Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 89: Yesu Hã Sɔlemɔwe lɛ Mli Tse

Biblia Mli Sane 89: Yesu Hã Sɔlemɔwe lɛ Mli Tse

YESU tamɔ mɔ ko ni emli efu waa yɛ biɛ, aloo jeee nakai? Ani ole nɔ hewɔ ni emli fu waa lɛ? Ejaakɛ gbɔmɛi nɛɛ ni yɔɔ Nyɔŋmɔ sɔlemɔwe ni yɔɔ Yerusalem lɛ ji hiɛjoolɔi waa. Amɛmiibɔ mɔdɛŋ ni amɛna shika babaoo kɛjɛ gbɔmɛi ni eba jɛmɛ ní amɛbaja Nyɔŋmɔ lɛ adɛŋ.

Yesu miitsirɛ shika okpɔlɔi lɛ eetswia shi

Ani oona nakai tsina hii kɛ tooi kɛ okpoi lɛ fɛɛ? Gbɔmɛi lɛ miihɔɔ kooloi nɛɛ yɛ sɔlemɔwe lɛ mli tɔ̃ɔ. Ani ole nɔ hewɔ? Nɔ hewɔ ji akɛ, kooloi kɛ loofɔji ahe miihia Israelbii lɛ ni amɛkɛshã afɔle amɛha Nyɔŋmɔ.

Nyɔŋmɔ mla lɛ kɛɔ akɛ, kɛ Israelnyo ko fee efɔŋ lɛ, esa akɛ eshã afɔle eha Nyɔŋmɔ. Ni bei krokomɛi hu yɛ ni esa akɛ Israelbii lɛ ashã afɔle. Shi nɛgbɛ Israelnyo ko baaná loofɔji kɛ kooloi yɛ ni ekɛshã afɔle lɛ eha Nyɔŋmɔ?

Israelbii lɛ ekomɛi yɛ loofɔji kɛ kooloi. No hewɔ lɛ amɛbaanyɛ amɛkɛ enɛɛmɛi ashã. Shi Israelbii lɛ ateŋ mɛi babaoo bɛ kooloi kɛ loofɔji. Ni mɛi krokomɛi hu yɛ he ni kɛ Yerusalem jɛkɛ waa akɛ amɛnyɛɛɛ amɛkɛ kooloo aba sɔlemɔwe lɛ. No hewɔ lɛ gbɔmɛi lɛ baa biɛ ni amɛbaheɔ kooloi kɛ loofɔji ni he baahia amɛ lɛ. Shi gbɔmɛi nɛɛ miihe shika babaoo tsɔ̃ yɛ gbɔmɛi lɛ adɛŋ. Amɛmiishishiu gbɔmɛi lɛ. Yɛ no sɛɛ hu lɛ, esaaa akɛ amɛhɔɔ nii yɛ Nyɔŋmɔ sɔlemɔwe lɛ mli yɛ biɛ.

Enɛ ji nɔ ni ha Yesu mli fu lɛ. No hewɔ lɛ etsirɛ mɛi ni hiɛ shika lɛ okpɔlɔi lɛ fɛɛ eshwie ni egbɛ amɛ kapɛji lɛ eshwã. Agbɛnɛ hu, ekɛ taŋkpee fee kplebi ni ekɛshwie kooloi lɛ fɛɛ kɛjɛ sɔlemɔtsu lɛ mli. Ekɛɛ hii ni hɔɔ okpoi lɛ akɛ: ‘Nyɛjiea kɛjɛa biɛ! Nyɛkaŋɔa mi-Tsɛ we lɛ nyɛfea he ni anáa shika babaoo yɛ.’

Yesu sɛɛnyiɛlɔi lɛ ekomɛi fata ehe yɛ biɛ yɛ sɔlemɔwe lɛ yɛ Yerusalem. Amɛnaa kpɛ amɛhe yɛ nɔ ni amɛna ni Yesu feɔ lɛ he. Kɛkɛ ni amɛkai he ko yɛ Biblia lɛ mli ni kɛɔ yɛ Nyɔŋmɔ Bi lɛ he akɛ: ‘Suɔmɔ ni eyɔɔ kɛha Nyɔŋmɔ we lɛ baatso yɛ emli tamɔ la.’

Beni Yesu yɔɔ biɛ yɛ Yerusalem ni eyeɔ Hehoo lɛ, efee naakpɛɛ nibii pii. No sɛɛ lɛ, Yesu shi Yudea ni eje egbɛfãa lɛ shishi kɛku esɛɛ kɛtee Galilea. Shi beni eyaa lɛ, eyatsɔ Samaria niiaŋ. Ha wɔkwɛ nɔ ni ba yɛ jɛmɛ.

Yohane 2:13-25; 4:3, 4.



Sanebimɔi

  • Mɛni hewɔ ahɔ̃ɔ kooloi yɛ sɔlemɔwe lɛ?
  • Mɛni ha Yesu mli fu waa lɛ?
  • Taakɛ onaa yɛ mfoniri lɛ mli lɛ, mɛni Yesu feɔ lɛ, ni mɛɛ famɔ ekɛha hii ni hɔ okpoi lɛ?
  • Be mli ni Yesu sɛɛnyiɛlɔi lɛ na nɔ ni efeɔ lɛ, mɛni amɛkai?
  • Mɛɛ kpokpaa nɔ Yesu yatsɔ be ni efãa gbɛ kɛkuɔ esɛɛ kɛyaa Galilea lɛ?

Sanebimɔ ni fata he

  • Kanemɔ Yohane 2:13-25.

    Kɛ́ wɔsusu bɔ ni Yesu mli fu mɛi ni tsakeɔ shika yɛ sɔlemɔwe lɛ he lɛ, mɛɛ jwɛŋmɔ ni ja esa akɛ wɔná yɛ jarayeli nifeemɔi ahe yɛ Maŋtsɛyeli Asa lɛ nɔ? (Yoh. 2:15, 16; 1 Kor. 10:24, 31-33)

Ekrokromɛi Hu Nɛ

Yesu Tsɔɔ akɛ Ehiɛ Dɔɔ Anɔkwa Jamɔ He

Nyɔŋmɔ Mla lɛ ŋmɛɔ gbɛ ni mɛi ahé kooloi yɛ Yerusalem kɛhã afɔleshaa, no hewɔ lɛ, mɛni hewɔ Yesu mli fu guɔyelɔi lɛ yɛ sɔlemɔwe lɛ?