Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 92: Yesu Tee Gbohii Ashi

Biblia Mli Sane 92: Yesu Tee Gbohii Ashi

GBEKƐ yoo ni onaa yɛ biɛ lɛ eye afii 12. Yesu hiɛ enine mli, ni enyɛ kɛ etsɛ damɔ shi yɛ afãgbɛ. Ani ole nɔ hewɔ ni amɛmii eshɛ amɛhe waa nakai lɛ? Ha wɔkwɛ.

Yesu ni miitee Yairo biyoo lɛ shi

Gbekɛ yoo nɛɛ tsɛ ji nuu ko ni he hiaa waa ni atsɛɔ lɛ Yairo. Gbi ko lɛ hela mɔ ebiyoo lɛ, ni akɛ lɛ yafɔ̃ saa nɔ. Shi enaaa hewalɛ. Hela lɛ tee nɔ ni emli bawa waa. Yairo kɛ eŋa tsui baye waa, ejaakɛ etamɔ nɔ ni amɛbiyoo fioo lɛ baagbo. Lɛ pɛ ji amɛbiyoo. No hewɔ lɛ, Yairo tee eyaatao Yesu. Énu naakpɛɛ nibii ni Yesu feɔ lɛ he.

Beni Yairo na Yesu lɛ, no mli lɛ asafo babaoo ko ebua amɛhe naa yɛ emasɛi. Shi Yairo tsɔ mɛi lɛ ateŋ ni eyagbee Yesu naji anaa. Ekɛɛ lɛ akɛ: ‘Mibiyoo lɛ he miiye waa.’ Ni ekpa fai akɛ: ‘Ofainɛ ba ni obatsa lɛ oha mi.’ Yesu kɛɛ lɛ akɛ ebaaba.

Beni amɛnyiɛ kɛyaa lɛ, gbɔmɛi asafo babaoo lɛ tsi kɛba koni amɛbɛŋkɛ lɛ. Amrɔ nɔŋŋ kɛkɛ ni Yesu wa. Ni ebi akɛ: ‘Namɔ ta mihe lɛ?’ Yesu nu he akɛ hewalɛ ko eje emli, no hewɔ lɛ ele akɛ mɔ ko eta ehe. Shi namɔ ni? Lɛ ji yoo ko ni hela eye lɛ waa afii 12 sɔŋŋ lɛ. Lɛ eba ni ebata Yesu atade lɛ he, ni atsá lɛ lɛ!

Enɛ ha Yairo ná miishɛɛ fioo, ejaakɛ ena akɛ ewaaa kwraa kɛha Yesu akɛ eeetsa mɔ. Shi amrɔ nɔŋŋ kɛkɛ ni tsulɔ ko ba. Ebakɛɛ Yairo akɛ: ‘Kaagba Yesu naa dɔŋŋ. Obiyoo lɛ egbo.’ Yesu nu nɔ ni akɛɛ lɛ, ni ekɛɛ Yairo akɛ: ‘Kaashe gbeyei, eyi baana wala ekoŋŋ.’

Yɛ naagbee mli beni amɛbashɛ Yairo shia lɛ, gbɔmɛi lɛ miifo kɛ awerɛho babaoo. Shi Yesu kɛɛ amɛ akɛ: ‘Nyɛkafoa. Gbekɛ lɛ gboko. Wɔ kɛkɛ ewɔ.’ Shi amɛŋmɔ, ni amɛye Yesu he fɛo, ejaakɛ amɛle akɛ egbo.

Kɛkɛ ni Yesu tsɛ́ gbekɛ yoo lɛ tsɛ kɛ enyɛ kɛ ebɔfoi lɛ ateŋ mɛi etɛ ni amɛ fɛɛ amɛtee tsũ mli he ni gbekɛ lɛ kã lɛ. Emɔ enine mli ni ekɛɛ lɛ akɛ: ‘Tee shi!’ Ni eba wala mli ekoŋŋ, tamɔ bɔ ni onaa yɛ biɛ lɛ. Ni ete shi ni enyiɛ! No hewɔ ni enyɛ kɛ etsɛ ena miishɛɛ waa diɛŋtsɛ lɛ.

Jeee mɔ nɛ ji mɔ klɛŋklɛŋ ni Yesu tee lɛ shi kɛjɛ gbohii ateŋ. Mɔ klɛŋklɛŋ ni Biblia lɛ wieɔ ehe ji yoo okulafo ko ni yɔɔ Nain maŋ lɛ mli lɛ binuu lɛ. Yɛ sɛɛ mli lɛ, Yesu tee Lazaro, ni ji Maria kɛ Marta nyɛmi nuu lɛ hu shi kɛjɛ gbohii ateŋ. Beni Yesu baaye nɔ akɛ Nyɔŋmɔ maŋtsɛ lɛ, ekɛ mɛi pii ni egboi baaba wala mli ekoŋŋ. Ani wɔnaŋ enɛ he miishɛɛ?

Luka 8:40-56; 7:11-17; Yohane 11:17-44.



Sanebimɔi

  • Namɔ ji gbekɛ yoo ni yɔɔ mfoniri lɛ mli lɛ tsɛ, ni mɛni hewɔ ekɛ eŋa lɛ fɛɛ tsui baye waa lɛ?
  • Mɛni Yairo fee be ni ena Yesu lɛ?
  • Mɛni ba be mli ni Yesu yaa Yairo shia lɛ, ni mɛɛ amaniɛbɔɔ akɛbaha Yairo yɛ gbɛ lɛ nɔ?
  • Mɛni hewɔ mɛi ni yɔɔ Yairo shia lɛ ŋmɔ Yesu lɛ?
  • Mɛni Yesu fee be mli ni ekɛ ekaselɔi etɛ kɛ gbekɛ yoo lɛ tsɛ kɛ enyɛ tee gbekɛ yoo lɛ tsũ lɛ mli lɛ?
  • Namɔ hu Yesu tée lɛ shi kɛjɛ gbohii ateŋ, ni mɛni enɛ tsɔɔ?

Sanebimɔi ni fata he

  • Kanemɔ Luka 8:40-56.

    Yesu jie mɔbɔnalɛ kɛ hiɛshikamɔ kpo etsɔɔ yoo ni lá hoɔ lɛ lɛ yɛ mɛɛ gbɛ nɔ, ni mɛni Kristofoi onukpai ni yɔɔ ŋmɛnɛ lɛ baanyɛ akase kɛjɛ enɛ mli? (Luka 8:43, 44, 47, 48; 3 Mose 15:25-27; Mat. 9:12, 13; Kol. 3:12-14)

  • Kanemɔ Luka 7:11-17.

    Mɛni hewɔ mɛi ni amɛsuɔlɔi egboi lɛ baanyɛ aná miishɛjemɔ kpele kɛjɛ hetoo ni Yesu kɛha Nain yoo okulafo lɛ mli lɛ? (Luka 7:13; 2 Kor. 1:3, 4; Heb. 4:15)

  • Kanemɔ Yohane 11:17-44.

    Yesu tsɔɔ akɛ ejeee tɔ̃mɔ akɛ aaaye awerɛho yɛ suɔlɔ ko gbele he yɛ mɛɛ gbɛ nɔ? (Yoh. 11:33-36, 38; 2 Sam. 18:33; 19:1-4)

Ekrokromɛi Hu Nɛ

Gbekɛ Yoo Fioo ko Ba Wala mli Ekoŋŋ!

Be ni Yesu kɛɛ wɔ kɛkɛ gbekɛ yoo ni egbo lɛ wɔɔ lɛ, mɛi ŋmɔ lɛ. Mɛni ele ní amɛleee?

Yesu Tee Yoo Okulafo ko Binuu Shi

Mɛi ni na naakpɛɛ nii nɛɛ kɔ nɔ ni etsɔɔ diɛŋtsɛ lɛ sɛɛ.

Atee Lazaro Shi

Nibii titrii enyɔ hãaa mɛi ni teɔ shi amɛwoɔ Yesu lɛ tete po aje enaakpɛɛ nii nɛɛ he ŋwane.