Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 106: Ajie Amɛ Kɛjɛ Tsuŋwoo Mli

Biblia Mli Sane 106: Ajie Amɛ Kɛjɛ Tsuŋwoo Mli

KWƐMƆ ŋwɛibɔfo ni hiɛ tsuŋwoohe ni agbele naa lɛ naa shinaa lɛ. Hii ni ejieɔ amɛ kɛjɛɔ tsuŋ lɛ ji Yesu bɔfoi lɛ. Nyɛhaa wɔkwɛa nɔ ni ha ayawo amɛ tsuŋ lɛ.

Ŋwɛibɔfo ni miijie bɔfoi lɛ

Etsɛko tsɔ ni afɔse mumɔ krɔŋkrɔŋ lɛ ashwie Yesu kaselɔi lɛ anɔ. Ni nɔ ni ba nɛ: Petro kɛ Yohane miiya sɔlemɔwe lɛ yɛ Yerusalem gbi ko shwane. Jɛmɛ ji he ni amɛna nuu ko ni ji obubuafo ewala gbii abɔ fɛɛ ni eta shinaa lɛ masɛi lɛ yɛ. Awóɔ lɛ kɛbaa jɛmɛ daa gbi koni ebaba shika yɛ mɛi ni yaa sɔlemɔwe lɛ adɛŋ. Beni ena Petro kɛ Yohane lɛ, ekpa amɛ fai ni amɛha lɛ nɔ ko. Mɛni bɔfoi lɛ baafee?

Amɛwa ni amɛkwɛ nuu ni nii yɔɔ mɔbɔ nɛɛ. Ni Petro kɛɛ lɛ akɛ: ‘Mibɛ shika, shi nɔ ni miyɔɔ lɛ, mahao. Yɛ Yesu gbɛi amli lɛ, tee shi ni onyiɛ!’ Kɛkɛ ni Petro mɔ nuu lɛ ninejurɔ mli ni ete shi, kɛkɛ ni etu amrɔ lɛ nɔŋŋ ni ebɔi nyiɛmɔ. Beni gbɔmɛi lɛ na enɛ lɛ, amɛnaa kpɛ amɛhe waa ni amɛná miishɛɛ waa yɛ naakpɛɛ nii nɛɛ hewɔ.

Petro kɛɛ: ‘Nyɔŋmɔ, mɔ ni tee Yesu shi kɛjɛ gbohii ateŋ lɛ hewalɛ naa wɔfee nɛkɛ naakpɛɛ nii nɛɛ yɛ.’ Beni ekɛ Yohane wieɔ lɛ, kɛkɛ ni jamɔ mli hiɛnyiɛlɔi komɛi ba jɛmɛ. Amɛmli fu waa ejaakɛ Petro kɛ Yohane miiwie Yesu ni atee lɛ shi kɛjɛ gbohii ateŋ lɛ he sane amɛmiitsɔɔ mɛi lɛ. No hewɔ lɛ amɛmɔmɔ amɛ ni amɛkɛ amɛ yawo tsuŋ.

Enɔ jetsɛremɔ lɛ, jamɔ mli hiɛnyiɛlɔi lɛ fee kpee wulu ko. Kɛkɛ ni atsɛ Petro kɛ Yohane, kɛ nuu ni amɛtsa lɛ lɛ fɛɛ kɛba. Ni jamɔ mli hiɛnyiɛlɔi lɛ bi amɛ akɛ: ‘Mɛɛ hewalɛ naa nyɛfee naakpɛɛ nii nɛɛ yɛ?’

Petro kɛɛ amɛ akɛ Nyɔŋmɔ, mɔ ni tee Yesu shi kɛjɛ gbohii ateŋ lɛ hewalɛ naa amɛfee yɛ. Osɔfoi lɛ leee nɔ ni amɛbaafee, ejaakɛ amɛnyɛŋ amɛje he ŋwane akɛ amɛfee nɛkɛ naakpɛɛ nii nɛɛ. No hewɔ lɛ amɛbɔ bɔfoi lɛ kɔkɔ ni amɛkawie Yesu he sane ko kwraa dɔŋŋ, ni amɛŋmɛɛ amɛhe ni amɛya.

Beni gbii lɛ hoɔ yaa lɛ, bɔfoi lɛ tee nɔ amɛshiɛ Yesu he sane ni amɛtsatsaa helatsɛmɛi hu. Nɛkɛ naakpɛɛ nii nɛɛ he amaniɛbɔɔ gbɛ shwã. No hewɔ lɛ, mɛi babaoo ni jɛ maji ni bɛŋkɛ Yerusalem lɛ amli lɛ kɛ helatsɛmɛi ba koni bɔfoi lɛ atsa amɛ. Enɛ ha jamɔ mli hiɛnyiɛlɔi lɛ ye awuŋa waa, no hewɔ lɛ amɛmɔmɔ bɔfoi lɛ ni amɛwo amɛ tsuŋ. Shi amɛtsɛɛɛ yɛ jɛmɛ.

Maŋkɛ mli lɛ, Nyɔŋmɔ bɔfo ko bagbele tsuŋwoohe lɛ naa shinaa lɛ, taakɛ onaa yɛ biɛ lɛ. Ni bɔfo lɛ kɛɛ amɛ akɛ: ‘Nyɛyaa nyɛyadamɔa sɔlemɔwe lɛ, ni nyɛyaa nɔ nyɛwiea nyɛtsɔa gbɔmɛi lɛ.’ Enɔ jetsɛremɔ, beni jamɔ mli hiɛnyiɛlɔi lɛ tsu mɛi kɛtee tsuŋwoohe lɛ koni amɛyajie bɔfoi lɛ kɛba lɛ, amɛbɛ jɛmɛ. Sɛɛ mli lɛ hii lɛ na amɛ ni amɛmiitsɔɔ nii yɛ sɔlemɔwe lɛ ni amɛkɛ amɛ ba Akuashɔŋ lɛ asa lɛ nɔ.

Jamɔ mli hiɛnyiɛlɔi lɛ kɛɛ: ‘Wɔwo nyɛ kita waa akɛ nyɛkashiɛ Yesu he sane ko kwraa dɔŋŋ. Shi nyɛha Yerusalem eyi obɔ kɛ nyɛtsɔɔmɔ lɛ.’ Ni bɔfoi lɛ ha amɛ hetoo akɛ: ‘Esa akɛ wɔboɔ Nyɔŋmɔ moŋ toi akɛ nɔyelɔ fe gbɔmɛi.’ No hewɔ lɛ amɛtee nɔ amrɔ nɔŋŋ ni amɛjaje “sanekpakpa” lɛ. Ani enɛ jeee nɔkwɛmɔ nɔ kpakpa kɛha wɔ koni wɔnyiɛ sɛɛ?

Bɔfoi lɛ Asaji yitsei 3 kɛyashi 5.



Sanebimɔi

  • Mɛni ba Petro kɛ Yohane nɔ gbi ko shwane be mli ni amɛmiiya sɔlemɔwe lɛ?
  • Mɛni Petro kɛɛ nuu obubuafo ko, ni mɛni Petro kɛha lɛ ni jara wa kwraa fe shika?
  • Mɛni hewɔ jamɔ mli hiɛnyiɛlɔi lɛ amli efu waa lɛ, ni mɛni amɛfee Petro kɛ Yohane?
  • Mɛni Petro kɛɛ jamɔ mli hiɛnyiɛlɔi lɛ, ni mɛɛ kɔkɔbɔɔ bɔfoi lɛ anine shɛ nɔ?
  • Mɛni hewɔ jamɔ mli hiɛnyiɛlɔi lɛ ye awuŋa lɛ, shi mɛni ba be ni awo bɔfoi lɛ atsuŋ nɔ ni ji shii enyɔ nɔ lɛ?
  • Mɛɛ hetoo bɔfoi lɛ kɛha be ni akɛ amɛ ba Akuashɔŋ lɛ asa lɛ nɔ lɛ?

Sanebimɔi ni fata he

  • Kanemɔ Bɔfoi lɛ Asaji 3:1-10.

    Eyɛ mli akɛ ahako wɔ hewalɛ akɛ wɔfee naakpɛɛ nii ŋmɛnɛ moŋ, shi yɛ mɛɛ gbɛ nɔ Petro wiemɔi ni jeɔ kpo yɛ Bɔfoi lɛ Asaji 3:6 lɛ yeɔ ebuaa wɔ koni wɔhiɛ asɔ bɔ ni Maŋtsɛyeli shɛɛ sane lɛ jara wa ha lɛ? (Yoh. 17:3; 2 Kor. 5:18-20; Fil. 3:8)

  • Kanemɔ Bɔfoi lɛ Asaji 4:1-31.

    Kɛji wɔkɛ shitee-kɛ-woo kpe yɛ shiɛmɔ nitsumɔ lɛ mli lɛ, esa akɛ wɔkase wɔnyɛmimɛi klɛŋklɛŋ afii 100 lɛ mli Kristofoi lɛ yɛ mɛɛ gbɛ nɔ? (Bɔf. 4:29, 31; Efe. 6:18-20; 1 Tes. 2:2)

  • Kanemɔ Bɔfoi lɛ Asaji 5:17-42.

    Mɛi ni amɛjeee Odasefoi lɛ ekomɛi ejie hiɛshikamɔ kpo yɛ shiɛmɔ nitsumɔ lɛ he yɛ blema kɛ ŋmɛnɛŋmɛnɛ beaŋ fɛɛ yɛ mɛɛ gbɛ nɔ? (Bɔf. 5:34-39)

Ekrokromɛi Hu Nɛ

Petro He Sane

Kanemɔ koni ole kaselɔ anɔkwafo nɛɛ he saji komɛi hu.