Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 94: Esumɔɔ Gbekɛbii Bibii Asane

Biblia Mli Sane 94: Esumɔɔ Gbekɛbii Bibii Asane

KWƐMƆ Yesu yɛ biɛ ni ekɛ eniji efua gbekɛ nuu lɛ. Obaana akɛ Yesu sumɔɔ gbekɛbii asane lɛɛlɛŋ. Hii lɛ ni kwɛɔ lɛ ji ebɔfoi lɛ. Mɛni Yesu kɛɔ amɛ lɛ? Ha wɔkwɛ.

Etsɛko tsɔ ni Yesu kɛ ebɔfoi lɛ ku amɛsɛɛ kɛjɛ gbɛfãa kakadaŋŋ ko amɛba. Beni amɛnyiɛ gbɛ kɛbaa lɛ, ekaselɔi lɛ je sane ko he ŋwane yɛ amɛteŋ. No hewɔ lɛ yɛ gbɛfãa lɛ sɛɛ lɛ Yesu bi amɛ akɛ: ‘Mɛɛ sane nyɛjeɔ he ŋwane yɛ gbɛ lɛ nɔ lɛ?’ Yɛ anɔkwale mli lɛ, Yesu le nɔ ni sane lɛ ji. Shi ebi bɔfoi lɛ sane lɛ akɛ amɛbaakɛɛ lɛ lo.

Yesu kɛ gbekɛ fioo ko

Bɔfoi lɛ haaa lɛ hetoo, ejaakɛ ni amɛbaa yɛ gbɛ lɛ nɔ lɛ amɛmiije ŋwane yɛ mɔ ni ji amɛteŋ onukpa fe fɛɛ lɛ he. Bɔfoi lɛ ekomɛi miitao ni amɛfee mɛi ni he hiaa fe mɛi krokomɛi lɛ. Te Yesu baafee tɛŋŋ ekɛɛ amɛ akɛ ejaaa akɛ mɔ ko aaasumɔ ni efee mɔ ni nɔ kwɔ fe fɛɛ?

Etsɛ gbekɛ nuu fioo lɛ kɛba, ni ekɛ lɛ badamɔ amɛ fɛɛ amɛhiɛ. Kɛkɛ ni ekɛɛ ekaselɔi lɛ akɛ: ‘Miisumɔ ni nyɛle enɛ jogbaŋŋ, Kɛ́ nyɛtsakeee ni nyɛtsɔmɔ tamɔ gbekɛbii bibii lɛ, nyɛboteŋ Nyɔŋmɔ maŋtsɛyeli lɛ mli. Mɔ ni ji agbo fe fɛɛ yɛ maŋtsɛyeli lɛ mli lɛ ji mɔ ni baa ehe shi tamɔ gbekɛ bibioo nɛɛ.’ Ani ole nɔ hewɔ ni Yesu wie nɛkɛ lɛ?

Ojogbaŋŋ, gbekɛbii bibii yeee amɛtsui akɛ amɛmiitao ni amɛfee mɛi ni nɔ kwɔlɔ loo mɛi ni he hiaa fe mɛi krokomɛi. No hewɔ lɛ, esa akɛ bɔfoi lɛ akase ni amɛtsɔmɔ tamɔ gbekɛbii yɛ nɛkɛ gbɛ nɔ, ni amɛkabe akɛ amɛ nɔ kwɔlɔ loo amɛhe hiaa fe mɛi krokomɛi.

Bei krokomɛi yɛ hu, ni Yesu tsɔɔ bɔ ni esumɔɔ gbekɛbii bibii asane ehaa. Yɛ no sɛɛ nyɔji fioo ko lɛ, mɛi komɛi kɛ amɛbii ba koni amɛbana Yesu. Bɔfoi lɛ bɔ mɔdɛŋ ni amɛtsĩ amɛ gbɛ. Shi Yesu kɛɛ ebɔfoi lɛ akɛ: ‘Nyɛhaa gbekɛbii lɛ abaa miŋɔɔ, ni nyɛkatsĩa amɛ gbɛ, ejaakɛ mɛi ni tamɔ amɛ lɛ anɔ̃ ji Nyɔŋmɔ maŋtsɛyeli lɛ.’ Kɛkɛ ni Yesu hole gbekɛbii lɛ anɔ, ni ejɔɔ amɛ. Ani ehiii akɛ wɔɔle akɛ Yesu sumɔɔ gbekɛbii asane?

Mateo 18:1-4; 19:13-15; Marko 9:33-37; 10:13-16.



Sanebimɔi

  • Mɛni he ŋwane bɔfoi lɛ jeɔ be mli ni amɛkuɔ amɛsɛɛ kɛjɛɔ gbɛfãa kakadaŋŋ ko mli amɛbaa lɛ?
  • Mɛni hewɔ Yesu tsɛ́ gbekɛ nuu fioo ko ni ekɛ lɛ badamɔ bɔfoi lɛ ateŋ lɛ?
  • Esa akɛ bɔfoi lɛ akase bɔ ni amɛaafee amɛtsɔmɔ tamɔ gbekɛbii yɛ mɛɛ gbɛ nɔ?
  • Mɛɛ gbɛ nɔ Yesu tsɔɔ yɛ nyɔji fioo komɛi asɛɛ akɛ esumɔɔ gbekɛbii asane?

Sanebimɔi ni fata he

  • Kanemɔ Mateo 18:1-4.

    Mɛni hewɔ Yesu kɛ abɛbuai tsu nii ni ekɛtsɔɔ nii lɛ? (Mat. 13:34, 36; Mar. 4:33, 34)

  • Kanemɔ Mateo 19:13-15.

    Mɛɛ gbekɛbii bibii asui esa akɛ wɔkase bɔni afee ni wɔná Maŋtsɛyeli jɔɔmɔi amli gbɛfaŋnɔ? (Lala 25:9; 138:6; 1 Kor. 14:20)

  • Kanemɔ Marko 9:33-37.

    Mɛni Yesu tsɔɔ ekaselɔi lɛ yɛ hegbɛ taomɔ kɛha gbɛihemɔ he? (Mar. 9:35; Mat. 20:25, 26; Gal. 6:3; Fil. 2:5-8)

  • Kanemɔ Marko 10:13-16.

    Yesu ji mɔ ko ni anyɛɔ abɛŋkɛɔ lɛ yɛ mɛɛ gbɛ nɔ, ni mɛni Kristofoi onukpai baanyɛ akase kɛjɛ enɔkwɛmɔnɔ lɛ mli? (Mar. 6:30-34; Fil. 2:1-4; 1 Tim. 4:12)

Ekrokomɛi Hu Nɛ

YESU​—GBƐ LƐ, ANƆKWALE LƐ, WALA LƐ

Yesu Wie Gbalatsemɔ kɛ Suɔmɔ ni Anáa Ahãa Gbekɛbii lɛ He

Esoro bɔ ni Yesu buɔ gbekɛbii ehãa lɛ kwraa yɛ ekaselɔi lɛ anɔ he. Mɛni hewɔ?