Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 97: Yesu Miiba akɛ Maŋtsɛ

Biblia Mli Sane 97: Yesu Miiba akɛ Maŋtsɛ

BENI etsa shwilafoi nibalɔi enyɔ lɛ sɛɛ lɛ, etsɛɛɛ kɛkɛ ni Yesu ba akrowa bibioo ko mli yɛ Yerusalem masɛi. Ekɛɛ ekaselɔi lɛ ateŋ mɛi enyɔ akɛ: ‘Nyɛyaa akrowa lɛ, ni nyɛbaana teji oblayoo ko. Nyɛfɛnea lɛ ni nyɛkɛbahaa mi.’

Beni akɛ teji lɛ baha lɛ lɛ, Yesu ta enɔ. Kɛkɛ ni eta enɔ kɛtee Yerusalem ni bɛŋkɛ jɛmɛ lɛ. Beni ebɛŋkɛ maŋtiase lɛ, asafo babaoo ko je kpo ni amɛkɛ lɛ bakpe. Amɛteaŋ mɛi pii jie amɛtadei ni amɛkɛshwie shikpɔŋ yɛ gbɛ lɛ nɔ. Mɛi krokomɛi hu folɔ tɛŋ bɛlɛoi. Amɛkɛ enɛɛmɛi hu shwie gbɛ lɛ nɔ, ni amɛbolɔ akɛ: ‘Nyɔŋmɔ ajɔɔ maŋtsɛ ni baa yɛ Yehowa gbɛi amli lɛ!’

Mɛi miinya Yesu he

Be ko ni eho lɛ, maŋtsɛmɛi heei ni awoɔ amɛ yɛ Israel lɛ taraa teji oblayoo nɔ kɛyaa Yerusalem ni amɛkɛ amɛhe yatsɔɔ maŋbii lɛ. No ji nɔ ni Yesu feɔ lɛ. Ni gbɔmɛi nɛɛ miitsɔɔ akɛ amɛmiisumɔ ni Yesu aye amɛnɔ maŋtsɛ. Shi jeee gbɔmɛi lɛ fɛɛ sumɔɔ lɛ. Wɔbaanyɛ wɔna enɛ yɛ nɔ ni ba beni Yesu tee sɔlemɔwe lɛ mli lɛ.

Yesu tsa mɛi ni eshwila kɛ obubuafoi yɛ sɔlemɔwe lɛ. Beni gbekɛbii bibii lɛ na enɛ lɛ, amɛbolɔ kɛjie Yesu yi. Shi enɛ ha osɔfoi lɛ amli fu waa, ni amɛkɛɛ Yesu akɛ: ‘Ani oonu nɔ ni gbekɛbii lɛ kɛɔ lɛ?’

Yesu here nɔ akɛ: ‘Hɛɛ, miinu. Ani nyɛkaneko kɛjɛko Biblia lɛ mli dã akɛ: “Abifabii kɛ fufɔbii anaa ni Nyɔŋmɔ esaa yijiemɔ eto yɛ?”’ No hewɔ lɛ gbekɛbii lɛ tee nɔ amɛjie Nyɔŋmɔ maŋtsɛ lɛ yi.

Wɔmiisumɔ ni wɔfee tamɔ nakai gbekɛbii lɛ, aloo jeee nakai? Ekolɛ mɛi komɛi baabɔ mɔdɛŋ ni amɛtsĩ wɔnaa ni wɔkawie Nyɔŋmɔ maŋtsɛyeli lɛ he. Shi wɔbaaya nɔ wɔgba naakpɛɛ nibii ni Yesu baafee aha gbɔmɛi lɛ wɔtsɔɔ mɛi krokomɛi.

Beni Yesu yɔɔ shikpɔŋ lɛ nɔ lɛ, no mli lɛ be shɛko kɛhako lɛ akɛ eeeye maŋtsɛ. Mɛɛ be nɛkɛ be nɛɛ baashɛ? Yesu kaselɔi lɛ miitao amɛle. Wɔbaakane enɛ he sane yɛ nɔ ni nyiɛ sɛɛ lɛ mli.

Mateo 21:1-17; Yohane 12:12-16.



Sanebimɔi

  • Be ni Yesu ba akrowa bibioo ko ni bɛŋkɛ Yerusalem lɛ, mɛni ekɛɛ ekaselɔi lɛ akɛ amɛfee?
  • Taakɛ onaa yɛ mfoniri lɛ mli lɛ, mɛni ba be ni Yesu bɛŋkɛ maŋtiase ni yɔɔ Yerusalem lɛ?
  • Mɛni gbekɛbii bibii lɛ fee be mli ni amɛna ni Yesu miitsa shwilafoi kɛ obubuafoi lɛ?
  • Mɛni Yesu kɛɛ osɔfoi ni mli efu waa lɛ?
  • Wɔbaanyɛ wɔfee wɔnii tamɔ gbekɛbii ni jie Yesu yi lɛ yɛ mɛɛ gbɛ nɔ?
  • Mɛni kaselɔi lɛ taoɔ akɛ amɛle?

Sanebimɔi ni fata he

  • Kanemɔ Mateo 21:1-17.

    Yerusalem ni Yesu bote akɛ Maŋtsɛ lɛ yɛ srɔto kwraa yɛ Romabii abeaŋ tatsɛmɛi ni eye kunim lɛ anɔ̃ lɛ he yɛ mɛɛ gbɛ nɔ? (Mat. 21:4, 5; Zak. 9:9; Fil. 2:5-8; Kol. 2:15)

    Mɛɛ nikasemɔ oblahii kɛ oblayei bibii baanyɛ akase kɛjɛ Lala 118 lɛ ní Israel gbekɛbii hii lɛ tsɛ́ yisɛɛ be ni Yesu boteɔ sɔlemɔwe lɛ? (Mat. 21:9, 15; Lala 118:25, 26; 2 Tim. 3:15; 2 Pet. 3:18)

  • Kanemɔ Yohane 12:12-16.

    Mɛni tɛŋ bɛlɛoi ni mɛi lɛ kɛtsu nii kɛnyá Yesu he lɛ damɔ shi kɛha? (Yoh. 12:13; Fil. 2:10; Kpoj. 7:9, 10)

Ekrokomɛi Hu Nɛ

YESU​—GBƐ LƐ, ANƆKWALE LƐ, WALA LƐ

Maŋtsɛ lɛ Ta Teji Bi nɔ Kɛbote Yerusalem

Ehã gbalɛ ko ni agba nɔ ni fa fe afii ohai enumɔ lɛ ba mli.