Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 90: Ekɛ Yoo lɛ yɛ Nubu lɛ He

Biblia Mli Sane 90: Ekɛ Yoo lɛ yɛ Nubu lɛ He

YESU ewa yɛ nu bu ko he yɛ Samaria koni ejɔɔ ehe. Ekaselɔi lɛ etee maŋ lɛ mli koni amɛyahe niyenii. Yoo ni Yesu kɛ lɛ wieɔ lɛ eba koni ebayɛ nu. Ekɛɛ lɛ akɛ: ‘Ha mi nu lɛ eko manu.’

Yesu kɛ Samaria yoo ko miiwie

Enɛ ha yoo lɛ naa kpɛ ehe waa. Ani ole nɔ hewɔ? Nɔ hewɔ ji akɛ Yesu lɛ, Yudafonyo ji lɛ, ni Samarianyo ji yoo lɛ. Ni Yudafoi pii sumɔɔɔ Samariabii asane. Amɛkɛ amɛ ewieee tete po! Shi Yesu sumɔɔ gbɔmɛi srɔtoi fɛɛ asane. No hewɔ lɛ ekɛɛ: ‘Eji ole mɔ ni kɛɔ bo akɛ oha lɛ nu ni enu lɛ kulɛ, bo moŋ oooba lɛ ni eha bo wala nu.’

Ni yoo lɛ kɛɛ: ‘Nuŋtsɔ, obɛ nɔ ni okɛbaayɛ, ni bu lɛ hu mli kwɔ. Nɛgbɛ ooona wala nu lɛ yɛ mɔ?’

Yesu tsɔɔ mli akɛ: ‘Kɛ onu nu bu nɛɛ mli nu lɛ, kumai baaye bo ekoŋŋ. Shi nu ni maha lɛ baanyɛ aha mɔ ahi shi kɛya naanɔ.’

Yoo lɛ kɛɛ lɛ akɛ: ‘Nuŋtsɔ, ha mi nu nɛɛ eko! Kɛkɛ lɛ kumai yeŋ mi dɔŋŋ. Ni mibaŋ biɛ koni mibayɛ nu dɔŋŋ.’

Yoo lɛ susuɔ akɛ Yesu miiwie nu diɛŋtsɛ he. Shi eewie anɔkwale ni kɔɔ Nyɔŋmɔ kɛ emaŋtsɛyeli lɛ he lɛ he. Anɔkwale nɛɛ tamɔ nu ni haa mɔ wala. Ebaanyɛ eha mɔ naanɔ wala.

Agbɛnɛ Yesu kɛɛ yoo lɛ akɛ: ‘Yaa ni oyatsɛ owu ni okɛ lɛ aba.’

Ni yoo lɛ ha hetoo akɛ: ‘Mibɛ wu.’

Yesu kɛɛ lɛ akɛ: ‘Oha hetoo jogbaŋŋ. Ogbã wumɛi enumɔ, ni mɔ ni ogbãa agbɛnɛ nɛɛ, jeee owu ji lɛ.’

Yoo lɛ naa kpɛ ehe, ejaakɛ nibii ni ewie lɛ fɛɛ lɛ, anɔkwale ni. Te fee tɛŋŋ ni Yesu le nɛkɛ nibii nɛɛ? Hɛɛ, ejaakɛ Yesu ji Mɔ ni Awo Shi yɛ Ehe ni Nyɔŋmɔ tsu lɛ lɛ, ni Nyɔŋmɔ kɛ nɛkɛ nilee nɛɛ ha lɛ. Yesu kaselɔi lɛ ku amɛsɛɛ yɛ be nɛɛ mli, ni amɛnaa kpɛ amɛhe akɛ ekɛ Samaria yoo lɛ miiwie.

Mɛni wɔkaseɔ kɛjɛɔ enɛɛmɛi fɛɛ mli? Etsɔɔ akɛ Yesu yɛ mlihilɛ kɛha gbɔmɛi srɔtoi fɛɛ. Ni nakai esa akɛ wɔ hu wɔfee. Esaaa akɛ wɔsusuɔ akɛ mɛi komɛi ehiii akɛni amɛhiɛ hewolo nɔ su kroko lɛ hewɔ. Yesu miitao ni mɛi fɛɛ ale anɔkwale ni kɛ mɔ yaa naanɔ wala mli lɛ. Ni esa akɛ wɔ hu wɔsumɔ akɛ wɔɔye wɔbua mɛi krokomɛi ni amɛle anɔkwale lɛ.

Yohane 4:5-43; 17:3.



Sanebimɔi

  • Mɛni hewɔ Yesu ewa edamɔ shi yɛ nubu ko he yɛ Samaria lɛ, ni mɛni ekɛɔ yoo lɛ?
  • Mɛni hewɔ yoo lɛ naa kpɛ ehe lɛ, ni mɛni Yesu kɛɛ yoo lɛ, ni mɛni hewɔ?
  • Mɛɛ nu yoo lɛ susu akɛ Yesu wieɔ he lɛ, shi mɛɛ nu diɛŋtsɛ he Yesu wieɔ lɛ?
  • Mɛni hewɔ yoo lɛ naa kpɛ ehe yɛ nibii ni Yesu le yɛ ehe lɛ he lɛ, ni te fee tɛŋŋ ni Yesu le saji nɛɛ?
  • Mɛni wɔbaanyɛ wɔkase kɛjɛ sane ni kɔɔ yoo lɛ he yɛ nubu lɛ he lɛ mli?

Sanebimɔi ni fata he

  • Kanemɔ Yohane 4:5-43.

    Be mli ni wɔnyiɛɔ Yesu nɔkwɛmɔnɔ lɛ sɛɛ lɛ, mɛɛ subaŋ esa akɛ wɔjie lɛ kpo yɛ mɛi ni hiɛ hewolo nɔ sui srɔtoi loo amɛjɛ shihilɛi srɔtoi amli lɛ ahe? (Yoh. 4:9; 1 Kor. 9:22; 1 Tim. 2:3, 4; Tito 2:11)

    Mɛɛ mumɔŋ sɛɛnamɔi mɔ ko náa kɛ́ ebatsɔ Yesu kaselɔ lɛ? (Yoh. 4:14; Yes. 58:11; 2 Kor. 4:16)

    Yɛ mɛɛ gbɛ nɔ wɔbaanyɛ wɔjie hiɛsɔɔ kpo tamɔ bɔ ni Samariayoo lɛ ni sumɔɔ ni egba nɔ ni ekase lɛ he sane etsɔɔ lɛ fee lɛ? (Yoh. 4:7, 28; Mat. 6:33; Luka 10:40-42)

Ekrokomɛi Hu Nɛ

YESU​—GBƐ LƐ, ANƆKWALE LƐ, WALA LƐ

Etsɔɔ Samaria Yoo ko Nii

Yesu kɛɛ lɛ nɔ ko ni eeenyɛ efee akɛ, kɛbashi nakai beiaŋ lɛ ekɛko mɔ ko mɔ ko.