɔ

ANI ole mɔ ni kã shikpɔŋ lɛ? Saulo ni. Kaimɔ akɛ, lɛ ji mɔ ni kwɛ mɛi ni tswia Stefano tɛi lɛ anɔhaa atadei lɛ anɔ lɛ. Kwɛmɔ la ni kpɛɔ waa lɛ! Mɛni yaa nɔ lɛ?

Beni agbe Stefano sɛɛ lɛ, Saulo nyiɛ hiɛ koni akɛtao Yesu sɛɛnyiɛlɔi lɛ koni aye amɛ awui. Ejɛɔ shia kome mli kɛyaa ekroko mli ni eyagbalaa amɛ kɛjeɔ kpo ni ayawoɔ amɛ tsuŋ. Kaselɔi lɛ ateŋ mɛi pii jo foi kɛtee maji krokomɛi anɔ ni amɛbɔi “sanekpakpa” lɛ shiɛmɔ yɛ jɛmɛ. Shi Saulo tee maji krokomɛi anɔ koni eyatao Yesu sɛɛnyiɛlɔi lɛ. Amrɔ nɛɛ enyiɛ gbɛ ni yaa Damasko lɛ nɔ. Shi, nɛkɛ naakpɛɛ nii nɛɛ ba, yɛ gbɛ lɛ nɔ:

Trukaa kɛkɛ ni la ko kpɛ kɛbɔle Saulo he fɛɛ kɛkpe. Ni egbee shikpɔŋ, taakɛ wɔnaa yɛ biɛ lɛ. Kɛkɛ ni gbee ko kɛɛ: ‘Saulo, Saulo! Mɛni hewɔ owaa mi yi?’ Hii ni kɛ Saulo nyiɛ lɛ na la lɛ ni amɛnu gbee lɛ gbɛɛmɔ hu, shi amɛnuuu nɔ ni awieɔ lɛ shishi.

La ko ha Saulo shwila

Saulo bi akɛ: ‘Bo namɔ, Nuŋtsɔ?’

Gbee lɛ here nɔ akɛ: ‘Mi ji Yesu, mɔ ni owaa lɛ yi lɛ.’ Yesu kɛɛ enɛ ejaakɛ kɛ Saulo miiwa Yesu sɛɛnyiɛlɔi lɛ ayi lɛ, Yesu nuɔ he tamɔ nɔ ni aawa lɛ diɛŋtsɛ eyi.

Agbɛnɛ Saulo bi akɛ: ‘Mɛni esa akɛ mafee, Nuŋtsɔ?’

Yesu kɛɛ: ‘Tee shi ni oya Damasko. Jɛmɛ abaatsɔɔ bo nɔ ni esa akɛ ofee.’ Beni Saulo te shi ni egbele ehiŋmɛii lɛ, enaaa nii dɔŋŋ. Éshwila! No hewɔ lɛ hii ni kɛ lɛ nyiɛ lɛ mɔ̃ enine mli ni amɛnyiɛ ehiɛ kɛtee Damasko.

Agbɛnɛ Yesu kɛ ekaselɔi ni yɔɔ Damasko lɛ ateŋ mɔ kome wie, ni ekɛɛ: ‘Tee shi, Anania. Yaa gbɛjegbɛ ni atsɛɔ lɛ Trɔmɔɔ lɛ nɔ. Yaabi nuu ni atsɛɔ lɛ Saulo lɛ shi yɛ Yuda shia lɛ. Mihala lɛ koni efee mitsulɔ krɛdɛɛ ko.’

Anania bo toi. Beni ekɛ Saulo yakpe lɛ, ekɛ eniji shwie enɔ ni ekɛɛ: ‘Nuŋtsɔ lɛ etsu mi kɛba koni ona nii ekoŋŋ ni mumɔ krɔŋkrɔŋ ayi bo obɔ.’ Amrɔ nɔŋŋ kɛkɛ ni nibii komɛi tamɔ loo he totoi jɛ Saulo hiŋmɛii anɔ eshwie shi, ni enyɛ ena nii ekoŋŋ.

Akɛ Saulo tsu nii waa diɛŋtsɛ koni eshiɛ eha gbɔmɛi yɛ jeŋmaji pii amli. Abale lɛ yɛ sɛɛ mli akɛ bɔfo Paulo, mɔ ni wɔbaakase ehe nii babaoo lɛ. Shi klɛŋklɛŋ lɛ, nyɛhaa wɔkwɛa nɔ ni Nyɔŋmɔ tsu Petro ni eyafee.

Bɔfoi lɛ Asaji 8:1-4; 9:1-20; 22:6-16; 26:8-20.



Sanebimɔi

  • Yɛ Stefano gbele lɛ sɛɛ lɛ mɛni Saulo fee?
  • Be mli ni Saulo nyiɛ gbɛ kɛmiiya Damasko lɛ, mɛɛ naakpɛɛ nɔ ko ba?
  • Mɛni Yesu kɛɛ Saulo akɛ efee?
  • Mɛɛ fãmɔi Yesu kɛha Anania, ni te fee tɛŋŋ ni Saulo na nii ekoŋŋ lɛ?
  • Mɛɛ gbɛi akɛbale Saulo yɛ sɛɛ mli, ni akɛ lɛ tsu nii yɛ mɛɛ gbɛ nɔ?

Sanebimɔi ni fata he

  • Kanemɔ Bɔfoi lɛ Asaji 8:1-4.

    Mɛɛ gbɛ nɔ yiwaa ni naa wa ni ba Kristofoi asafo ni ato shishi ehee lɛ nɔ lɛ ye ebua ní Kristofoi ahemɔkɛyeli lɛ agbɛ ashwã, ni mɛɛ nɔ ko ni tamɔ no nɔŋŋ eba mli yɛ ŋmɛnɛŋmɛnɛ beaŋ? (Bɔf. 8:4; Yes. 54:17)

  • Kanemɔ Bɔfoi lɛ Asaji 9:1-20.

    Mɛɛ nitsumɔi etɛ Yesu esaa eto akɛ ekɛbaaha Saulo? (Bɔf. 9:15; 13:5; 26:1; 27:24; Rom. 11:13)

  • Kanemɔ Bɔfoi lɛ Asaji 22:6-16.

    Wɔbaanyɛ wɔtamɔ Anania yɛ mɛɛ gbɛ nɔ, ni mɛni hewɔ nakai ni wɔɔfee lɛ he hiaa lɛ? (Bɔf. 22:12; 1 Tim. 3:7; 1 Pet. 1:14-16; 2:12)

  • Kanemɔ Bɔfoi lɛ Asaji 26:8-20.

    Saulo tsakemɔ kɛmiiba Kristojamɔ mli lɛ bafeɔ hewalɛwoo jɛɛhe kɛha mɛi ni yɔɔ hefatalɔi ni heee yeee ŋmɛnɛ lɛ yɛ mɛɛ gbɛ nɔ? (Bɔf. 26:11; 1 Tim. 1:14-16; 2 Tim. 4:2; 1 Pet. 3:1-3)

Ekrokromɛi Hu Nɛ

Paulo He Sane

Mɛɛ nitsumɔ Paulo tsu kɛkwɛ ehe yɛ esɔɔmɔ nitsumɔ lɛ mli? Okɛ Biblia mli sane nɛɛ atsu kɛná hetoo lɛ.