Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 105: Amɛmiimɛ yɛ Yerusalem

Biblia Mli Sane 105: Amɛmiimɛ yɛ Yerusalem

GBƆMƐI ni yɔɔ biɛ lɛ ji Yesu sɛɛnyiɛlɔi. Amɛbo lɛ toi ni amɛhi Yerusalem. Ni beni amɛ fɛɛ amɛmɛɔ kutuu lɛ, gbɛɛmɔ ko ni naa wa waa bayi shia lɛ fɛɛ obɔ. Egbɛɛmɔ tamɔ ahum ko ni miitswa waa. Kɛkɛ ni lalilɛii bɔi baa ni ebatara kaselɔi lɛ ateŋ mɔ fɛɛ mɔ yiteŋ. Ani oona la lɛ yɛ amɛteŋ mɔ fɛɛ mɔ yiteŋ? Mɛni enɛ fɛɛ tsɔɔ?

Mumɔ krɔŋkrɔŋ lɛ ba klɛŋklɛŋ afii 100 lɛ mli kaselɔi lɛ anɔ

Eji naakpɛɛ nɔ ko! Yesu eku esɛɛ eyashɛ ŋwɛi ni ekɛ e-Tsɛ lɛ yɛ jɛmɛ, ni eefɔse Nyɔŋmɔ mumɔ krɔŋkrɔŋ lɛ eeshwie esɛɛnyiɛlɔi lɛ anɔ. Ani ole nɔ ni mumɔ nɛɛ ha amɛfee? Amɛ fɛɛ amɛbɔi wiemɔ yɛ maji anɔ wiemɔi srɔtoi amli.

Mɛi pii ni yɔɔ Yerusalem lɛ nu gbɛɛmɔ ni tamɔ ahum ko ni miitswa lɛ he, ni amɛje kpo kɛba amɛbakwɛ nɔ ni yaa nɔ lɛ. Mɛi lɛ ateŋ mɛi komɛi jɛ maji krokomɛi anɔ ni amɛba biɛ kɛha Israelbii agbijurɔ ni ji Pentekoste lɛ yeli. Mɛɛ naakpɛɛ nii gbɔi nɛɛ na nɛkɛ! Amɛnu ni kaselɔi lɛ miiwie naakpɛɛ nibii ni Nyɔŋmɔ efee lɛ ahe yɛ amɛ diɛŋtsɛ amɛmaŋ wiemɔi amli.

Gbɔi lɛ kɛɛ: ‘Nɛkɛ gbɔmɛi nɛɛ fɛɛ jɛ Galilea. No hewɔ lɛ, te fee tɛŋŋ ni amɛwieɔ maji anɔ wiemɔi srɔtoi ni ji maji anɔ hei ni wɔjɛ lɛ awiemɔi nɛɛ?’

Kɛkɛ ni agbɛnɛ Petro te shi koni egbala mli etsɔɔ amɛ. Kɛkɛ ni ewo egbee nɔ ni ekɛɛ gbɔmɛi lɛ bɔ ni agbe Yesu, ní Yehowa tee lɛ shi kɛjɛ gbohii ateŋ lɛ. Petro kɛɛ: ‘Amrɔ nɛɛ Yesu yɛ ŋwɛi yɛ Nyɔŋmɔ ninejurɔ nɔ. Ni efɔse mumɔ krɔŋkrɔŋ ni ewo shi yɛ he lɛ eshwie shi. Enɛ hewɔ ni nyɛnaa ni nyɛnuɔ naakpɛɛ nibii nɛɛ.’

Ojogbaŋŋ, beni Petro wie enɛ egbe naa lɛ, edɔ gbɔmɛi lɛ ateŋ mɛi pii yɛ nɔ ni afee Yesu lɛ hewɔ. Amɛbi akɛ: ‘Mɛni esa akɛ wɔfee?’ Petro kɛɛ amɛ akɛ: ‘Ehe miihia ni nyɛtsake nyɛ shihilɛ ni abaptisi nyɛ.’ No hewɔ lɛ abaptisi mɛi aaafee 3,000 yɛ nakai gbi lɛ nɔ ni amɛbatsɔmɔ Yesu sɛɛnyiɛlɔi.

Bɔfoi lɛ Asaji 2:1-47.



Sanebimɔi

  • Taakɛ atsɔɔ yɛ mfoniri lɛ mli lɛ, mɛni ba Yesu sɛɛnyiɛlɔi ni mɛɔ yɛ Yerusalem lɛ anɔ?
  • Mɛɛ naakpɛɛ nii gbɔi ni eba Yerusalem lɛ ye he odase?
  • Mɛni Petro gbála mli etsɔɔ gbɔmɛi lɛ?
  • Te gbɔmɛi lɛ nu he amɛha tɛŋŋ be ni amɛbo Petro toi sɛɛ lɛ, ni mɛni ekɛɛ amɛ akɛ amɛfee?
  • Mɛi enyiɛ abaptisi yɛ Pentekoste gbi lɛ nɔ yɛ afi 33 Ŋ.B.?

Sanebimɔi ni fata he

  • Kanemɔ Bɔfoi lɛ Asaji 2:1-47.

    Petro wiemɔi ni yɔɔ Bɔfoi lɛ Asaji 2:23, 36 lɛ tsɔɔ akɛ Yuda maŋ muu lɛ fɛɛ yeɔ f yɛ Yesu gbele lɛ he yɛ mɛɛ gbɛ nɔ? (1 Tes. 2:14, 15)

    Petro fee nɔkwɛmɔnɔ kpakpa yɛ Ŋmalɛi lɛ amli ni ejɛɔ ekɛ mɛi susuɔ nii ahe lɛ mli yɛ mɛɛ gbɛ nɔ? (Bɔf. 2:16, 17, 29, 31, 36, 39; Kol. 4:6)

    Yɛ mɛɛ gbɛ nɔ Petro kɛ “ŋwɛi maŋtsɛyeli lɛ naa samfei lɛ” ni Yesu wo lɛ shi akɛ ekɛbaaha lɛ lɛ tsu nii klɛŋklɛŋ kwraa? (Bɔf. 2:14, 22-24, 37, 38; Mat. 16:19)

Ekrokromɛi Hu Nɛ

Mɛi Ohai Abɔ Na Lɛ Dani Pentekoste Gbi Lɛ Shɛ

Yesu shitee lɛ sɛɛ dani ebaakwɔ kɛya ŋwɛi lɛ, etee nɔ ehã ekaselɔi lɛ le nɔ ni amɛnine baashɛ nɔ kɛ bɔ ni sa akɛ amɛkɛtsu nii ahã.