Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 102: Yesu Hiɛ Kã

Biblia Mli Sane 102: Yesu Hiɛ Kã

ANI ole mɔ ni yoo nɛɛ kɛ hii enyɔ lɛ ji? Yoo lɛ ji Yesu naanyo, Maria Magdaleena. Ni hii ni wo atadei yɛji lɛ ji ŋwɛibɔfoi. Tsũ bibioo ni Maria kwɛɔ mli lɛ ji he ni akɛ Yesu gbonyo yafɔ̃ yɛ egbele sɛɛ lɛ. Atsɛɔ lɛ gbonyobu. Shi amrɔ nɛɛ, gbonyo lɛ bɛ jɛmɛ! Namɔ bawo? Nyɛhaa wɔkwɛa.

Ŋwɛibɔfoi ni kɛ Maria Magdaleena miiwie

Yɛ Yesu gbele sɛɛ lɛ, osɔfoi lɛ yakɛɛ Pilato akɛ: ‘Beni Yesu yɔɔ wala mli lɛ, ekɛɛ abaatee lɛ shi kɛjɛ gbohii ateŋ yɛ gbi ni ji etɛ lɛ nɔ. No hewɔ lɛ fã koni ayabu gbonyobu lɛ he. Kɛkɛ lɛ ekaselɔi lɛ nyɛŋ amɛyaju egbonyo lɛ ni amɛkɛɛ akɛ atee lɛ shi kɛjɛ gbohii ateŋ!’ Ni Pilato kɛɛ osɔfoi lɛ koni amɛha asraafoi ayabu gbonyobu lɛ he.

Shi beni Yesu egbo sɛɛ gbi ni ji gbi etɛ lɛ leebi maŋkpa lɛ, Yehowa bɔfo ko ba trukaa. Ni ebatsi tɛ lɛ kɛjɛ gbonyobu lɛ naa. Asraafoi lɛ she gbeyei aahu akɛ amɛnyɛɛɛ amɛtsi amɛhe po. Yɛ naagbee lɛ, beni amɛyakwɛ gbonyobu lɛ mli lɛ, anaaa gbonyo lɛ! Asraafoi lɛ ateŋ mɛi komɛi tee maŋ lɛ mli ni amɛyakɛɛ osɔfoi lɛ. Ani ole nɔ ni osɔfoi fɔji lɛ fee? Amɛha asraafoi lɛ shika koni amɛmale. Osɔfoi lɛ kɛɛ asraafoi lɛ akɛ: ‘Nyɛkɛa akɛ ekaselɔi lɛ ba nyɔɔŋteŋ, ni beni wɔwɔ lɛ, amɛbaju egbonyo lɛ kɛtee.’

Beni enɛ yaa nɔ lɛ, yei komɛi ni ji Yesu nanemɛi bakwɛ gbonyobu lɛ mli. Kwɛ bɔ ni efee amɛ naakpɛɛ eha akɛ amɛna ni nɔ ko bɛ mli! Amrɔ nɔŋŋ kɛkɛ ni ŋwɛibɔfoi enyɔ ni wo atadei ni kpɛlɛɔ bapue. Amɛbi akɛ: ‘Mɛni hewɔ nyɛtaoɔ Yesu yɛ biɛ? Atee lɛ shi. Nyɛyaa oya ni nyɛyakɛa ekaselɔi lɛ.’ Kwɛ bɔ ni yei lɛ jo foi waa amɛha! Shi beni amɛyaa yɛ gbɛ lɛ nɔ lɛ, nuu ko wa amɛ. Ani ole mɔ ni eji? Lɛ ji Yesu! Ekɛɛ amɛ akɛ: ‘Nyɛyaa nyɛyakɛa mikaselɔi lɛ.’

Beni yei lɛ yakɛɛ kaselɔi lɛ akɛ Yesu yɛ wala mli ni amɛna lɛ lɛ, ewa waa kɛha kaselɔi lɛ akɛ amɛaahe amɛye. Ni Petro kɛ Yohane jo foi kɛtee gbonyobu lɛ he akɛ amɛ diɛŋtsɛ amɛyaakwɛ, shi gbonyobu lɛ mli kã shi efolo! Beni Petro kɛ Yohane shi jɛmɛ lɛ, Maria Magdaleena hi shi yɛ sɛɛ. Enɛ ji be mli ni ekwɛ mli ni ena ŋwɛibɔfoi enyɔ lɛ.

Ani ole nɔ ni ba Yesu gbonyo lɛ nɔ? Nyɔŋmɔ ha elaaje. Nyɔŋmɔ eteee Yesu shi kɛbaaa wala mli yɛ heloo gbɔmɔtso ni ekɛgbo lɛ nɔŋŋ mli. Eha Yesu mumɔŋ gbɔmɔtso hee, tamɔ bɔ ni bɔfoi ni yɔɔ ŋwɛi lɛ yɔɔ lɛ. Shi Yesu baanyɛ aŋɔ gbɔmɔtso ni gbɔmɛi baanyɛ ana, bɔni afee ni etsɔɔ ekaselɔi lɛ akɛ eyɛ wala mli, taakɛ wɔbaakase lɛ.

Mateo 27:62-66; 28:1-15; Luka 24:1-12; Yohane 20:1-12.



Sanebimɔi

  • Mɛɛ yoo yɔɔ mfoniri lɛ mli lɛ, ni namɛi ji hii enyɔ lɛ, ni nɛgbɛ amɛyɔɔ?
  • Mɛni hewɔ Pilato kɛɛ osɔfoi lɛ koni amɛha asraafoi ayabu Yesu gbonyobu lɛ he lɛ?
  • Mɛni bɔfo ko fee yɛ Yesu gbele sɛɛ gbi ni ji etɛ lɛ nɔ leebi maŋkpa lɛ, shi mɛni osɔfoi lɛ fee?
  • Mɛni hewɔ efee yei komɛi naakpɛɛ be mli ni amɛbakwɛ Yesu gbonyobu lɛ mli lɛ?
  • Mɛni hewɔ Petro kɛ Yohane jo foi kɛtee Yesu gbonyobu lɛ he lɛ, ni mɛni amɛyana?
  • Mɛni ba Yesu gbonyo lɛ nɔ, shi mɛni efee bɔni afee ni etsɔɔ ekaselɔi lɛ akɛ eyɛ wala mli?

Sanebimɔi ni fata he

  • Kanemɔ Mateo 27:62-66 kɛ 28:1-15.

    Yɛ mɛɛ gbɛ nɔ osɔfonukpai lɛ, Farisifoi kɛ onukpai lɛ fee esha amɛshi mumɔ krɔŋkrɔŋ lɛ yɛ be mli ni atée Yesu shi lɛ? (Mat. 12:24, 31, 32; 28:11-15)

  • Kanemɔ Luka 24:1-12.

    Yɛ mɛɛ gbɛ nɔ amaniɛbɔɔ ni kɔɔ Yesu shitee lɛ he lɛ tsɔɔ akɛ Yehowa buɔ yei akɛ odasefoi ni abaanyɛ akɛ he afɔ̃ amɛnɔ? (Luka 24:4, 9, 10; Mat. 28:1-7)

  • Kanemɔ Yohane 20:1-12.

    Mɛɛ gbɛ nɔ Yohane 20:8, 9 lɛ yeɔ ebuaa wɔ koni wɔna bɔ ni ehe hiaa ni wɔŋmɛ wɔtsui shi kɛji wɔnuuu Biblia mli gbalɛ ko mlibaa shishi jogbaŋŋ lɛ? (Abɛi 4:18; Mat. 17:22, 23; Luka 24:5-8; Yoh. 16:12)

Ekrokromɛi Hu Nɛ

YESU​—GBƐ LƐ, ANƆKWALE LƐ, WALA LƐ

Yesu Hã Mɛi Pii Na Lɛ yɛ Eshitee lɛ Sɛɛ

Mɛni Yesu fee koni ekaselɔi lɛ ana akɛ atee lɛ shi?

SANEBIMƆI NI BIBLIA LƐ EHA HETOO

Ani Atee Yesu Shi kɛ Mumɔŋ Gbɔmɔtso loo Heloo?

Biblia lɛ kɛɛ akɛ, Yesu ba “wala mli akɛ mumɔ,” no hewɔ lɛ te fee tɛŋŋ ni ekaselɔi lɛ na lɛ ni amɛta ehe be ni atee lɛ shi lɛ?

BUU-MƆƆ

Yesu Gbele kɛ Eshitee—Bɔ ni Ehe Yɔɔ Sɛɛnamɔ Kɛhã Bo

Biblia mli anɔkwalei ekpaa ni tsɔɔ bɔ ni mɔ kome gbele baanyɛ ahã mɛi babaoo aná wala.