Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 93: Yesu Hã Gbɔmɛi Pii Niyenii

Biblia Mli Sane 93: Yesu Hã Gbɔmɛi Pii Niyenii

NƆ FƆŊ ko eba. Etsɛko tsɔ̃ ni agbe Yohane Baptisilɔ lɛ. Herodia, maŋtsɛ lɛ ŋa lɛ, sumɔɔɔ esane. Ni enyɛ́ eha maŋtsɛ lɛ kpɛlɛ nɔ akɛ afo Yohane yitso.

Beni Yesu nu sane nɛɛ he lɛ, edɔ lɛ waa. Etee he ko banee ni ekome too eyahi jɛmɛ. Shi gbɔmɛi lɛ nyiɛ esɛɛ. Beni Yesu na asafo babaoo lɛ, emusuŋ tsɔ̃ lɛ yɛ amɛ hewɔ. No hewɔ lɛ ekɛ amɛ wie Nyɔŋmɔ maŋtsɛyeli lɛ he, ni etsá amɛ helatsɛmɛi lɛ.

Nakai gbɛkɛ lɛ ekaselɔi lɛ ba eŋɔɔ ni amɛbakɛɛ lɛ akɛ: ‘Je miina agbɛnɛ, ni ŋa nɔ ji biɛ. Ha ni gbɔmɛi lɛ aya koni amɛyahe niyenii yɛ akrowai ni bɛŋkɛ biɛ lɛ amli ni amɛye.’

Yesu miilɛ mɛi babaoo

Yesu ha amɛ hetoo akɛ: ‘Esaaa akɛ amɛyaa. Nyɛhaa amɛ nɔ ko ni amɛyea.’ Ni Yesu tsɔ ehiɛ eha Filipo ni ebi lɛ akɛ: ‘Nɛgbɛ wɔbaana niyenii bɔ ni sa ni wɔhe wɔha nɛkɛ gbɔmɛi babaoo nɛɛ ni amɛye?’

Filipo ha hetoo akɛ: ‘Ebaabi shika babaoo ni akɛhe niyenii ni fa bɔ ni sa ni baaha mɔ fɛɛ mɔ ana bibioo ko pɛ aye.’ Ni Andrea wie akɛ: ‘Gbekɛ nuu nɛɛ, ni tere wɔ niyenii lɛ hiɛ abolooi kukuji enumɔ kɛ looi enyɔ. Shi eshɛŋ nɛkɛ asafo babaoo nɛɛ anaa.’

Yesu kɛɛ amɛ akɛ: ‘Nyɛkɛa gbɔmɛi lɛ ni amɛtara jwɛi lɛ nɔ.’ Kɛkɛ ni eda Nyɔŋmɔ shi yɛ niyenii lɛ hewɔ, ni ebɔi mli kuumɔ. No sɛɛ lɛ, ekaselɔi lɛ kɛ aboloo lɛ kɛ loo lɛ ha gbɔmɛi lɛ fɛɛ. Hii 5,000 yɔɔ jɛmɛ, kɛ yei kɛ gbekɛbii akpei abɔ krokomɛi hu. Amɛ fɛɛ amɛye kɛyashi amɛ fɛɛ amɛtɔrɔ. Ni beni kaselɔi lɛ bua fufuji ni shwɛ lɛ anaa lɛ, aná kɛntɛŋi obɔbɔ 12!

Agbɛnɛ Yesu ha ekaselɔi lɛ bote lɛlɛ mli koni amɛfo Galilea Ŋshɔ lɛ. Yɛ nyɔɔŋ lɛ mli lɛ, ahum kpeteŋkpele ko batswa, ni ŋshɔkei bɔi lɛlɛ lɛ kpamɔ kɛmiiya biɛ kɛ biɛ. Kaselɔi lɛ atsui fã waa diɛŋtsɛ. Kɛkɛ ni nyɔɔŋteŋ lɛ, amɛna mɔ ko miinyiɛ nu lɛ hiɛ kɛmiiba amɛmasɛi. Amɛbolɔ kɛ gbeyeishemɔ, ejaakɛ amɛleee nɔ ni amɛnaa lɛ.

Yesu kɛɛ: ‘Nyɛkashea gbeyei. Mi ni!’ Amɛnyɛɛɛ amɛhé amɛye lolo. No hewɔ lɛ Petro kɛɛ: ‘Nuŋtsɔ, kɛ bo ni lɛɛlɛŋ lɛ, fã mi ni manyiɛ nu lɛ hiɛ kɛba omasɛi.’ Yesu ha lɛ hetoo akɛ: ‘Ba!’ Ni Petro je lɛlɛ lɛ mli ni enyiɛ nu lɛ hiɛ! Kɛkɛ ni ebɔi gbeyei shemɔ ni ebɔi nu lɛ mli yaa, shi Yesu here eyiwala.

Yɛ sɛɛ mli lɛ, Yesu lɛ mɛi akpei abɔ ekoŋŋ. Yɛ enɛ mli lɛ, ekɛ abolooi kpawo kɛ looi bibii fioo ko lɛ amɛ. Ni mɔ fɛɛ mɔ ná niyenii babaoo nakai nɔŋŋ. Ani bɔ ni Yesu susuɔ mɛi ahe lɛ bɛ naakpɛɛ? Beni ebaaye nɔ akɛ Nyɔŋmɔ maŋtsɛ lɛ, ehe ebahiaŋ ni wɔye wɔtsui yɛ nɔ ko nɔ ko he dɔŋŋ!

Mateo 14:1-32; 15:29-38; Yohane 6:1-21.



Sanebimɔi

  • Mɛɛ nɔ fɔŋ ko ba Yohane Baptisilɔ lɛ nɔ, ni te Yesu nu he eha tɛŋŋ?
  • Mɛɛ gbɛ nɔ Yesu tsɔ eha asafo babaoo ni nyiɛ esɛɛ lɛ niyenii, ni niyenii falɛ enyiɛ shwɛ?
  • Mɛni hewɔ kaselɔi lɛ atsui fã yɛ nyɔɔŋ lɛ mli lɛ, ni mɛni ba Petro nɔ?
  • Yesu lɛ gbɔmɛi akpei abɔ nɔ ni ji shii enyɔ nɔ yɛ mɛɛ gbɛ nɔ?
  • Mɛni hewɔ be mli ni Yesu baaye shikpɔŋ lɛ nɔ akɛ Nyɔŋmɔ Maŋtsɛ lɛ baafee be ni yɔɔ miishɛɛ waa lɛ?

Sanebimɔi ni fata he

  • Kanemɔ Mateo 14:1-32.

    Amaniɛbɔɔ ni yɔɔ Mateo 14:23-32 lɛ haa wɔyɔseɔ mɛni yɛ Petro subaŋ he?

    Nɔ ni aŋma afɔ̃ shi yɛ Ŋmalɛ lɛ mli lɛ tsɔɔ akɛ Petro he basa ni eye esu ni ji nii ni efeɔ kpalakpala lɛ nɔ yɛ mɛɛ gbɛ nɔ? (Mat. 14:27-30; Yoh. 18:10; 21:7; Bɔf. 2:14, 37-40; 1 Pet. 5:6, 10)

  • Kanemɔ Mateo 15:29-38.

    Yesu jie bulɛ kpo etsɔɔ heloonaa niyenii ní jɛ e-Tsɛ lɛ ŋɔɔ lɛ yɛ mɛɛ gbɛ nɔ? (Mat. 15:37; Yoh. 6:12; Kol. 3:15)

  • Kanemɔ Yohane 6:1-21.

    Kristofoi ni yɔɔ ŋmɛnɛ lɛ baanyɛ anyiɛ Yesu nɔkwɛmɔnɔ lɛ sɛɛ yɛ bulɛ kpojiemɔ kɛha nɔyeli lɛ yɛ mɛɛ gbɛ nɔ? (Yoh. 6:15; Mat. 22:21; Rom. 12:2; 13:1-4)

Ekrokromɛi Hu Nɛ

Yesu Lɛ Asafo Babaoo Ko

Kwɛmɔ akɛ mɛni etɔtɔ yɛ mfoniri nɛɛ he, koni okɔla mfoniri lɛ.