Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 95: Gbɛ ni Yesu Tsɔɔ Nɔ Etsɔɔ Nii

Biblia Mli Sane 95: Gbɛ ni Yesu Tsɔɔ Nɔ Etsɔɔ Nii

GBI ko lɛ Yesu kɛɛ nuu ko akɛ esa akɛ esumɔ enaanyo sane. Ni nuu lɛ bi Yesu akɛ: ‘Namɔ ji minaanyo?’ Shi, Yesu le nɔ ni nuu nɛɛ susuɔ. Nuu lɛ susuɔ akɛ mɛi ni ekɛ amɛ hiɛ hewolo nɔ su kome kɛ mɛi ni ekɛyɔɔ jamɔ kome mli lɛ pɛ ji enanemɛi. No hewɔ lɛ ha wɔkwɛ nɔ ni Yesu kɛɛ lɛ.

Bei komɛi lɛ Yesu gbaa saji ni ekɛtsɔɔ mɛi anii. Nɛkɛ ji bɔ ni efee agbɛnɛ. Egba sane ko ni kɔɔ Yudanyo ko kɛ Samarianyo ko he. Wɔna wɔle momo akɛ Yudafoi lɛ ateŋ mɛi pii sumɔɔɔ Samariabii asane. Ojogbaŋŋ, Yesu sane lɛ nɛ:

Gbi ko lɛ Yudanyo ko miifã gbɛ kɛmiitsɔ gɔji ateŋ gbɛ ko nɔ kɛmiiya Yeriko. Shi ojotswalɔi yafo lɛ. Amɛhe eshika lɛ yɛ edɛŋ ni amɛyi lɛ waa aahu kɛyashi efee tamɔ mɔ ni egbo.

Sɛɛ mli lɛ, Yudanyo osɔfo ko baho yɛ gbɛ lɛ nɔ. Ena nuu ni ayi lɛ nɛɛ. Mɛni osusuɔ akɛ efee? Oo, etsɔ ehe kɛtee gbɛ lɛ afã kroko ni etsa nɔ kɛtee. Kɛkɛ ni mɔ kroko ni ji Nyɔŋmɔ jálɔ hu ba. Levinyo ji lɛ. Ani ewá edamɔ shi? Dabi, lɛ hu ewaaa edamɔɔɔ shi koni eye ebua nuu ni ayi lɛ waa nɛɛ. Obaanyɛ ona osɔfo lɛ kɛ Levinyo lɛ yɛ shɔŋŋ ni amɛmiiya yɛ gbɛ lɛ nɔ.

Shi kwɛmɔ mɔ ni kɛ nuu ni ayi lɛ waa nɛɛ yɔɔ jɛmɛ lɛ. Samarianyo ji lɛ. Ni eeye eebua Yudanyo lɛ. Ekɛ tsofa miito efaji lɛ anɔ eeha lɛ. Sɛɛ mli lɛ, ewó Yudanyo lɛ kɛtee he ko ni ebaanyɛ ejɔɔ ehe ni ena hewalɛ yɛ.

Samarianyo ni fee ehe naanyo kpakpa lɛ

Beni egbe esane lɛ naa lɛ, Yesu kɛɛ nuu ni bi lɛ sane lɛ akɛ: ‘Mɛi etɛ nɛɛ ateŋ namɔ osusuɔ akɛ efee enii akɛ naanyo kɛha nuu ni ayi lɛ waa nɛɛ? Ani osɔfo lɛ, aloo Levinyo lɛ, aloo Samarianyo lɛ?’

Nuu lɛ ha hetoo akɛ: ‘Samarianyo lɛ ni. Ejie mɔbɔnalɛ kpo etsɔɔ nuu ni ayi lɛ lɛ.’

Yesu kɛɛ lɛ akɛ: ‘Okɛɛ jogbaŋŋ. Bo hu yaa ni oyafee mɛi krokomɛi tamɔ bɔ ni efee lɛ.’

Ani osumɔɔɔ gbɛ ni Yesu tsɔɔ nɔ etsɔɔ nii lɛ? Wɔbaanyɛ wɔkase nibii ni he hiaa babaoo kɛji wɔbo nɔ ni Yesu kɛɔ yɛ Biblia lɛ mli lɛ toi, aloo jeee nakai?

Luka 10:25-37.



Sanebimɔi

  • Mɛɛ sane nuu ko bi Yesu, ni mɛni hewɔ?
  • Bei komɛi lɛ, mɛni Yesu kɛtsɔɔ mɛi anii, ni mɛni wɔná wɔle momo yɛ Yudafoi lɛ kɛ Samariabii ahe?
  • Yɛ sane ni Yesu gba lɛ mli lɛ, mɛni ba Yudanyo ko nɔ yɛ be mli ni Yudanyo lɛ fãa gbɛ kɛtsɔɔ gbɛ ni yaa Yeriko lɛ nɔ lɛ?
  • Mɛni ba be ni Yudanyo osɔfo ko kɛ Levinyo ko baho yɛ gbɛ lɛ nɔ lɛ?
  • Namɔ yeɔ ebua Yudanyo ni apila lɛ yɛ mfoniri lɛ mli lɛ?
  • Be ni Yesu gbe sane lɛ naa lɛ, mɛɛ sane ebi, ni te nuu lɛ ha hetoo eha tɛŋŋ?

Sanebimɔi ni fata he

  • Kanemɔ Luka 10:25-37.

    Yɛ nɔ najiaŋ ni Yesu aaaha hetoo tɛ̃ɛ lɛ, yɛ mɛɛ gbɛ nɔ eye ebua nuu ko ni le Mla lɛ mli jogbaŋŋ lɛ koni esusu nii ahe? (Luka 10:26; Mat. 16:13-16)

    Mɛɛ gbɛ nɔ Yesu tsɔ ekɛ nɔkwɛmɔnii tsu nii ekɛwie eshi jwɛŋmɔ ni ejaaa ní mɛi ni boɔ wiemɔ ni ehaa lɛ toi lɛ aaaná lɛ? (Luka 10:36, 37; 18:9-14; Tito 1:9)

Ekrokromɛi Hu Nɛ

Samarianyo ko Tsɔɔ akɛ Eji Naanyo Kpakpa

Mɛɛ gbɛ nɔ Yesu kɛ abɛbua ko ni kɔɔ Samarianyo naanyo kpakpa lɛ he lɛ tsu nii kɛtsɔɔ nɔ ko ni náa mɔ nɔ hewalɛ waa?

Bi ni Laaje lɛ Ku Esɛɛ

Mɛni wɔkaseɔ yɛ Yesu nɔkwɛmɔnɔ ni kɔɔ bi nyenyeŋtswi lɛ he lɛ mli?