Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 107: Atswia Stefano Tɛi

Biblia Mli Sane 107: Atswia Stefano Tɛi

NUU ni kula shi yɛ biɛ lɛ ji Stefano. Eji Yesu kaselɔ anɔkwafo. Shi kwɛmɔ nɔ ni afeɔ lɛ amrɔ nɛɛ! Hii nɛɛ kɛ tɛi agboi miitswia lɛ. Mɛni hewɔ amɛnyɛ̃ɔ Stefano waa nakai ni no hewɔ ni amɛfeɔ lɛ efɔŋ ni tamɔ nɛkɛ lɛ? Nyɛhaa wɔkwɛa.

Aatswa Stefano tɛi

Nyɔŋmɔ yeɔ ebuaa Stefano ni enyɛɔ efeɔ naakpɛɛ nibii pii. Nɛkɛ hii nɛɛ sumɔɔɔ enɛ, no hewɔ lɛ amɛkɛ lɛ bɔi saji anaataomɔ yɛ anɔkwale lɛ ni etsɔɔ gbɔmɛi lɛ hewɔ. Shi Nyɔŋmɔ ha Stefano nilee kpele, ni Stefano tsɔɔ akɛ nɛkɛ hii nɛɛ tsɔɔ apasa tsɔɔmɔi. Enɛ ha amɛmli fu waa moŋ po fe nine. No hewɔ lɛ amɛmɔ lɛ, ni amɛtsɛ́ mɛi kɛba koni amɛbawie amale wiemɔi amɛshi lɛ.

Osɔfonukpa lɛ bi Stefano akɛ: ‘Ani nibii nɛɛ ji anɔkwale?’ Stefano wie fɛfɛo kɛjɛ Biblia lɛ mli ni ekɛha lɛ hetoo. Yɛ naagbee lɛ, etsɔɔ bɔ ni gbɔmɛi fɔji nyɛ̃ɔ Yehowa gbalɔi ni hi shi yɛ blema lɛ. Kɛkɛ ni ekɛɛ: ‘Nyɛtamɔ nakai mɛi lɛ nɔŋŋ. Nyɛgbe Nyɔŋmɔ tsulɔ Yesu, ni nyɛbooo Nyɔŋmɔ mlai lɛ atoi.’

Enɛ ha nɛkɛ jamɔ mli hiɛnyiɛlɔi nɛɛ amli fu waa diɛŋtsɛ! Amɛkpé amɛnyanyɔji ashishi kɛ mlifu. Shi no mli nɔŋŋ ni Stefano wó eyitso nɔ, ni ekɛɛ: ‘Naa! Miina Yesu ni edamɔ Nyɔŋmɔ ninejurɔ nɔ yɛ ŋwɛi.’ Ní Stefano wie nɛkɛ lɛ, gbɔmɛi nɛɛ kɛ amɛniji tsĩmɔ amɛtoii ni amɛjo foi kɛyanina lɛ. Amɛmɔ lɛ ni amɛgbala lɛ kɛtee maŋ lɛ sɛɛ.

Amɛjie amɛ nɔhaa atadei lɛ ni amɛkɛhã oblanyo Saulo koni ekwɛ nɔ eha amɛ. Ani oona Saulo? Kɛkɛ ni hii lɛ ateŋ mɛi komɛi bɔi Stefano tɛi tswiamɔ. Stefano kula shi, taakɛ onaa lɛ, ni esɔle eha Nyɔŋmɔ akɛ: ‘Yehowa, kaagbala amɛtoi yɛ nɛkɛ efɔŋ nɛɛ hewɔ.’ Ele akɛ jamɔ mli hiɛnyiɛlɔi lɛ ji mɛi ni efee amɛteŋ mɛi komɛi buulu lɛ. No sɛɛ lɛ, Stefano gbo.

Kɛji mɔ ko fee bo efɔŋ lɛ, ani obɔɔ mɔdɛŋ ni bo hu ofee lɛ eko oto najiaŋ, aloo obiɔ Nyɔŋmɔ ni efee amɛ eko eto najiaŋ eha bo? Jeee nakai Stefano loo Yesu fee. Amɛmli jɔ yɛ mɛi ni yitsoŋ wa yɛ amɛnɔ lɛ po nɔ. Nyɛhaa wɔbɔa mɔdɛŋ ni wɔnyiɛa amɛ nɔkwɛmɔnɔ lɛ sɛɛ.

Bɔfoi lɛ Asaji 6:8-15; 7:1-60.



Sanebimɔi

  • Namɔ ji Stefano, ni mɛni Nyɔŋmɔ yeɔ ebuaa lɛ ni efeɔ?
  • Mɛni Stefano kɛɛ ni no ha jamɔ mli hiɛnyiɛlɔi lɛ amli fu waa lɛ?
  • Be ni hii lɛ gbala Stefano kɛtee maŋ lɛ sɛɛ lɛ, mɛni amɛyafee lɛ?
  • Namɔ ji oblanyo ni damɔ atadei lɛ ahe yɛ mfoniri lɛ mli lɛ?
  • Dani Stefano baagbo lɛ, mɛni esɔle ebi Yehowa?
  • Kɛ́ wɔmiisumɔ ni wɔkase Stefano lɛ, mɛni esa akɛ wɔfee kɛji mɔ ko fee wɔ efɔŋ ko?

Sanebimɔi ni fata he

  • Kanemɔ Bɔfoi lɛ Asaji 6:8-15.

    Mɛɛ shishiumɔ nifeemɔi jamɔ mli hiɛnyiɛlɔi ebɔ mɔdɛŋ ni amɛkɛtsu nii koni amɛkɛtsĩ Yehowa Odasefoi ashiɛmɔ nitsumɔ lɛ naa? (Bɔf. 6:9, 11, 13)

  • Kanemɔ Bɔfoi lɛ Asaji 7:1-60.

    Mɛni ye ebua Stefano ni enyɛ efã sanekpakpa lɛ he kɛmɔ shi yɛ Akuashɔŋ lɛ hiɛ lɛ, ni mɛni wɔbaanyɛ wɔkase kɛjɛ enɔkwɛmɔnɔ lɛ mli? (Bɔf. 7:51-53; Rom. 15:4; 2 Tim. 3:14-17; 1 Pet. 3:15)

    Mɛɛ su esa akɛ wɔjie lɛ kpo yɛ mɛi ni teɔ shi woɔ wɔnitsumɔ lɛ ahe? (Bɔf. 7:58-60; Mat. 5:44; Luka 23:33, 34)