Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 104: Yesu Ku Esɛɛ Kɛtee Ŋwɛi

Biblia Mli Sane 104: Yesu Ku Esɛɛ Kɛtee Ŋwɛi

BENI gbii lɛ hoɔ kɛyaa lɛ, Yesu jie ehe kpo etsɔɔ esɛɛnyiɛlɔi lɛ shii abɔ. Yɛ be ko mli lɛ ekaselɔi aaafee 500 na lɛ. Beni ejie ehe kpo etsɔɔ amɛ lɛ, ani ole nɔ ni Yesu kɛ amɛ wie he? Nyɔŋmɔ maŋtsɛyeli lɛ. Yehowa tsu Yesu kɛba shikpɔŋ nɛɛ nɔ koni ebatsɔɔ Maŋtsɛyeli lɛ he sane. Ni etee nɔ efee enɛ beni atee lɛ shi kɛjɛ gbohii ateŋ lɛ sɛɛ po.

Yesu miiya ŋwɛi

Ani okaiɔ nɔ ni Nyɔŋmɔ maŋtsɛyeli lɛ ji? Hɛɛ, Maŋtsɛyeli lɛ ji Nyɔŋmɔ nɔyeli diɛŋtsɛ ni yɔɔ ŋwɛi, ni Yesu ji Mɔ ni Nyɔŋmɔ ehala lɛ ni eye nɔ akɛ maŋtsɛ. Taakɛ wɔkase lɛ, Yesu tsɔɔ bɔ ni eeeji maŋtsɛ ni he yɔɔ naakpɛɛ ha kɛtsɔ mɛi ni hɔmɔ yeɔ amɛ lɛ ni eha amɛ niyenii, helatsɛmɛi ni etsa amɛ, kɛ gbohii po ni etee amɛ shi ekoŋŋ lɛ nɔ!

No hewɔ lɛ beni Yesu yeɔ maŋtsɛ yɛ ŋwɛi afii akpe lɛ, te nibii baatamɔ yɛ shikpɔŋ nɔ aha tɛŋŋ? Hɛɛ, abaatsake shikpɔŋ muu lɛ fɛɛ ni abaafee lɛ paradeiso. Awuŋ tai dɔŋŋ, ni awuiyeli, aloo hela loo gbele tete po ehiŋ shi dɔŋŋ. Wɔle akɛ enɛ ji anɔkwale ejaakɛ Nyɔŋmɔ fee shikpɔŋ lɛ koni etsɔ paradeiso eha gbɔmɛi ni amɛná he miishɛɛ. No hewɔ ni efee Eden trom lɛ kɛjɛ shishijee lɛ. Ni Yesu baakwɛ koni afee nɔ ni Nyɔŋmɔ taoɔ ni afee lɛ fɛɛ.

Agbɛnɛ be eshɛ ni Yesu baaku esɛɛ kɛya ŋwɛi. Yesu kɛ gbii 40 sɔŋŋ ejie ehe kpo etsɔɔ ekaselɔi lɛ. No hewɔ lɛ amɛyɛ nɔmimaa akɛ ehiɛ kã ekoŋŋ. Shi dani eeeshi ekaselɔi lɛ, ekɛɛ amɛ akɛ: ‘Nyɛhia Yerusalem kɛyashi beyinɔ ni nyɛnine aaashɛ mumɔ krɔŋkrɔŋ lɛ nɔ.’ Mumɔ krɔŋkrɔŋ lɛ ji Nyɔŋmɔ nitsumɔ hewalɛ, tamɔ kɔɔyɔɔ ni miitswa, ni baaye abua esɛɛnyiɛlɔi lɛ ni amɛfee Nyɔŋmɔ suɔmɔnaa nii. Yɛ naagbee lɛ, Yesu kɛɛ: ‘Esa akɛ nyɛshiɛ mihe sane kɛyashi shikpɔŋ lɛ naagbee hei lɛ fɛɛ.’

Beni Yesu ekɛɛ nɛkɛ sɛɛ lɛ, naakpɛɛ nɔ ko ba. Ebɔi kwɔɔ kɛ ŋwɛigbɛ yaa, tamɔ bɔ ni onaa yɛ biɛ lɛ. Kɛkɛ ni atatu ko ba ni ebatsĩ ehiɛ, ni no haaa ekaselɔi lɛ ana Yesu dɔŋŋ. Yesu tee ŋwɛi, ni ebɔi esɛɛnyiɛlɔi lɛ anɔ yeli yɛ shikpɔŋ nɔ kɛjɛ jɛmɛ.

Kaselɔi lɛ miikwɛ ŋwɛi

1 Korintobii 15:3-8; Kpojiemɔ 21:3, 4; Bɔfoi lɛ Asaji 1:1-11.



Sanebimɔi

  • Kaselɔi enyiɛ kɛ amɛhiŋmɛii na Yesu be ko, ni mɛni he ekɛ amɛ wie?
  • Mɛni ji Nyɔŋmɔ Maŋtsɛyeli lɛ, ni te shikpɔŋ nɔ shihilɛ baatamɔ eha tɛŋŋ yɛ be mli ni Yesu yeɔ nɔ akɛ Maŋtsɛ afii akpe lɛ?
  • Gbii enyiɛ Yesu tee nɔ ekɛjie ehe kpo etsɔɔ ekaselɔi lɛ, shi amrɔ nɛɛ mɛni eshwɛ ni ebaafee?
  • Dani Yesu aaashi ekaselɔi lɛ, mɛni ekɛɛ amɛ akɛ amɛfee?
  • Mɛni yaa nɔ yɛ mfoniri lɛ mli lɛ, ni te ebalɛ tɛŋŋ ni anaaa Yesu dɔŋŋ lɛ?

Sanebimɔi ni fata he

  • Kanemɔ 1 Korintobii 15:3-8.

    Mɛni hewɔ bɔfo Paulo baanyɛ ekɛ nɔmimaa awie Yesu shitee lɛ he lɛ, ni mɛɛ nibii Kristofoi ni yɔɔ ŋmɛnɛ lɛ baanyɛ amɛkɛ nɔmimaa awie he? (1 Kor. 15:4, 7, 8; Yes. 2:2, 3; Mat. 24:14; 2 Tim. 3:1-5)

  • Kanemɔ Bɔfoi lɛ Asaji 1:1-11.

    Nɛgbɛ shiɛmɔ nitsumɔ lɛ gbɛ eshwã kɛyashi, taakɛ agba afɔ̃ shi yɛ Bɔfoi lɛ Asaji 1:8 lɛ? (Bɔf. 6:7; 9:31; 11:19-21; Kol. 1:23)

Ekrokromɛi Hu Nɛ

Kristo yɛ Nyɔŋmɔ Ninejurɔ Nɔ

Kɛyashi be ni Yesu baakpãta ehenyɛlɔi lɛ ahiɛ lɛ baashɛ lɛ, mɛni ebaajɛ ŋwɛi efee?