Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 99: Yɛ Ŋwɛitsu ko Mli

Biblia Mli Sane 99: Yɛ Ŋwɛitsu ko Mli

AGBƐNƐ Soo gbɛkɛ nɛ, yɛ no sɛɛ gbii enyɔ. Yesu kɛ ebɔfoi 12 lɛ eba nɛkɛ ŋwɛitsũ agbo nɛɛ mli koni amɛbaye Hehoo niyenii lɛ. Nuu ni onaa ni miije kpo lɛ ji Yuda Iskariot. Eeya ni eyakɛɛ osɔfoi lɛ bɔ ni amɛbaafee ni amɛnine ashɛ Yesu nɔ.

Nuŋtsɔ lɛ gbɛkɛnaashi niyenii lɛ

Gbi ni tsɔ hiɛ lɛ mli lɛ, Yuda tee amɛŋɔɔ ni eyabi amɛ akɛ: ‘Kɛ miwa nyɛ ni nyɛmɔ Yesu lɛ, mɛni nyɛbaaha mi?’ Amɛkɛɛ: ‘Jwiɛtɛi kukuji 30.’ No hewɔ lɛ Yuda miiya ni eyana hii nɛɛ koni enyiɛ amɛhiɛ kɛba Yesu ŋɔɔ. Ani jeee efɔŋ nɛ?

Aye Hehoo niyenii lɛ agbe naa. Shi Yesu je niyenii krɛdɛɛ kroko hu shishi agbɛnɛ. Ekɔ aboloo ni ekɛha ebɔfoi lɛ ni ekɛɛ amɛ akɛ: ‘Nyɛhea ni nyɛyea, ejaakɛ enɛ tsɔɔ migbɔmɔtso ni abaaŋɔ aha yɛ nyɛhewɔ lɛ.’ Ni ewo wein kɛ kpulu hu ni ekɛha amɛ ni ekɛɛ amɛ akɛ: ‘Nyɛhea ni nyɛnua, ejaakɛ enɛ tsɔɔ milá ni abaafɔse ashwie shi yɛ nyɛhewɔ lɛ.’ Biblia lɛ tsɛɔ enɛ akɛ ‘Nuŋtsɔ lɛ gbɛkɛnaashi niyenii lɛ,’ aloo ‘Nuŋtsɔ niyenii.’

Israelbii lɛ yeɔ Hehoo lɛ koni ekai amɛ be ni Nyɔŋmɔ bɔfo lɛ ‘ho’ amɛshiai lɛ ‘ahe’ yɛ Mizraim, ni eyagbe kromɔbii ni yɔɔ Mizraimbii lɛ ashiai amli lɛ fɛɛ lɛ. Shi agbɛnɛ Yesu miitao ni esɛɛnyiɛlɔi lɛ akai lɛ, kɛ bɔ ni ekɛ ewala eha yɛ amɛhewɔ lɛ. Ni no hewɔ ekɛɛ amɛye nɛkɛ niyenii krɛdɛɛ nɛɛ daa afi lɛ.

Beni amɛye Nuŋtsɔ lɛ Gbɛkɛnaashi Niyenii lɛ amɛgbe naa lɛ, Yesu kɛɛ ebɔfoi lɛ ni amɛfee ekãa ni amɛhe awa yɛ hemɔkɛyeli mli. Yɛ naagbee lɛ, amɛla lalai amɛha Nyɔŋmɔ ni amɛtee. Je ena waa agbɛnɛ, ekolɛ afo mli yɛ maŋkɛ po. Nyɛhaa wɔkwɛa he ni amɛtee.

Mateo 26:14-30; Luka 22:1-39; Yohane yitsei 13 kɛyashi 17; 1 Korintobii 11:20.



Sanebimɔi

  • Taakɛ anaa yɛ mfoniri lɛ mli lɛ, mɛni hewɔ Yesu kɛ ebɔfoi 12 lɛ eba ŋwɛitsu agbo ko mli lɛ?
  • Namɔ ji nuu ni jeɔ kpo lɛ, ni mɛni eyaafee?
  • Be ni aye Hehoo niyenii lɛ agbe naa lɛ, mɛɛ niyenii krɛdɛɛ ko Yesu to he gbɛjianɔ kɛje shishi?
  • Mɛɛ sane ko ni ba Hehoo lɛ kaiɔ Israelbii lɛ, ni mɛni sane niyenii krɛdɛɛ nɛɛ kaiɔ Yesu sɛɛnyiɛlɔi lɛ?
  • Be ni aye Nuŋtsɔ lɛ Gbɛkɛnaashi Niyenii lɛ agbe naa lɛ, mɛni Yesu kɛɛ esɛɛnyiɛlɔi lɛ, ni mɛni amɛfee?

Sanebimɔi ni fata he

  • Kanemɔ Mateo 26:14-30.

    Mɛɛ gbɛ nɔ Mateo 26:15 lɛ tsɔɔ yɛ akɛ Yesu sɛɛ gbɛ ní Yuda tsɔɔ lɛ ji nɔ ko ni eje gbɛ efee?

    Mɛɛ yiŋtoi enyɔ Yesu lá ni afɔse ashwie shi lɛ tsuɔ he nii? (Mat. 26:27, 28; Yer. 31:31-33; Efe. 1:7; Heb. 9:19, 20)

  • Kanemɔ Luka 22:1-39.

    Satan bote Yuda mli yɛ mɛɛ shishinumɔ naa? (Luka 22:3; Yoh. 13:2; Bɔf. 1:24, 25)

  • Kanemɔ Yohane 13:1-20.

    Kɛji wɔkwɛ amaniɛbɔɔ ni yɔɔ Yohane 13:2 lɛ, ani abaanyɛ ashwa Yuda yɛ nɔ ni efee lɛ hewɔ, ni mɛni Nyɔŋmɔ tsuji baanyɛ akase kɛjɛ enɛ mli? (1 Mose 4:7; 2 Kor. 2:11; Gal. 6:1; Yak. 1:13, 14)

    Mɛɛ nɔkwɛmɔnɔ ni hewalɛ yɔɔ mli ní abaanyɛ akase nii kɛjɛ mli Yesu kɛha? (Yoh. 13:15; Mat. 23:11; 1 Pet. 2:21)

  • Kanemɔ Yohane 17:1-26.

    Yesu sɔle koni esɛɛnyiɛlɔi lɛ ‘afee ekome’ yɛ mɛɛ shishinumɔ naa? (Yoh. 17:11, 21-23; Rom. 13:8; 14:19; Kol. 3:14)

Ekrokromɛi Hu Nɛ

Nuŋtsɔ lɛ Gbɛkɛ Niyeli Lɛ

Yesu to gbi jurɔ ko ni esa akɛ esɛɛnyiɛlɔi lɛ aye daa afi kɛkai lɛ yɛ Nisan 14 lɛ nɔ.