Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 103: Ebote Tsũ Mli Beni Aŋmɛ Shinaa lɛ Mli

Biblia Mli Sane 103: Ebote Tsũ Mli Beni Aŋmɛ Shinaa lɛ Mli

BENI Petro kɛ Yohane shi gbonyobu ni akɛ Yesu gbonyo yawo mli lɛ naa lɛ, amɛshi Maria kome pɛ yɛ jɛmɛ. Ni ebɔi yaafo. Kɛkɛ ni ebɔi bu lɛ mli kwɛmɔ, taakɛ wɔna yɛ mfoniri ni tsɔ hiɛ lɛ mli lɛ. Kɛkɛ ni ena ŋwɛibɔfoi enyɔ! Amɛbi lɛ akɛ: ‘Mɛni hewɔ ofóɔ?’

Maria ha hetoo akɛ: ‘Amɛbawo mi-Nuŋtsɔ lɛ kɛtee, ni mileee he ni amɛkɛ lɛ eyafɔ̃.’ Kɛkɛ ni Maria tsɔ ehe ni ena nuu ko. Nuu lɛ bi lɛ akɛ: ‘Namɔ otaoɔ?’

Maria susuɔ akɛ trom lɛ mli saalɔ lɛ ni, ni ekolɛ lɛ ewo Yesu gbonyo lɛ. No hewɔ lɛ, ekɛɛ: ‘Kɛ óbawo lɛ yɛ biɛ kɛtee lɛ, tsɔɔmɔ mi he ni okɛ lɛ eyafɔ̃.’ Shi, yɛ anɔkwale mli lɛ, nuu nɛɛ ji Yesu. Eŋɔ gbɔmɔtso ni Maria yooo lɛ. Shi beni ekɛ lɛ diɛŋtsɛ egbɛi tsɛ lɛ lɛ, Maria na ele akɛ Yesu ni. Ni ejo foi ni eyakɛɛ kaselɔi lɛ akɛ: ‘Mina Nuŋtsɔ lɛ!’

Sɛɛ mli yɛ gbi lɛ mli lɛ, beni kaselɔi enyɔ nyiɛ kɛmiiya Emao akrowa lɛ mli lɛ, nuu ko bafata amɛhe. Kaselɔi lɛ anii efee mɔbɔ waa ejaakɛ agbe Yesu. Shi beni amɛnyiɛ gbɛ lɛ nɔ kɛyaa lɛ, nuu lɛ tsɔɔ amɛ nibii pii kɛjɛ Biblia lɛ mli ni eha amɛna miishɛɛ waa. Yɛ naagbee mli, beni amɛyawa he ko koni amɛye nii lɛ, kaselɔi lɛ yoo akɛ nuu nɛɛ ji Yesu. Kɛkɛ ni Yesu laaje, ni kaselɔi enyɔ nɛɛ ku amɛsɛɛ oya kɛtee Yerusalem koni amɛyakɛɛ bɔfoi lɛ ehe sane.

Beni enɛ yaa nɔ lɛ, Yesu jie ehe kpo etsɔɔ Petro. Ní mɛi krokomɛi lɛ nu enɛ lɛ, amɛna miishɛɛ waa. Kɛkɛ ni kaselɔi enyɔ nɛɛ tee Yerusalem ni amɛyatao bɔfoi lɛ. Amɛgba amɛ bɔ ni Yesu jie ehe kpo etsɔɔ amɛ hu yɛ gbɛ lɛ nɔ lɛ. Ni beni amɛgbaa amɛ enɛ lɛ, ani ole naakpɛɛ nɔ ko ni ba?

Kwɛmɔ mfoniri lɛ. Yesu bajie ehe kpo yɛ tsũ lɛ mli tɔ̃ɔ, eyɛ mli akɛ aŋmɛ shinaa lɛ mli po. Kwɛ bɔ ni kaselɔi lɛ ena miishɛɛ amɛha! Ani enɛ jeee miishɛɛ gbi? Ani obaanyɛ okane shii abɔ ni Yesu ejie ehe kpo etsɔɔ esɛɛnyiɛlɔi lɛ kɛbashi bianɛ lɛ? Ní okane lɛ, ani oná shii enumɔ?

Yesu ni ejie ehe kpo etsɔɔ ekaselɔi lɛ

Bɔfo Toma fataaa amɛhe beni Yesu bapue lɛ. No hewɔ lɛ kaselɔi lɛ kɛɛ lɛ akɛ: ‘Wɔna Nuŋtsɔ lɛ!’ Shi Toma kɛɛ ja lɛ diɛŋtsɛ ena Yesu dani ebaahe eye. Ojogbaŋŋ, gbii kpaanyɔ sɛɛ lɛ, kaselɔi lɛ bua amɛhe naa ekoŋŋ yɛ tsũ ni aŋmɛ mli lɛ mli, ni yɛ nɛkɛ be nɛɛ mli lɛ, Toma fata amɛhe. Trukaa kɛkɛ ni Yesu bapue yɛ tsũ lɛ mli. Agbɛnɛ Toma he eye.

Yohane 20:11-29; Luka 24:13-43.



Sanebimɔi

  • Mɛni Maria kɛɛ nuu ko ni esusuɔ akɛ eji tromsaalɔ lɛ, shi mɛni ha ena akɛ Yesu diɛŋtsɛ ni?
  • Mɛni ba be mli ni kaselɔi enyɔ komɛi nyiɛ kɛmiiya Emao akrowa lɛ mli lɛ?
  • Mɛɛ naakpɛɛ nɔ ko ba be ni kaselɔi enyɔ lɛ kɛɛ bɔfoi lɛ akɛ amɛna Yesu lɛ?
  • Shii enyiɛ Yesu ejie ehe kpo etsɔɔ esɛɛnyiɛlɔi lɛ?
  • Mɛni Toma kɛɛ be ni enu akɛ kaselɔi lɛ ena Nuŋtsɔ lɛ, shi mɛni ba gbii kpaanyɔ sɛɛ?

Sanebimɔi ni fata he

  • Kanemɔ Yohane 20:11-29.

    Ani Yesu wiemɔi ni yɔɔ Yohane 20:23 lɛ miitsɔɔ akɛ adesai yɛ hegbɛ ni amɛkɛ mɛi ahe eshai keɔ amɛ? Tsɔɔmɔ mli. (Lala 49:3, 8; Yes. 55:7; 1 Tim. 2:5, 6; 1 Yoh. 2:1, 2)

  • Kanemɔ Luka 24:13-43.

    Mɛɛ gbɛ nɔ wɔɔtsɔ wɔsaa wɔtsui lɛ koni ekpɛlɛ Biblia mli anɔkwalei lɛ anɔ? (Luka 24:32, 33; Ezra 7:10; Mat. 5:3; Bɔf. 16:14; Heb. 5:11-14)